K’e xhoonal li Qaawa’

Ex was wiitz’in, chiru wiib’ kutan yooko chi tzole’k chi chaab’il xb’aaneb’ lix moos li Qaawa’, li xe’xsik’ chi anchaleb’ xch’ool xnawb’al k’a’ru naraj a’an naq te’xye.

Xqak’ul li qataqlankil choq’ reheb’ li waqib’ po chalkeb’ re. Anajwan ninpatz’, chan ru toojalaaq rik’in li xqab’i ut li xqeek’a?

Li nimla yajel xk’utb’esi naq li yu’am sa’ junpaat naru najala, ut chi kok’ aj xsa’ maak’a’ qawankil chixramb’al. A’b’an, wan naab’al li k’a’aq re ru li nokoru chixb’eresinkil. Naru naqaxaqab’ k’a’ru aajel ru ut naqak’uub’ chan ru taqoksi li qametz’ew, li qahoonal, ut li qak’anjeleb’aal. Naru naqasik’ chan ru taqil qib’ chiqib’il qib’. Naqasik’ ani chi aj u toowulaq re xk’ulb’al li yaal ut li qab’eresinkil.

Lix yaab’ xkux ut lix na’leb’il li ruchich’och’ atawaleb’ ru ut k’iheb’. A’b’an naab’al reheb’ li xyaab’ kuxej nokohe’xb’alaq’i, nokohe’raale, ut nokohe’xjalb’ehi chiru xb’ehil li sumwank. Re naq ink’a’ teek’ul li rahilal te’xk’e raj, nintz’aama eere naq teetz’eqtaana li ruchich’och’, ut teek’e b’an xhoonal li Qaawa’ sa’ lee yu’am—wulaj wulaj.

Wi lix k’ihal li na’leb’ nakak’ul nachal sa’ internet malaj xkomon chik a’an, laa wankilal chirab’inkil xhasb’ li Musiq’ej taach’inanq. Wi ink’a’ yookat ajwi’ chixsik’b’al li Qaawa’ rik’in tijok ut xtzolb’al li evangelio wulaj wulaj, nakakanab’ aawib’ chi k’ame’k xb’aan li na’leb’ li maare atawal ru, a’b’an li moko yaal ta. Us ta tiik chi paab’ank junaq aj santil paab’anel, naru taajalb’ehiiq xb’aan li q’unob’resiik rajlal xb’aan Babilonia.

Ex was wiitz’in, nintz’aama eere naq teek’e xhoonal li Qaawa’! Kawob’resihomaq lix k’ojleb’aal eepaab’aal re naq taakanaaq chi junelik rik’in xb’aanunkil li k’a’ru tixk’e cherochb’eeni rajlal li Santil Musiq’ej.

Meekub’si xwankil li nimla yaal naq “li Musiq’ej … na’aatinak chirix li k’a’aq re ru jo’ chanru tz’aqal wan, ut chirix li k’a’aq re ru jo’ chanru tz’aqal taawanq.”¹ “A’an tixk’ut cheru chixjunil li k’a’aq re ru tento teeb’aanu.”²

Maak’a’aq raj chik nab’oqok re li Musiq’ej jo’ xjayalankil qib’ rik’in li Jesukristo. Chex’aatinaq chirix li Kristo, chisaho’q eech’ol rik’in li Kristo, cheyal xsahil li raatin li Kristo, ut chetiikisi eerib’ chi uub’ej chi xaqxookex rik’in li Kristo.³ K’ehomaq lee hilob’aal kutan choq’ sahil kutan naq nekeloq’oni a’an, nekek’ul li loq’laj wa’ak, ut nekek’uula xsantilal lix kutan.⁴

Jo’ xinye eq’la chaq, chek’e xhoonal li Qaawa’ sa’ lix santil ochoch. Maak’a’aq raj chik tixkawob’resi lee musiq’ejil k’ojleb’aal jo’ li k’anjelak ut li loq’onink sa’ li santil ochoch.

Naqab’antioxi reheb’ chixjunil li neke’xkawresi li qasantil ochoch. Yookeb’ chi kab’laak chiru chixjunil li ruchich’och’. Anajwan, chi sa inch’ool tinye resil naq taqakab’laheb’ li santil ochoch sa’ xweenteb’ li na’ajej a’in: Kaohsiung, Taiwán; Tacloban, Filipinas; Monrovia, Liberia; Kananga, República Democrática del Congo; Antananarivo, Madagascar; Culiacán, México; Vitória, Brasil; La Paz, Bolivia; Santiago Oeste, Chile; Fort Worth, Texas; Cody, Wyoming; Rexburg North, Idaho; Heber Valley, Utah; ut taqab’aanu li rak’ob’resinkil li santil ochcoch re Provo Utah chirix naq na’osob’tesiik li santil ochoch re Orem Utah.

Nekexinra, ex was wiitz’in. Li Qaawa’ naxnaw eeru ut nekexxra. A’an aj Kolol eere ut aj Tojol eerix. Naxjolomi ut naxb’eresi lix Iglees. A’an texxb’eresi ut tixk’am eeb’e sa’ lee yu’am, wi teek’e xhoonal a’an sa’ lee yu’am—wulaj wulaj.

Chiwanq taxaq li Dios eerik’in toj reetal naq taqach’utub’ wi’chik qib’, sa’ lix loq’laj k’ab’a’ li Jesukristo, amen.