Bildimap wan Laef blong Winim Enemi

Long ol yia i pas long naesfala pulpit ia long Konfrens Senta, yumi bin kasem ol gudgudfala kaonsel, insperesen, instraksen mo revelesen. Wanwan taem, ol spika oli komperem ol eria blong save blong olgeta i go wetem eksperiens, blong soemaot klia mo wetem paoa, wan prinsipol blong gospel blong Jisas Kraes.

Long wei ia, eksampol, yumi lanem abaot ol plen mo ol flaet se taem i gat wan smol jenis, i save lidim yumi i go long wan ples we i longwe long ples we yumi wantem go long hem.¹ Mo tu long wei ia, yumi lanem taem oli komperem wok blong hat blong yumi wetem paoa we hat i nidim blong jenis blong ansa long invitesen blong Lod blong folem Hem.²

Naoia, wetem tingting we i stap daon mi wantem ademap blong komperem wan samting we i kam tru long insperesen long wan eria blong wok blong mi taem mi stap redi from. Mi stap tokbaot wol blong sivil enjinia. Long stat blong ol stadi blong mi long yunivesiti, mi bin stap drim long dei ia taem bae mi finisim ol samting we i nid blong mekem blong kwalifae blong tekem klas ia we bae i tijim mi olsem wanem blong disaenem ol bilding, mo ol nara fasin blong bilding we oli “etkwek pruf.”

Dei ia i kam blong fas klas blong mi long topik ia. Ol fas toktok blong profesa oli: “I tru, yufala i mas wari blong statem klas ia mo lanem olsem wanem blong disaenem ol bilding we oli etkwek pruf,” we i mekem mifala i saksakem hed blong agri fulwan. Afta, profesa i talem “Mi sore blong talem long yufala se hemia i no posibol, from mi no save tijim yufala olsem wanem blong disaenem wan bilding we i save stap strong agensem etkwek o we i etkwek pruf. Hemia i no posibol nomo,” hem i se “from se ol etkwek bae oli hapen nomata yumi laekem o no.”

Afta, hem i ademap,“Wanem we mi save tijim long yufala i olsem wanem blong disaenem ol bilding we oli save stap strong we oli save stopem ol fos blong etkwek, we i mekem se bilding bae i stanap strong mo nogat eni series damej mo save gohed blong givim seves olsem we i stap mekem oltaem.”

Enjinia i i wokemaot hamas longfala mo bigfala blong bilding, ol kwaliti mo ol wok blong fandesen, ol aean bos we i stanap mo hemia we i krosem, simen slab mo ol narafala samting we oli disaenem blong stap long bilding. Ol risal ia oli mekem i kam ol plan mo ol teknikol instraksen, we man blong bildim bae i mas folem gud blong mekem wok i hapen mo blong mekem stamba tingting blong bilding ia.

Nomata se 40 yia i bin pas, long tetaem ia blong fas klas ia blong etkwek pruf enjiniaring, mi tingbaot gud taem ia we mi kasem wan dip, mo andastaning we i fulwan long saed blong topik ia we i impoten, se bae i hapen long ol bilding we bae mi disaenem long fiuja wok blong laef blong mi. I no hemia nomo, be wanem we i moa impoten—i we bae i stap blong givim instraksen long laef blong miwan mo long olgeta we bae mi save jenisim laef blong olgeta.

Hamas nao yumi kasem blesing blong dipen long wan save blong plan ia blong fasin blong sevem man we Papa long Heven i bin krietem, blong gat gospel blong Jisas Kraes we i bin kambak,! mo blong dipen long ol daereksen we i kam wetem insperesen tru long ol profet we oli stap laef! Evri samting we oli pat blong tabu disaen ia oli mekem ol “plan” mo ol “teknikol samting” we oli tijim yumi moa klia long olsem wanem blong bildim hapi laef—laef we oli save winim sin, winim temtesen, winim ol atak blong Setan, we i wantem tumas blong stopem yumi blong kasem laef we i no save finis, tugeta wetem Papa blong yumi long Heven wetem ol famli blong yumi.

Long stat blong seves blong Hem, Sevya Hemwan “ Spirit i lidim Jisas i go long waelples, blong Setan i traem hem.”³ Be Jisas i gat sakses blong kamaot long bigfala hadtaem ia. ?Long wanem wei nao taem yumi gat wan fasin blong stanap agensem Setan o agensem temtesen, i givim seves long Hem? Wanem we i bin mekem Jisas i winim ol hadtaem ia, i from we Hem i bin rere long saed blong spirit, we i letem Hem blong stap long wan situesen blong winim ol temtesen blong enemi.

?Wanem nao sam samting we i bin helpem Sevya blong stap rere from impoten taem ia?

Faswan, Hem i lego kaekae blong 40 dei mo 40 naet, i bin wan fast we i mas hapen wetem plante prea. So, nomata se bodi blong Hem i slak, spirit blong Hem i bin strong tumas. Nomata se, yumi laki se oli no askem yumi blong lego kaekae blong wan longfala taem olsem—be blong 24 aoa mo wan taem long wan manis—fasin blong livim kakae i givim paoa long yumi long saed blong spirit, mo mekem rere yumi blong winim ol hadtaem blong laef.

Nambatu samting, long stori blong ol temtesen we Sevya i bin go tru long hem, yumi luk se oltaem Hem i ansa wetem ol skripja long maen blong Hem, i stap kwotem olgeta, mo stap talem olgeta long ol stret taem.

Taem Setan i temtem Hem blong tanem ol ston i kam bred mekem se bae Hem i nomo hanggri from fast blong Hem, Lod i talem long hem, “Baebol i talem se,‘Man i no save laef long kakae nomo. Evri tok we God i talem, hemia nao samting blong mekem man i laef.”⁴ Afta, taem Lod i stap long ples we i hae long tempol, devel i traem Hem blong temtem Hem blong soem paoa blong Hem, we i mekem se Lod i ansa wetem paoa: “Be Baebol i talem tu se, ‘Yu no save traem Hae God we i God blong yu.”⁵ Setan i traem namba tri taem, Lod i talem, “Baebol i talem se, Yu mas mekem wosip long Hae God we i God blong yu mo bambae yu mas mekem wok blong hem nomo.”⁶

Taem we etkwek i hapen, i livim ol mak blong hem long ol bilding we oli bin mekem i stret gud folem disaen mo oli bildim—olsem risal, ating bae i gat ol wol simen i brokbrok, ol kapod o siling oli foldaon, mo ol windo oli brokbrok. Be bilding ia we oli disaenem mo bildimap gud bae i mekem i hapen wok blong hem blong protektem ol pipol insaed, mo wetem sam wok blong fiksim, bae oli mekem i kam niu blong i luk semmak olsem bifo.

Long semmak fasin, ol fos blong enemi oli save mekem “ol mak” o sam pat blong ol damej long laef blong yumi, nomata ol hadwok blong yumi blong bildim laef blong yumi folem disaen blong tabu plan we i stret gud evriwan. Ol “mak” ia oli ol filing blong harem nogud, o blong rigret from ol mistek mo blong no mekem evri samting oli stret gud evriwan, o blong filim se yumi no mekem gud olsem we yu mas mekem.

Be wanem we i tru mo stret i blong stap folem ol tabu plan mo disaen ia, we tru long gospel blong Jisas Kraes, yumi stap stanap yet. Plan blong laef blong yumi i no foldaon from ol hadwok blong enemi o from ol had situesen we yumi mas fesem, be, yumi stap rere blong muv i go fored.

Glad we oli promesem insaed long ol skripja olsem stamba tingting blong yumi blong stap laef⁷ i no blong andastanem se bae yumi no kasem ol hadtaem o ol harem nogud, se bae yumi no kasem ol “mak” olsem risal blong ol temtesen, blong enemi, o ol hadtaem we yumi stap fesem naoia long laef blong yumi long wol ia.

Glad ia i mas hemia we Nifae i stap tokbaot abaot laef, taem hem i talem, “Mi bin luk plante hadtaem long ol dei blong mi, be, Lod i bin blesem mi bigwan oltaem long ol dei blong mi.”⁸ !Ol dei blong hem! Iven ol dei we Nifae i safa from ol fasin blong ol brata blong hem blong no bilif mo no akseptem hem, iven taem oli fasem hem insaed long sip, iven long dei we papa blong hem, Lihae i ded, iven taem Leman mo Lemyul oli kam ol enemi blong ol pipol blong hem. Iven long ol dei ia we oli had, Nifae i filim se Lod i blesem hem bigwan.

Yumi save gat filing blong pis taem yumi save se Lod bae i neva letem Setan i temtem yumi bitim wanem we yumi save mekem. Alma i invaetem yumi blong “ lukaot gud mo prea oltaem, nogud se devel i temtem [yumi], mo bae i Tabu Spirit lidim yumi blong putum tingting i stap daon, , i save folem tingting blong narafala man, i save wet longtaem, i fulap long lav mo i save gotru long ol hadtaem wetem longfala tingting; ”⁹

Semmak samting i save aplae long ol tes blong laf Ammon i rimaenem yumi long ol toktok blong Lod: “Go … mo stanap strong wetem fasin blong save wet long taem long ol hadtaem blong yufala, mo bae mi givim sakses long yufala.”¹⁰

Oltaem, Lod i givim wan rod long yumi blong helpem yumi long taem we yumi fesem fasin blong agens, temtesen, taem we tingting i fasfas, ol samting we oli no strong long olgeta mo iven ded. Hem i talem, “Mo naoia, i tru mi talem long yufala, mo wanem mi talem long wan, mi talem long evriwan, yufala i mas stap glad, ol smol pikinini; from we mi stap long medel blong yufala, mo mi no livim yufala fogud.”¹¹ !Bae Hem i neva lego yumi!

Mi prea se bae yumi gohed blong bildimap laef blong yumi folem ol plan mo teknikol instraksen blong tabu disaen we Papa blong yumi i krietem mo we i hapen tru long Sevya blong yumi, Jisas Kraes. Taswe, from gladhat blong Sevya we i kam long yumi tru long Atonmen blong Hem, bae yumi gat sakses taem yumi stap mekem plan blong wan laef blong winim sin, winim temtesen mo gat paoa blong winim harem nogud, ol hadtaem long laef blong yumi. Mo tu, bae yumi stap long wan situesen blong kasem ol blesing we Papa mo Sevya blong yumi we Tufala i bin promesem tru long lav blong Tufala. Long nem blong Jisas Kraes, amen.