Folem Jisas Kraes wetem Ol Wokbaot blong Fet

Tangkyu kwaea long singsing ia “Fet long Evri Wokbaot.” Miusik mo ol toktok blong singsing ia oli raetem long 1996, we i kam long Brata Newell Dayley¹ taem oli stap rere long 150 aniveseri blong ol fas paeonia we oli kam tru long Sol Lek Vale long 1847.

Nomata se singsing ia oli raetem taem oli stap rere from selebresen ia, mesej blong hem i aplae long ful wol.

Oltaem mi laekem kores:

Ol brata mo sista. Mi testifae se taem yumi folem Jisas Kraes wetem ol wokbaot blong fet, i gat hop i stap. I gat hop long Lod Jisas Kraes. I gat hop blong evriwan long laef ia. I gat hop blong winim ol mistek blong yumi, ol sore mo ol hadtaem blong yumi, mo ol tes mo trabol blong yumi. I gat hop long fasin blong sakem sin mo blong oli fogivim yu mo blong yu fogivim ol nara man. Mi testifae se i gat hop mo pis long Kraes. Hem i save helpem yumi blong go tru ol hadtaem. Hem i bin mekem hemia long ol fas paeonia, mo bae Hem i mekem tedei long wanwan long yumi.

Yia ia i makem 175 aniveseri blong ol fas paeonia we oli kam tru long Sol Lek Vale, we i mekem mi blong tingting i gobak long ol bubu blong mi blong bifo, we sam long olgeta i wokbaot stat long Nauvu i go kasem Sol Lek Vale. Mi gat ol gudfala apu-apu man mo woman we oli wokbaot long levelples taem oli yangfala. Henry Ballard we i gat 20 yia;³ Margaret McNeil we i gat 13;⁴ mo Joseph F. Smith, we bin kam namba sikis Presiden blong Jos, i gat 9 yia nomo taem hem i kasem Sol Lek Vale.⁵

Oli go tru ol hadtaem blong evri kaen long wokbaot long rod, olsem strong kolkol blong winta, sik, mo oli no bin gat inaf klos mo kakae. From samting ia, taem Henry Ballard i kasem Sol Lek Vale, hem i glad blong luk “Promes Lan” be laef long fraet se nogud wan bae i luk hem from klos we hem i werem i brokbrok mo i no kavremap bodi blong hem. Hem i haed biaen long ol bus ful dei go kasem naet. Afta bae hem i go long wan haos mo askem klos blong hem i save gohed long rod blong hem mo stap wetem papa mo mama blong hem. Hem i talem tangkyu long God se hem i kasem fiuja hom blong hem sef.⁶

Ol apu-apu man mo woman blong mi i folem Jisas Kraes wetem ol wokbaot blong fet long ol wanwan jalenj blong olgeta. Mi talem tangkyu long olgeta from oli no bin givap. Ol wokbaot blong fet blong olgeta i bin blesem mi mo ol fiuja jeneresen, semmak olsem ol wokbaot blong fet blong yu tedei we bae i blesem ol jeneresen blong yu.

Toktok ia paeonia hem i wan naon mo wan veb tu. Olsem wan naon, hem i save minim wan man we i wan long olgeta faswan blong faenem o stap long wan niu ples. Olsem wan veb, hem i save minim blong openem o mekem rere rod blong ol nara man oli folem.⁶

Taem mi tingbaot ol paeonia we oli bin mekem rere rod blong ol nara man, mi tingting faswan long Profet Josef Smit. Josef i bin wan paeonia, from wokbaot blong fet blong hem i lidim hem i go long wan tabu bus ples we hem i nildaon mo prea mo openem rod long yumi blong kasem gospel blong Jisas Kraes we i fulwan. Fet blong Josef blong “askem long God”⁸ long moning blong spring long 1820 i openem rod blong Restoresen blong gospel blong Jisas Kraes we i fulwan, mo hemia i tekem tu ol profet mo ol aposol we oli singaotem olgeta blong givim seves long wol bakegen tedei.⁹ Mi save se Josef Smit i wan profet blong God Mi save se ol wokbaot blong hem we i fulap wetem fet i lidim hem blong nildaon long fored blong God we i Papa mo Pikinini blong Hem Jisas Kraes we Hem i Lavem Tumas.

Ol wokbaot blong fet blong Profet Josef Smit i mekem hem i kam wan tul long han blong Lod blong karem Buk blong Momon i kam, we i wan nara testeman blong Jisas mo gladhat blong atonmen blong Hem.

Tru long fet blong Josef Smit mo fasin blong hem blong stap go tru ol hadtaem mo ol fasin blong agens, hem i bin save kam wan tul long ol han blong Lod blong stanemap Jos Ia blong Jisas Kraes long wol bakegen.

Long las jeneral konfrens, mi bin tokbaot olsem wanem fultaem misin blong mi i bin blesem mi. Mi bin gat blesing ia taem mi tij abaot naesfala plan ia blong fasin blong sevem man blong Papa blong yumi long Heven, Fas Visen blong Josef Smit, mo translesen blong hem long Buk blong Momon. Ol tijing mo doktrin ia we oli kambak, i lidim ol wokbaot blong fet blong mi blong tijim olgeta we oli wantem blong lisin long mesej blong Restoresen blong gospel.

Ol misinari blong yumi tedei oli ol paeonia blong tedei from oli serem naesfala mesej ia wetem ol pipol raon long wol, mo hemia i openem rod blong ol pikinini blong Papa blong yumi long Heven blong save Hem mo Pikinini blong Hem Jisas Kraes. Blong stap akseptem gospel blong Jisas Kraes, i openem rod blong evriwan blong rere from mo kasem ol odinens mo ol blesing blong Jos mo tempol.

Las jeneral konfrens, Presiden Russell M. Nelson i talem bakegen “se Lod i askem evri yang man we i klin inaf mo save mekem blong rere from mo givim seves long wan misin” mo se “wan misin i wan strong janis, be, i no wan mas” blong “ol yang sista we i save mekem.”⁹

Ol dia yang man mo yang woman, ol wokbaot blong fet blong yufala bae i helpem yufala blong folem invitesen blong Lod blong givim seves long ol misin—blong kam ol paeonia blong tedei—blong openem rod blong ol pikinini blong God blong faenem mo stap long kavenan rod we i lid i gobak long fes blong Hem wetem glori.

Presiden Nelson i bin wan paeonia insaed long Jos. Olsem wan Aposol hem i bin mekem rod long plante ples blong prijing blong gospel i save go. I no longtaem afta we hem i kam profet, Presiden blong Jos i bin plis long yumi blong “kam antap long paoa blong [yumi] long saed blong spirit blong kasem revelesen.”¹⁰ Hem i gohed blong tijim yumi blong mekem ol testemoni blong yumi i kam strong moa. Long wan divosen blong ol yang adalt, hem i talem se:

“Mi plis mo askem strong yufala blong tekem responsibol long testemoni blong yufala. Wok from. Tekem i blong yu. Lukaotem gud. Fidim blong bae i gro.

“[Afta] wajem ol merikel blong i hapen long laef blong yu.”¹¹

Hem i stap tijim yumi olsem wanem blong stap dipen long yumiwan moa long saed blong spirit. Hem i bin talem se “long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit we i lidim, daerektem mo kamfotem yumi wetem paoa blong Hem.”¹²

Mi testifae se Presiden Russell M. Nelson i profet blong God long wol tedei.

Sevya blong yumi Jisas Kraes, i bigfala paeonia blong stap mekem rod i rere. I tru, Hem i “rod ia”¹³ blong plan blong fasin blong sevem man i hapen blong mekem se yumi save sakem sin mo tru long fet long Hem, yumi save gobak long Papa blong yumi long Heven.

Jisas i talem: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam.”¹⁴ Hem i promes blong no save lego yumi i stap olsem nomo; Bae Hem i kam long yumi long ol taem blong tes blong yumi.¹⁵ Hem i invaetem yumi blong “kam long [Hem] wetem evri tingting blong hat mo bae [Hem i] mekem [yumi] i kam oraet.”¹⁶

Mi testifae se Jisas Kraes i Sevya mo Ridima blong yumi, Man blong toktok long bihaf blong yumi wetem Papa. Papa blong yumi long Heven i openem rod blong yumi blong gobak long Hem taem yumi folem Pikinini blong Hem Jisas Kraes we Hem i lavem tumas wetem fet long ol evri wokbaot.

Ol apu-apu man mo woman blong mi mo ol nara fas paeonia oli fesem plante hadtaem taem oli kam tru long ol wakon, ol hankat, mo wokbaot i go long Sol Lek Vale. Yumi tu bae yumi fesem ol jalenj long wanwan rod blong laef blong yumi. Yumi no stap pusum ol hankat o draevem ol wakon we oli kavremap mo krosem ol bigfala maonten mo tru long ol tik sno; yumi stap traem olsem we oli bin mekem long saed blong spirit, blong winim ol temtesen mo ol jalenj long dei blong yumi. Yumi gat ol rod blong wokbaot; yumi gat ol hil—mo samtaem ol maonten—blong klaem. Nomata ol jalenj tedei oli defren long olgeta blong ol fas paeonia, ol jalenj ia oli no kam isi long yumi.

Hem i impoten blong folem profet mo kipim ol leg blong yumi i stap strong long kavenan rod blong stap fetful olsem ol fas paeonia.

Letem yumi folem Jisas Kraes wetem fet long evri wokbaot blong yumi. Yumi nidim blong givim seves long Lod mo givim seves long wanwan long yumi. Yumi nidim blong mekem yumiwan i kam strong long saed blong spirit taem yumi stap kipim mo givim ona long ol kavenan blong yumi. Yumi mas oltaem gat filing ia se i impoten blong yumi kipim ol komanmen blong God. Setan i traem blong mekem yumi kam slak long ol komitmen mo lav blong yumi long God mo long Lod Jisas Kraes. Plis, tingbaot se sapos eniwan i lusum rod blong olgeta, bae yumi neva lus long Sevya blong yumi. Wetem blesing blong fasin blong sakem sin, yumi save tanem yumi i go long Hem. Bae Hem i helpem yumi blong lanem, gro, mo jenis taem yumi traehad blong stap long kavenan rod.

Bae yumi oltaem folem ol wokbaot blong Jisas Kraes mo wetem fet long evri wokbaot blong yumi, lukluk nomo long Hem, stap kipim ol leg blong yumi i stap strong long kavenan rod,hemia i prea blong mi wetem tingting i stap daon long nem blong Jisas Kraes, amen.