ຄິດກ່ຽວກັບຊັ້ນສູງ!
ການເລືອກຂອງທ່ານຈະກຳນົດວ່າທ່ານຈະດຳລົງຊີວິດຢູ່ໃສຕະຫລອດຊົ່ວນິລັນດອນ, ຮ່າງກາຍແບບໃດທີ່ທ່ານຈະຟື້ນຄືນຊີວິດນຳ, ແລະ ແມ່ນໃຜທີ່ທ່ານຈະຢູ່ນຳຕະຫລອດໄປ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າກະຕັນຍູຢ່າງເລິກເຊິ່ງທີ່ໄດ້ກ່າວກັບທ່ານໃນມື້ນີ້. ໃນອາຍຸຂອງຂ້າພະເຈົ້າ, ແຕ່ລະມື້ໃໝ່ນຳຄວາມປະຫລາດໃຈທີ່ໜ້າອັດສະຈັນ ແລະ ທ້າທາຍມາໃຫ້. ສາມອາທິດກ່ອນ, ຂ້າພະເຈົ້າໄດ້ຮັບບາດເຈັບທີ່ກ້າມເນື້ອສັນຫລັງ. ສະນັ້ນ, ຂະນະທີ່ຂ້າພະເຈົ້າໄດ້ຢືນກ່າວຄຳປາໄສຂອງກອງປະຊຸມໃຫຍ່ສາມັນຫລາຍກວ່າ 100 ຄັ້ງ, ແຕ່ມື້ນີ້ຂ້າພະເຈົ້າຈະຂໍນັ່ງກ່າວ. ຂ້າພະເຈົ້າອະທິຖານວ່າ ພຣະວິນຍານຈະນຳຂ່າວສານຂອງຂ້າພະເຈົ້າເຂົ້າສູ່ໃຈຂອງທ່ານໃນມື້ນີ້.
ເມື່ອບໍ່ດົນມານີ້ ຂ້າພະເຈົ້າໄດ້ສະຫລອງວັນເກີດ 99 ປີ ແລະ ດັ່ງນັ້ນຈຶ່ງໄດ້ເລີ່ມຍ່າງເຂົ້າສູ່ 100 ປີ ຂອງການມີຊີວິດຂອງຂ້າພະເຈົ້າ. ຂ້າພະເຈົ້າມັກຈະຖືກຖາມເຖິງເຄັດລັບຂອງການມີຊີວິດທີ່ຍືນຍາວ. ຄຳຖາມທີ່ດີກວ່າຄື “ຂ້າພະເຈົ້າໄດ້ຮຽນຮູ້ຫຍັງແດ່ຈາກການໃຊ້ຊີວິດເກືອບໜຶ່ງສັດຕະວັດ?”
ເວລາທຸກວັນນີ້ເຮັດໃຫ້ຂ້າພະເຈົ້າບໍ່ສາມາດຕອບຄຳຖາມນັ້ນໄດ້ຄົບຖ້ວນ ແຕ່ຂໍແບ່ງປັນບົດຮຽນທີ່ສຳຄັນທີ່ສຸດບົດໜຶ່ງທີ່ຂ້າພະເຈົ້າໄດ້ຮຽນຮູ້ມາ.
ຂ້າພະເຈົ້າຮຽນຮູ້ວ່າ ແຜນຂອງພຣະບິດາເທິງສະຫວັນສຳລັບເຮົານັ້ນ ຍອດຍ້ຽມ, ຫລາຍສິ່ງທີ່ເຮົາເຮັດໃນຊີວິດນີ້ສຳຄັນແທ້ໆ ແລະ ການຊົດໃຊ້ຂອງພຣະຜູ້ຊ່ວຍໃຫ້ລອດຄືສິ່ງທີ່ເຮັດໃຫ້ແຜນຂອງພຣະບິດາເປັນໄປໄດ້.1
ຂະນະທີ່ຂ້າພະເຈົ້າຕໍ່ສູ້ກັບຄວາມເຈັບປວດແສນສາຫັດທີ່ເກີດຈາກອາການບາດເຈັບເມື່ອບໍ່ດົນມານີ້, ຂ້າພະເຈົ້າຮູ້ສຶກຊາບຊຶ້ງຫລາຍຂຶ້ນຕໍ່ພຣະເຢຊູຄຣິດ ແລະ ຂອງປະທານແຫ່ງການຊົດໃຊ້ຂອງພຣະອົງທີ່ບໍ່ອາດຈະເຂົ້າໃຈໄດ້. ໃຫ້ຄິດກ່ຽວກັບສິ່ງນີ້! ພຣະຜູ້ຊ່ວຍໃຫ້ລອດໄດ້ທົນກັບ “ຄວາມເຈັບປວດ ແລະ ຄວາມທຸກທໍລະມານ ແລະ ຖືກລໍ້ລວງໃນທຸກຮູບແບບ”2 ເພື່ອວ່າພຣະອົງຈະໄດ້ປອບໂຍນເຮົາ, ປິ່ນປົວເຮົາ, ແລະ ຊ່ວຍກູ້ເຮົາໃນຍາມຈຳເປັນ.3 ພຣະເຢຊູຄຣິດໄດ້ບັນຍາຍປະສົບການຂອງພຣະອົງໃນເຄັດເຊມາເນ ແລະ ຢູ່ເທິງພູກະໂຫລກຫົວວ່າ: “ຄວາມທຸກທໍລະມານເຮັດໃຫ້ຕົວເຮົາເອງ, ແມ່ນແຕ່ພຣະເຈົ້າ, ຜູ້ຍິ່ງໃຫຍ່ທີ່ສຸດ ໃນບັນດາທຸກສິ່ງທັງປວງ, ຕ້ອງສັ່ນເພາະຄວາມເຈັບປວດ, ແລະ ເລືອດໄຫລອອກຈາກທຸກຂຸມຂົນ.”4 ອາການບາດເຈັບຂອງຂ້າພະເຈົ້າ ເຮັດໃຫ້ຂ້າພະເຈົ້າໄຕ່ຕອງເຖິງ “ຄວາມຍິ່ງໃຫຍ່ຂອງພຣະຜູ້ບໍລິສຸດຂອງອິດສະຣາເອນ.”5 ໃນລະຫວ່າງການຮັກສາຂອງຂ້າພະເຈົ້າ, ພຣະຜູ້ເປັນເຈົ້າໄດ້ສະແດງອຳນາດອັນສູງສົ່ງຂອງພຣະອົງດ້ວຍວິທີທີ່ສະຫງົບສຸກ ແລະ ບໍ່ຜິດພ້ຽນ.
ເພາະການຊົດໃຊ້ອັນບໍ່ມີຂອບເຂດຂອງພຣະເຢຊູຄຣິດ, ແຜນຂອງພຣະບິດາເທິງສະຫວັນຂອງເຮົາ ຈຶ່ງເປັນແຜນທີ່ສົມບູນແບບ! ຄວາມເຂົ້າໃຈໃນແຜນທີ່ຍອດຍ້ຽມຂອງພຣະເຈົ້າ ໄດ້ກຳຈັດຄວາມລຶກລັບອອກໄປຈາກຊີວິດ ແລະ ຄວາມບໍ່ແນ່ນອນອອກໄປຈາກອະນາຄົດ. ມັນຊ່ວຍໃຫ້ ເຮົາ ແຕ່ລະຄົນເລືອກ ວິທີ ທີ່ເຮົາຈະດຳລົງຊີວິດຢູ່ເທິງໂລກນີ້ ແລະ ບ່ອນ ທີ່ເຮົາຈະອາໄສຢູ່ຕະຫລອດໄປ. ຄວາມຄິດທີ່ບໍ່ມີມູນຄວາມຈິງທີ່ວ່າ “ຈົ່ງກິນ, ຈົ່ງດື່ມ, ແລະ ຈົ່ງມ່ວນຊື່ນເຖີດ, ເພາະວ່າມື້ອື່ນນີ້ພວກເຮົາກໍຈະຕາຍແລ້ວ, ແລະ ມັນຈະດີສຳລັບພວກເຮົາ”6 ເປັນໜຶ່ງໃນຄຳຕົວະທີ່ໄຮ້ສາລະທີ່ສຸດໃນຈັກກະວານ.
ນີ້ຄືຂ່າວປະເສີດກ່ຽວກັບແຜນຂອງພຣະເຈົ້າ: ສິ່ງທີ່ຈະເຮັດໃຫ້ຊີວິດ ມະຕະ ຂອງທ່ານດີທີ່ສຸດ ເທົ່າທີ່ ມັນ ຈະສາມາດເປັນໄປໄດ້ ຄືສິ່ງ ດຽວກັນກັບ ທີ່ຈະເຮັດໃຫ້ຊີວິດຂອງທ່ານ ຊົ່ວນິລັນດອນ ທີ່ສຸດເທົ່າທີ່ ມັນ ຈະສາມາດເປັນໄປໄດ້! ມື້ນີ້, ເພື່ອຊ່ວຍໃຫ້ທ່ານມີຄຸນສົມບັດເໝາະສົມຕໍ່ພອນອັນລ້ຳຄ່າທີ່ພຣະບິດາເທິງສະຫວັນມີໃຫ້ທ່ານ, ຂ້າພະເຈົ້າເຊື້ອເຊີນໃຫ້ທ່ານຮັບເອົາການປະຕິບັດ “ການຄິດກ່ຽວກັບຊັ້ນສູງ”!7 ການຄິດກ່ຽວກັບຊັ້ນສູງໝາຍເຖິງການຄິດກ່ຽວກັບທາງວິນຍານ. ເຮົາຮຽນຮູ້ຈາກສາດສະດາຢາໂຄບໃນພຣະຄຳພີມໍມອນວ່າ “ຈິດໃຈທີ່ສະແຫວງຫາສິນທຳຄືຊີວິດນິລັນດອນ.”8
ຄວາມເປັນມະຕະຄືຫ້ອງຮຽນຊັ້ນສູງ ໃນການຮຽນຮູ້ທີ່ຈະເລືອກສິ່ງທີ່ສຳຄັນທີ່ສຸດທາງດ້ານນິລັນດອນ. ມີຄົນຫລາຍເກີນໄປທີ່ດຳລົງຊີວິດຄືກັບວ່າ ຊີວິດນີ້ຄືທັງໝົດທີ່ມີ. ເຖິງຢ່າງໃດກໍຕາມ, ການເລືອກຂອງທ່ານໃນມື້ນີ້ຈະກຳນົດສາມຢ່າງ: ທ່ານຈະດຳລົງຊີວິດຢູ່ໃສຕະຫລອດຊົ່ວນິລັນດອນ, ຮ່າງກາຍແບບໃດທີ່ທ່ານຈະຟື້ນຄືນຊີວິດນຳ, ແລະ ແມ່ນໃຜທີ່ທ່ານຈະຢູ່ນຳຕະຫລອດໄປ. ສະນັ້ນ ຈົ່ງຄິດກ່ຽວກັບຊັ້ນສູງ.
ໃນຂ່າວສານຄັ້ງທຳອິດຂອງຂ້າພະເຈົ້າໃນຖານະປະທານຂອງສາດສະໜາຈັກ, ຂ້າພະເຈົ້າໄດ້ຊຸກຍູ້ທ່ານໃຫ້ເລີ່ມຕົ້ນດ້ວຍຈຸດໝາຍປາຍທາງ. ນີ້ໝາຍຄວາມວ່າ ການເຮັດໃຫ້ອານາຈັກຊັ້ນສູງ ເປັນເປົ້າໝາຍນິລັນດອນຂອງທ່ານ ແລະ ແລ້ວໃຫ້ພິຈາລະນາຢ່າງຮອບຄອບວ່າ ການຕັດສິນໃຈແຕ່ລະຄັ້ງຂອງທ່ານຂະນະຢູ່ເທິງໂລກຈະນຳທ່ານໄປຫາບ່ອນໃດໃນໂລກໜ້າ.9
ພຣະຜູ້ເປັນເຈົ້າໄດ້ສິດສອນຢ່າງແຈ່ມແຈ້ງວ່າ ພຽງແຕ່ຊາຍ ແລະ ຍິງທີ່ໄດ້ຜະນຶກເຂົ້າກັນເປັນສາມີ ແລະ ພັນລະຍາຢູ່ໃນພຣະວິຫານ, ແລະ ຜູ້ທີ່ຮັກສາພັນທະສັນຍາຂອງເຂົາເຈົ້າ, ທີ່ຈະໄດ້ຢູ່ນຳກັນຊົ່ວນິລັນດອນ. ພຣະອົງໄດ້ກ່າວວ່າ, “ພັນທະສັນຍາ, ການສັນຍາ, ພັນທະການ, ພັນທະ, ຄຳສາບານ, ຄຳປະຕິຍານ, ການປະຕິບັດ, ຄວາມກ່ຽວພັນ, ຄວາມສຳພັນ, ຫລື ຄວາມຄາດຫວັງທັງປວງ, ທີ່ ບໍ່ ໄດ້ເຮັດ ແລະ ໄດ້ເຂົ້າສູ່ ແລະ ໄດ້ຜະນຶກໂດຍພຣະວິນຍານສັກສິດແຫ່ງຄຳສັນຍາ … ສິ້ນສຸດລົງ ເມື່ອຄົນຕາຍໄປ.”10
ດັ່ງນັ້ນ, ຖ້າຫາກເຮົາເລືອກ ຢ່າງບໍ່ສະຫລາດ ທີ່ຈະດຳລົງຊິວິດຕາມກົດ ຊັ້ນຕ່ຳ ໃນຕອນນີ້, ແລ້ວເຮົາກໍໄດ້ເລືອກທີ່ຈະຟື້ນຄືນຊີວິດໃນຮ່າງກາຍຂອງ ຊັ້ນຕ່ຳ. ເຮົາເລືອກ ບໍ່ ຢູ່ກັບຄອບຄົວຂອງເຮົາຕະຫລອດໄປ.
ສະນັ້ນ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ທ່ານຢາກມີຊີວິດແບບໃດ ແລະ ຢູ່ໃສ ແລະ ກັບ ໃຜ ຕະຫລອດໄປ? ທ່ານຕ້ອງເລືອກເອງ.11
ເມື່ອທ່ານເລືອກ, ຂ້າພະເຈົ້າເຊື້ອເຊີນທ່ານໃຫ້ເບິ່ງພາບກວ້າງໄກ—ພາບນິລັນດອນ. ໃຫ້ພຣະເຢຊູຄຣິດມາກ່ອນ, ເພາະຊີວິດນິລັນດອນຂອງທ່ານແມ່ນຂຶ້ນຢູ່ກັບສັດທາຂອງທ່ານໃນພຣະອົງ ແລະ ໃນການຊົດໃຊ້ຂອງພຣະອົງ.12 ມັນກໍຂຶ້ນຢູ່ກັບການເຊື່ອຟັງຂອງທ່ານຕໍ່ກົດຂອງພຣະອົງນຳອີກ. ການເຊື່ອຟັງເປັນສິ່ງເປີດທາງໃຫ້ຊີວິດທີ່ມີຄວາມສຸກ ສຳລັບທ່ານໃນມື້ນີ້ ແລະ ລາງວັນອັນຍິ່ງໃຫຍ່ ແລະ ນິລັນດອນໃນມື້ອື່ນ.
ເມື່ອທ່ານປະເຊີນກັບພາວະວິໄສ, ໃຫ້ຄິດກ່ຽວກັບຊັ້ນສູງ! ເມື່ອທ່ານຖືກທົດສອບໂດຍການລໍ້ລວງ, ໃຫ້ຄິດກ່ຽວກັບຊັ້ນສູງ! ເມື່ອຊີວິດ ຫລື ຄົນທີ່ທ່ານຮັກເຮັດໃຫ້ທ່ານຜິດຫວັງ, ໃຫ້ຄິດກ່ຽວກັບຊັ້ນສູງ! ເມື່ອຄົນໃດຄົນໜຶ່ງຕາຍໄປ ກ່ອນໄວອັນຄວນ, ໃຫ້ຄິດກ່ຽວກັບຊັ້ນສູງ. ເມື່ອຄົນໃດຄົນໜຶ່ງຢູ່ກັບຄວາມປ່ວຍໂຊຮ້າຍແຮງ, ໃຫ້ຄິດກ່ຽວກັບຊັ້ນສູງ. ເມື່ອຊີວິດມີຄວາມກົດດັນ, ໃຫ້ຄິດກ່ຽວກັບຊັ້ນສູງ! ເມື່ອທ່ານຟື້ນຕົວຈາກອຸບັດຕິເຫດ ຫລື ການບາດເຈັບ, ດັ່ງເຊັ່ນທີ່ຂ້າພະເຈົ້າກຳລັງເປັນຢູ່, ໃຫ້ຄິດກ່ຽວກັບຊັ້ນສູງ!
ເມື່ອທ່ານສຸມຄວາມຄິດໃສ່ຊັ້ນສູງ, ໃຫ້ຄາດຫວັງທີ່ຈະປະເຊີນກັບການຕໍ່ຕ້ານ.13 ຫລາຍທົດສະວັດມາແລ້ວ, ເພື່ອນຮ່ວມງານຄົນໜຶ່ງໄດ້ວິພາກວິຈານຂ້າພະເຈົ້າວ່າ ມີ “ພຣະວິຫານຫລາຍເກີນໄປ” ໃນຕົວຂ້າພະເຈົ້າ, ແລະ ມີຫົວໜ້າງານຫລາຍກວ່າໜຶ່ງຄົນລົງໂທດຂ້າພະເຈົ້າ ເພາະສັດທາຂອງຂ້າພະເຈົ້າ. ເຖິງຢ່າງໃດກໍຕາມ, ຂ້າພະເຈົ້າເຊື່ອໝັ້ນວ່າ ການຄິດກ່ຽວກັບຊັ້ນສູງເຮັດໃຫ້ອາຊີບຂອງຂ້າພະເຈົ້າດີຂຶ້ນ.
ເມື່ອທ່ານຄິດກ່ຽວກັບຊັ້ນສູງ, ໃຈຂອງທ່ານຈະຄ່ອຍໆປ່ຽນໄປ. ທ່ານຈະຕ້ອງອະທິຖານເລື້ອຍຂຶ້ນ ແລະ ຈິງໃຈຫລາຍຂຶ້ນ. ກະລຸນາຢ່າປ່ອຍໃຫ້ຄຳອະທິຖານຂອງທ່ານຟັງຄືກັບລາຍການຊື້ຂອງ. ທັດສະນະຂອງພຣະຜູ້ເປັນເຈົ້າຢູ່ເໜືອສະຕິປັນຍາມະຕະຂອງທ່ານ. ການຕອບຂອງພຣະອົງຕໍ່ຄຳອະທິຖານຂອງທ່ານອາດເຮັດໃຫ້ທ່ານປະຫລາດໃຈ ແລະ ຈະຊ່ວຍໃຫ້ທ່ານຄິດກ່ຽວກັບຊັ້ນສູງ.
ລອງພິຈາລະນາຄຳຕອບຂອງພຣະຜູ້ເປັນເຈົ້າຕໍ່ໂຈເຊັບ ສະມິດ ເມື່ອເພິ່ນໄດ້ທູນຂໍການບັນເທົາທຸກໃນຄຸກລີເບີຕີ. ພຣະຜູ້ເປັນເຈົ້າໄດ້ສິດສອນສາດສະດາວ່າ ການກະທຳຢ່າງໄຮ້ມະນຸດສະທຳ ຈະເຮັດໃຫ້ເພິ່ນໄດ້ຮັບປະສົບການ ແລະ ເປັນຜົນດີສຳລັບເພິ່ນ.14 “ຖ້າຫາກເຈົ້າອົດທົນມັນໄດ້ດີ,” ພຣະຜູ້ເປັນເຈົ້າສັນຍາ, “ພຣະເຈົ້າຈະຍົກເຈົ້າຂຶ້ນສູ່ເບື້ອງບົນ.”15 ພຣະຜູ້ເປັນເຈົ້າໄດ້ສິດສອນໂຈເຊັບໃຫ້ຄິດກ່ຽວກັບຊັ້ນສູງ ແລະ ຈິນຕະນາການເຖິງລາງວັນນິລັນດອນ ແທນທີ່ຈະສຸມໃຈໃສ່ກັບຄວາມຍາກລຳບາກແສນສາຫັດຂອງມື້ນັ້ນ. ຄຳອະທິຖານຂອງເຮົາສາມາດ—ແລະ ຄວນເປັນ—ການສົນທະນາທີ່ມີຊີວິດຢູ່ກັບພຣະບິດາເທິງສະຫວັນຂອງເຮົາ.
ເມື່ອທ່ານຄິດກ່ຽວກັບຊັ້ນສູງ, ທ່ານຈະພົບເຫັນຕົວເອງຫລີກເວັ້ນຈາກ ທຸກສິ່ງ ທີ່ລັກເອົາອຳເພີໃຈຂອງທ່ານ. ການຕິດແສດ ໃດໆ—ບໍ່ວ່າຈະເປັນ ການຫລິ້ນເກມ, ການພະນັນ, ໜີ້ສິນ, ຢາເສບຕິດ, ເຫລົ້າ, ຄວາມໃຈຮ້າຍ, ຮູບພາບລາມົກ, ເພດ, ຫລື ແມ່ນແຕ່ອາຫານ—ລ້ວນແຕ່ເຮັດໃຫ້ພຣະເຈົ້າຂຸ່ນເຄືອງ. ເປັນຫຍັງ? ເພາະຄວາມຫລົງໄຫລຂອງທ່ານກາຍເປັນພຣະເຈົ້າຂອງທ່ານ. ທ່ານເບິ່ງ ມັນ ແທນທີ່ຈະເບິ່ງໄປທີ່ ພຣະອົງ ເພື່ອການປອບໂຍນ. ຖ້າຫາກທ່ານຕໍ່ສູ້ດີ້ນລົນກັບການຕິດແສດ ຈົ່ງສະແຫວງຫາຄວາມຊ່ວຍເຫລືອທາງວິນຍານ ແລະ ຈາກມືອາຊີບ ທີ່ທ່ານຕ້ອງການ. ກະລຸນາຢ່າປ່ອຍໃຫ້ຄວາມຫລົງໄຫລລັກເອົາອິດສະລະພາບຂອງທ່ານໄປຈາກການປະຕິບັດຕາມແຜນອັນຍອດຍ້ຽມຂອງພຣະເຈົ້າ.
ການຄິດກ່ຽວກັບຊັ້ນສູງຈະຊ່ວຍໃຫ້ທ່ານເຊື່ອຟັງກົດພົມມະຈັນນຳອີກ. ມີສອງສາມຢ່າງທີ່ຈະເຮັດໃຫ້ຊີວິດຂອງທ່ານຫຍຸ້ງຍາກໄວຂຶ້ນໃນການລະເມີດກົດອັນສັກສິດນີ້. ສຳລັບຜູ້ທີ່ເຮັດພັນທະສັນຍາກັບພຣະເຈົ້າ, ການເຮັດຜິດສິນທຳເປັນວິທີໜຶ່ງທີ່ຈະສູນເສຍປະຈັກພະຍານໄດ້ໄວທີ່ສຸດ.
ການຫລອກລວງຫລາຍຢ່າງທີ່ບໍ່ຢຸດຢັ້ງຂອງຜູ້ປໍລະປັກແມ່ນກ່ຽວຂ້ອງກັບການລະເມີດຄວາມບໍລິສຸດທາງສິນທຳ. ພະລັງໃນການສ້າງຊີວິດເປັນ ສິດທິພິເສດຢ່າງໜຶ່ງ ຂອງຄວາມເປັນພຣະເຈົ້າ ທີ່ພຣະບິດາເທິງສະຫວັນອະນຸຍາດໃຫ້ລູກໆມະຕະຂອງພຣະອົງນຳໃຊ້. ດັ່ງນັ້ນ, ພຣະເຈົ້າຈຶ່ງໄດ້ກຳນົດແນວທາງຊີ້ນຳທີ່ແຈ້ງຊັດສຳລັບການໃຊ້ອຳນາດທີ່ດຳລົງຢູ່ ແລະ ສັກສິດນີ້. ຄວາມໃກ້ຊິດທາງກາຍມີໄວ້ ພຽງແຕ່ ສຳລັບຊາຍ ແລະ ຍິງທີ່ແຕ່ງງານກັນເທົ່ານັ້ນ.
ໂລກສ່ວນໃຫຍ່ບໍ່ເຊື່ອເລື່ອງນີ້, ແຕ່ຄວາມຄິດເຫັນຂອງສາທາລະນະບໍ່ແມ່ນຕົວຊີ້ຂາດກ່ຽວກັບຄວາມຈິງ. ພຣະຜູ້ເປັນເຈົ້າໄດ້ປະກາດວ່າ ບຸກຄົນທີ່ບໍ່ບໍລິສຸດ ຈະບໍ່ສາມາດຮັບອານາຈັກຊັ້ນສູງໄດ້. ສະນັ້ນ ເມື່ອທ່ານຕັດສິນໃຈກ່ຽວກັບສິນທຳ, ກະລຸນາຄິດກ່ຽວກັບຊັ້ນສູງ. ແລະ ຖ້າຫາກທ່ານບໍ່ບໍລິສຸດ, ຂ້າພະເຈົ້າຂໍອ້ອນວອນໃຫ້ທ່ານກັບໃຈ. ມາຫາພຣະຄຣິດ ແລະ ຮັບຄຳສັນຍາຂອງພຣະອົງເລື່ອງການໃຫ້ອະໄພໂດຍ ສົມບູນ ເມື່ອທ່ານກັບໃຈຈາກບາບຢ່າງເຕັມທີ່.16
ເມື່ອທ່ານຄິດກ່ຽວກັບຊັ້ນສູງ, ທ່ານຈະເບິ່ງການທົດລອງ ແລະ ການຕໍ່ຕ້ານໃນມຸມມອງໃໝ່. ເມື່ອຄົນທີ່ທ່ານຮັກໂຈມຕີຄວາມຈິງ, ໃຫ້ຄິດກ່ຽວກັບຊັ້ນສູງ, ແລະ ຢ່າສົງໄສປະຈັກພະຍານ ຂອງທ່ານ. ອັກຄະສາວົກໂປໂລ ໄດ້ທຳນາຍວ່າ “ໃນຍຸກສຸດທ້າຍຈະມີບາງຄົນປະຖິ້ມສັດທາ, ພວກເຂົາຈະເຊື່ອຟັງບັນດາດວງວິນຍານຜີຊົ່ວຮ້າຍທີ່ຫລອກລວງມະນຸດ, ແລະ ຄຳສອນຂອງພວກຜີມານຮ້າຍ.”17
ການຫລອກລວງຂອງຜູ້ປໍລະປັກແມ່ນບໍ່ສິ້ນສຸດ. ກະລຸນາກຽມພ້ອມ. ຢ່າຮັບຄຳແນະນຳຈາກຜູ້ທີ່ບໍ່ເຊື່ອ. ໃຫ້ສະແຫວງຫາການນຳພາຈາກສຽງທີ່ທ່ານໄວ້ວາງໃຈໄດ້—ຈາກສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ແລະ ຈາກການກະຊິບຂອງພຣະວິນຍານບໍລິສຸດ, ຜູ້ “ຈະສະແດງ ທຸກຢ່າງ ທີ່ພວກທ່ານຄວນເຮັດໃຫ້ແກ່ພວກທ່ານ.”18 ກະລຸນາເຮັດວຽກງານທາງວິນຍານ ເພື່ອເພີ່ມຄວາມສາມາດຂອງທ່ານໃນການຮັບການເປີດເຜີຍສ່ວນຕົວ.19
ເມື່ອທ່ານຄິດກ່ຽວກັບຊັ້ນສູງ, ສັດທາຂອງທ່ານຈະເພີ່ມຂຶ້ນ. ສະໄໝຂ້າພະເຈົ້າຝຶກງານຕອນຍັງໜຸ່ມ, ຂ້າພະເຈົ້າມີລາຍຮັບ 15 ໂດລາ ຕໍ່ເດືອນ. ຄືນໜຶ່ງ, ພັນລະຍາຂອງຂ້າພະເຈົ້າ ແດນແຊວ ໄດ້ຖາມຂ້າພະເຈົ້າວ່າ ຂ້າພະເຈົ້າໄດ້ຈ່າຍສ່ວນສິບຈາກເງິນຄ່າຈ້າງໜ້ອຍໆຂອງຂ້າພະເຈົ້າຫລືບໍ່. ຂ້າພະເຈົ້າບໍ່ໄດ້ຈ່າຍ. ຂ້າພະເຈົ້າໄດ້ກັບໃຈທັນທີ ແລະ ເລີ່ມຈ່າຍສ່ວນສິບເພີ່ມ $1.50 ໃນແຕ່ລະເດືອນ.
ສາດສະໜາຈັກແຕກຕ່າງໄປ ເພາະເຮົາຈ່າຍສ່ວນສິບເພີ່ມຫລືບໍ່? ບໍ່ແຕກຕ່າງ. ເຖິງຢ່າງໃດກໍຕາມ, ການກາຍເປັນຜູ້ຈ່າຍສ່ວນສິບເຕັມ ໄດ້ປ່ຽນແປງ ຂ້າພະເຈົ້າ. ນັ້ນຄືຕອນທີ່ຂ້າພະເຈົ້າໄດ້ຮຽນຮູ້ວ່າ ການຈ່າຍສ່ວນສິບເປັນເລື່ອງກ່ຽວກັບສັດທາ, ບໍ່ແມ່ນເງິນ. ເມື່ອຂ້າພະເຈົ້າໄດ້ເລີ່ມຈ່າຍເງິນສ່ວນສິບເຕັມ, ປະຕູສະຫວັນກໍໄດ້ເລີ່ມໄຂໃຫ້ຂ້າພະເຈົ້າ. ຂ້າພະເຈົ້າຖືວ່າໂອກາດທາງອາຊີບຕໍ່ມາຫລາຍຢ່າງກໍຍ້ອນການຈ່າຍສ່ວນສິບທີ່ຊື່ສັດຂອງພວກເຮົາ.20
ການຈ່າຍສ່ວນສິບຮຽກຮ້ອງສັດທາ, ແລະ ມັນກໍຍັງ ສ້າງ ສັດທາໃນພຣະເຈົ້າ ແລະ ພຣະບຸດທີ່ຮັກຂອງພຣະອົງນຳອີກ.
ການເລືອກດຳລົງຊີວິດຢ່າງມີຄຸນນະທຳໃນໂລກທີ່ເຕັມໄປດ້ວຍເລື່ອງເພດ ແລະ ການເມືອງ ຈະຊ່ວຍສ້າງສັດທາ.
ການໃຊ້ເວລາໃນພຣະວິຫານຫລາຍຂຶ້ນ ຈະສ້າງສັດທາ. ແລະ ການຮັບໃຊ້ ແລະ ການນະມັດສະການຂອງທ່ານໃນພຣະວິຫານ ຈະຊ່ວຍໃຫ້ທ່ານຄິດກ່ຽວກັບຊັ້ນສູງ. ພຣະວິຫານເປັນສະຖານທີ່ແຫ່ງການເປີດເຜີຍ. ຢູ່ທີ່ນັ້ນທ່ານຖືກສະແດງໃຫ້ເຫັນວິທີການກ້າວໄປສູ່ຊີວິດຊັ້ນສູງ. ຢູ່ທີ່ນັ້ນທ່ານໄດ້ຫຍັບເຂົ້າໃກ້ພຣະຜູ້ຊ່ວຍໃຫ້ລອດ ແລະ ເຂົ້າເຖິງອຳນາດຂອງພຣະອົງໄດ້ຫລາຍຂຶ້ນ. ຢູ່ທີ່ນັ້ນທ່ານຈະໄດ້ຮັບຄຳແນະນຳໃນການແກ້ໄຂບັນຫາໃນຊີວິດຂອງທ່ານ, ແມ່ນແຕ່ກະທັ້ງບັນຫາທີ່ສັບສົນທີ່ສຸດຂອງທ່ານ.
ພິທີການ ແລະ ພັນທະສັນຍາຂອງພຣະວິຫານມີຄວາມສຳຄັນນິລັນດອນ. ພວກເຮົາສືບຕໍ່ສ້າງພຣະວິຫານຕື່ມອີກ ເພື່ອເຮັດໃຫ້ຄວາມເປັນໄປໄດ້ທີ່ສັກສິດເຫລົ່ານີ້ກາຍເປັນຈິງ ໃນຊີວິດຂອງທ່ານແຕ່ລະຄົນ. ພວກເຮົາກະຕັນຍູທີ່ຈະປະກາດແຜນຂອງພວກເຮົາທີ່ຈະສ້າງພຣະວິຫານໃໝ່ ໃນ 20 ສະຖານທີ່ດັ່ງຕໍ່ໄປນີ້:
-
ຊາໄວອີ, ຊາມົວ
-
ແຄນຄູນ, ແມັກຊິໂກ
-
ປີອູຣາ, ເປຣູ
-
ຮວນຄາໂຢ, ເປຣູ
-
ວິຍາ ແດວມາ, ຈີເລ
-
ໂກຍອາເນຍ, ບຣາຊິນ
-
ຈວງ ເປໂຊອາ, ບຣາຊິນ
-
ຄາລາບາ, ນີເຊເຣຍ
-
ເຄບ ໂຄດ, ການາ
-
ລູອັນດາ, ອັງໂກລາ
-
ມູຈີ-ມາຍ, ປະຊາທິປະໄຕ ຄອງໂກ
-
ລະອອກ, ຟີລິບປິນ
-
ໂອຊາກາ, ຍີ່ປຸ່ນ
-
ຄາຮູລູຍ, ມາວອີ, ຮາວາຍ
-
ແຟແບ້ງສ໌, ອາລັດຊະກາ
-
ແວນຄູເວີ, ວໍຊິງຕັນ
-
ໂຄໂລຣາໂດ ສະປຣິງສ໌, ໂຄໂລຣາໂດ
-
ໂທຊາ, ໂອກະລາໂຮມາ
-
ໂຣອາໂນກ, ເວີຈີເນຍ
-
ອູລານບາເທີ, ມົງໂກລີ
ພຣະຜູ້ເປັນເຈົ້າຊົງຊີ້ນຳພວກເຮົາໃຫ້ສ້າງພຣະວິຫານເຫລົ່ານີ້ ເພື່ອຊ່ວຍໃຫ້ເຮົາຄິດກ່ຽວກັບຊັ້ນສູງ. ພຣະເຈົ້າຊົງພຣະຊົນຢູ່. ພຣະເຢຊູຄືພຣະຄຣິດ. ສາດສະໜາຈັກຂອງພຣະອົງໄດ້ຖືກຟື້ນຟູ ເພື່ອເປັນພອນໃຫ້ແກ່ລູກໆຂອງພຣະເຈົ້າທຸກຄົນ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.