ທ່ານຢາກມີຄວາມສຸກບໍ?
ຈົ່ງຢູ່ໃນເສັ້ນທາງແຫ່ງພັນທະສັນຍາ. ຊີວິດຂອງທ່ານຈະງ່າຍຂຶ້ນ, ມີຄວາມສຸກຫລາຍຂຶ້ນ, ແລະ ເຕັມໄປດ້ວຍຄວາມຊື່ນຊົມ.
ທ່ານຢາກມີຄວາມສຸກບໍ? ແມ່ນຫຍັງທີ່ເຮັດໃຫ້ທ່ານບໍ່ມີຄວາມສຸກ? ປະທານຣະໂຊ ເອັມ ແນວສັນ ໄດ້ກ່າວວ່າ: “ຖ້າທ່ານຢາກໂສກເສົ້າ, ກໍຈົ່ງຝ່າຝືນພຣະບັນຍັດ—ແລະ ບໍ່ຕ້ອງກັບໃຈ. ຖ້າທ່ານຢາກມີຄວາມສຸກ, ກໍຈົ່ງຢູ່ໃນເສັ້ນທາງແຫ່ງພັນທະສັນຍາ.”1 ມັນເປັນເລື່ອງງ່າຍທີ່ຈະມີຄວາມສຸກແມ່ນບໍ? ຂໍພຽງແຕ່ເຮັດພັນທະສັນຍາ ແລະ ຮັກສາມັນໄວ້ໃນຊີວິດຂອງທ່ານ. ຂໍໃຫ້ເຮົາຈົ່ງທົບທວນເຖິງບາງສິ່ງທີ່ສາມາດຊ່ວຍເຮົາໃຫ້ຢູ່ໃນເສັ້ນທາງແຫ່ງພັນທະສັນຍາ ແລະ ເຮັດໃຫ້ເຮົາມີຄວາມສຸກ.
1. ເສັ້ນທາງແຫ່ງພັນທະສັນຍາແມ່ນຫຍັງ?
ອີງຕາມຄຳເວົ້າຂອງ ແອວເດີ ແດວ ຈີ ເຣັນລັນ: “ຄຳວ່າ ເສັ້ນທາງແຫ່ງພັນທະສັນຍາ ອ້າງເຖິງລຳດັບຂອງພັນທະສັນຍາ ຊຶ່ງໂດຍທາງນັ້ນເຮົາມາຫາພຣະຄຣິດ ແລະ ເຊື່ອມຕໍ່ເຂົ້າກັບພຣະອົງ. ຜ່ານທາງຄວາມຜູກພັນແຫ່ງພັນທະສັນຍານີ້, ເຮົາຈະເຂົ້າເຖິງອຳນາດນິລັນດອນຂອງພຣະອົງ. ເສັ້ນທາງເລີ່ມຕົ້ນດ້ວຍສັດທາໃນພຣະເຢຊູຄຣິດ ແລະ ການກັບໃຈ, ຕິດຕາມດ້ວຍການບັບຕິສະມາ ແລະ ການຮັບເອົາພຣະວິນຍານບໍລິສຸດ.”2 ເຮົາຕໍ່ພັນທະສັນຍາເຫລົ່ານີ້ທຸກຄັ້ງທີ່ເຮົາຮັບສ່ວນສິນລະລຶກຂອງເຮົາ.
ໂດຍເລີ່ມຕົ້ນດ້ວຍພັນທະສັນຍາແຫ່ງການບັບຕິສະມາ, ເຮົາເຮັດພັນທະສັນຍາເພີ່ມຂຶ້ນຕະຫລອດຊົ່ວຊີວິດຂອງເຮົາ. ແອວເດີ ເຣັນລັນ ໄດ້ກ່າວອີກວ່າ: “ເສັ້ນທາງແຫ່ງພັນທະສັນຍານຳພາໄປສູ່ພິທີການພຣະວິຫານ, ດັ່ງເຊັ່ນຂອງປະທານສັກສິດພຣະວິຫານ. ຂອງປະທານສັກສິດຄືຂອງປະທານແຫ່ງພັນທະສັນຍາສັກສິດຂອງພຣະເຈົ້າ ທີ່ເຊື່ອມຕໍ່ເຮົາເຂົ້າກັບພຣະອົງຢ່າງສົມບູນຄົບຖ້ວນຫລາຍຂຶ້ນ.”3
2. ທ່ານຢູ່ໃນເສັ້ນທາງແຫ່ງພັນທະສັນຍາບໍ?
ບາງຄັ້ງເມື່ອເຮົາເຮັດພັນທະສັນຍາແລ້ວ, ເຮົາກໍລົ້ມເຫລວໃນການຮັກສາມັນ. ເມື່ອມັນເກີດຂຶ້ນ, ທ່ານສາມາດເຮັດແນວໃດເພື່ອກັບຄືນມາສູ່ເສັ້ນທາງແຫ່ງພັນທະສັນຍາ? ຂ້າພະເຈົ້າຂໍແບ່ງປັນບາງຕົວຢ່າງຂອງການກັບຄືນມາສູ່ເສັ້ນທາງແຫ່ງພັນທະສັນຍາ.
ປະມານໜຶ່ງເດືອນຜ່ານມາ, ຂ້າພະເຈົ້າໄດ້ຮັບຂໍ້ຄວາມຈາກອະດີດຜູ້ສອນສາດສະໜາຄົນໜຶ່ງທີ່ເຄີຍໄດ້ຮັບໃຊ້ກັບພວກເຮົາ. ລາວໄດ້ເວົ້າວ່າ: “ຊ່ວງນີ້ກໍຂັດສົນຫລາຍ. ໃນການຕໍ່ສູ້ກັບຄວາມວິຕົກກັງວົນ ແລະ ຄວາມກົດດັນທຸກໆມື້ ໄດ້ເຮັດໃຫ້ຂ້ານ້ອຍໜັກໃຈ, ແລະ ມັນເປັນເລື່ອງທີ່ຍາກຫລາຍ. ຂ້ານ້ອຍຮູ້ສຶກໂດດດ່ຽວ ແລະ ເປັນທຸກຫລາຍ. ຂ້ານ້ອຍໄດ້ອະທິຖານຫາພຣະບິດາເທິງສະຫວັນຂອງເຮົາ ເພື່ອສັນຕິສຸກ ແລະ ການປອບໂຍນໃນສິ່ງທີ່ຂ້ານ້ອຍສາມາດເຮັດໄດ້ເພື່ອຕໍ່ສູ້ກັບຄວາມຍາກລຳບາກນີ້. … ໃນຂະນະທີ່ຂ້ານ້ອຍກຳລັງອະທິຖານ, ຂ້ານ້ອຍໄດ້ຮັບການກະຕຸ້ນເຕືອນຈາກພຣະວິນຍານບອກກັບຂ້ານ້ອຍວ່າ ຂ້ານ້ອຍຕ້ອງຈ່າຍສ່ວນສິບເຕັມ. … ຂ້ານ້ອຍຮູ້ສຶກເຖິງພຣະວິນຍານຢ່າງແຮງກ້າ ແລະ ຂ້ານ້ອຍຮູ້ສຶກຕ້ອງການຢາກເຮັດແບບນັ້ນທັນທີ. ດ້ວຍຄວາມປາດຖະໜາທີ່ຈະເຮັດແບບນັ້ນ ຂ້ານ້ອຍໄດ້ຮູ້ສຶກເຖິງການກະຕຸ້ນວ່າ ‘ຖ້າເຈົ້າຈ່າຍສ່ວນສິບຂອງເຈົ້າ ທຸກສິ່ງທຸກຢ່າງຈະເປັນໄປດ້ວຍດີ.’ ຂ້ານ້ອຍຍັງດີ້ນລົນໃນການຊອກຫາສັນຕິສຸກຢູ່, ແຕ່ວ່າຂ້ານ້ອຍມີປະຈັກພະຍານເຖິງພຣະຜູ້ຊ່ວຍໃຫ້ລອດຂອງເຮົາ ແລະ ວ່າຜ່ານທາງການເຊື່ອຟັງຂອງຂ້ານ້ອຍ. ຂ້ານ້ອຍຈະສາມາດຮູ້ສຶກ ແລະ ພົບສັນຕິສຸກທີ່ຂ້ານ້ອຍກຳລັງຊອກຫາ ໃນຫົວໃຈ ແລະ ໃນຈິດໃຈຂອງຂ້ານ້ອຍ. ປະຈຸບັນນີ້ຂ້ານ້ອຍໄດ້ຕັດສິນໃຈທີ່ຈະກັບຄືນມາໂບດ ແລະ ສະແຫວງຫາພຣະວິນຍານໃນທຸກສິ່ງທີ່ຂ້ານ້ອຍເຮັດ.”
ຕອນນີ້ລາວດີຂຶ້ນຫລາຍແລ້ວ. ທ່ານກໍສາມາດຂໍສັນຕິສຸກຈາກພຣະບິດາເທິງສະຫວັນໄດ້ເຊັ່ນກັນ, ແຕ່ວ່າຄຳຕອບນັ້ນອາດຈະແຕກຕ່າງໄປຈາກທີ່ທ່ານຄາດຫວັງ. ຕາບໃດທີ່ທ່ານສະແຫວງຫາທີ່ຈະຮູ້ຈັກພຣະຜູ້ຊ່ວຍໃຫ້ລອດ ແລະ ອະທິຖານຫາພຣະບິດາເທິງສະຫວັນ, ພຣະອົງຈະໃຫ້ຄຳຕອບສະເພາະກັບທ່ານ.
ປະທານທອມມັສ ແອັສ ມອນສັນ ໄດ້ສິດສອນວ່າ:
“ບົດຮຽນທີ່ຍິ່ງໃຫຍ່ທີ່ສຸດ ທີ່ເຮົາສາມາດຮຽນຮູ້ໄດ້ ໃນຊ່ວງມະຕະ ແມ່ນຕອນທີ່ພຣະເຈົ້າກ່າວ ແລະ ເຮົາເຊື່ອຟັງ, ແລ້ວເຮົາຈະຖືກຕ້ອງສະເໝີ.”4
ເມື່ອເຮົາຮັກສາພຣະບັນຍັດ, ຊີວິດຂອງເຮົາຈະມີຄວາມສຸກກວ່າ, ສົມບູນກວ່າ, ແລະ ຫຍຸ້ງຍາກໜ້ອຍກວ່າ. ການທ້າທາຍ ແລະ ບັນຫາຂອງເຮົາ ຈະງ່າຍຂຶ້ນ ທີ່ຈະທົນຕໍ່, ແລະ ເຮົາຈະໄດ້ຮັບພອນທີ່ [ພຣະເຈົ້າ] ໄດ້ສັນຍາໄວ້.”5
ຕອນທີ່ຂ້າພະເຈົ້າໄດ້ຖືກເອີ້ນໃຫ້ເປັນອະທິການ, ມັນເປັນຊ່ວງເວລາທີ່ຫຍຸ້ງຍາກທີ່ສຸດໃນຊີວິດຂອງຂ້າພະເຈົ້າ. ຕອນນັ້ນຂ້າພະເຈົ້າເປັນພໍ່ໜຸ່ມ ມີອາຍຸ 30 ຕົ້ນໆ, ແຕ່ຂ້າພະເຈົ້າມີບັນຫາທາງດ້ານການເງິນຍ້ອນບັນຫາທາງຄອບຄົວ. ຂ້າພະເຈົ້າຫາວິທີແກ້ໄຂບໍ່ໄດ້, ແລະ ຂ້າພະເຈົ້າກໍຄິດວ່າຄວາມທ້າທາຍນັ້ນຈະບໍ່ມີວັນຈົບສິ້ນ. ຂ້າພະເຈົ້າເມື່ອຍໝົດແຮງທາງຊັບສິນ ແລະ ຈິດໃຈ. ຂ້າພະເຈົ້າກໍເລີ່ມສົງໄສໃນຄວາມເຂັ້ມແຂງທາງວິນຍານຂອງຂ້າພະເຈົ້າເຊັ່ນກັນ. ໃນຊ່ວງເວລາແຫ່ງຄວາມຫຍຸ້ງຍາກລຳບາກນັ້ນທີ່ປະທານສະເຕກຂອງຂ້າພະເຈົ້າໄດ້ສະເໜີການເອີ້ນໃຫ້ຂ້າພະເຈົ້າ. ຂ້າພະເຈົ້າກໍໄດ້ຮັບເອົາການເອີ້ນນັ້ນ, ເຖິງແມ່ນວ່າມັນຈະຍາກ.
ພັນລະຍາຂອງຂ້າພະເຈົ້າໄດ້ຮັບການສຳພາດກັບປະທານສະເຕກ, ແຕ່ລາວກໍບໍ່ສາມາດຕອບຕົກລົງ, ແລະ ລາວກໍບໍ່ໄດ້ຕອບເຊັ່ນກັນ ແຕ່ຍັງຫລັ່ງນ້ຳຕາຢູ່. ລາວໄດ້ຮ້ອງໄຫ້ຢູ່ໝົດອາທິດ, ໂດຍທູນຖາມພຣະບິດາເທິງສະຫວັນວ່າ, “ເປັນຫຍັງຈຶ່ງແມ່ນຕອນນີ້?” ແລະ “ພຣະອົງຊົງຮູ້ຈັກແຕ່ລະຄົນແທ້ແລ້ວບໍ?” ລາວກໍຍັງບໍ່ໄດ້ຄຳຕອບນັ້ນ, ແລ້ວຂ້າພະເຈົ້າໄດ້ຮັບການຢືນຢັນໃຫ້ເປັນອະທິການໃນວັນອາທິດຕໍ່ມາ. ລາວກໍບໍ່ໄດ້ຖາມຄຳຖາມເຫລົ່ານັ້ນກັບພຣະບິດາເທິງສະຫວັນອີກຕໍ່ໄປ ແຕ່ລາວໄດ້ສະໜັບສະໜູນຂ້າພະເຈົ້າໃນການເອີ້ນເປັນເວລາຫົກປີ.
ໃນວັນອາທິດທີ່ຂ້າພະເຈົ້າໄດ້ຮັບການປົດຈາກການເອີ້ນ, ພັນລະຍາຂອງຂ້າພະເຈົ້າໄດ້ຍິນສຽງໃນຂະນະທີ່ລາວກຳລັງຮັບສິນລະລຶກຢູ່. ສຽງນັ້ນກະຊິບບອກລາວວ່າ, “ເພາະມັນຍາກຫລາຍສຳລັບເຈົ້າໃນການກ້າວໄປຂ້າງໜ້າ, ເຮົາກໍເລີຍໃຫ້ການເອີ້ນແກ່ລາວໃນຖານະອະທິການ ເພື່ອຈະອູ້ມຊູ ແລະ ຍ່າງໄປກັບເຈົ້າ.” ເມື່ອເບິ່ງຢ້ອນກັບໄປຫົກປີກ່ອນ, ລາວຮູ້ວ່າຄວາມທ້າທາຍຫລາຍຢ່າງທີ່ເບິ່ງຄືວ່າຈະບໍ່ມີວັນສິ້ນສຸດ ບັດນີ້ໄດ້ຮັບການແກ້ໄຂແລ້ວໄປພ້ອມໆກັນ.
ພວກເຮົາໄດ້ຮຽນຮູ້ວ່າເມື່ອເຮົາຄິດວ່າມັນບໍ່ແມ່ນເວລາທີ່ດີທີ່ເຮົາຈະໄດ້ຮັບການເອີ້ນ, ມັນອາດຈະເປັນເວລາທີ່ເຮົາຕ້ອງການການເອີ້ນຫລາຍທີ່ສຸດ. ເມື່ອໃດກໍຕາມທີ່ພຣະຜູ້ເປັນເຈົ້າຂໍໃຫ້ເຮົາຮັບໃຊ້ໃນການເອີ້ນໃດໜຶ່ງ, ບໍ່ວ່າຈະເປັນການເອີ້ນທີ່ໜັກ ຫລື ເບົາກວ່າ, ພຣະອົງຊົງຫລິງເຫັນຄວາມຕ້ອງການຂອງເຮົາ. ພຣະອົງໄດ້ຈັດຫາຄວາມເຂັ້ມແຂງທີ່ເຮົາຕ້ອງການ ແລະ ມີພອນຕ່າງໆທີ່ພ້ອມຈະຖອກເທໃຫ້ກັບເຮົາໃນຂະນະທີ່ເຮົາຮັບໃຊ້ຢ່າງຊື່ສັດ.
ມີຫລາຍສິ່ງຫລາຍຢ່າງທີ່ລົບກວນເຮົາຈາກການຢູ່ໃນເສັ້ນທາງແຫ່ງພັນທະສັນຍາ. ບໍ່ວ່າມັນຈະແມ່ນສິ່ງໃດກໍຕາມ, ມັນບໍ່ເຄີຍຊ້າເກີນໄປສຳລັບເຮົາໃນການຫັນໃຈຂອງເຮົາມາຫາພຣະບິດາເທິງສະຫວັນເພື່ອການຊ່ວຍເຫລືອ. ແອວເດີ ພອລ ວີ ຈອນສັນ ໄດ້ສິດສອນເຮົາວ່າ: “ເມື່ອເຮົາຕິດຕາມຊາຕານ, ເຮົາກໍມອບອຳນາດໃຫ້ມັນ. ເມື່ອເຮົາຕິດຕາມພຣະເຈົ້າ, ພຣະອົງກໍມອບອຳນາດໃຫ້ເຮົາ.”6
ກະສັດເບັນຢາມິນໃນພຣະຄຳພີມໍມອນໄດ້ເປັນພະຍານວ່າ: “ຂ້າພະເຈົ້າປາດຖະໜາໃຫ້ພວກທ່ານພິຈາລະນາເຖິງສະພາບອັນເປັນພອນ ແລະ ຄວາມສຸກຂອງຄົນທີ່ຮັກສາພຣະບັນຍັດຂອງພຣະເຈົ້າ. ເພາະຈົ່ງເບິ່ງ, ເຂົາໄດ້ຮັບພອນທຸກຢ່າງ ທັງຝ່າຍໂລກ ແລະ ຝ່າຍວິນຍານ; ແລະ ຖ້າຫາກເຂົາອົດທົນຢ່າງຊື່ສັດຈົນເຖິງທີ່ສຸດແລ້ວ, ເຂົາຈະຖືກຮັບເຂົ້າສູ່ສະຫວັນ, ແລ້ວເຂົາຈະໄດ້ຢູ່ກັບພຣະເຈົ້າໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”7
3. ການຮັກສາພັນທະສັນຍາກັບພຣະເຈົ້າເຮັດໃຫ້ທ່ານມີຄວາມສຸກແນວໃດ?
ພັນລະຍາຂອງຂ້າພະເຈົ້າໄດ້ເວົ້າວ່າ ການແຕ່ງງານຂອງພວກເຮົາຄືການທຽມແອກນຳກັນ, ແລະ ຍ້ອນແນວນັ້ນລາວຈຶ່ງສາມາດເຮັດໃນສິ່ງທີ່ລາວບໍ່ສາມາດເຮັດໄດ້ມາກ່ອນ. ຍົກຕົວຢ່າງ, ຕັ້ງແຕ່ລາວຍັງນ້ອຍມາ, ມັນຍາກສຳລັບລາວທີ່ຈະອອກໄປນອກບ້ານໃນຄວາມມືດ, ແຕ່ມັນບໍ່ແມ່ນເລື່ອງຍາກສຳລັບລາວອີກຕໍ່ໄປເພາະຂ້າພະເຈົ້າໄປກັບລາວ. ລາວເປັນຄົນເຕ້ຍ ແລະ ບໍ່ສາມາດຢື້ເອົາສິ່ງຂອງທີ່ຢູ່ບ່ອນສູງໄດ້ນອກຈາກຕ້ອງໃຊ້ຕັ່ງ ຫລື ຂັ້ນໄດປີນ, ແຕ່ຂ້າພະເຈົ້າສາມາດຊ່ວຍລາວເອົາເຄື່ອງຈາກຊັ້ນບ່ອນສູງໄດ້ ເພາະວ່າຂ້າພະເຈົ້າສູງກວ່າລາວ. ການຮັບເອົາແອກຂອງພຣະຜູ້ຊ່ວຍໃຫ້ລອດກໍເປັນເຊັ່ນນັ້ນ. ເມື່ອເຮົາທຽມແອກກັບພຣະອົງ, ເຮົາສາມາດເຮັດໃນສິ່ງທີ່ເຮົາເຮັດບໍ່ໄດ້ ເພາະວ່າພຣະອົງສາມາດເຮັດໃນສິ່ງທີ່ເຮົາເຮັດບໍ່ໄດ້ດ້ວຍຕົວເຮົາເອງ.
ແອວເດີ ເດວິດ ເອ ແບ໊ດນາ ໄດ້ກ່າວວ່າ: “ການເຮັດ ແລະ ການຮັກສາພັນທະສັນຍາສັກສິດໃຫ້ເຮົາເຂົ້າຮ່ວມ ແລະ ເປັນໜຶ່ງກັບອົງພຣະເຢຊູຄຣິດເຈົ້າ. ຕາມຈິງແລ້ວ, ພຣະຜູ້ຊ່ວຍໃຫ້ລອດກຳລັງເຊື້ອເຊີນເຮົາໃຫ້ເພິ່ງອາໄສພຣະອົງ ແລະ ອອກແຮງງານຮ່ວມກັບພຣະອົງ, ແມ່ນແຕ່ເມື່ອຄວາມພະຍາຍາມທີ່ດີທີ່ສຸດຂອງເຮົາຍັງບໍ່ເໝາະສົມ ແລະ ປຽບທຽບກັບຂອງພຣະອົງບໍ່ໄດ້ກໍຕາມ. ເມື່ອເຮົາໄວ້ວາງໃຈໃນພຣະອົງ ແລະ ດຶງເອົາພາລະໜັກຂອງເຮົາກັບພຣະອົງລະຫວ່າງການເດີນທາງໃນຊີວິດມະຕະ, ແນ່ນອນວ່າແອກຂອງພຣະອົງນັ້ນກໍງ່າຍ ແລະ ພາລະຂອງພຣະອົງນັ້ນກໍເບົາ.”8
ປະທານແນວສັນຍັງໄດ້ສິດສອນອີກວ່າ:
“ການທຽມແອກຂອງທ່ານກັບພຣະຜູ້ຊ່ວຍໃຫ້ລອດໝາຍຄວາມວ່າ ທ່ານໄດ້ເຂົ້າເຖິງຄວາມເຂັ້ມແຂງ ແລະ ອຳນາດແຫ່ງການໄຖ່ ຂອງພຣະອົງ.”9
“ລາງວັນສຳລັບການຮັກສາພັນທະສັນຍາກັບພຣະເຈົ້າ ຄືພະລັງຈາກສະຫວັນ—ພະລັງທີ່ເສີມກຳລັງໃຫ້ເຮົາ ເພື່ອຕ້ານທານກັບການທົດລອງ, ການລໍ້ລວງ, ແລະ ຄວາມເຈັບປວດໃຈ ໄດ້ດີກວ່າເກົ່າ. ພະລັງນີ້ເຮັດໃຫ້ເຮົາສະບາຍໃຈຂຶ້ນ. ຜູ້ທີ່ດຳລົງຊີວິດຕາມກົດທີ່ສູງກວ່າຂອງພຣະເຢຊູຄຣິດໄດ້ເຂົ້າເຖິງອຳນາດທີ່ສູງກວ່າຂອງພຣະອົງ.”10
“ການຮັກສາພັນທະສັນຍາຍ່ອມເຮັດໃຫ້ຊີວິດງ່າຍຂຶ້ນກວ່າເກົ່າ! ທຸກຄົນທີ່ເຮັດພັນທະສັນຍາຢູ່ທີ່ອ່າງບັບຕິສະມາ ແລະ ໃນພຣະວິຫານ—ແລະ ຮັກສາມັນ—ສາມາດເຂົ້າເຖິງອຳນາດຂອງພຣະເຢຊູຄຣິດຫລາຍຂຶ້ນ.”11
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ທ່ານຢາກມີຄວາມສຸກບໍ? ຈົ່ງຢູ່ໃນເສັ້ນທາງແຫ່ງພັນທະສັນຍາ. ຊີວິດຂອງທ່ານຈະງ່າຍຂຶ້ນ, ມີຄວາມສຸກຫລາຍຂຶ້ນ, ແລະ ເຕັມໄປດ້ວຍຄວາມຊື່ນຊົມ. ພຣະຜູ້ຊ່ວຍໃຫ້ລອດກຳລັງເຊື້ອເຊີນເຮົາວ່າ, “ຈົ່ງມາຫາເຮົາທຸກຄົນທີ່ອິດເມື່ອຍຈາກການແບກຫາບພາລະໜັກ ແລະ ເຮົາຈະໃຫ້ພວກເຈົ້າໄດ້ພັກຜ່ອນ.”12 ພຣະອົງຄືພຣະຄຣິດທີ່ຊົງພຣະຊົນ. ພຣະອົງແບກຫາບພາລະຂອງເຮົາ ແລະ ເຮັດໃຫ້ຊີວິດຂອງເຮົາງ່າຍຂຶ້ນ. ໃນພຣະນາມຂອງພຣະເຢຊູຄຣິດ, ອາແມນ.