Doktrin blong Stap Pat

Mi laekem blong tokbaot long yufala, wanem mi singaotem doktrin blong stap pat insaed long Jos Ia blong Jisas Kraes blong Ol Lata‑Dei Sent. Doktrin ia i gat tri pat: (1) rol blong stap long kam tugeta blong ol kavenan pipol blong Lod, (2) olsem wanem seves i impoten mo sakrifaes blong stap pat, mo (3) mekem Jisas Kraes i stap long medel.

Long eli taem blong, Jos Ia blong Jisas Kraes blong Ol Lata Dei Sent, i fulap long ol Waet man blong ol Not Amerika mo Ol Sent blong not Yurop wetem wan smol namba blong ol Red Indien, Blak Man blong Amerika, mo Ol Man blong Pasifik. Naoia, eit yia i pas from 200 aniveseri taem Jos i kambak, namba blong ol memba blong Jos i kam antap mo plante defren kalja long Not Amerika mo iven long ful wol.

Olsem we oli profesae long hem long lata-dei kam tugeta ia blong ol kavenan pipol blong Lod oli gro hariap, Jos ia i gat ol memba blong evri nesen, famli, lanwis, mo pipol. ¹ Hem i no wan samting we oli mekem plan from, be i kam nomo olsem ia we bae yumi wantem,blong stap luksave hamas gospel i karem i kam tugeta evri nesen mo evri pipol.

Yumi glad tumas blong luk dei ia we Saeon oli bildim long evri graon mo long ol ples blong yumi. Olsem we Profet Josef Smit i talem,evri pipol blong God long evri jeneresen oli stap lukluk wetem glad long dei ia, mo “yumi ol pipol we God i jusum blong yumi mekem Lata-dei glori i hapen.”

Glad long janis ia, yumi no save letem blong spolem kala blong skin blong man, traeb o ol narafala samting we bae i seraotem yumi i stap insaed long lata-dei Jos blong Kraes. Lod i givim komanmen long yumi: “Stap wan; mo sapos yufala i no stap wan, yufala i no blong mi.”³ Yumi mas gohed blong karemaot ol samting we bae i save spolem Jos, hom, mo hemia we i moa impoten hem i wanem yumi wantem tumas. Taem ol memba blong Jos oli gro moa fulap, welkam blong yumi tu i mas gro moa wom mo moa bigwan. Yumi nidim wanwan long yumi.⁴

Long fas leta blong hem i go long ol man Korin, Pol i talem se evriwan we oli baptaes i kam insaed long Jos oli wan long bodi blong Kraes.

“Bodi blong man, hem i wan nomo be i gat plante haf blong hem, ol haf ya oli no semmak be oli joen gud blong mekem wan bodi nomo. Nao long Kraes, i olsem nomo.

“Yumi evriwan, we fastaem yumi laen blong Isrel, no yumi no laen blong Isrel, yumi slef no yumi friman, be naoia, yumi olsem wan bodi nomo. Yumi baptaes finis, mo long baptaes ya, Spirit ya we i wan nomo, hem i joenem yumi evriwan finis long bodi ya. Mo God i givim sem Spirit ya nomo long yumi evriwan, blong yumi gat laef long hem. …

“Nao long fasin ya, ol haf blong bodi blong yumi oli no save seraot. Evri haf blong bodi oli mas lukaot gud blong givhan long ol narafala haf blong hem.

“Sipos wan haf blong bodi blong mi i harem nogud, be bambae olgeta bodi blong mi i mas harem nogud. Sipos man i presem wan haf blong bodi blong mi, be bambae olgeta bodi blong mi i mas harem gud.”⁵

Filing ia blong stap pat hem i impoten long saed blong bodi, tingting mo gud blong spirit. Be, hem i posibol se wanwan taem yumi fil se oli no wantem yumi. Be long taem we tingting i stap daon, yumi filim se bae yumi neva kasem ol hae standet blong Lod o wanem ol narafala oli wantem yumi blong kasem.⁶ Samtaem bae yumi mekem ol samting we yumi no minim blong mekem long ol narafala man—o long yumi wan—we Lod i no wantem yumi blong mekem. Yumi save tokbaot ol naes wei we se wan sol we i bigwan i stamba blong sam samting we yumi winim o ol koling, be hem i no olsem wanem yumi stanap long ae blong Lod. “Lod i stap lukluk long hat.”⁷ Hem i kea abaot wanem yumi wantem mo wanem we yumi wantem blong kam olsem.⁸

Sista Jodi King i raetem wan eksperiens blong hemwan long ol yia we i pas finis:

“Mi filim se mi neva akseptem miwan insaed long jos kasem taem man blong mi, Cameron, mo mi i stap trae had blong statem wan famli. Ol pikinini mo ol famli we oltaem oli stap karem glad kam long mi long jos oli stat blong mekem mi harem nogud.

“Mi filim se mi mi nating, taem mi nogat pikinini o wan basket blong daepa long han blong mi …

“Sandei we i had, hem i Sandei long wan niufala wod. From se mifala i nogat pikinini, oli askem long mifala se sapos mifala i jes mared mo wetaem bae mifala i statem wan famli. Mi stat blong kam gud blong ansarem ol kwestin ia o no letem olgeta i luksave se ol kwestin ia i stap mekem mi harem nogud—mi save oli no minim blong mekem mi harem nogud.

“Be, long Sandei ia, hem i had blong ansarem ol kwestin ia. Mitufala jes faenemaot, se mi nogat bel afta mitufala i tingting strong bae mi gat bel—be bakegen—i no bin hapen.

“Taem mi wokbaot i go insaed long sakramen miting mi filim se mi lusum hop mo blong ansarem ol kwestin ia we ‘blong kam save yu’ i had long mi. …

“Be from hem i taem blong Sandei skul mo hemia i mekem mi harem nogud tumas. Lesen—i abaot tabu rol ia blong stap olsem wan mama—kwik taem nomo topik i jenis i go long ol harem nogud blong stap olsem wan mama. Hat blong mi i harem nogud mo mi stap krae miwan taem mi stap harem ol woman oli stap komplen long blesing ia we bae mi save givim eni samting from.

“Kwik taem nomo mi aot long jos. Fastaem, mi no wantem blong gobak. Mi no wantem eksperiensem filing ia blong mi stap miwan bakegen. Be, long naet ia mi bin storian wetem man blong mi, mitufala i save se mitufala i mas gohed blong go long jos, no from se Lod i askem mitufala blong mekem, be mitufala i save glad ia we bae i kam taem yumi riniu ol kavenan mo filim Spirit long jos mo fogetem harem nogud blong dei ia. …

“Insaed long Jos i gat olgeta we oli wido, oli divos, mo ol singgel memba; olgeta wetem memba blong famli we stap longwe long gospel; ol pipol we oli sik o oli traehad wetem mane; ol memba we oli gat eksperiens wetem semmak seks; ol memba we oli traehad blong winim ol adiksen blong olgeta o oli gat tu tingting; ol niu konvet; olgeta we oli muv i kam; olgeta we pikinini i nomo stap wetem olgeta; mo lis i go. …

“Sevya i bin invaetem yumi blong kam long Hem—no mata wanem yu stap fesem. Yumi kam long Jos blong riniu olgeta kavenan, blong mekem fet blong yumi i kam antap, blong faenem pis, mo blong mekem wanem Hem i mekem i stret long laef blong Hem—givhan long ol narafala we oli filim se oli no pat.”⁹

Pol i eksplenem se Jos mo ol ofisa blong hem, God nao i jusum blong “mekem ol sent oli kam stret gud, blong mekem wok blong seves ia, mo blong leftemap bodi blong Kraes:

“Long fasin ya, bambae yumi evriwan i save kam wan nomo, we yumi bilif long Pikinini blong God mo yumi savegud Hem. Nao long fasin ya, bambae yumi kam olsem we yumi no moa pikinini, yumi big man finis. Bambae yumi kam olsem Kraes nomo we hem i bigman tru”¹⁰

I luk nogud taem wan man i filim se hem i no mitim evri samting blong laef, afta i mekemap tingting blong hemwan se hem i no pat blong oganaesesen ia we God i help blong mekem yumi kam antap.

Yumi letem jajmen ia i go long han blong Lod long olgeta we hem i jusum mo olgeta we yumi jusum blong lavem mo tritim ol narafala wan i gud long wei we yumi save mekem. Letem yumi askem Hem blong soem long yumi rod, dei afta dei, blong “faenem ol puaman, mo ol blaenman, mo ol man we bodi blong olgeta i nogud, mo ol man we leg blong olgeta i nogud [hemia i evriwan]” long bigfala lafet blong Lod.¹¹

Long nambatu saed blong doktrin blong stap pat i blong mekem kontribusen blong yumi wan. Samtaem yumi no tingting tumas long hem, blong stap pat i kam tru long ol seves mo ol sakrifaes we yumi bin mekem blong ol narafala man mo blong Lod. Blong lukluk nomo long nid blong yumi wan i save mekem yumi harem nogud blong kam pat.

Yumi traehad folem doktrin blong Sevya:

“Be i no stret blong yufala i mekem olsem. Sipos wan long yufala i wantem kam haeman blong yufala, hem i mas kam olsem man blong wok blong yufala. …

Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.”¹²

Blong stap pat i no kam nomo taem yumi wet from, be yumi go aot blong helpem wanwan long yumi.

Tedei, blong mekem sakrifaes long eni samting blong eniwan i stap kam pat blong kalja wan laef blong wan man. Insaed Deseret Magazine eli long yia ia, man we i raetem stori ia, Rod Dreher i talem stori blong wan mama long Budapes:

“Mi stap insaed long wan lektrik tren wetem wan … fren we i gat samples long teti yia—bae yumi singaotem hem Kristina—long rod blong mifala blong go luk wan olfala [Kristian] woman we, man blong hem we i ded finis, tufala i bin stanap agensem ol komunis stet. Taem mifala i stap pas tru long ol rod long siti, Kristina i tokbaot olsem wanem i had blong stap ones long ol fren blong hem abaot yia blong hem mo ol hadtaem we hem i stap gotru long hem olsem wan waef mo mama blong ol yang pikinini.

“Ol hadtaem blong Kristina olsem wan yang woman i nomol nomo long wan we i stap lanem blong kam olsem wan mama mo waef—be ol fasin blong jeneresen blong hem i we laef i had i wan denja blong wan mo hem i mas no letem. ?Be, hem mo man blong hem, i stap raorao? Hem i mas lego man blong hem, oli stap talem. ?Ol pikinini blong hem, i stap hambak long hem? Hem i mas lego olgeta i go long ples blong lukaotem ol smol pikinini.

“Kristina i wari se ol fren blong hem oli no kasem semmak hadtaem mo iven blong safa, i wan nomol pat blong laef—mo ating bae hem i wan gud pat blong laef, sapos blong i tijim yumi olsem wanem blong gat fasin blong save wet long taem, kaen fasin mo fasin blong gat lav. …

“… Yunivesiti blong Notre Dame sociologist of religion Christian Smith i faenem long stadi blong hem blong ol adalt [ol yia] 18–23 se fulap long olgeta i biliv se oli gat moa paoa blong oli save stap olgeta wan mo gat wan gud taem.’¹³

Be long tingting ia eniwan we i faenem i had ‘hem i abius.”¹⁴

Long narafala saed, ol paeonia blong yumi oli kam long wan tingting se blong stap pat , long yuniti, mo hop long Kraes, taem oli mekem ol sakrifaes blong go long misin,bildim tempol, lego ol naesfala haos long fos mo stat bakegen, long fulap narafala wei blong sakrifaes blong olgeta wan blong Saeon. Oli nid blong mekem sakrifaes iven ol laef blong olgeta sapos i nid. Mo yumi evriwan, yumi gat akses mo kasem blesing long fasin ia blong olgeta blong stanap strong kasem en. Hem i semmak blong plante long yumi long tedei we oli lusum famli mo fren blong olgeta, lusum janis blong wok, o oli safa ol narafala man i spolem olgeta o abiusem olgeta olsem risal we oli kasem baptaes. Riwod blong olgeta, i gat moa paoa blong stap long medel blong ol kavenan pipol. Eni sakrifaes we yumi bin mekem blong Lod bae i help blong konfemem ples blong yumi wetem Hem we i givim laef blong Hem blong fulap man.

Las mo impoten samting blong doktrin blong stap pat hem i stamba rol blong Jisas Kraes. Yumi no joenem Jos blong jos yumiwan, impoten olsem we i stap. Yumi joen blong sevem yumi tru long lav mo gladhat blong Jisas Kraes. Yumi joen blong sevem ol odinens, blong sevem man mo kam olsem god blong yumiwan mo olgeta we yumi lavem long tugeta saed blong vel. Yumi joen long bigfala projek blong putum bak Saeon blong rere taem Lod i kambak.

Jos hem i wan tul blong ol kavenan blong fasin blong sevem man mo blong kam olsem wan god we God i givim long yumi tru long ol odinens blong hem tru long tabu prishud.¹⁵ Hem i taem yumi kipim olgeta kavenan we yumi kasem long hae mo dip tingting ia blong stap pat. Presiden Russell M. Nelson i talem:

Taem yu mo mi i mekem wan kavenan wetem God, rilesensip blong yumitu wetem Hem i kam moa kolosap bitim taem we yumi no bin mekem kavenan yet wetem Hem bifo. Naoia oli fasem yumi tugeta. From kavenan we yumi mekem wetem God, Hem bae i neva taed long ol traehad blong Hem blong helpem yumi, mo bae yumi neva stopem ol sore mo longfala tingting blong Hem we hem i gat long yumi. Wan wan long yumi i gat wan spesel ples insaed long hat blong God. …

“… Jisas Kraes i givim olgeta kavenan ia (luk long Hibru 7:22; 8:6).”¹⁶

Sapos yumi tingbaot hemia, hae tingting blong yumi long Lod bae i mekem yumi kasem insperesen blong mekem yumi no tingting daon.

Yumi kasem glad taem yumi gohed, wanwan mo olsem wan grup, “ Bambae yumi kam olsem Kraes nomo, we hem i bigman tru”¹⁷ Iven sapos i gat ol harem nogud mo ol samting yumi stap muvum i go, hem i wan bigfala samting blong askem. Yumi leftemap wan wan long yumi blong muv i go long fored, blong save se i no mata ol hadtaem mo i no mata se ol promes blesing i i kam slo, yumi save “Be yufala i no fraet; [from Kraes hem i] winim paoa blong olgeta samting blong wol ya finis,”¹⁸ mo yumi stap wetem Hem. Blong stap wan wetem Papa, Pikinini, mo Tabu Spirit bae i nogat tu tingting blong filim se yu pat.¹⁹

Hemia i doktrin blong stap pat we i kam daon long hemia, wanwan long yumi i save talem hemia se: Jisas Kraes i ded from mi; Hem i save se mi klin inaf from blad blong Hem. Hem i lavem mi mo i save mekem wan samting i defren long laef blong mi. Taem mi sakem sin, lav blong Hem i jenisim mi. Mi mi wan wetem Hem long kavenan gospel ia; mi stap pat long Jos mo kingdom blong Hem; mo mi stap mekem wok blong Hem blong sevem ol pikinini blong God.

Mi testifae se yu yu pat, long nem blong Jisas Kraes, amen.