Yumi Save Mekem Ol Had Samting Tru long Hem

Long taem blong ministri blong Sevya long wol, Hem i luksave wan man we i blaen. Ol disaepol blong Jisas oli askem: “Tija, taem man ya i bon, hem i blaen. ?Be from wanem? ?From sin blong hem, no from sin blong papa mo mama blong hem?”

Stret ansa blong Sevya wetem tru lav i wantem rimaenem yumi bakegen, se Hem i luksave ol hadtaem blong yumi: “Ae blong man ya i blaen, be i no from sin blong hem, mo i no from sin blong papa mo mama blong hem, be blong God i save soemaot paoa blong hem long laef blong hem.”¹

Taem sam long ol jalenj i kam from yumi wiling blong no wantem obei, yumi save se fulap long ol jalenj blong laef oli kam from ol narafala risen. Nomata wanem stamba blong ol jalenj blong yumi, oli save kam wan spesel janis blong gro.

Oli no blokem famli blong yumi blong oli no save kasem ol hadtaem blong laef. Taem mi stap groap, mi laekem ol bigfala famli. Mi stap laekem ol famli olsem, speseli taem mi faenem Jos long yang laef blong mi tru long angkel blong mi Sarfo mo waef blong hem long Takoradi, Gana.

Taem mi mo Hannah i mared, mitufala i wantem blong mekem wanem petriakel blesing blong mitufala i talem, se bae mitufala i gat blesing wetem fulap pikinini. Be, bifo namba tri boe blong mitufala i bon, from sam risen blong helt, i kam klia se Hannah bae i nomo save gat nara bebi. Wetem glad mo tangkyu, nomata long had situesen ia blong laef we Kenneth i bon i kam long hem mo mama blong hem tu i go tru long hem, hem i kam sef mo mama blong hem i oraet. Hem i bin save stat blong tekpat fulwan long famli laef blong mifala—olsem blong go long Jos, famli prea evri dei, skripja stadi, famli haos naet mo ol gud taem aktiviti.

Nomata se mifala i mas stretem tingting ia wetem hemia blong wantem gat wan bigfala famli, mifala i glad blong putum long praktis ol tijing blong “Famle: Wan Ofisol Toktok I Go Long Wol” wetem ol trifala pikinini blong mitufala we mitufala i lavem tumas. Folem ol tijing ia i givim moa mining long fet blong mi we i stap gro.

Olsem we ofisol toktok i talem: “Mared bitwin man mo woman hem i wan stamba samting folem plan ia blong Hem we i no save finis. Ol pikinini oli gat raet blong oli bon insaed long mared laef blong papa mo mama. Oli gat raet tu blong groap long han blong papa mo mama we tufala i agri mo folem ol promes we tufala i bin mekem long mared blong tufala wetem fasin blong stap fetful long tufala oltaem.² Taem mifala i putum ol prinsipol ia long praktis, mifala i kasem blesing.

Be, long wan wiken long taem blong seves blong mi olsem wan stek presiden, mifala i bin gat wan rabis eksperiens wan we i had blong wan papa mo mama i save fesem. Famli blong mifala i kambak long wan Jos aktiviti mo kam tugeta blong lanj. Afta trifala boe blong mitufala i go aot blong pleplei raon long yad blong mifala.

Waef blong mi i gohed blong kasem filing ia se wan samting i rong. Hem i askem mi blong go jekem ol pikinini taem mitufala i stap wasem ol dis. Mi filim se oli sef from mitufala i save harem ol hapi voes blong olgeta taem oli stap pleplei.

Taem mitufala tugeta i go blong jekem ol boe blong mitufala, long sapraes blong mitufala, mitufala i faenem smol eitin manis Kenneth insaed long wan baket blong wota, we ol brata blong hem oli no luk hem. Mitufala i hariap wetem hem i go long hospital, be evri samting we mifala i mekem blong mekem hem i laef bakegen i no wok nomo.

Mitufala i harem nogud tumas se mitufala i no save gat janis blong lukaotem gudfala pikinini blong mitufala long laef ia. Nomata mitufala i save se Kenneth bae i pat blong famli blong mifala blong taem we i no save finis, mi faenem miwan, mi stap askem kwestin se from wanem God i letem hemia i hapen long mi taem mi stap mekem evri samting we mi save mekem blong fulfilim koling blong mi. Mi jes kam hom long wan long ol diuti blong mi long wok blong givhan long ol Sent. ?From wanem God i no save lukluk long seves blong mi mo sevem boe blong mitufala mo famli blong mitufala aot long trabol ia? Moa mi tingting long hemia, moa mi kros bigwan.

Waef blong mi i neva kros long mi blong no mekem folem filing we hem i bin kasem, be mi lanem wan laef lesen we i jenisim mi mo mi mekem tu (2) rul, we bae mi neva brekem.

Rul namba 1: Lisin long mo folem ol filing blong waef blong yu.

Rul 2: Sapos yu no sua long eni risen, gobak long rul namba 1.

Nomata se eksperiens ia i had tumas mo mifala i gohed blong harem nogud, bigfala harem nogud ia blong mifala, sloslo i bin go lus.³ Mi mo waef blong mi i lanem wanwan lesen aot long ded blong boe blong mitufala. Mitufala i kam blong filim yuniti mo join tugeta tru ol tempol kavenan blong mitufala; mitufala i save se, mitufala i save talem se Kenneth i blong mitufala long nekis wol from hem i bin bon insaed long kavenan. Mitufala i kasem eksperiens ia tu from nid ia blong givhan long ol nara man mo serem eksperiens ia wetem olgeta. Mi testifae se kros mo harem nogud blong mitufala i stap go lus wanwan taem mitufala i eksesaesem fet blong mitufala long Lod. Eksperiens blong mifala i gohed blong kam had be mifala i lanem wetem Aposol Pol se yumi “save mekem evri samting tru long paoa blong Kraes we i stap mekem [yumi kam strong]” sapos yumi lukluk nomo long Hem.⁴

Presiden Russel M. Nelson i tijim: “Taem we laef blong yumi i stap lukluk nomo long plan blong God blong fasin blong sevem man… mo Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi. Hem i gohed blong talem se, “Glad i kam long mo from Hem.”⁵

Yumi save stap glad mo fulap wetem pis long ol hadtaem blong yumi. Lav we yumi filim from Sevya mo Atonmen blong Hem i kam wan strong ples blong risos long yumi long ol taem blong tes. “Evri samting we i no stret tumas [mo i had] abaot laef, Atonmen blong Jisas Kraes i save mekem i kam stret.”⁶ Hem i givim komanmen, “Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis”⁷ Hem i save helpem yumi go tru ol kaen harem nogud, sik mo ol hadtaem we yumi fesem long laef ia.

Yumi faenem fulap stori long skripja abaot ol gudfala strong lida olsem Jeremaea, Job, Josef Smit, Nifae we oli no stop blong fesem hadtaem mo ol jalenj blong laef ia. Oli ol man we oli stap long wol ia, we oli lanem blong obei long Lod iven long ol had situesen.⁸

Long ol had dei long Libeti Kalabus, Josef Smit i bin singaot: “O God, ?yu yu stap wea?” Mo ?wehem nao bigfala tapolen we i kavremap ples we yu stap haed long hem?”² Lod i tijim Josef blong “stap strong”¹⁰ mo promes se sapos hem i mekem, evri samting ia bae i givim hem eksperiens, mo bae i blong gud blong hem.¹¹

Luklukbak long ol eksperiens blong miwan, mi luksave se mi lanem sam gudfala lesen long ol hadtaem blong mi long laef blong mi, ol taem we i karemaot mi long ol kamfot ples blong mi. Ol hadtaem we mi go tru long hem olsem wan yut, taem mi stap lanem abaot Jos tru long seminari, olsem wan niu memba, mo olsem wan fultaem misinari mo ol jalenj we mi fesem long edukesen blong mi taem mi stap traem blong fulfilim ol koling blong mi, mo stap lukaotem wan famli i mekem mi rere from fiuja blong mi. Moa mi stap glad taem fesem ol had situesen wetem fet long Lod, moa mi gro long fasin blong mi blong kam disaepol.

Ol had samting long laef blong yumi i no mas kam olsem sapraes taem yumi go insaed long stret mo smol rod.¹² Jisas Kraes i lanem “fasin blong stap obei tru long ol samting ia we hem i bin safa from.”¹³ Taem yumi folem Hem, speseli long ol hadtaem blong yumi, yumi save gro blong kam moa olsem Hem.

Wan long ol kavenan we yumi mekem wetem Lod insaed long tempol i blong laef folem loa blong sakrifaes. Sakrifaes i bin oltaem pat blong gospel blong Jisas Kraes. Hem i wan rimaenem yumi long bigfala sakrifaes blong atonmen blong Jisas Kraes blong evriwan we oli bin laef o bae oli laef yet long wol.

Pikja

Ol misinari blong elda Morrison

Mi save se Lod oltaem i kompensetem yumi from ol disaea blong yumi we i stret mo gud. ?Tingbaot plante pikinini we petriakel blesing blong mi i promesem? Blesing ia i bin fulfil. Mi mo waef blong mi i givim seves wetem sam handred misinari, blong moa long 25 kaontri, long Gana Kap Kos Misin. Oli impoten tumas long mitufala olsem se oli ol stret pikinini blong mitufala.

Mi testifae se yumi gro long saed blong fasin blong stap wan disaepol taem yumi eksasaesem fet long Lod long ol taem blong hadtaem. Taem yumi mekem olsem, bae Hem i gat bigfala sore blong mekem yumi kam strong moa mo helpem yumi karem ol hevi samting blong yumi. Long nem blong Jisas Kraes, amen.