Prinsipol blong Lav We I No Save Finis

Prinsipol blong lav we i no save finis i kamaot taem yumi stap laef folem tufala bigfala komanmen: lavem God wetem ful hat, sol, maen mo paoa blong yu mo lavem neba blong yu olsem we yu lavem yuwan.¹

Mi tingbaot fas winta blong mi long ples ia long Yuta, sno i stap long evri ples. Mi kam long Sonoran Deset, ol fasfala dei mi laekem tumas, be sam dei afta, mi luksave se mi mas girap eli blong karemaot sno long rod blong trak.

Wan moning, long medel blong wan sno hariken, mi stap swet blong stap savelem sno, mo mi luk neba blong mi i stap openem karaj blong hem narasaed rod. Hem i olfala moa long mi, mi tingting se sapos mi finis hariap bae mi save go helpem hem. Mekem mi singaot mo askem hem, “?Brata yu nidim help?”

Hem i smael mo talem,”Tangkyu Elda Montoya.” Afta hem i karemaot masin blong blo-aot sno long karaj blong hem, hem i statem enjin, mo sam minit i pas, hem i karemaot evri sno long fored blong haos blong hem. Hem i krosem rod wetem masin blong hem mo askem mi, “?Elda, yu nidim help?”

Mi smael mo talem, “Yes, tangkyu.”

Yumi wiling blong helpem wanwan long yumi from se yumi lavem wanwan long yumi, mo nid blong brata blong mi i kam nid blong mi mo blong mi i kam nid blong hem. I no mata wanem lanwis brata blong mi i toktok long hem o wanem kantri hem i kam long hem, yumi lavem wanwan long yumi from we yumi ol brata, ol pikinini blong sem Papa.

Taem we oli anaonsem wok blong givhan, Presiden Russell M. Nelson i talem: “Bae yumi stat yusum wan niu mo moa tabu wei blong kea mo givhan long ol narawan”.² Long mi, tabu i minim i moa blong yuwan, i moa dip, i moa olsem wei blong Sevya: “Nao from yufala i stap lavlavem yufala”³ wan afta wan.

Hem i no inaf blong traem blong no stap olsem wan hadtaem blong ol narafala man; hem i no inaf blong luksave ol man we oli stap long nid long rod mo wokbaot pas bitim olgeta. Letem yumi tekem evri janis ia blong helpem neba blong yumi, iven sapos hem i fas mo wan taem ia nomo we yumi mitim hem long laef ia.

?From wanem blong lavem God hem i fas mo bigfala komanmen?

Mi ting se from wanem Hem i minim long yumi. Yumi ol pikinini blong Hem, Hem i lukaotem yumi, yumi dipen long Hem, mo lav blong Hem i protektem yumi. Plan blong Hem i kam wetem fasin blong mekem joes; taswe, bae yumi mekem ol mistek.

Hem i letem tu, blong oli testem mo traem yumi. Be sapos yumi stap mekem ol mistek o foldaon long temtesen, plan ia i givim wan Sevya mekem se yumi save sef mo gobak long ples blong God.

Ol hadtaem long ol laef blong yumi i save mekem yumi gat tu tingting abaot ol promes we oli bin mekem long yumi blong i hapen. Plis trastem Papa blong yumi. Hem i oltaem kipim ol promes blong Hem, mo yumi save lanem wanem Hem i wantem blong tijim long yumi.

Iven sapos yumi stap mekem samting i raet, ol situesen long laef blong yumi i save jenis long gud i go long nogud, glad i go long harem nogud. God i ansarem ol prea blong yumi folem bigfala sore blong Hem we i no save finis mo lav mo taem blong Hemwan.

• Pul blong wota we Elaeja i dring long hem i drae.

• Gudfala stil bonara blong Nifae i brok.

• Wan yangfala boe we oli tokbaot nogud hem oli putumaot hem long skul.

• Wan bebi we i wet longtaem blong bon i ded sam dei afta we hem i bon.

Ol situesen i jenis.

Taem ol situesen i jenis long gud i go long nogud, yumi stil save stap hapi, from glad i no dipen long ol situesen be long fasin blong yumi i go long ol situesen. Presiden Russell M. Nelson i talem: “Glad we yumi filim i wan smol pat nomo blong ol situesen blong laef blong yumi, mo i evri samting we i go wetem ol samting we yumi lukluk moa long hem long laef blong yumi.”⁶

Yumi save sidaon mo wet long ol situesen blong oli jenis olgeta wan, o yumi save lukaotem mo karem ol niu situesen i kam.

• Elaeja i wokbaot i go long Jarefat, long ples we wan wido i givim hem kakae mo wota blong dring.

• Nifae i mekem wan bonara aot long wud mo i go kilim ol animol blong kakae.⁸

• Wan yangfala boe i sidaon mo stap lisin mo tekem ol not kolosap long windo, mo tedei hem i wan tija blong praemeri.

• Tu kapol i mekem fet blong tufala i kam antap long Sevya Jisas Kraes mo gat tras long plan blong sevem man. Lav blong tufala long pikinini we tufala i wet long taem blong gat, i bigwan bitim harem nogud blong tufala, taem pikinini ia i ded hariap nomo.

Taem mi harem ol kwestin ia “?Papa long Heven, i tru se yu yu stap ia? “Mo yu stap harem mo ansarem [evri] prea blong pikinini?,”⁹ Mi laekem blong ansa: “Hem i bin stap, Hem i stap, mo oltaem bae Hem i stap blong yu mo mi. Mi mi pikinini blong Hem, Hem i Papa blong mi, mo mi stap lanem blong kam wan gud papa olsem Hem.”

Mi mo waef blong mi oltaem mitufala i traem blong stap wetem ol pikinini blong mitufala eni taem, long eni situesen mo long eni wei. Wanwan pikinini i spesel, valiu blong olgeta long God i bigwan, mo nomata wanem ol jalenj, ol sin, mo wiknes oli gat, God i lavem olgeta, mo yumi tu i lavem olgeta.

Taem mi kasem kol ia olsem wan Jeneral Atoriti, bifo long las dei blong mifala blong travel i go long Sol Lek, evri pikinini blong mi mo ol famli blong olgeta i kam tugeta long haos blong mitufala blong wan famli haos naet, ples we mifala i talemaot lav mo tangkyu blong mifala. Afta long lesen, mi givim wan prishud blesing long wanwan long ol pikinini blong mi. Evriwan wota blong ae i ron. Afta long ol blesing ia, bigfala boe blong mi i talem tangkyu long bihaf blong evri wan from bigfala lav we mitufala i bin givim long olgeta stat long dei we oli bon kasem naoia.

Blesem ol pikinini blong yu nomata se oli gat 5 o 50 yia. Stap wetem olgeta, stap blong olgeta. Nomata se blong stap lukaotem wan famli hem i wan responsabiliti we i folem tabu plan, yumi no mas foget blong serem ol gudfala taem wetem ol pikinini blong yumi.

Lav blong Papa blong yumi long Heven long wanwan long ol pikinini blong Hem i tru. Hem i stap blong wanwan long yumi. Mi no save olsem wanem Hem i mekem, be Hem i mekem. Hem mo Fas bon blong Hem tufala i wan blong mekem wok mo glori blong Papa,“blong mekem man i nomo save ded mo i kasem laef we i no save finis.”¹⁰ Tufala i sendem Tabu Spirit long yumi blong gaedem yumi, wonem yumi, mo givim kamfot long yumi sapos i nid.

Hem i bin givim instraksen long Stret Pikinini Ia blong Hem, blong i krietem naesfala wol ia. Hem i bin instraktem Adam mo Iv mo givim long tufala fridom blong joes. Hem i bin stap sendem ol mesenja blong Hem blong plante yia blong mekem se yumi save kasem lav mo ol komanmen blong Hem.

Hem i bin stap long Tabu Ples mo i ansa long kwestin blong Josef we i kam long hat blong hem mo i singaotem hem long nem blong hem. Hem i talem: “Hem, Hem i Pikinini blong Mi we Mi Lavem Tumas. !Lisin gud long Hem!”¹¹

Mi biliv se bigfala pikja blong lav we God i soem long yumi i hapen long Getsemane, ples we pikinini blong God i prea long Hem, “‘Papa sipos yu save mekem, plis yu tekemaot ol samting ya we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem.”¹³

Mi luksave se smol pat ia we mi save andastanem abaot Atonmen blong Jisas Kraes i mekem lav blong mi long Papa mo Pikinini Boe blong Hem i kam antap, i sloem daon tingting blong mi blong mekem sin mo blong stap obei, mo i leftemap tingting blong mi blong kam moa gud mo mekem i moa gud.

Jisas i nogat fraet taem i wokbaot, mo i no gat tu tingting long Garen blong Getsemane, Hem i trastem Papa blong Hem mo save se Hem i mas mekem samting ia Hemwan. Hem i winim evri harem nogud mo evri sem. Oli blemem, jajem, mo krusifaem Hem. Long taem blong harem nogud mo safa blong Hemwan long kros, Jisas i lukluk nomo long ol nid blong mama mo ol disaepol blong Hem we Hem i lavem tumas. Hem i givim laef blong Hem.

Long nambatri dei Hem i laef bakegen long ded. Gref i emti, Hem i stanap long raet han blong Papa blong Hem. Tufala i hop se bae yumi jusum blong kipim ol kavenan blong yumi mo gobak mo stap wetem Tufala. Wol ia i no las ples blong yumi, yumi no blong wol ia, be yumi ol man we i gat laef we i no save finis be yumi stap laef nomo blong wan sot taem eksperiens long wol ia.

Jisas Hem i Kraes, Pikinini blong God ia we i stap laef. Hem i laef, from se Hem i stap laef, yumi evriwan bae i laef bakegen. Tangkyu long sakrifaes blong Hem, i mekem yumi evriwan i save laef tugeta wetem Olgeta. Long nem blong Jisas Kraes, amen.