Blong Bae Oli Save Yu

Sam yia i pas, mi gat wan eksperiens we i jenisim laef blong mi long wan sakramen miting long wod blong mi long Arisona. Olsem we sakramen prea i talem blong yumi wantem tumas blong “tekem long [yumiwan} nem blong [Jisas Kraes],”¹ Tabu Spirit i rimaenem mi se Jisas i gat fulap nem. Kwestin ia i kam long hat blong mi: “?Wanem ol nem blong Jisas we mi sapos blong tekem long miwan long wik ia?”

Tri nem i kam long maen blong mi, mo mi raetemdaon. Wanwan long ol nem ia i gat fasin blong Kraes we mi wantem blong kam moa gud long hem. Long wik afta, mi lukluk nomo long ol trifala nem ia mo traem blong lavem moa ol fasin we i go wetem ol nem ia. Stat long taem ia, mi gohed blong askem kwestin ia olsem pat blong wosip blong miwan: “?Wanem ol nem blong Jisas we mi sapos blong tekem long miwan long wik ia?” Blong stap ansarem kwestin ia mo traehad blong gat ol fasin olsem Kraes i blesem laef blong mi.

Long Prea blong Hem long bihaf blong yumi, Jisas i talemaot impoten trutok ia: “Mo laef ya, hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”² Tedei mi laekem blong serem wetem yufala ol blesing mo paoa we i kam taem yu save Jisas Kraes, tru long ol narafala nem blong Hem.

Wan simpol wei blong save wan man hem i blong save nem blong hem. Oli bin talem se “nem blong wan man i moa swit mo impoten long hemwan, long eni narafala lanwis.”³ ?Yu eva gat eksperiens ia blong singaotem wan man long wan rong nem o fogetem nem blong hem? Waef blong mi, Alexis, mo mi samtaem mitufala i singaotem wan long ol pikinini blong mitufala “Lola.” Sore nomo, olsem we bae yufala i tingting long hem, !Lola hem i dog blong mifala! Blong gud o nogud, blong fogetem nem blong wan man i talemaot long man ia se yu no save gud hem.

Jisas i save mo i singaotem ol pipol long nem blong olgeta. Long taem blong Isrel bifo, Lod i talem: “Yufala i no mas fraet: Mi mi sevem yufala finis, mi mekem yufala i fri. Mi stap singaot yufala long nem blong yufala. Yufala i man blong mi.⁴ Long Ista moning, Meri i witnes long Kraes we i girap bakegen long ded, mo witnes ia i kam moa strong taem Jisas i singaotem hem long nem blong hem.⁵ Semmak olsem, God i singaotem Josef Smit long nem blong hem blong ansa long prea blong fet blong hem.⁶

Samtaem, Jisas i givim niu nem long ol disaepol blong Hem we i go wetem fasin, mo paoa blong olgeta blong mekem samting. Jehova i givim Jekob wan niu nem we hem i Isrel, we i minim “Wan we i letem God i Win” o “Letem God i win.”⁷ Jisas i givim Jemes mo Jon nem ia Boanejes, we i minim “ol pikinini boe blong tanda.”⁸ Jisas i givim Saemon nem ia Sefas o Pita, we i minim ston, taem Hem i luk fiuja lidasip blong hem.⁹

Olsem we Jisas i save wanwan nem blong yumi, wan wei blong yumi kam blong save gud Jisas hem i blong lanem ol narafala nem blong Hem. Olsem ol nem ia Isrel mo Pita, plante nem blong Jisas oli ol taetol we bae i helpem yumi blong andastanem misin, stamba tingting, mo ol fasin blong Hem. Taem yumi kam blong save ol narafala nem blong Jisas, yumi kam blong save moa gud tabu misin blong Hem mo kaen fasin blong Hem. Blong save ol narafala nem blong Hem i givim yumi insperesen ia blong kam moa olsem Hem—blong gat ol fasin blong Kraes we i karem glad mo wan stamba tingting long laef blong yumi.

Sam yia i pas, Presiden Russell M. Nelson i stadi evri skripja we i tokbaot Jisas Kraes long Gaed long ol Skripja.¹⁰ Hem i invaetem ol yangfala adalt blong stadi ol semfala skripja ia. Presiden Nelson i talem olsem abaot ol nem blong Jisas, “Stadi evri samting abaot Jisas Kraes taem yu prea mo gat strong tingting blong lukaotem mo andastanem wanem ol wanwan taetol mo nem blong Hem i minim long yuwan nomo.”¹¹

Folem invitesen blong Presiden Nelson, mi stat blong mekem lis blong miwan long ol plante nem blong Jisas. Lis blong miwan naoia i gat ova long 300 nem, mo mi save se i gat plante moa we mi no faenem yet.

I gat sam nem blong Jisas we hem i blong Hemwan nomo,¹² mi laekem blong serem faef nem mo taetol we i yumi save yusum long wanwan long yumi. Mi stap invaetem yufala blong mekem lis blong yufalawan, taem yufala i kam blong save Jisas tru long ol narafala nem blong Hem. Taem yu mekem olsem, bae yu faenem se i gat ol narafala nem—we i go wetem ol fasin blong Kraes—we bae yu wantem blong tekem long yuwan olsem wan kavenan disaepol blong Jisas.¹³

Faswan, Jisas hem i Gudfala man blong Lukaotem Sipsip.¹⁴ Olsem hemia, Jisas i save ol sipsip blong Hem,¹⁵ “i singaotem nem blong ol sipsip blong Hem tru long nem blong olgeta,”¹⁶ mo olsem Pikinini blong God, Hem i givim laef blong Hem blong ol sipsip blong Hem.¹⁷ Semmak olsem, Jisas i wantem yumi blong kam ol gudfala man blong lukaotem sipsip, speseli insaed long ol famli blong yumi mo olsem ol givhan brata mo sista. Wan wei blong soem lav blong yumi long Jisas i blong fidim ol sipsip blong Hem.¹⁸ Long ol sipsip we oli stap wokbaot olbaot yet, ol gudfala man blong lukaotem sipsip oli go long wael ples, blong faenem ol sipsip ia we oli lus mo afta stap wetem olgeta kasem taem oli kambak sef.¹⁹ Olsem ol gudfala man blong lukaotem sipsip, mo olsem we ol lokol situesen i akseptem, yumi mas lukaot blong spendem moa taem blong givhan long ol pipol long hom blong olgeta. Long givhan blong yumi, teks mo teknoloji oli sud yusum moa, be i no blong tekem ples blong go luk man fes tu fes.²⁰

Nambatu, Jisas Hem i Hae Pris blong Ol Gudfala Samting We Bae i Kam.²¹ Jisas i talem olsem taem Hem i save se bae oli Krusifaem hem i no long taem: “Mi mi talemaot ol samting ya finis long yufala, blong bambae tingting blong yufala i save gat pis.” Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.”¹⁹ Tedei, wol blong yumi i fulap long ol man we i gat ol defren kaen tingting mo bilif mo oli seraot, i gat wan bigfala nid i stap blong yumi prijim mo praktisim ol gudfala tingting mo hop. Nomata long ol jalenj we i pas finis, fet oltaem i poen i go long fiuja,²³ we i fulap wetem hop, i letem yumi blong fulfilim invitesen blong Jisas blong stap glad.²⁴ Blong stap glad blong laef folem gospel i helpem yumi blong kam olsem ol gudfala disaepol blong ol gudfala samting we bae i kam.

Wan narafala taetol blong Jisas i we Hem i Semmak, Yestedei, Tedei, mo I No Save Finis.²⁵ Gohed blong mekem samting hem i fasin blong Kraes. Jisas oltaem i mekem wanem Papa i wantem²⁶ mo han blong Hem i open oltaem blong i sevem, helpem, mo hilim yumi.²⁷ Taem yumi stap gohed blong laef folem gospel, bae yumi kam moa olsem Jisas.²⁸ Nomata we wol bae i eksperiensem jenis long ol samting we i popula ol samting nogud we man i laekem blong mekem, mo i saksakem ol man olbaot wetem ol giaman,²⁹ blong stap gohed blong laef folem gospel, i helpem yumi blong stanap strong mo no muvmuv long ol hadtaem blong laef.³⁰ Yumi soem blong stap gohed taem yumi akseptem invitesen blong Presiden Nelson blong “mekem taem blong Lod.”³¹ Bigfala paoa long saed long spirit i kamaot long ol smol mo simpol samting³² olsem blong stap developem“ ol tabu fasin” blong mekem prea evri dei, sakem sin, skripja stadi mo givim seves long ol narafala wan.

Namba Fo, Jisas i Tabu Wan blong Isrel.³⁴ Laef blong Jisas i wan tabu paten. Taem yumi stap folem Jisas, yumi save kam wan tabu wan blong Isrel.³⁵ Yumi kam moa tabu taem yumi stap go long tempol oltaem, long ples we “Tabu Fasin long Lod” oli raetem antap long doa. Evri taem yumi wosip long tempol, yumi aot wetem bigfala paoa blong mekem ol hom blong yumi i ol ples we tabu. Long yufala we i no holem wan tempol rekomen blong go insaed long tabu tempol, mi invaetem yu blong go luk bisop blong yu mo rere yuwan blong go insaed mo gobak long tabu ples ia. Taem we yumi spendem long tempol bae i mekem laef blong yumi i kam moa tabu.

Wan las nem blong Jisas Hem i Fetful mo Tru.³⁷ Olsem we Jisas i oltaem fetful mo tru, wanem Hem i wantem tumas i blong yumi soem ol fasin ia long laef blong yumi. Taem fet blong yumi i foldaon, yumi save krae long Jisas, “Lod, sevem mi,” olsem we Pita i singaot taem hem i stat draon long raf solwota long Galili.³⁸ Long dei ia Jisas i sevem disaepol blong Hem blong we i stap draon. Hem i bin mekem semmak long mi, mo bae i mekem i semmak long yu. No givap long Jisas—!Bae Hem i neva givap long yu!

Taem yumi stap fetful mo tru, yumi folem singaot blong Jisas blong “Laef blong yufala i mas joen long mi,” we hem i minim “stap wetem mi.”³⁹ Taem oli askem ol kwestin long yumi, oli jikim fet blong yumi, taem olgeta we oli stap long bigfala bilding oli poenem fingga long yumi, yumi gohed blong stap fetful mo stap tru. Long ol taem olsem, yumi tingbaot krae blong Jisas, “Lukluk long mi long evri tingting blong yutufala; no gat tu tingting, no fraet.”⁴⁰ Taem yumi mekem olsem, Hem i givim fet, hop, mo paoa ia we yumi nidim blong stap wetem Hem blong taem we i no save finis.⁴¹

Ol dia brata mo sista, Jisas i wantem yumi blong save Hem from nem blong Hem nomo i stap andanit long heven we i save sevem yumi.⁴² Jisas i Rod, Stamba blong Trutok, mo Laef—i no gat man i save kam long Papa , sapos Hem i no tekem hem i kam.⁴³ !Jisas Hem i rod ia nomo! From risen ia nao, Jisas i talem, “Kam long mi,”⁴⁴ “Folem mi,”⁴⁵ “Wokbaot wetem mi,”⁴⁶ mo “Lan long mi.”⁴⁷

Wetem ful hat blong mi, mi talem witnes blong mi long Jisas Kraes—se Hem i laef, Hem i lavem yu, mo i save nem blong yu. Hem i Pikinini Boe blong God,⁴⁸ Pikinini Ia nomo blong Papa.⁴⁹ [Hem i fandesen blong yumi, Sefples blong yumi, Sil blong yumi, Ples blong haed blong yumi, mo i sevem yumi.]⁵⁰ Hem i Laet we i Saen long Tudak.⁵¹ Hem i Sevya⁵² mo Ridima blong yumi.⁵³ Hem I Stamba blong Laef Bakegen long Ded mo Stamba blong Laef.⁵⁴ Strong tingting blong mi, i we bae yu kam blong save Jisas tru long ol plante nem blong Hem mo we bae yu kam moa olsem Hem taem yu soem ol tabu fasin blong hem long laef blong yu. Long nem blong Jisas Kraes, amen.