Yok blong Hem i Isi, mo Wok blong Hem i No Hevi.

Stori ia i blong wan man nem blong hem Jack we i gat wan hanting dog we hem i laekem tumas, nem blong hem Cassie. Jack i glad tumas long Cassie mo plante taem i stap tinghae long dog blong hem from dog ia i gat skil. Blong pruvum hemia, Jack i invaetem sam fren blong hem blong wajem Cassie i soem ol skil ia. Afta we oli kasem hanting klab, Jack i letem Cassie i ron raon mo hem i go insaed blong rejista.

Taem hem taem blong stat, Jack i glad blong soem aot ol sapraes skil blong Cassie. Be Cassie i stap ak defren. Hem i no obei long ol toktok blong Jack olsem we hem i stap mekem. Hem i wantem stap long saed blong Jack nomo.

Jack givap, i sem mo kros long Cassie; afta i talem se bae tufala i aot. Cassie i no wantem blong jam biaen long trak, mekem Jack i no wet be i pusum hem i go insaed long smol haos blong hem. Hem i tok kros long olgeta we oli stap mekem fani long fasin blong dog blong Hem long rod i go long haos. Jack i no andastanem from wanem Cassie i mekem rabis fasin olsem. Hem i bin tren gud, mo longtaem i kam hem i wantem mekem Jack i glad mo helpem hem.

Afta we oli kasem haos, Jack i stat jekem Cassie from eni kil, ol smol sid blong flaoa long we stak long hem o laos, olsem we hem i stap mekem oltaem. Taem hem i putum han blong hem long jes blong hem, hem i filim save wan wetwet samting mo faenem se han blong hem i fulap long blad. Hem i sem taem hem i faenem se Cassie i gat wan bigfala longfala kat long raet bon blong jes blong hem. Hem i faenem nara kat long raet lek blong hem long fored, mo long bon tu.

Jack i karem Cassie long han blong hem mo stat blong krae. Hem i sem mo harem nogud bigwan from hem i jajem dog ia fastaem afta tritim nogud hem . Cassie i jenisim fasin blong hem long taem ia from hem i kasem kil. Fasin blong hem i jenis folem harem nogud blong hem, safaring blong hem mo soa bodi blong hem. Hem i no from we hem i no wantem obei long Jack o from we hem i no lavem Jack.¹

Mi bin harem stori ia plante yia i pas be mi neva fogetem. ?Hamas man we oli kasem kil oli stap raon long yumi? ?Hamas taem nao yumi jajem olgeta folem lukluk mo ol aksen blong olgeta o from oli no tekem aksen, bitim, sapos yumi andastanem olgeta fulwan, yumi bae muv folem lav mo sore blong helpem olgeta bitim blong ademap hevi samting long olgeta wetem jajem blong yumi?

Mi rong blong jajem narafala man plante taem long laef blong mi, be Lod i gat fasin blong wet long mi blong tijim mi tru long eksperiens blong miwan mo mi bin lisin long laef eksperiens blong plante narafala. Mi kam blong akseptem fulwan eksampol blong dia Sevya taem Hem i spenem moa taem blong Hem blong givhan long narafala man wetem lav.

Laef eksperiens blong yangfala gel blong mi hem i jalenj blong helt long saed blong filing long taem we hem i wan smol gel. I gat ol taem long laef blong hem we hem i filim olsem se hem i nomo save go moa. Mifala i glad tumas from ol enjel blong wol ia we oli bin stap long ol taem ia: stap sit daon wetem hem; stap lisin long hem; stap krae wetem hem; mo stap serem tugeta ol spesel presen, ol andastaning long saed blong spirit, mo wan filing blong lav bitwin olgeta. Long ol situesen olsem we i fulap long lav ol hevi samting blong tugeta saed i kam isi.

Elda Joseph B. Wirthlin, i kot long 1 Korin, we i talem , “Spos mi gat paoa blong tok long ol lanwis blong ol man mo blong ol enjel tu, be mi no lavem man, tok ya bambae i olsem noes nomo. Bambae mi olsem wan bigfala tamtam we i stap krae nomo, no mi olsem wan bel we i stap krae blong nating.”²

Hem i gohed i talem:

Toktok blong Pol long niufala bodi blong ol Sent hem i simpol mo stret: Spos mi gat paoa blong talemaot ol tok we God i givim, be mi no lavem man, bambae mi olsem nating. Yu kasem olgeta save blong man, wetem mining blong olgeta tok ya tu we God i stap haedem … Mo sipos yu bilif strong long God we i naf blong mi save seftem ol bigbigfala hil, be yu no lavem man, bambae yu olsem nating nomo.

“‘Be bigfala lav i klin lav blong Kraes’ [Moronae 7:47]. Sevya i soem lav ia.”.”³

Long Jon yumi ridim se, “Nao from we yufala i stap lavlavem yufala, bambae olgeta man oli luksave se yufala i man blong mi.”⁴

Plante lida blong Jos oli bin givim toktok abaot bigfala lav, yuniti, fasin blong stap kaen, lav mo sore, fasin blong fogiv,. Mi biliv se Sevya i stap invaetem yumi long wan moa hae mo tabu wei⁵—Wei blong Hem blong soem lav we evriwan i filim se hem i pat mo hem i impoten.

Hem i komanmen yumi blong lavem nara man,⁶ blong no jajem olgeta.⁷ Letem yumi stopem hevi wok ia; we i no blong yumi blong karem.⁸ Be, yumi mekem wok blong hem we i no hevi we i blong soem lav mo sore.

“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.

“Yufala i mas putum yok blong mi long solda blong yufala, mo yufala i mas lan long mi; …

“From we yok blong mi i isi, nomo oli no hevi.”⁹

Sevya i no luk ova long sin be hem i givim long yumi lav blong Hem mo fasin blong fogiv taem yumi sakem sin. Long woman we i slip wetem man we i no man blong hem, Hem i se, “Mi tu mi no save jajem yu. Be i gud yu gohom, mo yu nomo mekem sin bakegen,”¹⁰ Olgeta we Hem i tajem oli filim lavblong Hem, mo lav ia i hilim mo jenisim olgeta. Lav blong Hem i leftemap olgeta blong wantem blong jenisim laef. Stap laef folem wei blong Hem i givim glad mo pis, mo Hem i invaetem ol narafala man long rod ia wetem fasin blong stap kaen, mo lav.

Elda Gary E. Stevenson i se: “Taem yumi fesem ol win mo ren long laef, sik, mo ol kil, Lod—Man blong yumi blong Lukaot long Sipsip, Man we I Kea long Yumi—bae i lukaotem yumi wetem lav mo fasin we i kaen. Bae hem i hilim yumi mo putumbak sol blong yumi i stap gud.”¹¹ ?Olsem ol man blong folem Jisas Kraes, bae yumi mekem semmak tu?

Sevya i askem yumi blong mas lan long Hem¹² mo mekem ol samting we yumi luk Hem i mekem.¹³ Hem nao pikja blong bigfala lav, blong klin lav. Taem yumi stap lan moa blong mekem wanem we Hem i askem yumi blong mekem—i no from se yumi mas mekem from ol blesing we bae yumi kasem be from yumi lavem Hem mo Papa long Heven¹⁴—Lav blong Hem bae i fulumap yumi mo mekem evri samting we hem i no posibol i posibol mo kam moa isi mo laet¹⁵ mo fulap wetem glad we yumi no save pikjarem. Hemia bae tekem praktis; bae tekem yia olsem mi, be taem yumi wantem lav i stap olsem fos ia blong leftemap yumi, Hem bae i tekem stamba tingting ia,¹⁶ sid ia, mo tanem i kam wan naesfala tri we i fulap long swit frut.¹⁷

Yumi singsing long wan long ol hym we yumi laekem tumas, “? Mi huia blong jajem narafala man taem mi wan mi no wokbaot stret? Long kwaet hat hem i haedem bigfala harem nogud we ae i no save luk.””¹⁸ ?Hu long yumi i haedem bigfala harem nogud? Long olgeta we yumi ting se oli ol yangfala we oli agensem yumi, ol pikinini we mama mo papa i divos, signol mama o papa, olgeta wetem jalenj long saed blong helt long bodi mo tingting, olgeta we i stap kwestinim fet, olgeta we man i jajem olgeta from olgeta oli no plante o from kalja blong ol, olgeta we oli filim se oli stap olgeta wan, olgeta we oli wantem mared, olgeta wetem adiksen, mo plante moa wetem plante jalenj long eksperiens blong laef ia—plante taem laef blong olgeta i smut long ae blong man.

I nogat wan long yumi o famli we i klin evriwan; Mi tu semmak. Taem yumi lukaot blong sore wetem olgeta tu we oli eksperiensem jalenj mo ol rong fasin long laef, hemia i save helpem olgeta filim se oli no stap olgeta wan long ol jalenj blong olgeta. Evriwan i nidim blong filim se oli pat mo yumi nidim olgeta long bodi blong Kraes.¹⁹ Stamba tingting blong Setan i blong divaedem ol pikinini blong God, mo Hem i bin mekem i hapen, be i gat moa paoa long yunit.²⁰ !Mo olsem wanem yumi nid blong wokbaot tugeta tru long ol jalenj long rod blong laef long wol ia!

Profet blong yumi, Presiden Russell M. Nelson, i talem se, “Eni man we i abiusum o jajem man folem kantri blong hem, kala blong skin, rilesensip blong hem wetem man, hem i man o woman, gat digri long edukesen, kalja, o ol narafala lukluk we i no stret long Krieta blong yumi! !Ol rabis fasin olsem oli mekem yumi no gro olsem ol kavenan pikinini boe mo gel blong Hem!”²¹

Taem Presiden Nelson i bin invaetem evriwan blong kam mo stap long kavenan rod ia we i gobak long Sevya blong yumi mo Papa we i Stap long Heven, hem i bin givim kaonsel ia tu: “Sapos ol fren mo famli … oli aot long Jos, gohed blong lavem olgeta. I no blong yu blong jajem joes blong wanwan man semmak olsem we olgeta i no save jajem yu from joes blong yu blong stap fetful.”²²

Ol fren, letem yumi tingbaot se wanwan man long wol ia i wan pikinini blong God²³ mo Hem i lavem wanwan long yumi.²⁴ ?I gat man long laef blong yu we yu filim blong jajem? Sapos i gat, tingbaot se, hem i ol naesfala janis blong yumi blong praktisim blong lavem olgeta olsem Sevya.²⁵ Taem yumi folem eksampol blong Hem wok tugeta wetem Hem mo help putum wan filing blong lav mo filing ia se yu pat long hat blong evri wan long ol pikinini blong Papa.

“Yumi stap lavem God mo ol narafala man, from we God i lavem yumi fastaem.”²⁶ Taem yumi fulap long lav blong Sevya, yok ya blong Hem i isi nomo, mo ol samting we bambae Hem i givim long yumi blong karem oli no hevi be oli laet.²⁷ Long hemia, mi testifae long nem blong Jisas Kraes, amen.