Taqsihomaq lee saqen

Naqanaw naq koowan jo’ choxahil alalb’ej ut k’ajolb’ej rik’in li qaChoxahil Yuwa’ naq maji’ xoochal arin,⁴ ut naq kiyo’ob’tesiik li ruchich’och’ re naq chiqajunilo taqak’ul li qatib’el, taqataw qana’leb’, tootzoloq, ut took’iiq re tooruuq chixk’ulb’al li junelik yu’am—a’an lix yu’am li Dios.⁵ Li qaChoxahil Yuwa’ kixnaw naq taqak’ul rahilal ut toomaakob’q sa’ ruchich’och’, jo’kan naq kixtaqla li Ralal, ut xb’aan “lix yu’am li maak’a’ xjuntaq’eetankil”⁶ ut lix junelikil mayej aj tojol-ix,⁷ taaruuq taakuye’q qamaak, took’irtesiiq, ut taatz’aqob’resiiq qe qu.⁸

Li nawom a’in naxjal li qayu’am! Naq jun kristiaan naxtzol k’a’ru aj-e li yu’am a’in, naxtaw ru naq li Jesukristo naxkuy xmaakeb’ ut naxtenq’aheb’ li neke’taaqenk re, ut naxsik’ ru xtaaqenkil li Kristo toj sa’ xha’il li kub’iha’, nachaab’ilo’ xyu’am—us ta ink’a’ nachaab’ilo’ li k’a’ru nak’ulman sa’ xyu’am.

Jun komon ixq jwal sa xch’ool li xinnaw ru sa’ Onitsha, Nigeria kixye we naq chalen chaq naq kixtaw li evangelio ut kikub’e xha’ (ut a’in li kixye), “us chixjunil choq’ we. Sa inch’ool. Wankin sa’ choxa.”⁹ Xwotzb’al li evangelio naxloch xsahilal ut xyo’onihom li raam li nak’ehok jo’ ajwi’ li nak’uluk. Relik chi yaal, “k’a’jo’aq xnimal xsahil eech’ool”¹⁰ naq teewotz li evangelio! Xwotzb’al li evangelio, a’an li saho’k sa’ ch’oolej ut li yo’onink chi numtajenaq.¹¹

Naq xkub’e qaha’, xoo’ok sa’ jun junelikil¹² sumwank rik’in li Dios naq “took’anjelaq chiru, ut taqapaab’ lix taqlahom,”¹³ li naraj naxye naq “tooxaqliiq jo’ aj yehol nawom chirix a’an sa’ chixjunil hoonal, ut sa’ chixjunil li k’a’aq re ru, ut sa’ chixjunil li na’ajej.”¹⁴ Naq “nokokana rik’in” a’an sa’ xyu’aminkil li sumwank a’in, li wankilal re choxahilal li nokoxwaklesi ut nokoxsantobʼresi nak’ehe’ qe xb’aan li Kristo, jo’ chanru naq li ruq’ li che’ nach’olaniik xb’aan li toon che’.¹⁵

Li Qaawaʼ kixtaqla:

“Taqsihomaq lee saqen re taaruuq taalemtz’unq chiru li ruchich’och’. K’ehomaq reetal, laa’in li saqen li teetaqsi—li kʼaʼaq re ru kineeril chixbʼaanunkil. …

“… Kintaqla naq … texchalq wikʼin, re texruuq chi chʼeʼok ut chi ilok; joʼkan ajwiʼ teebʼaanu re li ruchichʼochʼ; ut ani naqʼetok re li taqlahom aʼin naxkanabʼ ribʼ chi bʼeresiik saʼ li aaleek.”¹⁶

Naq naqasik’ ink’a’ xtaqsinkil xsaqenkil li evangelio noko’ok sa’ muhel, b’ar wi’ nokoroyb’eni li aaleek. Yaal ajwi’ lix junpak’alil: naq naqasik’ xtaqsinkil xsaqenkil li evangelio noko’ok sa’ li saqen, b’ar wi’ kawob’resinb’ilo chiru li aaleek. K’a’jo’aq xchaab’ilal li osobʼtesink aʼan saʼ li ruchichʼochʼ anajwan!

Li Hermana Tiffany Myloan kixkʼulubʼa xbʼoqbʼal chixtenqʼankilebʼ li misioneer us ta wan xchʼaʼajkilal, ut naabʼal lix patzʼom chirix lix paabʼaal. Toje’ xye we naq xtenq’ankileb’ li misioneer kirak’ob’resi lix paab’aal ut xsahilal lix yu’am. A’an xye, “Li k’anjelak jo’ misioneer nokoxk’irtesi.¹⁷

Li sahil ch’oolejil. Li yo’onink. Lix wankil li Dios re qawaklesinkil. Li kole’k chiru li aaleek. Li k’irtesink. Chixjunil a’in—ut wan xkomon chik (jo’ lix kuyb’al li qamaak)¹⁸ nahoye’ sa’ qab’een xb’aan li choxa naq naqawotz li evangelio.

Ex was wiitz’in, “wankeb’ naab’al … sa’ xyanqeb’ chixjunil li ch’uut chi paab’aal, li molam, ut li raqal chi iglees, li … ramb’il li yaal chiruheb’ yal xb’aan naq ink’a’ neke’xnaw b’ar te’xtaw.”¹⁹ Jo’ maajun wa chalen chaq xtiklajik, jwal aajel ru sa’ li qakutankil xtaqsinkil li qasaqenkil. Jo’ maajun wa chalen chaq xtilajik, naru xtawb’al li yaal.

Laj Jimmy Ton, a’an chaq aj Budista, kitoch’e’ xch’ool xb’aan jun junkab’al li xe’xwotz resil xyu’ameb’ sa’ YouTube. Naq kixnaw naq a’aneb’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ki’ok chixtzolb’al li evangelio sa’ internet, chirilb’al ru lix Hu laj Mormon sa’ lix celular, ut kikub’e xha’ naq kixnaweb’ ru li misioneer naq wan sa’ li tzoleb’aal.²⁰ Li Elder Ton nak’anjelak anajwan jo’ misioneer.

A’an ut li rech misioneeril, a’aneb’ lix teep li Qaawa’—jo’ naxye li qaprofeet.²¹ Eb’ li misioneer moko neke’xtaaqe ta xb’ehil li ruchich’och’: eb’ li tz’ilok-ix neke’xk’ut naq li saaj yookeb’ chixtz’eqtaanankil li Dios,²² a’b’an li qasaaj aj pleet²³ elder ut hermana yookeb’ chixb’eresinkileb’ li kristiaan rik’in li Dios. Ut k’iheb’ chik li komon re li Iglees li yookeb’ chixjunajinkileb’ rib’ rik’ineb’ li misioneer re xwotzb’al li evangelio, ut xtenq’ankileb’ li kristiaan chi chalk rik’in li Kristo ut lix Iglees.

Eb’ li qakomon aj santil paab’anel sa’ Liberia ke’xtenq’a 507 chi kristiaan chi kub’eek xha’ chiru li lajeeb’ po naq maak’a’eb’ li misioneer sa’ xtenamiteb’. Naq jun awa’b’ej re oqech aran kirab’i naq maare te’sutq’iiq li misioneer, a’an kixye, “Us, truuq toohe’xtenq’a rik’in li qak’anjel laa’o.”

Yaal li kixye: li xch’utub’ankil Israel—li k’anjel k’a’jo’ xnimal xwankil sa’ ruchich’och’ a’in²⁴—a’an li qak’anjel laa’o. Ut a’in li qakutankil laa’o! Moko ch’a’aj ta inb’oqom anajwan: wotzomaq li evangelio. Chek’ut anihex ut chetaqsi li saqen. Chetz’aama xtenq’ li choxa ut chetaaqe xhasb’ li musiq’ej. Chewotz eeyu’am; cheb’oq jun kristiaan chi chalk ut chi ilok, chi chalk ut chi tenq’ank, ut chi chalk ut chi tz’aqonk.²⁵ Ut chisaho’q sa’ eech’ool naq eb’ lee raarookil komon ut laa’ex nekek’ul li yeechi’inb’il eere.

Ninnaw naq rik’in li Kristo jultikanb’il li chaab’il esil chiruheb’ li tuulaneb’ xch’ool; rik’in li Kristo lanb’ileb’ xtoch’olaleb’ li yot’b’ileb’ lix ch’ool; rik’in li Kristo yaab’asinb’il li ach’ab’aak chiruheb’ li preex; ut rik’in li Kristo, ka’ajwi’ rik’in li Kristo, ruuchil li cha hoyb’il li sununkil b’an sa’ xb’eeneb’ li neke’yaab’ak.²⁶ Chi jo’kan naq aajel ru xyeeb’al resil a’in!²⁷

Ninch’olob’ xyaalal naq li Jesukristo a’an aj yoob’anel ut aj choyonel re li qapaab’aal.²⁸ A’an tixchoy, tixtz’aqob’resi ru, li qab’aanuhom—us ta maji’ tz’aqal re ru—naq naqataqsi xsaqenkil li evangelio. Tixk’anjelaheb’ li sachb’a-ch’oolej sa’ li qayu’am ut sa’ xyu’ameb’ chixjunil li ch’utub’anb’ileb’ xb’aan, xb’aan naq a’an jun Dios re sachb’a-ch’oolej.²⁹ Sa’ xk’ab’a’ li Jesukristo, amen.