Fasin blong stap Olsem wan Disaepol
Yumi save faenem paoa blong spirit blong no fraet mo pis taem yumi lukaotem ol tabu fasin mo ol klin fasin we i save gohed blong mekem mo laetem faea blong fet blong yumi.
Long sama we i jes pas, ova long 200,000 long ol yang pipol blong yumi raon long wol we fet blong olgeta i bin gro long wan long ol handred blong ol longfala sesen truaot long wik blong, Blong Ol Yut Oli Kam Strong o BYS, konfrens. Blong kamaot long wan wol sik lok daon ia, long plante, i bin wan aksen blong fet long Lod, iven blong stap long hem. Plante long ol yangfala we oli tekpat, i olsem se oli stap folem wan laen olsem wan ak we i stap from wan bigfala jenis blong laef. Long en blong wik blong olgeta, mi laekem blong askem olgeta,“?Afta?, ?I bin go olsem wanem?”
Samtaem oli ansa olsem: “Yes, long Mandei mi bin kros smol long mama blong mi from we hem i mekem mi kam long konfrens ia. Mo mi no bin save eniwan. Mo mi no ting se hemia i blong mi. Mo bae mi no gat eni fren. … Be naoia hem i Fraedei, mo mi wantem stap ia nomo. Mi jes wantem nomo blong filim Spirit long laef blong mi. Mi wantem stap laef olsem.”
Wanwan long olgeta oli gat ol stori blong olgeta blong tokbaot olsem ol taem we ol tingting i kam klia, mo ol presen ia blong spirit we oli filim se i helpem olgeta gro mo jenisim laef. Mi tu mi filim se mi bin jenis tru long long sama blong BYS taem ia, taem mi bin luk Spirit blong God i no stop blong ansa long ol yangfala ia, folem wanem we hat blong olgeta wanwan i wantem we i stret mo gud, mo we i givim long olgeta wanwan, strong paoa long tingting blong trastem wanwan oli faenem strong paoa long tingting.
Olsem bodi blong sip long solwota, yumi laef long wan ples we i no sef mo i gat bigfala denja long saed blong spirit, ples ia we saen gud, oli mas lukaotem gud o oli save kasem mak, afta i save sloslo i save spolem bodi blong bod, mo i save mekem i kam roten.
?Wanem kaen Samting Nao Yumi Save Mekem blong Holemtaet Paoa Ia long Bilif blong Yumi?
Ol eksperiens olsem ol konfrens blong BYS, ol kamp, ol sakramen miting, mo ol misin, i save helpem givim paoa long ol testemoni blong yumi, we i tekem yumi kasem long laen blong gro mo faenemaot ol ples we i givim pis. Be wanem nao bae yumi mekem blong stap ia mo gohed blong “wokabaot fored wetem strong bilif long Kraes” (2 Nifae 31:20) mo nomo gobak? Yumi mas gohed blong mekem olgeta samting we i tekem yumi i kasem ples ia, olsem blong prea oltaem, draonem yumi long skripja, mo givim seves wetem wan tru tingting.
Long sam long yumi, i nidim wan praktis, blong stap trastem Lod, iven blong go long sakramen miting. Be taem yumi kasem ples ia, hiling paoa blong sakramen blong Lod, paoa blong ol prinsipol blong gospel, mo fasin blong lukaotem gud jos, i save helpem yumi blong kasem mo insperesen mo paoa.
?Wea Nao Paoa blong Stap Kam Tugeta Fes Tu Fes I Kam long Hem?
Long BYS, i gat samples tu handred taosen mo sam moa yut we oli bin kam blong save moa long Sevya taem oli yusum wan simpol paten, we i soem se,tu no tri man oli joen wanples long nem blong [Hem] (luk Matiu 18:20blong stadi mo laef folem gospel, skripja, singsing mo prea tugeta, mo stap faenem pis long Kraes. Hemia i wan narafala wei blong filim paoa blong spirit.
Hemia i go long evri brata mo ol sista raon long wol, we naoia oli go hom blong tingting long wanem i minim blong gohed nomo blong “trastem Lod” (Proveb 3:5; 2022 stamba toktok blong yut) taem oli stap long medel blong ol paoa blong wol we yumi no save stopem. Hem i wan samting blong “lisingud long Hem” (Josef Smit—Histri 1:17) long wan kwaet ples mo tingting hevi wetem ol skripja we i open bigwan. Be hem i wan narafala samting blong stap wan disaepol long medel blong ol paoa blong wol we yumi mas traem blong “lisin long Hem” iven sapos long medel blong ol selfis tingting mo we tras i stap lus. No letem tingting i foldaon, hem i ol kwaliti blong ol hiro we i soem long ol yut blong yumi, blong gat ol hat mo ol strong tingting blong stanap agensem paoa blong wol we i stap muvmuv long taem blong yumi.
?Wanem Nao Ol Famli Oli Save Mekem long Hom blong Bildimap Tingting ia We Oli Krietem long ol Jos Aktiviti?
Mi bin wantaem stap olsem hasban blong Presiden blong Yang Woman. Wan naet oli askem mi blong arenjem gud ol biskit long wan open spes, taem we waef blong mi i stap kondaktem wan faeasaed long japel blong ol papa mo mama mo ol gel blong olgeta blong oli rere blong go long Yang Woman kam long nekis wik. Afta we hem i eksplenem weaples blong oli stap mo wanem blong karem, hem i se, “Nao, long Tiusdei moning taem yu putum ol swit gel blong yufala long bas, yu haggem olgeta strong. Mo yu kisim olgeta blong talem tata—from se bae oli nomo kambak.”
Mi harem wan i pulum nogud win, be mi tingbaot se hem i mi. “?Nomo kambak?”
Be afta hem i gohed: “Taem yu putum ol gel long moning blong Tiusdei, bae oli livim biaen ol samting blong wol we i no impoten mo spenem wan wik tugeta blong lan mo gro mo trastem Lod. Bae yumi prea tugeta mo singsing mo kuk mo givim seves tugeta mo serem ol testemoni mo mekem ol samting we i letem yumi filim Spirit blong Papa long Heven, long ful wik ia, kasem taem we i fulumap gud yumi. Mo long Satedei, bae yufala i luk ol gel oli stap kamaot long bas be bae oli no olgeta we yufala i putum long Tiusdei. Bae oli kam ol niufala pikinini gel. Mo sapos yufala i gohed blong helpem olgeta blong gohed blong gro long saed blong spirit, bambae oli sapraesem yu. Bambae oli gohed blong jenis mo gro. Mo i semmak long famli blong yu.”
Long Satedei ia, i bin hapen semmak olsem we hem i bin talem. Taem mi stap putumbak ol tenet, mi harem voes blong waef blong mi long wan open ples we ol gel oli bin stap tugeta long hem bifo oli go hom. Mi harem hem i talem se, “O, yufala hemia. Mifala i bin stap wet long yufala blong ful wik. Ol Satedei gel blong mifala.”
Ol fetful yut blong Sion oli stap wokbaot tru ol spesel taem. Stap faenem glad long wol ia we oli profesae abaot noes blong hem, be blong no kam pat blong wol ia, wetem ol blaen mak we i save kavremap tabu fasin, oli mas luksave hemia olgetawan. Samples wan handred yia i pas, G. K Chesterton i tokbaot kolosap olsem we hem i luk tingting ia blong stap olsem wan hom senta mo jos i sapotem taem hem i talem, “Yumi mas filim yunives wantaem olsem haos blong jaean, we hariken i stonem, be yet hem i haos blong yumi, we yumi save stap gobak long hem long naet” (Orthodoxy [1909], 130).
Be i gud tumas, we oli no nid blong go aot olgetawan nomo. Oli gat olgeta wanwan tugeta. Mo oli gat yu. Mo oli folem wan profet we i laef, Presiden Russell M. Nelson, we i lidim wetem save mo lukluk blong wan sia blong talemaot se bigfala wok ia blong taem tedei—we hem i kam tugeta blong Isrel—bambae tugeta i naes tumas mo gat bigfala paoa (luk long “Hop blong Isrel” [worldwide youth devotional, 3 Jun, 2018], HopeofIsrael.ChurchofJesusChrist.org).
Long sama taem ia, waef blong mi, Kalleen, mo mi, mitufala i jenisim ol plen long Amsterdam be plante yia we i pas, mi bin stap wan niufala misinari long ples ia. Afta plante manis we mi stap traehad blong lanem lanwis Jemani, KLM flaet blong mifala i stap godaon, mo kapten i mekem wan strong anaonsmen long sistem blong PA. Afta long wan taem we ples i kwaet, kompanion blong mi i stap toktok sloslo, “Mi ting se hemia lanwis Jemani.” Mitufala i lukluk mitufala, mo stap ridim ol tingting blong mifala: Evri samting i lus.
Be evri samting i no bin lus. Taem mi stap sapraes from bigfala fet we mifala i bin tekem taem mifala i bin stap wokabaot tru long eapot wetem plante merikel we mifala i bin kasem olsem ol misinari, mi bin sek long wan long ol misinari we hem i stap kam long semmak plen blong gobak hom. Hem i introdiusum hem wan mo i askem, “Presiden, Lund ?wanem nao bae mi mekem naoia?” ?Wanem nao bae mi mekem blong stanap strong?
Hemia hem i semmak kwestin we i stap long ol maen blong ol yut taem oli lego ol konfrens, ol yut kamp, mo ol tempol trip long BYS mo eni taem oli filim ol paoa blong heven: “?Fasin blong Stap Olsem Wan Disaepol?”
Mi filim wan bigfala lav blong misinari ia we ae blong hem i klia mo i stap givim seves long ol las aoa blong misin blong hem, mo long smol kwaet taem blong Spirit, mi harem voes blong mi i talem slo, “Yu no nidim blong werem nem tag blong tekem nem blong Hem.”
Mi wantem blong putum han blong mi long solda blong hem mo talem, “Hemia wanem we yu mas mekem. Yu go long haos mo yu stap Olsemia nomo. Yu yu gud tumas yu save saen long tudak. Laef blong misin blong yu mo ol sakrifaes blong yu i mekem yu wan gudfala pikinini boe blong God. Gohed blong wanem we i givim paoa long yu long ples ia, semmak long hom. Yu bin lanem blong prea mo long huia yu mas prea i go long hem mo lanwis blong prea. Yu bin stadi long ol toktok blong Hem mo kam blong lavem Sevya taem yu traem blong kam olsem Hem. Yu bin lavem Papa long Heven semmak olsem we Hem i lavem Papa blong Hem, givim seves long ol narawan semmak olsem we Hem i givim seves, mo laef folem ol komanmen semmak olsem we Hem i laef folem—mo taem yu no bin mekem, yu bin sakem sin. Blong stap olsem wan disaepol hem i no wan toktok nating long wan T-set—hem i kam olsem laef we i gat mining blong yu long laef blong ol narawan. So yu go hom mo yu mekem hemia. Stap olsem ia nao. Karem paoa blong faea blong spirit long ful laef blong yu.
Mi save se tru long tras long Lod Jisas Kraes mo kavenan rod blong Hem, yumi save faenem paoa blong spirit blong no fraet mo pis taem yumi lukaotem ol tabu fasin mo ol klin fasin we i save gohed blong mekem mo laetem faea blong fet blong yumi. Bae yumi muv i go kolosap moa long faea ia blong kipim testemoni blong yumi i wom, nomata long wanem we i save hapen, bae yumi gohed blong stap. Long nem blong Jisas Kraes, amen.