Helpem Ol Pua mo Man we i Fesem Hadtaem

Ol brata mo sista, Presiden blong yumi Russell M.Nelson we yumi lavem bae i toktok long yumi afta long sesen ia. Hem i bin askem mi blong mi mi fas spika.

Topik blong mi tedei i abaot wanem we Jos Ia blong Jisas Kraes blong Ol Lata-dei Sent mo ol memba blong hem oli givim mo mekem blong ol pua mo ol man we oli fesem hadtaem. Bae mi tokbaot tu abaot semmak fasin blong givim we i kam long ol nara gud pipol. Blong stap givim long olgeta we oli sta long nid i wan prinsipol long evri relijin blong laen blong Ebraham mo long ol nara man tu.

Sam manis i pas, hem i fas taem we Jos Ia blong Jisas Kraes blong Ol Lata-dei Sent i ripotem hamas yumaniterian wok raon long wol i kam moa bigwan.¹ Ol mane we yumi yusum long 2021 blong olgeta we oli stap long nid long 188 kantri raon long wol hem i naen handred mo sikis milian dola—kolosap wan bilian dola. Antap long hemia, ol memba blong yumi oli volontia blong mekem wok we i ova long sikis milian aoa long semmak wok ia.

Yes, ol namba ia oli wan ripot we i no fulwan blong ol samting we yumi stap givim mo stap help. Oli no tekem ol seves we ol memba oli mekem olgetawan, taem oli givhan long wanwan long olgeta long ol posisen we oli singaotem olgeta long hem mo volontia blong givim seves long wan memba i go long narawan. Mo long 2021 ripot blong yumi i no tokbaot wanem ol memba blong yumi oli mekem wanwan tru long plante jareti oganaesesen we i no konek stret wetem Jos blong yumi. Bae mi stat wetem olgeta ia.

Long 1831, tu yia i no pas yet afta we kambak blong Jos Ia i oganaes, Lod i givim revelesen ia blong lidim ol memba blong Hem mo, mi bilif, evri pikinini blong Hem raon long wol:

“From luk, hem i no stret blong mi talemaot evri samting blong mekem; from hem we mi mas fosem hem long evri samting, hem i wan les man mo i no wan waes wokman; ….

“I tru mi talem, ol man oli mas wok wetem strong tingting long wan gud wok, mo mekem plante samting long tingting blong olgetawan nomo, mo mekem plante stret mo gud wok oli kamtru;

“From paoa ia i stap long olgeta, we i mekem olgeta oli fri blong mekem samting olgetawan nomo. Mo sapos ol man oli gohed blong mekem gud, bae oli no save lusum praes blong olgeta nating.”²

Moa long 38 yia olsem wan Aposol mo ova 30 yia olsem wan profesonol wokman, mi bin luk plante kaen hadwok we i kam long ol oganaesesen mo ol kaen man we revelesen ia we i tokbaot olsem “wan gud wok” mo “[stap] karem i kam fulap stret mo gud fasin.” I gat plante eksampol olsem yumaniterian seves truaot long wol we oli no kaontem we i go bitim ol eria blong yumi mo long save we yumi gat. Taem mi stap tingting long hemia, mi tingbaot profet blong Buk blong Momon, King Benjamin we prijing blong hem i tekem tu trutok ia we i no save finis: “Taem we yufala i stap wok blong ol narafala man, yufala i stap mekem wok blong God blong yufala nomo.”³

Plante welfea mo yumaniterian seves long ol narafala man, Jos Ia blong Jisas Kraes blong Ol Lata-dei Sent mo yumi ol memba blong hem i tijim mo praktisim. Eksampol,yumi livim kakae long evri fas Sandei blong manis mo givim smol kakae we yumi no kakae blong helpem olgeta we oli stap long nid insaed long kongregesen blong yumiwan. Jos tu i mekem ol bigfala kontribusen blong yumaniterian mo ol nara seves truaot long wol.

Nomata long evri samting we Jos i mekem i go stret, ol man mo oganaesesen we oli no gat stret koneksen wetem Jos blong yumi nao oli mekem plante long ol yumaniterian seves ia i go long ol pikinini blong God raon long wol Olsem wan long ol Aposol blong yumi i luksave: “God i stap yusum moa long wan pipol blong i mekem bigfala mo gudfala wok ia i hapen. … Wok ia, i bigwan tumas, i had tumas blong eni wan pipol.” .⁴ Olsem ol memba blong Jos Ia we i kambak, yumi nid blong luksave moa mo talem tangkyu moa from ol seves blong ol nara man.

Jos Ia blong Jisas Kraes i stap givim seves fulwan long olgeta we i stap long nid mo tu blong wok wan wetem ol nara man long efot ia. I no long taem i pas, mifala i mekem wan bigfala presen i go long Yunaeted Nesen Wol Program blong Kaekae. Ova long plante yia wok blong yumi long yumaniterian, tu oganaesesen i kamaot klia olsem ol ki ejen: ol projek wetem Red Kros mo ol Red Kresen ejensi insaed long sam kantri oli givim bigfala help long taem blong ol disasta mo ol raorao long ol pikinini blong God . Long semmak fasin, yumi gat wan longfala rekod blong help wetem Ol Seves blong Katolik Rilif. Ol oganaesesen ia oli tijim yumi fulap samting abaot wol klas help.

Yumi gat ol gudfala patnasip wetem ol nara oganaesesen, we i tekem tu Muslim Sapot, Wota blong Pipol mo IsraSAPOT oli sam long olgeta. Taem wanwan yumaniterian oganaesesen i gat ol spesel eria blong olgetawan, yumi serem semmak gol blong help blong karemaot safaring long ol pikinini blong God. Evri samting ia i pat blong wok blong God long ol pikinini blong Hem.

Revelesen blong tedei i tijim se Sevya blong yumi Jisas Kraes i “tru laet we i saenem evri man we i kam long wol ia”.⁵ From hemia, evri pikinini blong God i kasem insperesen blong givim seves long Hem mo wanwan long olgeta folem hamas save mo paoa we oli gat.

Buk blong Momon i tijim se “evri samting we i stap invaetem mo switim man blong mekem samting we i gud, mo blong lavem God, mo blong wok blong hem, i kamaot long God.”⁶

I Stap Gohed:

From luk, Spirit blong Kraes, God i givim long evri man, blong hem i save gat save long samting we i gud aot long samting we i nogud; taswe, mi soemaot long yufala fasin blong jaj; from evri samting we i invaetem man blong mekem samting we i gud mo blong winim tingting blong biliv long Kraes, i kamaot tru long paoa mo presen blong Kraes. …

“Mo nao, ol brata blong mi, … yufala i save laet ia we bae yufala i save yusum blong jaj, we laet ia i laet blong Kraes.”⁷

Hemia sam eksampol blong ol pikinini blong God we oli stap helpem ol nara pikinini blong God wetem ol ki eria blong kaekae, medikol kea, mo tijing:

Ten yia bifo, ol Kandaris, wan Sik (wan relijin blong ol man India)) hasban mo waef long Yunaeted Arab Emiret, oli statem wan naesfala program blong fidim ol man we oli hanggri. Truaot long Guru Nanak Darbar Sik tempol, oli stap givimaot tedei ova long 30,000 vejetebol kakae evri wiken long eniwan we i stanap long doa blong olgeta, nomata wanem relijin o kala blong skin. Dokta Kandari i eksplenem, “Mifala i biliv se evriwan i wan nomo; yumi ol pikinini blong wan God mo yumi stap ia blong givim seves long ol pipol.”⁸

Ol saplae blong medikol mo tut kea long olgeta we i stap long nid i wan nara eksampol. Long Jikago, mi mitim wan man Siria-Amerika, Dokta Zaher Sahloul, we wok blong hem i blong lukaotem ol sikman. Hem i wan long ol man we i onem MedGlobol, we oli oganaesem ol medikol profesonol we oli volontia ol taem, skil, save mo lidasip blong olgeta blong helpem ol nara man long ol bigfala trabol taem, olsem wo long Siria, we Dokta Sahloul i putum laef blong hem long denja blong givim medikol kea long ol man ples ia. MedGlobol mo ol oganaesesen we oli semmak (we i tekem tu plante profesonol Lata-dei Sent) oli soem se God i stap lidim ol profesonol man blong fet blong karem help i go long ol pua raon long wol.⁹

Plante long ol pikinini blong God we oli gat bigfala hat oli tekpat long ol tijing efot raon long wol. Wan gud eksampol we yumi save tru long yumaniterian efot blong yumi, i aktiviti blong wan man we oli save hem olsem Mista Gabriel, we i bin wan rifuji long sam defdefren raorao long sam situesen. Hem i luksave se handred long ol taosen blong ol rifuji pikinini blong Is Afrika oli nidim help blong kipim hop blong olgeta i laef mo maen blong olgeta i aktiv. Hem i oganaesem ol nara tija long rifuji populesen ia i go long wanem oli singaotem “ol tri skul,” ples we ol pikinini i kam tugeta blong kasem lesen andanit long sed blong wan tri. Hem i no wet blong ol nara man oli oganaesem o daerektem be hemwan i lidim ol efot we oli bin givim janis blong lanem samting long taosen blong praemeri skul pikinini long ol yia blong harem nogud blong olgeta we oli muvmuv olbaot.

Yes, ol trifala eksampol ia i no minim se evri samting we ol oganaesesen o wanwan man o woman ia oli talemaot from i gud o i blong God i hemia tru. Ol eksampol ia oli soem se God i givim insperesen long plante oganaesesen mo wanwan man mo woman blong mekem plante gud samting. I soem tu se moa long yumi i mas luksave ol gud samting we ol nara man i mekem mo sapotem olgeta taem yumi gat taem mo ol saplae blong mekem hemia.

Hemia sam eksampol blong ol seves we Jos i sapotem mo we ol memba blong yumi mo ol narafala gud pipol mo oganaesesen tu i sapotem wetem donesen blong taem mo mane blong wanwan man mo woman:

Bae mi stat wetem fridom blong relijin. Taem yumi sapotem hemia yumi stap givim seves long ol intres blong yumiwan mo tu ol intres blong nara relijin. Olsem fas Presiden blong yumi, Josef Smit, i tijim, “Mifala i talemaot we mifala i gat raet blong wosipim Hae God long wei we mifala i wantem, mo letem evri man blong gat sem raet ia, letem olgeta blong wosip long fasin we oli wantem, long weaples we oli wantem, o wanem we oli wantem.”¹⁰

Ol nara eksampol blong yumaniterian blong Jos Ia we i kambak mo ol nara help we ol memba blong yumi oli volontia blong sapotem i, ol skul blong yumi we yumi save gud long hem, ol kolej mo yunivesiti mo hemia we yumi no save gud be naoia oli pablisim ol bigfala donesen blong helpem olgeta we oli fesem hadtaem long ol ples we oli prapa spolem, mo blong muvmuv olbaot from ol disasta olsem ol hariken mo etkwek.

Ol nara jareti aktiviti we ol memba blong yumi oli volontia blong sapotem ol donesen mo efot oli plante tumas blong listim, be blong talem smol nomo wanem kaen efot mo olsem wanem oli impoten i we blong: stopem fasin blong gat defren lukluk long skin kala mo ol nara jajmen; stap lukaotem olsem wanem blong protektem mo hilim ol sik; stap helpem ol man wetem ol spesel nid; sapotem ol oganaesesen blong miusik; mo mekem ples blong saed long tingting mo bodi i kam moa gud.

Evri yumaniterian efot blong Jos Ia blong Jisas Kraes blong Ol Lata-dei Sent i lukaotem blong folem eksampol blong ol pipol we oli stret mo gud we oli tokbaot insaed long Buk blong Momon: “Mo long fasin ia nao, long taem we oli stap kam antap gud, oli no sendembak olgeta we oli neked, o olgeta we oli hanggri, o olgeta we oli tosta, o olgeta we oli sik, … mo oli …fri, ol man mo ol woman, i nomata sapos oli blong jos o oli no blong jos. Oli mekem semmak long eni kaen man, nomata huia i stap long nid.”¹¹

Mi testifae abaot Jisas Kraes, we laet mo Spirit blong Hem i gaedem evri pikinini blong God blong helpem ol pua mo ol man we oli fesem hadtaem truaot long wol. Long nem blong Jisas Kraes, amen.