?Wanem Hem I Tru Samting?
God i stamba blong evri trutok. Jos Ia blong Jisas Kraes blong Ol Lata-dei Sent i akseptem evri trutok we God i givim long ol pikinini blong Hem.
Ol brata mo sista blong mi we mi lavem tumas. Tangkyu evriwan from insperesen sesen ia! Afta long konfrens blong yumi long las Epril, yumi bin witnesem plante samting truaot long wol, we i stat wetem hat we i brok i go kasem ol naesfala samting.
Yumi glad long ol ripot blong ol bigfala yut konfrens we oli bin gat truaot long wol. 1 Long ol konfrens ia, ol gudfala yut blong yumi oli stap lan se nomata wanem i hapen long ol laef blong olgeta, oli kasem moa paoa i kam long Lod.2
Yumi glad se oli bildim moa tempol truaot long wol. Wetem dedikesen blong wanwan niu tempol, i givim moa paoa long saed blong god i kam long wol blong mekem yumi kam strong moa mo save fesem bigfala fos blong enemi.
Abius i wan wei blong invaetem paoa blong enemi. Hem i wan bigfala sin.3 Olsem Presiden blong Jos, mi talemaot ol tijing blong Lod Jisas Kraes long saed ia. Bae mi talem gud i klia: eni kaen abius blong ol woman, ol pikinini, o eniwan i wan rabis sin long Lod. Hem i harem nogud mo Mi harem nogud long enitaem we eniwan i kasem kil. Hem i krae, mo yumi evriwan i krae from wanwan man/woman we i safa from eni kaen abius. Olgeta we oli stap mekem ol kaen abius ia, bae oli no fesem loa blong man nomo be bae oli fesem kros blong God tu.
Blong plante yia nao, Jos i bin tekem bigfala step blong protektem—speseli nao—ol pikinini aot long abius. I gat plante help long Jos websaet. Mi invaetem yu blong stadi long ol websaet ia.4 Ol gaedlaen ia oli mekem i stap blong protektem man we i no mekem samting nogud. Mi askem strong long wanwan long yumi blong stanbae from eniwan we bae i save stap long denja from abius mo tekem aksen we i stret blong protektem olgeta. Sevya bae i no akseptem abius, semmak long ol disaepol blong Hem, mo i semmak long yumi tu.
Enemi i gat ol narafala teknik. Wan long ol teknik ia, i we hem i traem blong mekem se i no isi blong luksave wanem i tru mo wanem i no tru. Wetem plante infomesen we yumi stap gat naoia long dei blong yumi, i mekem i had, blong luksave wanem i tru.
Jalenj ia i rimaenem mi long wan eksperiens we mi mo Sista Nelson i bin gat taem mitufala i bin visitim wan big man long wan kantri we i no gat plante man i save abaot Jisas Kraes. Dia fren ia i wan olfala man we hem i bin sik bigwan. Hem i bin talem long mitufala se long ol taem we hem i stap leidaon nomo long bed, plante taem bae hem i lukluk i go antap long ruf mo askem, “?Wanem ia trutok?”
Plante long wol tedei “oli no save faenem trutok from oli no save weaples blong faenem trutok.”5 Sam man bae oli se trutok i save kam defren blong wanwan man o situesen—se wanwan man i save talemaot blong hemwan wanem nao trutok. Kaen bilif ia i olsem wan tingting blong olgeta we oli gat rong tingting ia se hemia i no gat samting wetem God.
Ol dia brata mo sista. God i stamba blong evri trutok. Jos Ia blong Jisas Kraes blong Ol Lata-dei Sent i akseptem evri trutok we God i givim long ol pikinini blong Hem, nomata se hem i lanem tru long saens lab o kasem tru wan revelesen we i kam stret long Hem.
Long pulpit ia, tedei mo tumoro bae yu gohed blong harem trutok. Plis tekem ol not long ol tingting we yu harem, mo hemia we i kam long maen blong yu mo i stap long hat blong yu. Wetem fasin blong prea, askem Lod blong konfemem long yu se wanem yu bin harem i tru.
Mi lavem yufala ol dia brata mo sista. Mi prea se konfrens ia bae i givim kakae long saed blong spirit we yu stap lukaotem, long nem blong Jisas Kraes. Long tabu nem blong Jisas Kraes, amen.