Histri Laen blong Fasin blong Stap Leftemap Tingting
Mi leftemap tingting blong yufala blong gohed blong wok had blong save kwalifae blong gobak long Papa long Heven mo Jisas Kraes.
Ol dia brata mo sista blong mi. Mi glad tumas blong stap wetem yufala long jeneral Konfrens ia blong Jos Ia blong Jisas Kraes blong Ol Lata-dei Sent. Mifala i filim fet mo lav blong yufala wea ples yufala i stap. Mifala i kasem insperesen tru long ol tijing, ol paoaful testemoni, mo naesfala miusik.
Mi leftemap tingting blong yufala blong gohed blong wok had blong save kwalifae blong gobak long Papa long Heven mo Jisas Kraes. Weaples yufala i stap long hem long kavenan rod ia, bae yufala i faet agensem ol harem nogud blong wol ia o oposisen blong Setan.
Olsem we mama blong mi i talem long mi taem we mi komplen long hamas wan samting i had tumas, “O Hal, yes, hem i had. I sapos blong i had ia nao. Laef i wan tes.”
Hem i save talem hemia long wan kwaet voes, iven wetem wan smael, from hem i save tu samting. Nomata long had taem, wanem we i moa impoten hem i blong gobak hom blong stap wetem Papa long Heven. Mo mama i save se hem i save mekem tru long fet blong hem long Sevya.
Hem i filim se God i stap kolosap long hem. Long ol dei we hem i save se bae kolosap hem i ded, hem i toktok wetem mi abaot Sevya taem hem i stap ledaon long bedrum blong hem. I gat wan doa i go long nara rum kolosap long bed blong hem. Hem i smael mo lukluk doa ia taem hem i toktok long kwaet voes se bae hem i luk God i no longtaem. Mi tingabaot yet we mi stap lukluk doa ia mo pikjarem rum biaen long hem.
Hem i stap naoia long spirit wol. Hem i bin save lukluk nomo long gol we hem i wantem long ol yia blong hadtaem long bodi mo hemwan.
Stori blong leftemap tingting we mama i lego i stap, Momon i tokbaot long Moronae 7, taem Momon i stap leftemap tingting blong boe blong hem mo ol pipol blong hem. Hem i stori blong leftemap tingting blong ol jeneresen we i stap kam yet, semmak olsem blong mama we i blong famli blong hem. Momon i bin pasem stori ia blong leftemap tingting long evriwan we oli gat strong tingting blong oli kwalifae, tru evri tes blong laef ia, from laef we i no save finis.
Momon i statem long fas ves blong Moronae 7 wetem wan testemoni abaot Jisas Kraes, abaot ol enjel, mo abaot Spirit blong Kraes we i mekem se ol man oli save wanem i gud mo wanem i nogud mo blong mekem se oli save jusum raet.
Hem i putum Jisas Kraes faswan, olsem evriwan we oli bin win blong leftemap tingting blong olgeta narawan we oli stap traehad blong folem rod ia i go long hom long heven.
“From i no gat eni man we Lod i save sevem, folem ol toktok blong Kraes, sapos oli no gat fet long nem blong hem; taswe, sapos ol samting ia oli bin stop, ale fet tu i bin stop; mo ples blong man i stap nogud tumas, from oli stap olsem se i no bin gat wan fasin blong pemaot man i bin hapen.
“Be luk, ol brata blong mi we mi lavem tumas, mi jajem ol samting we oli moa gud long yufala, from mi jajem se yufala i gat fet long Kraes from fasin blong yufala blong no stap flas; from sapos yufala i no gat fet long hem, ale yufala i no naf blong oli kaontem yufala wetem ol pipol blong jos blong hem”1
Momon i bin luk fasin blong no stap flas olsem wan pruf blong strong fet blong olgeta. Hem i bin luk se olgeta oli dipen long Sevya. Hem i leftemap tingting blong olgeta taem hem i luksave fet ia . Momon i gohed blong stap leftemap tingting blong olgeta taem hem i helpem olgeta blong oli luk se fet mo fasin blong olgeta blong no stap flas bae i save bildimap hop mo tras blong olgeta blong winim ol hadtaem blong olgeta:
“Mo bakegen, ol brata blong mi we mi lavem tumas, mi wantem toktok long yufala long saed blong hop. ?Hao nao hem i olsem se yufala i save kasem fet, sapos yufala i no gat hop?
“?Mo wanem ia nao we bae yufala i gat hop from? Luk mi talem long yufala se bae yufala i gat hop tru long atonmen blong Kraes mo paoa blong laef bakegen long ded, blong hem, blong girap long laef we i no save finis, mo hemia i from fet blong yufala long hem, folem promes.
“Taswe, sapos wan man i gat fet, i nid blong hem i mas gat hop; from sapos i no gat fet, i no save gat eni hop.
“Mo bakegen, luk mi talem long yufala se hem i no save gat fet mo hop, be nomo sapos i hem i gat fasin blong no stap flas mo tingting blong hat blong hem i stap daon.”2
Afta Momon i leftemap tingting blong olgeta taem hem i stap testifae se oli stap long rod blong kasem presen ia blong ol hat blong olgeta i fulap wetem klin lav blong Kraes. Hem i soem long olgeta olsem wanem fet long Jisas Kraes, fasin blong no stap flas, putum tingting i stap daon, Tabu Spirit, mo strong hop blong kasem laef we i no save finis, oli wok tugeta. Hem i leftemap tingting blong olgeta long wei ia:
“From i no gat wan we God i akseptem long fored blong hem, be olgeta nomo we oli no stap flas mo tingting blong hat blong olgeta i stap daon; mo sapos wan man i no stap flas mo tingting blong hat blong hem i stap daon, mo hem i konfes tru long paoa blong Tabu Spirit se Jisas i Kraes, i nid blong hem i mas gat bigfala lav; from sapos hem i no gat bigfala lav, hem i nating nomo; taswe, i nid blong hem i mas gat bigfala lav.”3
Lukluk i gobak, naoia mi luksave olsem wanem presen ia blong bigfala lav—klin lav blong Kraes—i bin mekem mama i strong, i gaedem hem mo sastenem hem long ol hadtaem blong hem long rod blong hem i go hom.
“Mo bigfala lav i save wet longtaem, mo i kaen, mo i no jalus, mo i no kam bigwan, i no lukaotem samting blong hem nomo, i no save kros kwiktaem, i no tingting long eni nogud samting, mo i no glad long rabis fasin, be i glad long trutok, i stanap strong long evri samting, i bilivim evri samting, i gat hop long evri samting, i stap strong long evri samting.
“Taswe, ol brata blong mi we mi lavem tumas, sapos yufala i no gat bigfala lav, yufala i nating, from bigfala lav bae i neva sot. Taswe, hang long bigfala lav, we i moa hae bitim evri samting, from evri samting i mas sot—
“Be bigfala lav i klin lav blong Kraes, mo i stap strong blong oltaem; mo huia we oli faenem se hem i gat hemia long las dei, bae i gud long hem.
“From samting ia, ol brata blong mi we mi lavem tumas, prea long Papa wetem evri paoa blong hat, blong yufala i save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes; blong yufala i save kam ol boe blong God; blong taem we bae hem i kamaot bae yumi stap olsem Hem, from bae yumi lukim Hem olsem we Hem i stap; blong yumi save gat hop ia; blong yumi save kam klin olsem we hem i klin.”4
Mi talem tangkyu from eksampol mo tijing blong Momon we i bin leftemap tingting. Mi bin kasem blesing tu long stori blong mama blong mi. Ol profet stat long Adam kasem olgeta tedei, tru long ol tijing mo eksampol blong olgeta oli bin mekem mi kam strong.
Blong soem respek long olgeta we mi save gud mo ol famli blong olgeta, mi bin jusum blong no askem moa infomesen abaot ol hadtaem blong olgeta o tokbaot ol bigfala presen we oli kasem long pablik. Wanem we mi luk i bin leftemap tingting blong mi mo jenisim mi blong kam moa gud.
Wetem denja ia blong tokbaot praevet laef blong hem, bae mi ademap wan smol ripot abaot fasin blong leftemap tingting blong waef blong mi. Mi mekem hemia wetem kea. Hem i wan praevet woman we i no lukaotem o wantem blong oli talem gud hem.
Mitufala i bin mared blong 60 yia. Hem i tru long eksperiens ia nao mekem mi andastanem naoia, mining blong ol toktok ia long skripja: fet, hop, fasin blong no stap flas, wet longtaem, no lukluk long yuwan, stap glad long trutok, nogat rabis tingting, mo antap long evriwan, bigfala lav.5 Folem eksperiens ia, mi save serem testemoni blong mi se ol man mo woman oli save tekem ol naesfala standet long laef blong olgeta evri dei taem oli stap gro long saed blong spirit tru long ol hadtaem long laef.
Milian long yufala we oli stap lisin oli save ol pipol olsem. Plante long yufala oli ol pipol ia. Evriwan long yumi i nidim ol eksampol blong leftemap tingting mo ol fren we oli lavem yumi.
Taem yu sidaon wetem wan we yu stap givhan long hem olsem wan givhan sista o brata; yu ripresentem Lod. Tingting long wanem bae Hem i mekem long yu o talem long yu. Hem bae i invaetem olgeta blong kam long Hem. Hem bae i leftemap tingting blong olgeta. Hem bae i luksave mo presem stat blong ol jenis we olgeta i nidim blong mekem. Mo Hem bae i eksampol ia we i stret evriwan blong oli folem.
I nogat wan i save mekem givhan wok we i stret evriwan yet, be taem yu stap lisin long konfrens ia, yu save se yu stap wok i go. Sevya i save evri samting abaot ol hadtaem blong yu. Hem i save se yu gat paoa ia blong gro long fet, hop, mo bigfala lav.
Ol komanmen mo ol kavenan we Hem i givim i no ol tes blong kontrolem yu. Oli ol presen blong leftemap yu blong kasem evri presen blong God mo blong gobak hom long Papa long Heven mo Lod, we i lavem yu.
Jisas Kraes i pem praes from ol sin blong yumi. Yumi save klemem blesing blong laef we i no save finis sapos yumi gat inaf fet long Hem blong sakem sin mo kam olsem wan pikinini, klin mo rere blong kasem blesing we i moa bigwan aot long evri narafala presen blong God.
Mi prea se yu bae akseptem invitesen ia mo bae yu givim long ol nara pikinini blong Papa long Heven.
Mi prea from ol misinari raon long wol. Letem olgeta oli kasem insperesen blong leftemap tingting blong wanwan man blong oli wantem blong biliv long ol invitesen blong Jisas Kraes tru long ol wokman we oli bin tekem nem blong Hem long olgeta.
Mi testifae se Hem i laef mo stap lidim Jos blong Hem. Mi mi wan witnes blong Hem. Presiden Russell M. Nelson hem i profet blong God blong ful wol ia. Mi save se hemia i tru. Long tabu nem blong Jisas Kraes, amen.