Fidim mo Serem Testemoni blong Yu

Ol janis long laef we yu no save stopem, plante taem oli kam we yumi no save, iven long ol taem we yu yangfala yet. Letem mi serem stori blong wan studen long sekendri skul, Kevin, we oli bin jusumaot hem blong travel i go aot long stet long wan miting blong ol studen lida. Hemia nao wanem hem i talem.

“Mi nao taem blong mi blong rejista mo woman klak we i stap rejistarem mifala i lukluk mi mo askem nem blong mi. Hem i luk lis blong hem mo talem, ‘Yu ia nao yangfala man blong Yuta.’

“‘Yu minim se mi mi wan nomo?’ Mi askem.

“‘Yes, yu wan nomo.’ Hem i givim nemtag wetem nem blong mi long hem we i se “Yuta” andanit long nem blong mi. Taem mi pinim long klos blong mi, mi filim olsem se oli stap makem mi.

“Mi fasfas insaed long eleveta wetem faef narafala studen blong sekendri skul wetem ol nemtag olsem blong mi. ‘E, yu yu blong Yuta. ?Yu yu wan Momon?’ wan studen i askem.

“Mi filim se mi no pat wetem ol studen lida ia we oli kam long plante defren kantri. ‘Yes,’ mi talem wetem fraet.

“‘Yufala ia nao ol man we oli biliv long Josef Smit, we hem i se hem i luk ol enjel. ?Yu tu, yu bilivim hemia?’

“Mi no save wanem blong talem. Evri studen long eleveta oli stap lukluk mi. Mi jes kam tru long ples ia, mo evriwan i ting se mi mi defren. Mi wantem haedem mi smol, be afta mi talem.‘Mi save se Josef Smit hem i wan profet blong God.’

“?Toktok ia i kamaot wea ia?’ Mi askem miwan. Mi no bin save se i bin stap insaed long mi. Be ol toktok ia we mi talem oli tru.

“‘Yes, oli bin talem long mi se yufala ol man wetem strong biliv’ hem i talem.

“Afta long toktok ia, ples i kwaet we i mekem mi no filim gud nating taem doa blong eleveta i open. Taem mifala i stap putum tugeta ol basket blong mifala, hem i wokbaot i go daon long holdwei mo stap laf.

“Afta wan voes biaen long mi i askem, ‘E, i tru se ol Momon oli gat wan narafala Baebol?’

“O no. topik ia bakegen. Mi tanem mi blong lukluk nara studen we i bin stap long eleveta wetem mi, Christopher.

“Nem blong hem Buk blong Momon,’ mi talem, blong mekem se mifala nomo tokbaot topik ia. Mi karem ol basket blong mi mo stat wokbaot i go daon long holwei.

“‘Hemia nao buk we Josef Smit i transletem?’ hem i askem.

“‘Yes hemia nao,’ mi ansa. Mi gohed blong stap wokbaot, wetem hop blong oli nomo mekem mi sem.

“‘Be, yu save olsem wanem mi save karem wan?’

“Wan skripja we mi bin lanem long seminari i kam kwik taem long mi. ‘Mi mi no sem nating long gud nius ya blong Jisas Kraes.’¹ Taem tingting ia i kam long maen blong mi, mi filim sem long wanem mi bin mekem blong traem blong haedem miwan.

“Long ful wik ia, skripja ia i nomo save livim mi. Mi ansarem plante long ol kwestin abaot Jos olsem we mi save mekem, mo mi bin mekem plante fren.

“Mi bin faenemaot se mi glad tumas from relijin blong mi.

“Mi givim Christopher wan Buk blong Momon. Samtaem afta, hem i talem long leta i kam long mi se hem i bin invaetem ol misinari blong go long haos blong hem.

“Mi bin lanem blong no stap sem blong serem testemoni blong mi.”²

Strong tingting blong Kevin blong serem testemoni blong hem i bin givim insperesen long mi. Hem i wan strong tingting we ol fetful memba long Jos truaot long Wol oli ripitim evri dei. Taem mi stap serem tingting blong mi, mi invaetem yu blong tingting long ol kwestin ia:

1. ?Mi mi save mo andastanem wanem hem i wan testemoni?

2. ?Mi mi save olsem wanem blong serem testemoni blong mi?

3. ?Wanem nao ol samting we oli stopem mi blong serem testemoni blong mi?

4. ?Olsem wanem nao mi save kipim testemoni blong mi?

Testemoni blong yu hem i wan spesel samting we yu gat wetem yu, we plante taem i kam wetem ol dip filing long saed blong spirit. Ol filing ia oli kam long wan kwaet wei mo oli tokbaot se hem i olsem wan “kwaet smol voes.”³ Hem i bilif blong yu o save blong yu long trutok we i kam olsem wan witnes long saed blong spirit tru long paoa blong Tabu Spirit. Blong kasem witnes ia, bae i jenisim wanem yu talem mo olsem wanem yu putum long aksen. Ol ki pat long testemoni blong yu, we Tabu Spirit i talem se oli tru hem i:

• God hem i Papa blong yu long Heven; yu yu pikinini blong Hem. Hem i lavem yu.

• Jisas Kraes i laef. Hem i Pikinini blong God we i stap laef mo Hem i Sevya mo Ridima blong yu.

• Josef Smit i wan profet blong blong God, we God i bin singaotem hem blong putumbak Jos Ia blong Jisas Kraes.

• Jos Ia blong Jisas Kraes blong Ol Lata-dei Sent hem i Jos blong God we Hem i putumbak long wol ia.

• Jos Ia blong Jisas Kraes we i kambak i gat wan profet we i laef i stap i lidim tedei.

Yu serem testemoni blong yu taem yu serem ol filing long saed blong spirit wetem ol narafala man. Olsem wan memba blong Jos, yu gat ol janis blong serem testemoni long ol sakramen miting o long taem we yumi storian wetem famli, ol fren, mo ol narafala man.

Narafala wei we yu serem testemoni blong yu hem i tru long stret mo gud fasin. Testemoni blong yu long Jisas Kraes i no wanem we yu talem nomo—hem i huia yu.

Evri taem yu talemaot witnes blong yu o soem tru long ol aksen blong yu komitmen blong yu blong folem Jisas Kraes, yu stap invaetem narafala man blong “kam long Kraes.”⁴

Ol memba blong Jos oli stanap olsem ol witnes blong God long evri taem mo long evri samting, mo long evri ples.⁵ Ol janis blong mekem hemia long intanet, taem yumi yusum ol topik blong yumiwan o serem topik we narafala man i rere long hem blong i leftemap tingting blong narafala man, i nogat en blong hem. Yumi testifae taem yumi lavem, serem, mo invaetem, iven onlaen. Ol twita, daerek mesej, mo ol pos blong yu, bae i givim wan hae mo tabu stamba tingting, taem yu yusum tu sosol media blong soem olsem wanem gospel blong Jisas Kraes i jenisim laef blong yu.

Ol samting we i stap stopem yu blong serem testemoni blong yu i save ol taem we yu filim se yu no save wanem blong talem. Matthew Cowley, i wan Aposol blong bifo, i serem eksperiens blong hem taem hem i stap rere blong go blong faef yia misin wok blong hem long taem hem i gat 17 yia long Niu Silan:

“Bae mi neva fogetem prea blong papa blong mi long dei we mi aot long haos. Mi neva harem wan naesfala blesing olsem long ful laef blong mi. Afta ol las toktok blong hem long mi long tren stesen, ‘Boe blong mi, bae yu go long misin ia; bae yu stadi; bae yu traem blong rere long ol toktok blong yu; mo samtaem taem oli jusum yu, yu ting se yu bin rere gud, be taem yu stanap, yu no save wanem blong talem.’ Mi bin gat eksperiens ia plante taem.

“Mi se, ‘?Wanem nao yu mekem taem yu no save wanem blong talem?’

“Hem i se, ‘Yu stanap mo wetem fet blong yu we i laef i stap, yu serem witnes blong yu se Josef Smit i wan profet blong God we i stap laef, mo afta ol tingting oli stat blong fulumap maen blong yu mo ol toktok long maot blong yu … i go long hat blong evriwan we oli stap lisin.’ Mo mekem se, taem maen blong mi i nogat tumas samting insaed long hem long taem blong … misin … blong mi, i givim mi janis ia blong serem testemoni blong mi abaot bigfala taem ia long histri blong wol, taem we oli bin krusifaem Masta. Traem samtaem, ol yang man mo woman. Sapos yu no save wanem moa blong talem, testifae se Josef Smit i bin wan profet blong God, mo ful histri blong Jos bae i fulumap tingting blong yu”⁶

Olsem we, Presiden Dallin H. Oaks i bin serem, “Sam testemoni yumi kasem gud taem yumi serem bitim we blong nildaon mo stap prea from.”⁷ Spirit i givim witnes blong hem long man we i toktok mo hemia we i lisin, i semmak.

Narafala samting we i blokem yumi olsem we i stap long stori blong Kevin, hem i fraet. Olsem we Pol i bin raet i go long Timoti:

“Spirit ia we God i givim long yumi, hem i no blong mekem yumi fraet; Spirit ia i blong mekem yumi gat paoa, mo i blong mekem yumi lavem ol man …

“Bambae yu no sem blong tokbaot Masta blong yumi.”⁸

Ol filing blong fraet i no kam long Lod be plante taem hem i kam long Setan. Gat fet, olsem we Kevin i bin mekem, bae i mekem yu save winim ol filing ia mo bae yu fri blong serem wanem we i stap long hat blong yu.

Mi biliv se wan testemoni i wan impoten samting insaed long yumi, be, blong kipim mo mekem i gro, Alma i bin tijim se yumi mas “givim gudfala kaekae mo lukaot gud long hem.⁹ Taem yumi mekem olsem, “i save gat rus, blong mekem se i save gro i kam antap, mo givim frut long yumi.”¹⁰ Taem hem i no gat eni rus hem i drae wantaem.”¹¹

Wanwan long ol memba blong Fas Presidensi we yumi lavem tumas, oli bin givim long yumi daereksen long olsem wanem blong kipim wan testemoni.

Presiden Henry B. Eyring i bin tijim yumi wetem lav blong “stap kakae gud long toktok blong God, prea wetem ful hat, mo stap obei long ol komanmen blong Lod evri dei mo oltaem blong testemoni blong yu i gro mo kam wan sases.”¹²

Presiden Dallin H. Oaks i rimaenem yumi se blong holem taet testemoni blong yumi “yumi nid blong tekpat long sakramen evri wik (luk long D&K 59:9) blong kwalifaem yumi from naesfala promes ia se bae ‘oltaem gat Spirit blong Hem i stap wetem [yumi]’ (D&K 20:77).”¹³

Mo Presiden Russell M. Nelson wetem fasin blong stap kaen, i givim kaonsel i no longtaem i pas:

“Fidim [testemoni blong yu] long trutok. …

“… Fidim mo lukaot gud testemoni blong yu long ol toktok blong ol profet blong bifo mo blong tedei. Askem Lod blong i tijim yu olsem wanem blong lisin gud long Hem. Gat plante moa taem long tempol mo long famli histri wok.

“… Mekem testemoni blong yu i kam fas samting long ltop lis blong yu.”¹⁴

Ol brata mo sista blong mi we mi lavem tumas, mi promes se taem yu andastanem fulwan wanem hem i wan testemoni, mo taem yu serem, bae yu winim ol samting we oli stap blokem yu blong no save wanem blong talem mo fraet, bae i mekem se yu save fidim mo lukaot gud mo kipim spesel samting we yu gat ia, we i testemoni blong yu.

Yumi gat blesing ia blong gat plante eksampol we yumi no save kaontem blong ol profet blong bifo mo tedei we oli serem ol testemoni blong olgeta wetem strong tingting.

Afta long ded blong Kraes, Pita i stanap mo i testifae:

“Yufala evriwan i mas save samting ya, … Jisas ya we yufala i nilim hem long kros, nao hem i ded be God i mekem hem i laef bakegen, …mekem man ia we i stanap long foret blong yufala. …

“… “Mo i no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi.”¹⁵

Amulek, folem testemoni blong Alma abaot fet, we hem i serem wetem plante paoa: “Mo nao, luk, bae miwan bae mi testifae long yufala se ol samting ia oli tru. Luk, mi talem long yu, se mi save se Kraes bae i kam long ol pikinini blong ol man, … we bae hem i pem praes blong ol sin blong wol; from Lod God i bin talem samting ia.”¹⁶

Josef Smit mo Sidney Rigdon, afta we tufala i witnesem wan naesfala testemoni abaot laef bakegen blong Sevya, tufala i testifae se:

“Mo nao, afta long plante testemoni we oli bin givim abaot hem, hemia i testemoni, laswan long evriwan, we mitufala i givim abaot hem: Se hem i stap laef!

“From we mitufala i bin luk hem, we i stap long raet han blong God; mo mitufala i bin harem voes we i testifae se hem i Wan Stret Pikinini Ia Nomo blong Papa.”¹⁷

Ol brata mo sista, mi invaetem yufala blong lukaotem ol janis ia blong serem testemoni blong yufala tru long toktok mo tru long aksen. Wan janis olsem i bin kam long mi i no longtaem i pas, long en blong wan miting wetem mea blong kapitol siti blong Saot Amerika, insaed long miting rum blong hem we i fulap wetem plante hae ofisa blong gavman. Wetem gudfala filing long en blong miting blong mifala, mi tingting kwik se mi mas serem testemoni blong mi. Folem filing ia we i kam, mi serem witnes se Jisas Kraes i Pikinini blong God we i stap laef mo Sevya blong wol ia. Evri samting i jenis long taem ia. Spirit long rum ia man i no save stopem. I luk olsem evriwan long rum oli filim spirit ia. “Spirit blong Givhan … i witnes long saed blong Papa mo Pikinini.”¹⁸ Mi bin glad tumas we mi save gat strong tingting ia blong serem testemoni blong mi.

Taem wan janis olsem ia i kam, tekem mo akseptem. Bae yu filim wom filing ia blong Kamfota insaed long yu taem yu mekem.

Mi givim testemoni blong mi mo witnes blong mi long yu—God hem i Papa blong yumi we i stap long Heven, Jisas Kraes i stap laef, mo Jos Ia blong Jisas Kraes blong Ol Lata-dei Sent hem i Jos blong God long wol ia tedei we dia profet blong yumi we yumi lavem tumas i stap lidim, Presiden Russell M. Nelson. Long nem blong Jisas Kraes, amen.