Stap Luk Moa Jisas Kraes long Ol laef blong Yumi

Ol brata mo sista, hamas tingting blong mi i stap daon taem mi stap stanap long fored blong yufala long moning ia. Mi joenem hat blong mi wetem hat blong yufala wetem glad mo tangkyu blong kam tugeta, nomata weaples long wol yu stap long hem, blong harem ol mesej blong ol profet, aposol, sia, reveleta mo ol lida insaed long kingdom blong God. Long pikja, yumi kam olsem ol pipol long dei blong King Benjamin, we oli stanemap ol tenet blong olgeta wetem ol doa i open stret i go long profet blong God long wol ia,¹ Presiden Russell M. Nelson.

Ae blong mi i bin nogud longtaem be mi save tingbaot nomo se oltaem mi nidim help blong glas blong stretem ae blong mi. Taem mi openem ol ae blong mi evri moning, wol i no luk stret long mi. Evri samting i no kamaot gud, i smolsmol, mo i no stret. Iven dia hasban blong mi i olsem wan pikja we oli droem be i no man ia wetem lav mo kamfot olsem we hem i stap tedei! Bigfala nid blong mi, bifo mi mekem eni samting blong statem dei blong mi, i blong putum ol glas blong mi blong save luk gud ol samting raon long mi mo stap glad long wan moa eksperiens, taem oli helpem mi truaot long dei.

Afta ol yia, mi kam blong luksave se fasin ia i soem ol evri dei stael blong mi blong dipen long tu (2) samting: faswan, wan tul we i helpem mi blong lukluk moa klia wol raon long mi; mo nambatu, wan nid blong wan samting we mi save tajem blong i lidim mi oltaem i go long stret rod. Simpol praktis ia, long mi i olsem lukluk blong mi long rilesensip blong yumi wetem Sevya Jisas Kraes.

Long laef blong yumi we plante taem i fulap wetem ol kwestin, ol wari, ol presa, mo ol janis, lav blong Sevya blong wanwan long yumi mo olsem ol kavenan pikinini blong Hem we i go wetem ol tijing mo ol loa blong Hem, oli stap olsem ol evri dei risos we yumi save dipen long hem olsem wan “laet ia we i saen, … i givim moa [laet] long ae blong yumi [mo] i mekem [yumi] andastanem moa samting.”² Taem yumi lukaotem moa blesing blong Spirit long ol laef blong yumi, bae yumi save, olsem we Jekob i bin tijim, luk “ol samting olsem we oli rili stap, mo … olsem we bae oli rili stap.”³

Olsem ol kavenan pikinini blong God, yumi bin bles wetem wan rij saplae blong ol tabu tul we oli bin jusum blong impruvum visen blong yumi long saed blong spirit. Ol toktok mo tijing blong Jisas Kraes olsem we oli bin rekodem insaed long skripja mo ol mesej we i kam long ol profet we Hem i jusum, mo Spirit blong Hem tru long ol evri dei prea, mo atendem tempol oltaem, mo tru long odinens blong sakramen evri wik, i save help blong putumbak pis mo givimaot presen blong save gud aot long nogud, we i givim laet blong Kraes mo save blong Hem long ol kona blong laef blong yumi long wan wol we i no klia tumas. Sevya i save stap olsem kampas mo paelot blong yumi taem yumi stia tru long kwaet mo ol raf wota blong laef. Hem i save mekem stret rod we i lidim yumi i go long ples blong yumi we i no save finis. So, ?wanem nao bae Hem i mekem yumi luk, mo wea nao bae Hem i mekem yumi go long hem?

Dia profet blong yumi i bin tijim se “lukluk blong yumi i mas stap nomo long Sevya mo long gospel blong Hem” mo se yumi mas “traehad blong lukluk long Hem wetem ful tingting.”⁴ Presiden Nelson i bin promes tu se “I no gat wan samting we i invaetem Spirit moa bitim we yumi putum tingting blong yumi i lukluk nomo long Jisas Kraes. … Bambae Hem i lidim mo soem rod long yu long laef blong yuwan sapos yu putum taem blong givim long Hem long laef blong yu—long evri dei.⁵ Ol fren, tugeta, Jisas Kraes i stamba risen blong lukluk blong yumi mo strong tingting blong kasem ples blong yumi. Blong helpem yumi stap tingting mo tekem stret rod, Sevya i invaetem yumi blong lukluk ol laef blong yumi tru Hem blong yumi save luk moa Hem long ol laef blong yumi. Mi kam blong lanem moa abaot spesel invitesen ia tru long stadi blong mi blong OlTesteman.

Loa blong Moses, oli bin givim long ol pipol blong Isrel blong bifo olsem wan gospel blong mekem rere olgeta, oli mekem blong priperem ol pipol from wan kavenan rilesensip we i moa hae wetem God tru Jisas Kraes.⁶ Loa ia i rij wetem ol simbol we i poenem olgeta we oli biliv blong “luk fored long kaming” mo Atonmen blong Jisas Kraes,⁷ i minim blong stap helpem ol pipol blong Isrel blong lukluk long Sevya mo eksesaesem fet long Hem, sakrifaes blong Hem, mo ol loa blong Hem mo ol komanmen long ol laef blong olgeta⁸—wetem tingting ia blong karem olgeta i kam long wan andastaning blong Ridima blong olgeta.

Olsem we yumi stap tedei, ol pipol blong God bifo, oli bin kasem invitesen blong lukluk ol laef blong olgeta tru Hem blong mekem se oli save luk moa Hem long ol laef blong olgeta. Be i kam long taem blong ministri blong Sevya, ol pipol blong Isrel oli nomo lukluk long Kraes, oli putum Hem long saed mo mekemap ol loa we i nomo lidim olgeta i go long stret sos we bae i sevem olgeta mo pemaot olgeta—Jisas Kraes.⁹

Wol blong ol pipol blong Isrel blong evri dei i bin kam konfius mo i nomo sua Ol pikinini blong Isrel, long taem ia, oli bilivim se ol praktis mo fasin blong folem loa i bin rod ia blong wan i save sef mo long wan saed tu i katemdaon loa blong Moses blong folem sam rul we oli givim blong wan nomol man i laef folem.¹⁰ Hemia i nidim Sevya blong i putumbak klia lukluk long gospel.

Long en wan bigfala pat blong ol pipol blong Isrel i bin sakem mesej blong Hem, iven kasem pat ia blong agensem Sevya—Hem we i bin givim loa mo talemaot we Hem i bin “loa mo laet ia”¹¹—blong brekem loa. Be yet antap long Hil we Jisas i stap tij, i bin tokbaot loa ia blong Moses, se, “No ting se mi kam blong prapa spolem gud loa o ol profet: Mi no kam blong prapa spolem gud samting be blong mekem oli kam tru.”¹² Afta, Sevya tru long Atonmen blong Hem we i no save finis, i endem ol kod, ol rul, mo ol praktis blong seremoni we ol pipol blong Isrel i bin stap folem long taem ia. Las sakrifaes blong Hem i mekem se sakrifaes blong bonem ol ofring naoia i jenis i go long “wan hat we i fulap wetem sore mo wan spirit we i wantem blong sakem sin,”¹³ aot long odinens blong sakrifaes i go long odinens blong sakramen.

Presiden M. Rasel Balad, long tijing blong hem abaot topik ia, i se, “Long wan wei, sakrifaes ia i jenis aot long ofring i go long hem we i givim.”¹⁴ Taem yumi tekem ofring blong yumi i go long Sevya, yumi kasem invitesen blong luk moa Jisas Kraes long ol laef blong yumi, taem yumi givim tingting blong yumi fulwan wetem tingting i stap daon long Hem wetem klia save mo andastanem stret mo gud tingting blong Hem we Hem i mekem i go long Papa. Taem yumi stretem lukluk blong yumi long Jisas Kraes, yumi luksave mo andastanem se Hem i sos mo rod ia nomo blong kasem fasin blong fogiv mo pemaot man, iven kasem laef we i no save finis mo blong kam olsem wan god.

Olsem wan we i stap folem gospel longtaem, mi fas long plante we oli bin luk ol jenis long fasin blong mi, ol praktis, mo ol joes blong mi afta we mi bin joenem Jos. Oli wantem save tumas abaot “ol from wanem” ol samting we oli stap luk—from wanem mi bin jusum blong baptaes mo joenem kongregesen ia blong olgeta we oli biliv, iven Jos Ia blong Jisas Kraes blong Ol Lata dei Sent, from wanem mi stopem sam praktis blong Sabat, from wanem mi fetful blong kipim Ol Tok blong Waes, from wanem mi ridim Buk blong Momon, from wanem mi biliv long mo stap folem ol tijing blong ol profet mo ol aposol blong tedei long laef blong mi, from wanem mi atendem ol Jos miting evri wik, from wanem mi invaetem ol narawan blong “kam mo luk, kam mo help, … kam mo stap,”¹⁵ mo “kam mo stap pat.”¹⁶

Long taem ia, ol kwestin ia oli hevi mo i luksave nomo se samtaem i olsem se oli poenem fingga long yu. Be taem mi stap fesem ol toktok ia, mi kam blong luksave se oli wantem, mo i tru from fas invitesen blong mi, hem i blong werem wan glas long saed blong spirit blong mekem i klia long olgeta from wanem mi mas stanap strong long bilif mo gospel praktis mo standet ia. ?Wanem nao stamba blong testemoni blong mi? ?Mi mi stap karemaot “ol wok aotsaed nomo” mo no mekem i konek folem ol loa blong God we i blong “mekem fet blong [mi] long Kraes i kam strong moa”¹⁷ o soemaot tru long aksen se Jisas Kraes i sos ia nomo blong paoa long evri samting we mi stap mekem?

Wetem kea mo traehad blong lukluk long mo from Jisas Kraes long evri tingting mo wok, ol ae blong mi i givim moa laet mo andastaning blong mi blong luksave se Jisas Kraes i bin stap singaotem mi blong “kam long Hem.¹⁸ Olsem wan yut mo wan niu disaepol, mi save tingbaot wan invitesen we mi bin kasem long ol misinari blong joenem olgeta taem oli stap tijim gospel long wan grup blong ol yangfala gel we oli gat sem yia long mi. Wan naet, mi bin sidaon long hom blong wan long ol yang woman ia, kwaet kwestin blong olgeta ia blong from wanem mi biliv i bin tajem hat blong mi, mo i letem mi blong testifae long olgeta wetem dip andastaning long visen blong Lod abaot fasin blong mi long saed blong spirit olsem wan disaepol, mo i mekem helpem testemoni blong mi blong gro.

Mi bin lanem afta, olsem mi save naoia se Sevya Jisas Kraes i lidim ol leg blong yumi i go long ol mitinghaos evri wik blong tekpat long sakramen blong Hem, i go long haos blong Lod blong mekem ol kavenan wetem Hem, i go long ol skripja mo ol tijing blong ol profet blong lanem ol toktok blong Hem. Hem i lidim ol maot blong yumi blong testifae abaot Hem, ol han blong yumi blong leftemap mo givim seves olsem we Hem i leftemap mo givim seves, ol ae blong yumi blong luk wol mo wanwan long yumi olsem we Hem i mekem—“ol samting olsem we oli rili stap, mo … olsem we bae oli rili stap.”¹⁹ Mo taem yumi letem Hem i lidim yumi long evri samting, yumi kasem testemoni se “evri samting i soem se i gat wan God,”²⁰ from wea ples we yumi lukaotem Hem bae yumi faenem Hem²¹—long evri dei. Long hemia, mi testifae long tabu nem blong Jisas Kraes, amen.