Paoa blong Toktok blong God
Yumi lanem se i gat paoa long toktok blong ol profet blong bifo mo tedei we i stret gud from se ol toktok blong olgeta i toktok blong Lod.
Insaed long Buk blong Momon, yumi ridim abaot wan impoten desisen we profet Alma i bin mekem long wan naesfala ves long skripja. Bifo yumi luklukbak long ol toktok we yumi save gud long hem, plis tingting wetem mi long ol had situesen we oli bin mekem desisen ia long hem.
Wan smol grup blong ol pipol we oli singaotem olgeta ol man blong Soram, oli seraotem olgeta long ol man blong Nifae1 mo kam tugeta kolosap long graon blong ol man blong Leman.2 Ol man blong Nifae oli jes winim ol man blong Leman long wan bigfala faet we plante taosen man i ded,3 mo “oli fraet bigwan se Ol Man blong Soram bae oli statem fasin blong fren wetem Ol Man blong Leman, mo we samting ia bae i mekem wan bigfala lus.”4 Wetem ol tingting blong wo, Alma i lanem se Ol Man blong Soram, we “oli gat toktok blong God i prij long olgeta,”5 oli stap tanem olgeta blong wosip long ol aedol mo “prapa spolem gud ol wok blong Lod.”6 Evri samting ia i mekem Alma i wari mo i mekem hem i “harem nogud.”7
Taem hem i luk se situesen i fasfas mo i had, Alma i tingting hevi long wanem bae hem i mekem. Long desisen blong hem, yumi ridim ol toktok we oli holemtaet blong givim insperesen mo instraktem yumi blong gotru long situesen we i fasfas mo i had long dei blong yumi.8
“Mo nao, from we trutok we oli prijim i lidim ol man blong mekem wanem we hem i stret—yes, hem i gat moa bigfala paoa long tingting blong ol pipol bitim naef blong faet, o eni narafala samting, we i bin hapen finis long olgeta—from hemia, Alma i ting se i gat nid se oli mas traem paoa blong toktok blong God.”9
Wetem ol posibol ansa, fet blong Alma i lidim olgeta blong oli dipen long paoa blong toktok. Hem i no blong nating we sam long ol tijing we i gat paoa oli faenem olgeta insaed long skripja mo oli prijim olgeta long semtaem ia nomo, folem tingting ia. Insaed long japta 32 mo 33 long buk blong Alma yumi ridim abaot ol tijing blong Alma abaot fet long Lod Jisas Kraes, mo long japta 34 yumi faenem ol tijing blong Amulek abaot Atonmen blong Jisas Kraes.
Pikja blong Paoa blong Toktok blong God
Yes, truaot long skripja yumi ridim abaot ol merikel blesing we i kam long olgeta we oli jusum blong traem ol toktok blong God long ol laef blong olgeta.10 Mi invaetem yu blong tingting hevi long ol eksampol ia wetem mi taem yumi stap lukluk nomo long Buk blong Momon—wan buk we Presiden Russel M. Nelson i tokbaot long “ol lata-dei blong yumi olsem wan gaed blong stap laef.”11
Faswan, rimaenem ol pipol olsem wanem Lod i sevem ol papa blong olgeta, Alma i tijim: “Luk, hem i jenisim hat blong olgeta; yes hem i wekemap olgeta long wan dip slip, mo oli wekap long God. Luk, oli stap long medel blong ol klaod blong tudak; be, laet blong toktok ia we i no gat en.”12 Maet bae yu filim se yu stap long medel blong tudak. ?Yu wantem tumas gaed long saed blong Spirit? Sapos yes, plis traem paoa blong toktok blong God.
Nambatu, tingting i gobak taem Ol Man blong Leman i jenisim fasin blong i kam long Lod, Amon i talem, “Luk, i gat hamas plante taosen long ol brata blong yumi we hem i bin tekemaot olgeta long ol soa blong hel; mo oli tekem olgeta oli kam blong singim singsing blong lav blong pemaot man, mo samting ia, from paoa blong toktok blong hem we i stap long yumi.13 Ol brata mo sista, i gat plante long yumi we oli wantem tumas blong wan man we yumi lavem tumas i kam singsing lav ia we i pemaot man. Wetem evri traehad, letem yumi tingbaot blong traem paoa blong toktok blong God, we i stap long yumi.
Nambatri, insaed long Buk blong Hileman yumi ridim se: “Yes, yumi luk se eni man we i wantem i save holemtaet toktok blong God, we i laef mo i gat paoa, we bae i save brekem ol trik mo ol rop blong trap mo ol plan blong devel, mo lidim man [mo woman] blong Kraes long wan rod we i stret mo i no isi i go long narasaed long bigfala hol blong harem nogud we i no gat en … mo putum sol blong olgeta … long raet han blong God long kingdom blong heven.”14 ?Yu stap lukaot blong no pas tru long trik mo ol plan blong devel we i plante long ol tijing blong wol tedei? ?Yu gat tingting ia blong karemaot bigfala klaod blong konfius long wol mo lukluk nomo long kavenan rod ia? Plis traem paoa mo atoriti blong toktok blong God.
Olsem wan we i jenis tru long paoa blong toktok blong God, miwan mi wantem testifae long trutok ia we dia profet Presiden Russel M. Nelson i tijim i naes long yumi: “Long mi paoa blong Buk blong Momon i wan pruf long wan bigfala jenis we i kam long laef blong olgeta we oli ridim wetem wan tru hat, wetem wan tru tingting blong wantem save, wetem fet long Kraes.’ Plante konvet oli lego wanem oli laekem tumas blong mekem blong oli save folem buk ia. … Bae hem i wan gudfala tul blong karem ol sol i kam long Jisas Kraes.”15
Stamba blong Paoa
Long hemia mo wetem ol narafala pikja, yumi witnes long paoa blong toktok blong God long laef blong ol pikinini blong Hem. Yumi save askem:?Wanem nao stamba blong paoa ia?
Taem yumi stap tingting long kwestin ia, hem i impoten blong tingbaot se toktok ia “toktok,” olsem we oli yusum long skripja, i gat tu mining. Elda David A. Bednar i jes tijim yumi se “wan nem blong Jisas Kraes hem i ‘Toktok,’” mo long “tijing blong Sevya, olsem we oli rekodem long tabu skripja, i ‘toktok tu.’”16
Profet Nifae i soemaot rilesensip bitwin tufala mining ia taem hem i raetem hemia: “Lisin gud long ol toktok ia mo biliv long Kraes; mo sapos yufala i no biliv long ol toktok ia, biliv long Kraes. Mo sapos bae yufala i biliv long Kraes bae yufala i biliv long ol toktok ia, from oli ol toktok blong Kraes, mo hem i bin givim ol toktok ia long mi.”17 Yumi lanem se i gat paoa long toktok blong ol profet blong bifo mo tedei long stret toktok from se ol toktok blong olgeta i toktok blong Lod.18 Ol dia fren blong mi, blong akseptem trutok ia we i no save finis i impoten long olsem wanem yumi laef long ol lata dei ia19 olsem we oli profesae long hem, bae i gat “hadtaem blong kasem kakae. Bambae yufala i hanggri tumas, mo yufala i tosta tumas, be i no from wota. Long taem ya, bambae yufala i wantem tumas blong harem tok blong mi.”20
Long en, paoa blong toktok blong God i Lod Jisas Kraes.21 Olsem we yumi andastanem moa fulwan, yumi save mekem wan jenis we i no save finis wetem koneksen ia bitwin rol blong ol profet blong Hem mo wetem hemia blong Sevya. Lav blong yumi long Hem, i mekem tingting blong yumi blong kam moa kolosap long Hem i blong folem lav blong Hem,22 bae i mekem yumi traem paoa blong toktok blong God long laef blong yumi—tugeta wetem paoa ia we i kam long Hem tru long Sevya mo Ridima23 mo long ol toktok blong ol “wokman we Lod i bin jusum.”24 Bae yumi kam blong luk save se, olsem ol narafala we i kam blong help blong stadi long Sevya mo ol toktok blong profet blong Hem, oli neva mas kam blong tekem ples blong olgeta. Yumi mas lan gud mo oltaem,25 stret long stamba.26
Mi talem lav blong mi long yufala ol dia brata mo sista blong mi. Wetem lav ia, mi askem strong long yufala blong gat eksperiens long paoa blong toktok blong God, speseli tru long Buk blong Momon, long evri dei laef blong yufala. Mo taem yu mekem hemia, bae yu eksperiensem promes blong profet we i kam long Presiden Russell M. Nelson: “Mi promes se taem yufala i stap stadi long Buk blong Momon wetem prea, evri dei,bambae yufala i save mekem ol moa gud desisen—evri dei. Mi promesem yufala se taem yufala i stap tingting hevi long wanem yu stap stadi long Buk blong Momon, bambae ol windo blong heven oli open, mo bae yu kasem ol ansa blong kwestin blong yu, mo bae Hem i soem rod blong laef blong yu. Mi promes se, taem we, evri dei, yu draonem yuwan long Buk blong Momon, bae yu gat proteksen long ol ivel blong tedei.”27
Mi testifae se Papa long Heven i givim toktok long yumi from se Hem i lavem yumi stret evriwan mo i wantem wanwan long yumi blong gobak hom blong stap wetem hem foreva. Mi testifae long “Tok ya … i kam man,”28 iven Jisas Kraes, mo long paoa blong Hem blong sevem mo pemaot yumi. Mi save se paoa blong Hem i pas tru long ol toktok blong ol profet blong Hem, tugeta long bifo mo naoia.
Hem i prea blong hat blong mi se bae yumi kasem save mo tingting i stap daon blong holem taet29 ol toktok blong God mo stap long kavenan rod ia we i lid kasem ples we yumi save kam olsem wan god mo kasem laef we i no save finis.30 Bae yumi gohed blong gat eksperiens long bigfala jenis we i stap blong wanwan long yumi tru long paoa blong Toktok blong God.31 Long nem blong Jisas Kraes, amen.