Wetem Tru Hat
Yu mas stap ol man blong folem Jisas we oli glad mo gat tru hat long wokbaot blong yumiwan blong stap wan disaepol.
Samtaem i gud blong save wanem we i stap kam.
Kolosap long en blong seves blong Hem, Jisas i talem long ol Aposol blong Hem se ol hadtaem bae oli kam. Be Hem i talem tu se, “yufala i mas lukaot gud blong yufala i no fraet.”1 Yes, Hem bae i go, be Hem bae i no lego oli stap olgetawan.2 Hem bae i sendem Spirit blong Hem blong i helpem olgeta blong tingbaot, stanap strong mo faenem pis. Sevya i mekem i hapen promes blong Hem blong stap wetem yumi, ol disaepol blong Hem, be yumi mas lukluk long Hem blong luksave olgeta mo glad we Hem i stap.
Ol disaepol blong Kraes oli bin fesem ol hadtaem.
Wan dia fren blong mi i sendem wan olfala atikol long Nebraska Advetaes, wan ples blong nius pepa long Is blong Yunaeted Stet, blong 9 Julae, 1857. I rid olsem: “Long eli moning ia wan kampani blong ol Momon oli kam pas tru long rod blong olgeta i go long Sol Lek. Ol woman (we oli no wari tumas) oli stap pulum ol hankat olsem ol animol, wan [woman] i foldaon long blak sofmad we i mekem hem oli stop blong wan smol taem, ol pikinini oli wokbaot i go wetem ol [defren[ klos blong ol nara kantri mo oli gat semmak strong tingting ia olsem ol mama blong olgeta.”3
Mi tingting plante abaot woman ia we i fulap long sofmad. ?From wanem hem i stap pulum hankat hemwan? ?Hem i wan singgel mama? ?Wanem i givim paoa insaed long hem, strong paoa long tingting blong mekem wan had wokbaot tru long sofmad, blong pulum evri samting blong hem long wan hankat, i go long wan waelples ples we hem i no save—samtaem ol pipol we oli stap lukluk oli jikim hem??4
Presiden Joseph F. Smith i tokbaot paoa insaed long ol paeonia woman ia se: “?Yu, yu save tanem hat blong wan long ol woman ia i go longwe long ol bilif blong olgeta abaot Jos Ia blong Jisas Kraes blong Ol Lata-dei Sent? ?Yu save mekem maen blong olgeta i kam tudak long misin blong Profet Josef Smit? ?Yu save mekem olgeta oli kam blaen long tabu misin blong Jisas Kraes, Pikinini blong God? No, neva long wol ia, bae yu save mekem. ?From wanem? From se oli save. God i talemaot long olgeta, mo oli andastanem, mo nogat wan paoa long wol ia we i save tanem olgeta long wanem oli save we i trutok ia.”4
Ol brata mo sista, hemia i singaot blong dei blong yumi tedei blong kam olsem ol man mo woman ia—ol disaepol we oli traehad blong faenem paoa blong gohed blong stap pulum taem oli singaot blong wokbaot long waelples, ol disaepol wetem ol bilif we God i bin soem long yumi, ol man blong folem Jisas, we oli glad mo gat tru hat long wokbaot blong yumiwan blong stap wan disaepol. Olsem ol disaepol blong Jisas Kraes, yumi bilif mo save gro long tri impoten trutok.
Faswan, Yumi Save Kipim Ol Kavenan blong Yumi, Nomata Se I No Isi
Taem fet, famli o fiuja blong yu oli kasem jalenj—taem yu stap tingting se from wanem laef i had tumas taem yu stap traem bes blong laef folem gospel—tingbaot se Lod i talem se bae ol trabol oli kam. Ol trabol oli pat blong plan mo i no minim se oli blong fogetem yu; oli pat blong wanem i minim se yufala i blong Hem.6 Afta evri samting, Hem i “wan man we i harem nogud plante taem, mo i savegud olgeta samting we i stap mekem man i harem nogud.”6
Mi lanem se Papa long Heven i intres moa long gro blong mi olsem wan disaepol blong Jisas Kraes bitim blong intres blong Hem long kamfot blong mi. Oltaem mi no stap agri long wei ia—!Be i olsem nao!
Blong stap laef gud mo nogat jalenj, i no save givim paoa. Paoa we yumi nidim blong stanap strong agensem ol hadtaem long dei blong yumi hem i paoa blong Lod mo paoa blong Hem i kam tru long ol kavenan we yumi mekem wetem Hem.7 Blong dipen long fet blong yumi taem yumi fesem ol had situesen—blong traehad evri dei wetem tru hat blong mekem wanem yumi kavenan wetem Sevya blong mekem, nomata mo speseli taem yumi taet, wari, mo stap faet wetem ol kwestin we i trabolem yumi mo ol problem—i blong sloslo kasem laet blong Hem, paoa blong Hem, lav blong Hem, Spirit blong Hem, pis blong Hem.
Risen ia blong stap wokbaot long kavenan rod, i blong kam kolosap long Sevya. Hem i risen ia nao, i no hamas yumi stret evriwan long progres blong yumi. Hem i no wan resis, mo yumi no mas komperem wokbaot blong yumi wetem ol narawan’. Iven taem yumi foldaon, Hem i stap ia.
Nambatu, Yumi Save Tekem Aksen tru long Fet
Olsem ol disaepol blong Jisas Kraes, yumi andastanem se fet long Hem i nidim aksen—speseli long ol hadtaem.8
Plante yia i pas, papa mo mama blong mi tufala i disaed blong jenisim tapi insaed long haos. Long naet bifo we niufala tapi i kam, mama blong mi i askem ol brata blong mi blong karemaot ol fenija mo teremaot ol tapi long bedrum mekem se oli save putum ol niufala tapi. Sista blong mi we i seven yia, Emily i stap slip finis. So, taem hem i stap slip, sloslo oli karemaot evri fenija long rum blong hem, be i no bed, mo afta, oli teremaot tapi. Afta, olsem we ol bigfala brata oli laekem blong mekem, oli jusum blong mekem wan fani samting long hem. Oli karemaot evri samting blong hem insaed long kabod mo long ol wol, we i mekem rum i emti. Afta, oli raetem wan not mo putum long wol we i se: “Dia Emily, mifala i bin muvaot. Bae mifala i raet long yu afta sam dei blong talem long yu, weaples mifala i stap long hem. Lav, famli blong yu.”
Nekis moning taem Emily i no kam drink ti, ol brata blong mi oli go blong faenem hem—hem hemia, i sidaon hemwan biaen long wan doa we i klos. Emily i tingtingbak long eksperiens ia afta: “Hat blong mi i brok. ?Be wanem i save hapen sapos mi bin openem doa ia nomo? ?Wanem nao bae mi save harem? ?Wanem nao bae mi save smelem? Bae mi bin save se mi no stap miwan. Bae mi save hamas oli lavem mi blong tru. Tingting ia i neva kam long maen blong mi blong mekem wan samting abaot situesen blong mi. Mi givap nomo, mo stap insaed long kabod blong mi mo stap krae. Be sapos nomo mi bin openem doa.”9
Sista blong mi i mekemap wan tingting folem wanem hem i luk, be i no soem stret wanem we i stap hapen. Hemia i no pulum tingting blong yumi se, olsem Emily, yumi save kam hevi long ol harem nogud, soa o tingting we i daon o wari o stap yumiwan o kros o taet, we i mekem se yumi tingting nomo blong mekem wan simpol samting, blong openem doa, blong tekem aksen wetem fet long Jisas Kraes?
Ol skripja oli fulap wetem ol eksampol blong ol man mo ol woman, we oli ol disaepol blong Kraes, we taem oli stap fesem ol hadtaem, oli tekem aksen nomo—we i tekem aksen tru long fet mo wokbaot.10
Long olgeta we oli kasem sik blong skin, Kraes i talem: “Yufala i go pas long pris. Nao taem olgeta oli stap wokbaot, i go, bodi blong olgeta i kam klin.”11
Oli go blong soem olgetawan long ol pris olsem we oli kam oraet finis, mo taem oli stap tekem aksen ia, oli bin kam oraet.
Mi wantem blong talem tu se sapos tingting ia blong tekem aksen i no posibol from yu filim tumas harem nogud, plis letem aksen blong yu i blong askem help—long wan fren, wan memba blong famli, wan Jos lida, wan profesonol. Hemia i save kam fas step long hop.
Nambatri, Yumi Save Stap Gat Tru Hat mo Glad long Wok blong Yumi13
Taem ol hadtaem oli kam, mi traem blong tingbaot se mi bin jusum blong folem Kraes bifo mi kam long wol ia, mo ol jalenj blong fet blong mi, helt blong mi, mo hamas mi save stanap strong kasem en, evriwan oli pat blong risen ia we mi stap ia. Mo mi sua se mi mas neva tingting se, ol hadtaem blong tedei i mekem mi kwestinim lav blong God long mi o i tanem fet blong mi long Hem i kam tu tingting. Ol hadtaem i no minim se plan i no stap wok; oli pat blong plan blong helpem mi blong lukaotem God. Mi kam moa olsem Hem taem mi stap strong kasem en, wetem tingting blong save wet longtaem mo wetem hop ia, olsem Hem, taem mi stap long bigfala harem nogud, mi prea moa strong.14
Jisas Kraes, Hem i nambawan eksampol blong stap lavem Papa long Heven wetem ful hat blong Hem—blong mekem tingting blong Hem, nomata praes blong hem.15 Mi wantem blong folem eksampol blong Hem blong mekem semmak.
Mi kasem insperesen tru long wido woman ia we, i gat tru hat mo olsem wan tru disaepol, i bin sakem tu koen long ofring blong tempol. Hem i givim evri samting we hem i gat.16
Jisas Kraes i luksave hamas hem i gat we i fulap, be ol man oli luk wanem we hem i nogat. Hemia i semmak mo tru wetem wanwan long yumi. Hem i no luk ol samting we yumi nogat olsem se yumi nogud inaf, be, i wan janis blong yusum fet mo blong gro.
Las Toktok
Ol fren disaepol blong Jisas Kraes, wetem ful hat blong mi, mi jusum blong stanap wetem Lod. Mi jusum blong stanap wetem ol wokman blong Hem we Hem i jusum—Presiden Russell M. Nelson mo ol fren Aposol blong hem—from oli toktok long bihaf blong Hem mo oli lukaotem ol odinens mo ol kavenan we oli fasem mi i go long Sevya.
Taem mi foldaon, oltaem bae mi girap, stap dipen long gladhat mo paoa blong Jisas Kraes. Bae mi stap long kavenan blong mi wetem Hem mo wok from ol kwestin blong mi tru long stadi long tok blong God, tru long fet mo wetem help blong Tabu Spirit, we mi trastem taem i lidim mi. Bae mi lukaotem Spirit blong Hem evri dei, taem mi mekem ol smol mo simpol samting.
Hemia i rod blong mi blong stap wan disaepol.
Mo kasem dei we ol evri dei kil long wol ia oli kam oraet, bae mi wet long Lod mo trastem Hem—taem blong Hem, waes blong Hem, plan blong Hem.13
Wetem han blong mi long han blong yu, mi wantem stanap wetem Hem blong oltaem. Wetem tru hat. Taem yumi save se yumi lavem Jisas Kraes wetem ful hat blong yumi, Hem i givimbak evri samting i kambak long yumi.14 Long nem blong Jisas Kraes, amen.