Stap Mekem Fasin blong Mekem Gud I Kam Nomol long Yumi

Mi oltaem talem tangkyu long ol wok we oli givim long mi insaed long Jos we i mekem mi save stap long ol defren kantri. Mitufala i faenem se long wanwan kantri ia i gat plante defdefren samting mo ol spesel pipol we oli gat ol defren kastom.

Evriwan long yumi i gat ol kastom we i blong yumiwan, we i kam long famli blong yumi, o komuniti we yumi stap long hem, mo yumi i hop blong holemtaet ol kastom we i folem ol prinsipol blong gospel. Blong stap jenisim kastom i impoten long ol traehad blong yumi blong stap long kavenan rod, mo bae yumi mas lego olgeta we oli blokem yumi.

Wan kastom i wan praktis o i wan nomol wei blong mekem samting mo tingting blong wan man o kalja. Plante taem, yumi luk fasin blong yumi blong tingting mo mekem samting hem i nomol.

Givim mi janis ia blong talem wan eksampol: Patricia, woman we mi lavem, i lavem blong dring wota blong kokonas mo afta kakae kokonas. Long fas wokabaot blong mitufala long Puebla, Meksiko, mitufala i go long wan ples we mitufala pem wan kokonas. Afta we hem i dring wota blong kokonas, waef blong mi i askem blong oli katem kokonas blong hem mo givimbak long hem blong hem i kakae kaekae blong hem. Taem kokonas i kambak, i gat red kala long hem. !Oli putum jili long hem! Swit kokonas wetem jili! Hemia i defren lelebet long mitufala. Be afta mitufala i lanem se wanem i defren hem i waef blong mi mo mi, we mitufala i no kakae kokonas wetem jili. Be long Meksiko, hemia i no defren; hem i nomol nomo.

Long wan nara taem, mifala stap kakae wetem sam fren long Brasil, mo oli bin givim avoka. Taem mitufala i stap rere blong putum sol long avoka, ol fren blong mitufala i talem, “?Yutufala stap mekem wanem? !Mifala i putum suga finis long avoka!” !Avoka wetem suga! Hemia i defren tumas long mitufala. Be afta mitufala i lanem se ol man we i defren hem i waef blong mi mo mi, we mitufala i no kakae avoka wetem suga. Long Brasil, avoka we oli putum suga long hem, i nomol wei blong kakae avoka.

Wanem we i nomol long sam man, i save defren blong ol narafala man, hemia i dipen long ol kastom blong olgeta.

?Wanem ol kastom we i nomol insaed long laef blong yumi?

Presiden Russell M. Nelson i talem: “ Tedei, yumi stap harem plante abaot ‘wan niu nomol.’ Sapos yu rili wantem akseptem wan niu nomol, mi stap invaetem yu blong tanem hat, maen, mo sol blong yu i go long Papa blong yumi long Heven mo long Pikinini blong Hem, Jisas Kraes. Letem hemia nao i niu nomol blong yu ” (“Wan Niu Nomol,” Liahona, Nov. 2020, 118).

Invitesen ia i blong yumi evriwan. I nomata sapos yu puaman mo rij, skul gud o no skul, olfala o yangfala, sik o helti. Sevya i invaetem yumi blong akseptem ol samting we i helpem yumi blong stap long kavenan rod, i kam ol nomol samting insaed long laef blong yumi.

I nogat wan kantri we i holem evri samting we i gud, o we man i laekem. From hemia, olsem we Pol mo Profet Josef Smit i tijim:

“Sapos i gat samting we i klin, i luk naes, o i gudfala mo i nambawan tru, mifala i lukaotem ol samting ia.” (Ol Toktok blong Bilif 1:13).

“Sapos i gat ol gudfala samting, putum ol tingting blong yufala i stap strong”(Filipae 4:8).

Tekem not se hemia i wan strong toktok, i no jes wan toktok nomo.

Mi wantem invaetem yumi evriwan blong tekem taem blong tingting hevi long ol kastom blong yumi mo wei we ol kastom ia i stap gat paoa long ol famli blong yumi.

Hemia i fo gudgudfala fasin we i sud nomol long ol memba blong Jos:

1. Skripja stadi blong yuwan mo famli. Blong jenisim laef i kam long Lod Jisas Kraes, wanwan man i responsibol blong lanem gospel. Ol papa mo mama oli responsibol blong tijim gospel long ol pikinini blong olgeta (luk long Doktrin mo Ol Kavenan 68:25; 93:40).

2. Prea blong yuwan mo famli. Sevya i givim komanmen long yumi blong prea oltaem (luk long Doktrin mo Ol Kavenan 19:38). Prea i givim yumi janis ia blong yumi toktok yumiwan wetem Papa blong yumi long Heven long tabu nem blong Pikinini blong Hem, Jisas Kraes.

3. Go long sakramen miting evri wik (luk long 3 Nifae 18:1–12; Moronae 6:5–6). Yumi mekem olsem blong tingbaot Jisas Kraes taem yumi tekem mo kakae sakramen. Insaed long odinens ia, ol memba blong Jos oli riniu ol kavenan blong olgeta mo tekem antap long olgetawan nem blong Sevya, mo oltaem tingbaot Hem, mo kipim ol komanmen blong Hem (luk long Doktrin mo Kavenan 20:77, 79

4. Tekpat oltaem long tempol mo wok blong famli histri. Wok ia i wei ia, blong yunaetem mo silim ol famli blong taem we i no save finis (luk long Doktrin mo Ol Kavenan 128:15).

?Yumi filim olsem wanem taem yumi harem ol fo samting ia? ?Ol samting ia i pat blong nomol laef blong yumi?

I gat plante narafala kastom we i save kam pat long nomol laef we yumi kam blong stap folem, we hem i blong letem God i win insaed laef blong yumi.

?Olsem wanem nao yumi save luksave wanem ol samting we bae i kam nomol insaed long laef blong yumi mo ol famli blong yumi? Insaed long ol skripja, yumi faenem wan gud rol model; insaed long Mosaea 5:15 i talem: “Mi wantem se yufala i stanap strong mo no muvmuv, mekem plante gudfala wok oltaem.”

Mi lavem ol toktok ia from yumi save se ol samting we oli kam nomol insaed laef blong yumi, oli ol samting we yumi stap mekem bakegen mo bakegen. Sapos yumi stanap strong mo no muvmuv taem yumi mekem ol gudfala samting, ol kastom blong yumi bae oli go gud wetem ol prinsipol blong gospel, mo bae oli helpem yumi blong stap long kavenan rod.

Presiden Nelson i bin givim kaonsel: “Akseptem niu nomol blong yu taem yu sakem sin evri dei. Lukaotem blong kam antap oltaem blong stap klin gud long tingting, toktok, mo wok blong yu. Givhan long ol narafala man. Oltaem gat wan lukluk i go long taem we i no save finis. Wok strong long ol koling blong yu. Mo nomata wanem jalenj i kam, ol dia brata mo sista, laef evri dei long wei blong yu rere gud blong mitim Meka blong yu” (“Wan Niu Nomol,” 118).

Naoia i no wan defren samting blong waef blong mi, Patricia, o mi blong kakae kokonas wetem jili— blong talem stret, mitufala i laekem. Be, fasin blong kam olsem wan god i wan samting we i moa impoten long spirit bitim tes blong kaekae; hem i wan topik we i blong taem we i no save finis.

Mi stap prea se nomol blong yumi bae i mekem yumi save eksperiensem wan ples blong “hapi we i neva gat en” (Mosaea 2:41) we oli promesem long olgeta we oli kipim ol komanmen blong God mo taem yumi mekem hemia, bae yumi save talem, “Mo i bin hapen se mifala i bin laef folem fasin blong stap hapi” (2 Nifae 5:27).

Ol brata mo sista blong mi, mi testifae abaot ol 15 man ia we yumi sastenem olgeta olsem ol profet, sia, mo reveleta, mo tu Presiden Russell M.Nelson we yumi lavem tumas. Mi testifae se Jos Ia blong Jisas Kraes blong Ol Lata-dei Sent i tru. Mi testifae speseli abaot Jisas Kraes, Sevya mo Ridima blong yumi, long nem blong Jisas Kraes, amen.