Kam Stret Evriwan Tru Hem

Papa long Heven mo Sevya blong yumi Jisas Kraes, tufala i gat paoa blong sevem yumi, mo jenisim yumi. Oli save helpem yumi blong kam olsem Olgeta.

Sam yia i pas, wan apu pikinini boe blong mi, Aaron, i stat blong gat problem long saed blong helt. Hem stat blong kam taet, hem i gat smolsmol kat mo hem i no luk helti. Afta long medikol testing, oli faenem se hem i gat sik insaed long sofsof pat blong bon blong hem we i stopem bodi blong hem blong prodiusum red sel, waet sel, mo bigbigfala sel insaed long blad. Taem i nogat tritmen mo wan samting blong stopem, blad blong hem i nomo save wok gud o faet agensem ol sik ia, mekem se ol smolsmol foldaon, smol kat o siknes, oli save mekem hem i ded.

Blong samtaem nao hem i kasem bigbigfala sel mo blad we man i givim blong kipim hem aot long denja. Ol dokta oli talem se blong hem i hil long sik ia hem i nidim blong oli putum blad insaed long sofsof pat blong bon blong hem mo bes janis blong hem blong winim i blong wan brata o sista i givim long hem. Sapos wan brata o sista hem i semmak long hem bae transfea ia bae i save sevem laef blong hem. Ol fofala yangfala brata blong hem oli go long tes mo wan, Maxwell blad blong hem nao i semmak long hem.

Iven we brata blong hem i semmak long hem, sofsof pat long bon ia blong transferem hem i no isi. Proses ia i nidim blong kilim ded ol sel insaed long sofsof pat blong bon blong Aaron we sik i stap long hem mo afta pas long wan masin we laet blong hem bae i kilim ol sel ia we oli sik bifo hem i save kasem blad i go long sofsof pat blong bon blong hem we bae oli karem long brata blong hem Maxwell. Mo afta we ol sistem insaed long bodi blong hem bae oli wik, hem i nidim blong stap hem wan long hospital blong sam wik mo afta long haos blong sam manis wetem spesel oda, strik rul mo meresin.

Hop afta long transfea i go long bodi blong Aaron i we bodi blong hem bae akseptem sel we oli givim long hem mo sel blong Maxwell bae oli help blong mekem ol red mo waet sel mo bigbigfala sel long bodi blong Aaron we hem i nidim. Sakses blong transfea ia bae i mekem hem i kam helti fulwan. Sapraes samting i we dokta i talem long Aaron se hem i no mas faet mo lego blad blong hem i stap long ples blong faet ia from bae polis i save arestem brata blong hem Maxwell. Hemia from blad blong Aaron bae i kam blad blong blad blong Maxwell tru long transfea blong ol sel mo hem bae gat DNA blong Maxwell mo hemia bae i stap blong ful laef blong hem.

Aaron i bin sef tru long blad blong brata blong hem we i givim tingting ia se atoning blad blong Jisas Kraes mo risal blong Atonmen blong Hem long yumi. Mi wantem lukluk tedei long samting we i jenisim laef we i stap olwe taem yumi letem Lod i wokem merikel long yumi.¹

Aaron i nogat paoa long hemwan blong winim siknes ia. Bodi blong hem i no save mekem ol blad sel ia we hem i nidim blong givim hem laef. Nomata wanem we hem wan i mekem i no save hilim ol sofsof pat insaed long bon blong hem. Semmak olsem Aaron we i no save hilim hemwan, yumi no save sevem yumiwan. Nomata we yumi gat paoa, yumi skul gud, yumi smat, o strong, yumi no save klinim yumiwan long ol sin blong yumi, jenisim ol bodi blong yumi wan i kam wan bodi we i no save ded o kam olsem wan god. Hemia i posibol nomo tru long Sevya Jisas Kraes mo long Atonmen blong hem we i no save finis. “I nogat wan narafala rod o nem we oli givim andanit long heven we tru long hem ol man i save sev long kingdom blong God.”² Hem i tru long atoning blad blong Hem we i save klinim yumi mo mekem yumi kam tabu.³

Nomata se Aaron i no save kam oraet hemwan, blong transfea blong blad i wok hem i nid blong mekem wanem ol dokta oli askem hem blong mekem—iven oli had tumas, oli ol samting we oli jalenj. Nomata yumi no save sevem yumiwan, taem yumi lego yumi long wil blong Lod mo kipim ol kavenan blong yumi, rod i open blong yumi kasem fasin blong pem aot man.⁴ Olsem sapraes promes blong DNA blong ol blad sel blong Aaron, ol hat blong yumi oli jenis, yumi kasem pikja blong hem long fes blong yumi,⁵ ,⁶ mo kam ol niu man long Kraes.⁷

Alma i rimaenem ol pipol blong Sarahemla long ol jeneresen we i pas we oli bin sakem sin. Hem i stap toktok long papa blong hem i talem se “folem fet blong hem, wan bigfala jenis i bin hapen long hat blong hem.”⁸ Hem i askem se, “yufala i bin kasem bigfala jenis ia long hat blong yufala?”⁹ Hem i no ol pipol we oli jenisim ol hat blong olgeta wan. Lod i mekem jenis ia. Alma i bin mekem i klia long hemia. Hem i se, “Luk, hem i jenisim hat blong olgeta.”¹⁰ Oli “putum tingting blong olgeta i stap daon mo putum tras blong olgeta long tru God … [mo] stap laef kasem en … [mo] God i bin sevem olgeta.”¹¹ Pipol oli bin wiling blong openem ol hat blong olgeta mo eksasaesem fet, afta Lod i jenisim ol hat blong olgeta. !Mo hem i wan bigfala jenis tru! Tingting long jenis blong laef blong tufala man ia nem blong tufala Alma, bifo mo afta we oli hat blong tufala i bin jenis.¹²

Yumi ol pikinini blong God wetem wan fiuja we i naes tumas. Yumi save jenis blong kam olsem Hem mo gat “wan glad we i fulwan.”¹³ Setan, hem i lukaotem tu blong mekem evri man long wol i harem nogud bigwan.¹⁴ Yumi fri blong jusum fridom huia blong yumi folem.¹⁵ Taem yumi folem Setan, yumi givim hem paoa.¹⁶ Taem yumi folem God, Hem i givim yumi paoa.

Sevya i bin tijim se yumi “mas kam stret gud evriwan.”²¹ Hemia bae i save had blong mekem. Mi save luk klia wiknes blong miwan mo mi harem nogud tumas mo save abaot bigfala spes ia bitwin mi mo fasin blong kam klin evriwan. Ating samtaem yumi ting se yumi mas kam klin evriwan, be hemia i no posibol. Stap folem ol tingting long evri buk we yumi save faenem long wol ia bae i no save mekem hemia i hapen. I no gat wan narafala rod o nem we oli givim andanit long heven, we tru long hem, God i sevem ol man insaed long kingdom blong hem. Yumi “ kam stret gud evriwan tru long Jisas, we i man blong toktok from niu kavenan, we i tekem i kam atonmen ia we i stret gud evriwan tru long blad blong Hemwan we i ron.”²² Yumi kam stret evriwan tru long bigfala lav mo sore blong God.

?Traem pikjarem strong filing ia we apu boe blong mifala Aaron i gat blong ting se hem i andastanem mo folem evri medikol wok we i kam wetem transfea blong hem? Yumi no mas ting se yumi nid blong mekem wanem we Sevya Hem wan nomo i save mekem.

Taem Moronae i endem ol rikoda blong Hem, hem i tijim se, “Yes, kam long Kraes, mo kam stret evriwan tru hem, … mo sapos bae yufala i tanem baksaed blong yufala long evri fasin we i no olsem blong god, mo lavem God wetem ful paoa blong tingting, ful maen mo ful paoa blong yufala, afta nao, gladhat blong hem i naf blong yufala, blong tru long gladhat blong hem, yufala i save kam stret evriwan tru Kraes.”²⁴ !Hemia wan trutok we i gat paoa mo i wan kamfot! Gladhat blong Hem i naf blong mi. Gladhat blong Hem i naf blong mi. Gladhat blong Hem i naf blong evriwan we “oli stap hadwok tumas, mo we oli stap karem ol hevi samting.”²⁵

Wetem ol tritmen long saed blong meresin olsem Aaron, bae oltaem bae risal i kam we yumi no ting se bae i olsem. Aaron i nidim wan namba tu transfea taem faswan i gat sam problem. Tangkyu, we wetem wan jenis long hat long saed blong spirit, yumi no nidim blong wari sapos bae hapen. Taem yumi laef folem wil blong Hem , “mo stap hang fulwan long ol gud wok blong hem, we i gat olgeta paoa blong sevem man,”²⁶ i gat wan 100 pesen strong tingting ia blong kam klin tru long blad blong Sevya mo afta kam stret gud tru long Hem. Hem i “wan God blong trutok, mo hem i [no save] giaman.”²⁷

I nogat kwestin se rod ia blong jenis i tekem taem mo bae i no komplit kasem afta long laef ia, be promes i tru. Taem ol promes blong God oli no kam tru afta yumi ded, yumi stil save holemtaet ol promes ia, wetem save ia se bae oli hapen.²⁸

Bigfala jenis long helt blong Aaron i tekem i kam bigfala glad blong famli blong mifala. Pikjarem bigfala glad long heven taem wan bigfala jenis i hapen long ol sol blong yumi.

Papa long Heven mo Sevya blong yumi, Jisas Kraes, Tufala i lavem yumi mo wantem blong jenisim yumi mo mekem yumi kam klin evriwan. Tufala i wantem blong mekem hemia. Hemia i stamba blong wok mo glori blong Tufala.²⁹ Mi testifae se Tufala i gat paoa blong mekem hemia taem yumi kam long Tufala wetem fet. Long nem blong Jisas Kraes, amen.