Jisas, Hem I Ansa

Hem i wan ona blong toktok long yufala long sesen ia blong konfrens. Tedei mi toktok long yufala olsem ol fren Long gospel blong Jon, Sevya i tijim se yumi i Ol fren blong Hem sapos yumi mekem wanem Hem i askem yumi blong mekem.

Hem i lav blong yumi wanwan mo yumi evriwan long Sevya, mo ol kavenan blong yumi wetem Hem we i fasem yumi tugeta. Olsem Presiden Eyring i tijim: “Long yufala mi hop blong talem hamas nao Lod i lavem mo trastem yufala. Mo, iven moa, mi hop blong talem long yufala hamas nao Hem i dipen long yufala”

Taem Presiden Russell M Nelson i bin singaotem mi olsem wan Jeneral Atoriti, mi bin tingting plante Hem i bigwan tumas. Waef blong mi, Julie mo mi mitufala i bin wet wetem wari from Satedei aftenun sesen blong jeneral konfrens. Hem i wan ona blong oli sastenem yu. Mi lukluk gud ol step blong mi taem mi wokbaot i go long jea we oli asaenem long mi, blong mi no foldaon.

Long en blong sesen ia, wan bigfala samting i bin hapen we i bin tajem hat blong mi. Olgeta memba blong kworom oli mekem wan laen mo welkamem wanwan long ol niu Jeneral Atoriti Wanwan long olgeta i serem lav mo sapot blong olgeta. Wetem bigfala glad, oli hag mo talem, “Yu no wari—yu yu pat”

Long rilesensip blong yumi wetem Sevya, Hem i lukluk long hat from Hem i lukluk evri man i semmak.³ Tingting long olsem wanem Hem i jusum ol Aposol blong Hem. Hem i no lukluk long wok o ol rij samting yumi gat. Hem i invaetem yumi blong folem Hem, mo mi biliv se Hem i mekem sua se yumi save se yumi pat wetem Hem.

Mesej ia i go speseli long ol yut blong Jos. Mi luk long yufala wanem Presiden Nelson i stap luk long yufala. Hem i talem se “I gat wan samting spesel abaot jeneresen ia blong ol yut. Papa blong yufala long Heven i mas gat bigfala tras long yufala blong sendem yufala i kam long wol long taem ia. !Yu yu bin bon blong wan bigfala gud samting!”

Mi talemtangkyu from wanem we mi lanem long ol yut. Mi talem tangkyu from wanem ol pikinini oli tijim long mi, from wanem we ol misinari oli tijim mi mo from wanem we ol nis mo nefiu blong mi oli tijim long mi,

I no long taem i pas, mi bin stap wok long fam blong mifala wetem nefiu blong mi Nash. Hem i gat sikis yia mo wan klin hat. Hem i fevret nefiu blong mi we nem blong hem Nash, mo mi biliv se mi mi fevret angkel blong hem we i stap toktok tedei long konfrens.

Olsem we hem i bin helpem mi blong faenem wan ansa long projek blong mitufala, mi talem, “Nash, hemia i wan gudfala tingting. ?Olsem wanem nao yu kam waes olsem? Hem i luk long mi wetem wan lukluk long ae blong hem we i talem, ?Angkel Ryan, olsem wanem nao yu no save ansa blong kwestin ia?

Hem muvum solda blong hem, smael, mo talem wetem strong tingting “Jisas.”

Nash i rimaenem mi long dei ia abaot simpol, be yet, impoten tijing ia. Se ansa long ol simpol kwestin mo ol had problem, oltaem i stap semmak nomo. Ansa hem i Jisas Kraes. Evri ansa, oli faenem tru long Hem.

Long Gospel blong Jon, Sevya i talem long ol disaepol blong Hem se, bambae Hem i mekem rere wan ples blong olgeta. Tingting blong Tomas i fasfas mo i talem long Sevya:

“Masta, mifala i no save ples ya we bambae yu yu go long hem. ?Bambae mifala i save rod blong hem olsem wanem?”

“Jisas i talem: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam.”⁵

Sevya i tijim ol disaepol blong Hem se “Hem nao i rod ya, mo stamba blong trutok, mo stamba blong laef.” Hem i ansa long kwestin blong olsem wanem blong kam long Papa long Heven. Blong kasem wan testemoni long tabu rol blong Hem long laef blong yumi i wan samting we mi lanem olsem wan yang man.

Taem mi sta givim seves olsem wan misinari long Ajentina, Presiden Howard W Hunter i bin invaetem mifala blong mekem ol samting we i tajem mi bigwan long laef blong mi. Hem i talem: “Yumi mas save Kraes moa bitim we yumi save hem, yumi mas tingbaot hem moa oltaem bitim we yumi tingbaot hem, yumi mas wok strong moa wetem bitim we yumi stap givim seves long hem.”⁶

Long taem ia, mi bin stap wari long olsem wanem mi save stap wan gudfala misinari. Hemia nao i ansa : blong save Kraes, blong tingbaot Hem mo blong givim seves long Hem. Ol misinari raon long wol oli yunaet long stamba tingting ia—blong “invaetem ol narawan blong kam long Kraes mo helpem olgeta blong kasem gospel we i bin kambak tru long fet long [Hem] mo Atonmen blong Hem”, mo tru long fasin blong sakem sin, kasem baptaes, kasem presen we i Tabu Spirit, mo stanap strong kasem en.”⁷ Long ol fren blong yumi we oli stap lisin long ol misinari, mi ademap invitesen blong mi blong kam long Kraes. Tugeta bae yumi traehad blong save Hem, tingbaot Hem, mo givim seves long Hem.

Blong stap givim seves olsem wan misinari i bin wan tabu taem long laef blong mi. Long las intaviu blong mi wetem hem olsem wan fultaem misinari, Presiden Blair Pincock i bin tokbaot ol jenis we bae hapen long ol misin lida, taem hem mo waef blong hem i kam kolosap long en blong seves blong tufala. Mitufala i bin harem nogud blong save lego samting we mitufala i laekem tumas. Hem i luksave se mi wari long tingting ia blong no stap olsem wan fultaem misinari. Hem i bin wan man wetem bigfala fet mo i bin tijim mi wetem lav olsem we hem i bin stap mekem tu yia i pas. Hem i poen i go long pikja blong Jisas Kraes antap long tebol blong hem mo talem, “Elda Olsen, bae evri samting i Oraet from hemia i wok blong Hem. Mi bin filim save se Sevya bae helpem mifala, i no long taem ia nomo we mifala i stap givim seves, be olsem oltaem, sapos mifala i letem Hem.

Sista Pincock i bin tijim mifala wetem olgeta filing blong hat blong hem long ol simpol toktok long lanwis Spanis. Taem hem i talem, “Jesucristo vive,” Mi save se i tru mo we Hem i laef. Taem hem i talem, “Elderes y hermanas, les amo”, Mi save se hem i lavem mifala mo hem i wantem yumi blong folem Sevya, oltaem.

I no longtaem i pas, waef blong mi mo mi i bin kasem blesing ia blong givim seves olsem ol misin lida blong givim seves wetem ol gudgudfala misinari long Yurugwe. Bae mi talem se hemia i ol bes misinari long wol, mo mi trastem se evri misin lida oli filim semmak. Ol disaepol ia oli bin tijim mifala evri dei abaot olsem wanem blong stap folem Sevya.

Long taem blong ol nomol intaviu, wan long ol strong sista misinari i kam insaed long ofis. Hem i wan misinari wetem sakses, wan nambawan trena, mo wan lida we i komitim hemwan. Ol kompanion blong hem i glad long hem mo ol pipol oli lavem hem. Hem i obei, gat tingting i stap daon, mo gat strong tingting. Ol fas visit blong mifala i lukluk nomo long eria blong hem mo ol man we hem i stap tijim. Visit ia i defren. Mo mi askem hem, wanem hem i stap mekem, mi luksave se hem i wari. Mo hem i talem, “Presiden Olsen, mi no save spos mi save mekem hemia. Mi no save sapos bae mi save gud inaf. Mi no save sapos mi save stap olsem misinari ia we Lod i wantem mi blong kam.”

Hem i bin wan nambawanmisinari. Hem i gud tumas long evri wei. Wan we misin presiden i drim blong gat. Mi neva wari abaot ol kwaliti blong hem olsem wan misinari.

Taem mi lisin long hem, mi filim i had blong save wanem blong talem. Mi prea long hat se: “ Papa long Heven, hemia i wan nambawan misinari. Hem i blong yu. Hem i stap mekem evri samting i stret. Mi no wantem spolem evri samting. Plis helpem mi blong save wanem blong talem.”

Ol toktok i kam long mi. Mi talem,“Sista, mi sori we yu stap filim olsem. Bae mi askem wan kwestin long yu. Sapos yu bin gat wan fren we yu sta tijim we i filim olsem,?Wanem nao bae yu talem?”

Hem i lukluk mi mo smael. Wetem misinari spirit we i nogat mistek, mo jajmen, hem i talem, “Presiden, hemia i isi. Bae mi talem long hem se Sevya i save gud yu evriwan. Bae mi talem long hem, se Hem i laef. Hem i lavem yu. !Yu yu gud inaf, mo yu save mekem!”

Hem i laf smol mo talem, “Mi ting se, sapos hemia i aplae long ol fren blong mi, i aplae tu long mi.

Taem yumi gat ol tu tingting mo ol kwestin, yumi save filim se ol ansa oli had tumas o blong faenem ol ansa bae i moa fasfas. Bambae yumi tingbaot se enemi, iven papa blong ol giaman, hem i akitek blong mekem tingting i fasfas.⁸

Sevya, Hem i Masta blong mekem samitng i klia.

Presiden Nelson i bin talem:

“Enemi i kleva gud. Blong plante milian yia hem i mekem se gud i luk nogud, mo nogud i luk gud. Ol mesej blong Hem oli stap go laod, strong, mo oli flas.

“Be, ol mesej we oli kam long Papa long Heven, oli klia gud tumas. Hem i toktok long wan wei we i simpol, i kwaet, mo i klia gud evriwan, mekem se i nogat wan i no save andastanem Hem i rong.”⁹

Hamas nao yumi talem tangkyu se God i lavem tumas yumi mekem se Hem i sendem Pikinini blong Hem. Hem nao, i ansa.

I no longtaem i pas Presiden Nelson i talem:

“Gospel ia blong Jisas Kraes, man i nidim moa tedei bitim bifo. …

“Hemia i poenemaot gud hamas nao i impoten long yumi blong folem instraksen blong Lod long ol disaepol blong Hem blong “mas go long evri ples long wol, mo talemaot gud nius blong [Hem] long olgeta man.”¹⁰

Long olgeta we oli jusum blong givim seves, mi save testifae se ol blesing we bae i kam taem yu lisin long wan singaot blong profet. Blong givim seves hem i no abaot yu, hem i abaot Sevya. Bae oli singaotem yu blong go long wan ples, be wanem i moa impoten i we oli singaotem yu i go long wan pipol. Bae yu gat wan bigfala blesing ia mo responsabiliti blong helpem ol niu fren i kam blong andastanem se ansa hem i, Jisas.

Hemia, hem i Jos Ia blong Jisas Kraes blong Ol Lata-dei Sent, mo hemia i ples blong yumi. Evri samting we Presiden Nelson i talem wetem lav blong leftemap tingting blong yumi, blong save mekem, bae i lidim yumi kam moa kolosap long Sevya.

Long ol strong yut blong yumi—mo tu, nefiu blong mi Nash—truaot laef blong yu, nomata ol jalenj oli had mo mekem tingting i fasfas, oltaem, yu save tingbaot se ansa hem i simpol, oltaem hem i Jisas.

Olsem mi bin harem olgeta we oli sastenem olgeta olsem ol profet, sia, mo reveleta oli talem plante taem, mi tu mi talem, mifala i lavem yufala, mifala i talem tangkyu, mo mifala i nidim yufala. Ples ia nao i blong yu.

Mi lavem Sevya. Mo mi talem witnes ia, long nem blong Hem, iven Jisas Kraes. Mi testifae se Sevya “Hem i stap long stat i go kasem en blong stamba blong bilif blong yumi,”¹¹ mo Hem i Masta blong mekem samting i klia. Ansa hem i, Jisas. Long nem blong Jisas Kraes, amen.