Stap Tru long God mo Wok blong Hem

Las Oktoba, mi bin kasem wan asaenmen, wetem Presiden M. Russell Ballard mo Elda Jeffrey R. Holland, blong visitim Yunaeted Kingdom, ples we mifala tri i mekem misinari wok olsem ol yang misinari. Mifala i bin gat janis blong tij mo testifae, mo tu visitim ol ples we Jos i bin stat long hem long ol Aelan blong Briten, ples we bubu blong bigfala bubu man blong mi Heber C. Kimball mo ol kompanion blong hem oli stap olsem ol fas misinari.¹

Presiden Russell M. Nelson, i stap mekem fani long mifala abaot asaenmen ia, se kaen asaenmen ia i no stap hapen olsem blong tri Aposol i visitim eria we oli bin mekem misinari wok long hem taem oli yang. Hem i luksave se evri Aposol tu oli wantem kasem asaenmen blong visitim ples we oli bin go long misin long hem. Wetem wan bigfala smael long fes blong hem, hem i eksplenem klia paten ia se sapos i gat tri nara grup blong Aposol we oli givim seves long sem misin ova long 60 yia i pas, olgeta ia i save kasem semmak asaenmen.

Pikja

Hiba<nb/>C. Kimbol

Blong rere from asaenmen ia, mi ridim bakegen Laef blong Heber C. Kimball, we wan apu boe i raetem, Orson F. Whitney, we afta hem i kam wan aposol. Mama blong mi i givim buk ia long mi taem mi kolosap 7 yia. Mifala i stap rere blong go atendem dedikesen blong memori ston blong This Is the Place Monument long 24 Julae 1947, we Presiden George Albert Smith nao i mekem.² Hem i wantem blong mi save moa abaot bubu blong mi, Heber C. Kimball.

Buk ia i gat bigfala stori abaot Presiden Kimball we i impoten long taem blong yumi tedei. Bifo mi serem toktok ia, letem mi serem wan smol bakgraon.

Taem oli sarem Profet Joseph Smith long Libeti Kalabus, Aposol Brigham Young mo Heber C. Kimball oli bin gat responsabiliti ia blong karemaot ol Sent long Misuri long rabis hadtaem blong agens. Namba blong ol Sent blong muvaot long taem ia i bigwan, from oda we i kam long Gavna Lilburn W. Boggs.³

Kolosap 30 yia afta, taem Heber C. Kimball i stap long Fas Presidensi, i tingting hevi long histri ia wetem niufala jeneresen, mo i tijim, “Letem mi talem long yufala, se plante long yufala bae i luk taem we bae yufala i gat ol trabol, hadtaem mo fasin blong agens we bae yufala i save fesem, mo plante janis blong soem se yufala i stap tru long God mo wok blong Hem.”⁴

Heber i gohed: “Blong mitim ol hadtaem we oli stap kam, i nid blong yufala i gat wan save blong trutok blong wok ia blong yufalawan. Ol hadtaem ia bae hem i fasin ia we wan man o woman we i no gat save ia o witnes ia blong hemwan bae i foldaon. Sapos yufala i no gat testemoni, laef folem wan stret laef, mo singaotem Lod mo no stop kasem taem we yufala kasem wan. Sapos yu no mekem bae yu no save stanap. … Taem ia bae i kam, long taem we man o woman bae oli no save gohed blong stanap strong long laet blong narafala man. Wanwan bae i nid blong letem laet we i stap long hemwan i lidim hem. … Sapos yu no gat laet ia bae yu no save stanap; taswe, lukaotem testemoni blong Jisas mo holem taet strong, from taem bae tes blong taem i kam bae yu no save mestem rod mo foldaon.”⁵

Wanwan long yumi i nidim wan testemoni long wok blong God mo long⁶ stret rol blong Jisas Kraes. Long Seksen 76 blong Doktrin mo Ol Kavenan i stap tokbaot trifala digri blong glori mo i stap komperem selestial glori long san. Mo afta i komperem terestrial kingdom long mun.⁷

Hem i wan sapraes blong luk san i gat laet blong hemwan, be mun i no gat laet o “i yusum laet blong nara ples.” Abaot terestrial kingdom, ves 79 i talem, “Olgeta ia, oli olgeta we oli no strong long testemoni long saed blong Jisas.” Yumi no save kasem selestial kingdom mo laef wetem God Papa long laet blong narafala man; yumi nidim testemoni blong yumiwan abaot Jisas Kraes mo gospel blong Hem.

Yumi laef long wan wol we rabis fasin i kam plante⁸ mo ol hat i tanem i go longwe long God from ol tingting blong man.⁹ Wan long ol gudfala eksampol long skripja blong Heber Kimball abaot lukaotem wan testemoni blong wok blong God mo Jisas Kraes i stap long toktok blong Alma i go long trifala boe blong hem—Hileman, Siblon, mo Korianton.¹⁰ Tu(2) long ol boe blong hem oli bin tru long God mo wok blong Hem. Be wan boe i mekem sam nogud desisen. Long mi, samting we i moa impoten long kaonsel blong Alma i we hem i givimaot toktok ia olsem wan papa blong gud blong ol pikinini blong hem.

Fas wari blong Alma, olsem Heber C. Kimball, i we wanwan i gat wan testemoni blong Jisas Kraes mo stap tru long God mo long wok blong Hem.

Long tijing blong Alma we i go long boe blong hem Hileman, hem i mekem wan tru promes se olgeta we oli “putum tras blong olgeta long God, bae God i sapotem olgeta long tes blong olgeta, mo trabol blong olgeta, mo ol hadtaem blong olgeta, mo God bae i leftemap olgeta long las dei.”¹¹

Taem Alma i luk wan enjel i kamkamaot long hem, hemia i hapen wanwan taem nomo. Filing ia we i paoa blong Tabu Spirit i hapen oltaem. Ol filing ia oli impoten semmak olsem taem enjel i kamkamaot long man. Presiden Joseph Filding Smith i bin tijim: “Ol filing we i kam long sol tru long Tabu Spirit oli moa impoten bitim wan visen. Taem Spirit i toktok long spirit, wanem i raet i stap long sol i moa strong mo i had blong waepemaot.”¹²

Hemia i lidim yumi i go long kaonsel blong Alma long nambatu boe blong hem, Siblon. Siblon i wan stret mo gud man olsem brata blong hem Hileman. Impoten toktok we mi wantem tokbaot hem i Alma 38:12we wan pat i rid olsem, “Meksua se yu kontrolem ol strong filing blong yu, blong mekem se yu save fulap wetem lav.“

Kontrol i wan gudfala toktok. Taem yumi ron long wan hos, yumi kontrolem hos ia. Wan nara gud toktok we bae i semmak long toktok ia, i lidim, stap longwe. OlTesteman i talem long yumi se yumi singaot from yumi glad taem yumi lanem se bae yumi kasem ol bodi blong yumi.¹³ Bodi ia i no ivel—hem i naes tumas mo i impoten—be sam strong filing mo tingting, sapos i yus gud mo gat kontrol, bae i save seperetem yumi long God mo long wok blong Hem mo go agensem testemoni blong yumi.

Bae yumi tokbaot tu long ol strong filing mo tingting ia—faswan, kros mo seken, rabis tingting we ae i wantem.¹⁴ Taem i nogat kontrol long tufala strong filing ia i save mekem hat i soa bigwan, katem daon paoa blong Spirit, mo seperetem yumi long God mo wok blong Hem. Enemi i tekem evri janis blong fulumap laef blong yumi wetem ol pikja blong rabis fasin mo ol rabis tingting long saed blong seks.

Long sam famli, hem i no wan fasin nogud blong wan hasban we i kros i kilim wan waef o wan pikinini. Long Julae mi bin tekpat long wan Yunaeted Kingdom Palamentri Forom long London.¹⁵ Vaelens agens woman mo yut i stap olsem haelaet mo mein problem raon long wol. Antap long ol vaelens ia, ol narawan oli fesem ol kaen abius long saed blong toktok. Ofisol toktok blong famli i talem long yumi se “olgeta we oli stap mekem nogud long ol man, woman o pikinini blong olgeta, oli mas lukaot from wan dei God bae i jajem olgeta.”¹⁶

Presiden Nelson i askem strong long yestedei moning ia.¹⁷ Plis mekemap tingting blong yu se wanem we papa mo mama blong yu i bin mekem, weta i abiusum o i no abiusum yu, be yu, yu no mas abiusum man, woman o ol pikinini blong yu long saed blong bodi o long toktok o long filing.

Long dei blong yumi tedei, jalenj we yumi stap fesem oltaem hem i fasin blong rao mo abius long saed blong toktok insaed wan sosaeti. Long plante wei, fasin blong kros mo abius long toktok, naoia i tekem ples blong fasin blong save tingting gud, toktok raon, mo gudfala fasin. Plante oli lego advaes blong senia Aposol blong Sevya, Pita, blong lukaotem ol gudfala fasin we i olsem blong Kraes olsem, blong gat kontrol, gat longfala tingting, gat fasin we i olsem blong god, lavem ol brata blong yufala, mo gat jareti.¹⁸ Oli lego tu fasin blong putum tingting i stap daon we i olsem blong Kraes.

Blong save kontrolem fasin blong stap kros mo gat kontrol long ol nara filing, yumi nidim blong lidim wan laef we i klin blong save kontrolem tingting blong yumi, lanwis, mo ol aksen. Yumi nidim blong stap longwe long ponografi, lukluk gud long wanem kaen samting nao yumi stap karem i kam long hom blong yumi tru long intanet, mo no letem evri kaen fom blong sin blong kam.

Hemia i karem yumi i go long kaonsel blong Alma long Korianton. Korianton i no olsem ol brata blong hem, Hileman mo Siblon, hem i tekpat long fasin blong gat rabis tingting long saed blong seks.

From se Korianton i tekpat long rabis tingting, i nid blong Alma i tijim hem abaot sakem sin. Hem i mas tijim hem from wanem sin i nogud mo afta hao blong sakem sin.¹⁹

So, kaonsel blong Alma i blong stopem samting i blong kontrolem ol filing blong lav mo sore, be kaonsel blong olgeta we oli brekem loa, i blong sakem sin. Presiden Nelson i bin givim wan tru toktok abaot fasin blong sakem sin long Epril 2019 jeneral konfrens. Hem i mekem i klia se sakem sin evri dei i pat blong laef blong yumi. Blong sakem sin, i no wan spesel taem; hem i wan rod blong folfolem. Hem i ki blong hapines mo pis long maen. “Blong sakem sin evri dei, i rod blong folem blong kam klin evriwan, mo fasin blong stap klin evriwan i tekem paoa i kam.”²⁰ Sapos Korianton i bin mekem wanem Presiden Nelson i talem, bae hem i save sakem sin kwik taem hem i stat blong gat ol rabis tingting long saed blong seks. Bigfala fasin blong brekem loa ia bae i no save hapen.

Lasfala toktok we Alma i givim long ol boe blong hem i sam long ol impoten doktrin insaed long evri skripja. I tokbaot Atonmen we Jisas Kraes i bin mekem.

Alma i testifae se bae Kraes i karemaot sin.²¹ Sapos Atonmen blong Sevya i nogat, prinsipol blong jastis we i no save finis, bae hem i panismen.²² From Atonmen blong Sevya, sore i stap blong olgeta we oli sakem sin mo letem olgeta i gobak long ples we God i stap long hem. Bae i gud blong yumi sapos yumi tingting hevi long ol gudfala doktrin ia.

I no gat man i save gobak long God tru long gud wok blong hem nomo; yumi evriwan i nidim sakrifaes blong Sevya. Evriwan i mekem sin, mo hem i tru long Atonmen blong Jisas Kraes nomo i mekem se yumi save kasem sore mo laef wetem God.²³

Alma i givim gudfala toktok tu long Korianton blong yumi evriwan we oli bin mo bae go tru long fasin blong sakem sin nomata ol sin i smol o i nogud tumas olsem hemia we Korianton i bin mekem. Ves 29 long Alma japta 42 i rid, “Mo nao, boe blong mi, mi wantem se bae yu nomo wari from ol samting ia, mo yu wari from ol sin blong yu nomo, wetem wari ia we bae i tekem yu daon blong yu sakem sin.”

Korianton i lisin long toktok blong Alma mo sakem sin mo finisim gud misin blong hem wetem ona. From Atonmen blong Sevya, evriwan i save kam oraet.

Long dei blong Alma, long dei blong Heber, mo long dei blong yumi, yumi evriwan i nid blong lukaotem testemoni blong yumiwan blong Jisas Kraes, kontrolem ol filing blong yumi, sakem ol sin blong yumi, mo fanem pis tru long Atonmen blong Jisas Kraes mo stap tru long God mo wok blong Hem.

Long wan toktok we i kamaot i no longtaem mo long sosol media post, Presiden Russell M. Nelson i talem long wei ia: “Mi prea wetem yufala blong gat testemoni blong yufala blong Jisas Kraes. Wok from. Gat blong yuwan. Lukaotem gud. Lukaotem blong i gro. Afta, luk bae ol merikel i hapen long laef blong yu.”²⁴

Mi glad se naoia bae yu harem Presiden Nelson i toktok. Mi testifae se Presiden Nelson i profet blong dei blong yumi. Mi lavem mo kipim long hat ol gudgudfala insperesen mo gudfala toktok we yumi stap kasem long hem.

Olsem wan Aposol blong Lod Jisas Kraes, Mi stap talemaot witnes blong mi se Sevya i tabu mo we Atonmen blong Hem i ril long nem blong Jisas Kraes, amen.