?Yu Yu Wiling Yet?

Wan Sandei, taem mi stap rere blong tekem sakramen afta long sam wik blong wok blong stek konfrens, wan gudfala tingting i pas i kam long maen blong mi.

Taem ol pris oli stat blong blesem bred, ol toktok we mi bin harem plante taem bifo i kam strong long maen mo hat blong mi. “Mo testifae long yu, O God, yu yu Papa we i no save finis, se oli rere gud blong tekem long olgeta, nem blong Pikinini blong yu, mo tingbaot hem mo stap obei long ol komanmen blong hem we hem i bin givim long olgeta; mekem se oltaem, oli gat Spirit blong hem i stap wetem olgeta.”¹ ?Hamas taem nao yumi bin testifae long God se yumi wiling?

Taem mi stap tingting hevi long mining blong ol toktok ia, toktok ia wiling i kam moa impoten long mi, neva olsem bifo. Maen mo hat blong mi i fulap wetem swit mo tabu eksperiens blong lav mo fasin blong talem tangkyu from sakrifaes blong Sevya we i bin pem praes, mo impoten rol blong Hem long plan blong Papa blong pemaot man, blong famli blong mi mo mi. Afta, mi harem mo filim dip insaed ol toktok blong prea blong wota: “blong oli testifae long yu … blong oltaem oli tingbaot hem.”² Mi save klia long taem ia se blong kipim ol kavenan blong mi, i nid blong mekem moa bitim blong gat ol gudfala tingting nomo.

Blong stap tekem sakramen i no wan simpol relijin seremoni we yumi agri blong stap mekem. Hem i wan rimaenda we i gat paoa abaot Atonmen blong Sevya we i ril, i no gat en, mo nid ia blong oltaem tingbaot Hem mo kipim ol komanmen blong Hem. Blong gat strong tingting long hat blong putum tingting i stap strong nomo long Sevya i impoten tumas, hem i tufala mesej blong skripja ia nao we oli stap kwotem long Jos: ol prea blong sakramen. Taem yumi andastanem trutok blong wanem Papa long Heven i putumaot long yumi wanwan tru long Pikinini blong Hem, hemia i sapos blong mekem yumi wantem blong givim bak wetem wan wiling hat.

?Fandesen blong yumi long saed blong spirit, oli bildimap i strong long Jisas Kraes?

Sapos fandesen blong yumi long saed blong spirit i no dip o i stap antap nomo, bae yumi save foldaon long ol fasin blong wol o jusum wan rod we i moa had long yumi. Mo sapos yumi akseptem ol samting we Jos i talem long yumi blong no yusum o ol sosol polisi we oli no stret long saed blong politik, ol samting we yumi no sapos o no nid blong mekem mo ol yus blong taem, long en hemia bae i mekem tingting blong yumi i kam slak. Yumi no mas gat tingting ia se prinsipol blong save stap wiling blong mekem samting, i no save miks wetem olgeta we oli yusum tumas sosol media o TikTok. Ol tijing blong wol, oltaem, i no save go wan wetem tabu trutok.

Jos i wan ples blong ol man we oli no stret evriwan mo oli lavem God mo we oli wiling blong folem Lod Jisas Kraes. Fasin ia blong stap wiling blong mekem samting, i kamaot long Jisas we i Kraes, Pikinini blong God we i stap laef. Tabu trutok ia, man bae i save nomo tru long paoa blong Tabu Spirit. Mekem se, fasin blong yumi blong stap wiling blong mekem samting, i kam long yumi tru long hamas taem yumi komitim yumi blong stap long ol tabu ples we paoa blong Tabu Spirit i stap long hem.

Bae yumi mekem gud moa blong spendem taem long storian long ol wari blong yumi we i gat mining wetem wan Papa long Heven we i gat lav, mo spenem smol taem blong lukaotem tingting blong nara ol voes. Yumi save jusum tu blong jenisim ples we yumi stap kasem nius blong yumi evri dei long ol toktok blong Kraes insaed long ol tabu skripja mo ol toktok blong ol profet blong Hem we oli stap laef.

Fasin blong soem hamas i impoten blong yumi kipim sabat dei i tabu, pem wan ones taeting, holem wan tempol rekomen we i laef, stap atendem tempol, mo onarem ol tabu kavenan blong yumi, oli ol samting we oli gat paoa blong soemaot se yumi wiling mo komitim yumi tru blong mekem ol wok ia. ?Yumi wiling blong putum moa bitim smol efot we yumi stap mekem blong mekem fet blong yumi long Kraes i kam moa strong?

Papa long Heven i lavem yumi i stret evriwan, be lav ia i kam wetem ol bigfala tingting biaen long hem. Hem i wantem yumi blong putum Sevya faswan long laef blong yumi. Sevya i eksampol blong yumi we i stret evriwan, blong wiling blong save stap biaen long evri samting we Papa i tingting blong putum long Hem. Hem i “rod ia, trutok ia, mo laef ia.”³ Hem i glad blong pemaot ol sin blong yumi. Hem i bin glad blong pemaot ol sin blong yumi, Hem i mekem ol hevi samting we yumi stap karem i kam laet, i ronemaot fraet, i givim paoa long yumi, i givim pis mo andastaning long hat blong yumi long taem blong sore mo harem nogud.

Yet fet long Jisas Kraes hem i wan joes. “Sapos [yumi] save go kasem wan bilif we i inaf blong akseptem”⁴ ol toktok blong Hem, yumi gat wan ples blong statem o blong putum bak wokbaot blong yumi long fet. Ol toktok blong Hem, sapos i gat ples long hat blong yumi, olsem wan sid mo lukaotgud long hem bae i putumaot ol rus blong hem mo fet blong yumi bae i gro i kam strong mo kam wan prinsipol blong aksen mo paoa. Buk blong Momon i risos blong yumi we i gat moa paoa blong putum bak mo mekem fet i gro. Fasin blong gat wiling hat i mekem fet i wok.

Laef ia i kam long tabu plan, i no isi mo bae i gat ol taem we laef bae i had. Nomata long hemia, “[yumi] stap ia, blong [yumi] save gat glad”!⁵ Taem yumi lukluk nomo long Sevya mo ol tabu kavenan blong yumi oli karem glad we i save stap longtaem i kam long laef blong yumi! Stamba tingting blong laef ia i blong pruvum hamas yumi wantem mekem samting. “Bigfala wok long laef mo praes blong kam disaepol, i blong lanem wil blong Lod mo mekem olgeta.”⁶ Fasin blong stap ol tru disaepol i lid i go long wan glad we i fulwan. ?Yumi wiling blong pem praes blong kam disaepol?

Rod blong kavenan i no wan simpol jeklis; i proses blong stap gro long saed blong spirit mo komitmen long Jisas Kraes i kam moa dip. Stamba tingting blong evri komanmen, prinsipol, kavenan, mo odinens oli blong bildim fet mo tras long Kraes. Strong tingting blong yumi blong mekem laef blong yumi i folem Kraes, bae i mas stap long rod ia oltaem—i no mas dipen long ol situesen, o pleplei wetem. Yumi no save tekem ol dei blong spel o spel blong yuwan “blong stanap olsem witnes blong God long oltaem mo long evri samting mo long evri ples.”⁷ Blong stap wan disaepol hem i no jip, from kompanionsip blong Tabu Spirit i no gat praes.

I tru se Lod i stap tingting long dei blong yumi taem i stap tij abaot parabol blong ol ten yangfala gel. Long ol faef we oli waes Hem i talem: oli “bin tekem Tabu Spirit olsem gaed blong olgeta, mo oli no bin folem ol giaman toktok,”⁸ long olgeta we oli no waes laet blong olgeta “i ded” from i no gat oel.⁹ Maet toktok blong Nifae i talemaot gud ol fetful memba ia blong Jos long wan taem: “Mo ol narafala bae hem i mekem oli kwaet, mo giaman long olgeta blong lidim olgeta oli go long sefples we i blong wol, blong mekem se bae oli talem se: evri samting i oraet long Saeon.”¹⁰

Sef ples we i blong wol i luk long mo trastem ol samting blong wol be i no Kraes—long ol nara toktok, i stap luk tru long glas blong wol be i no long glas long saed blong spirit. Tabu Spirit i givim yumi paoa ia blong save luk “ol samting olsem we oli rili stap, mo … olsem we bae oli rili stap.”¹¹ Mo “tru long paoa blong Tabu Spirit, bae [yumi save] trutok long saed blong evri samting ”¹² mo no save lisin long ol giaman. Yumi putum Kraes i kam faswan long laef blong yumi mo mekem promes blong obei ol komanmen blong Hem wetem wan wiling hat, i no from se yumi blaen be from se yumi save luk.¹³

?Be wanem i hapen long ol gel we oli no waes? ?From wanem oli no wantem blong karem wan kontena blong oel long saed blong spirit? ?Oli bin pusumbak taem? ?Ating from oli, no series tumas, from oli luk se i no gat nid? I no mata long wanem risen, oli no luksave impoten rol blong Kraes. Hemia i stamba wok blong Setan blong giaman, mo from wanem laet blong testemoni blong olgeta sloslo i go ded from i no gat inaf oel long saed blong spirit. Parabol ia i wan simbol blong taem blong yumi. Plante oli lego Sevya mo ol kavenan blong olgeta sam longfala taem bifo oli lego Jos blong Hem.

Yumi laef long wan taem we yumi no save yet, be ol profet blong bifo oli bin luk taem ia mo tokbaot dei we bae Setan i putum “long hat blong ol pikinini blong man, mo mekem olgeta oli kros long ol samting we i gud.”¹⁴ Plante long ol yut blong yumi, mo plante long yumi, oli laef insaed long wol blong onlaen, fulap long entetenmen mo mesej we oli go agensem ol tabu aedentiti mo bilif long Kraes.

Laef we i gat moa paoa blong tajem laef blong wan pikinini hem i gud mo stret eksampol blong wan papa mo mama mo ol apu man mo apu woman we oli fetful blong kipim ol tabu kavenan blong olgeta. Ol paren oli tijim ol pikinini blong olgeta fet long Lod Jisas Kraes, blong mekem se olgeta tu “oli save gat save long wanem ples oli save lukluk long hem blong kam klin aot long sin blong olgeta”¹⁵mo oli save karem ol laet blong testemoni blong olgeta we i fulap wetem oel long saed blong spirit. Taem yu kipim kavenan samsam taem nomo yu kasem blesing blong spirit tu samsam taem nomo. Ol pikinini mo apu pikinini olgeta we oli stap kam antap long taem naoia oli kasem moa damej long saed blong spirit ?Ol papa mo mama mo ol bubu, yumi wiling yet?

Presiden Nelson i bin tijim: “Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”⁶ Hemia hem i wan klia woning we i no gat eni mistek long hem blong yumi fulumap ol oel blong laet blong yumi. ?Yumi wiling yet blong folem ol profet we oli stap laef? ?Wanem level blong oel long saed blong spirit long laef blong yu? ?Wanem ol jenis long long laef blong yuwan we bae i save mekem yu yu gat paoa blong Tabu Spirit evri taem?

Tedei, semmak long taem blong Jisas, bae i gat olgeta we oli tanem baksaed blong olgeta mo no wantem blong akseptem praes blong stap wan disaepol. Taem strong fasin mo fasin blong agens i stap kam antap agensem Jos blong Sevya mo olgeta we oli folem Hem, fasin blong yumi blong stap disaepol i nidim blong gat moa wiling hat blong wok blong stretem mo mekem yumi kam strong moa mo no lisin long olgeta ia.¹⁷

Sapos fandesen blong yumi long saed blong spirit yumi bildimap i strong long Jisas Kraes, bae yumi no save foldaon, mo yumi no nid blong fraet.

“Luk, Lod i askem blong mas gat wan hat mo wan maen we i wantem mekem samting; mo man we i wantem mekem samting mo i stap obei, bambae hem i kakae ol gudfala samting blong graon blong Saeon long ol las dei ia.”¹⁸

Bae yumi gat hat ia we i wantem mekem samting, oltaem. Long tabu nem blong Lod, Jisas Kraes. Amen.