Yesu Kristo Yɛ Ademudeɛ no

Wɔ 1907, Enyiresinii defoɔ bi a ɔde George Herbert, a ɔyɛ Carnarvon Nimuonyamfoɔ a ɔtɔ so num,¹ tu kɔtenaa Egypt na n’ani gyee tete nneɛma nhwehwɛ mu ho. Ɔkɔɔ Howard Carter a ɔyɛ tete Egypt nneɛma nhwehwɛmuni hɔ, de nkabomsɛm too n’anim. Carter bɛhwɛ wɔn tete nneɛma fam tuo so, na Carnarvon bɛma sika.

Wɔkaboo mu, hwehwɛɛ mmeaɛ bebree wɔ awieeɛ pa mu. Afei, wɔnyaa tumi sɛ wɔtutu Ahemfo Bohwa no a ɛwɔ nnɛ yi Luxor hɔ, beaeɛ a farofoɔ amusieɛ bebree wɔ no. Wɔyɛɛ wɔn adwene sɛ wɔbɛhwehwɛ ƆheneTutankhamun amusieɛ no. Tutankhamun foroo Egypt abannwa mfeɛ mpem mmiɛnsa akyi, dii adeɛ mfeɛ 10 ansa na ne mfumu wuo no reba.² Na wɔnim sɛ wɔsiee no wɔ Ahemfo Bohwa no mu,³ nanso n’amusieɛ daberɛ no deɛ obiara nnim.

Carter ne Carnarvon de mfeɛ num hwehwɛɛ Tutankhamun amusieɛ no a wɔanhunu. Ewiee aseɛ no, Carnarvon ka kyerɛɛ Carter sɛ ɔne nhwehwɛmu hunu no awie yɛ. Carter srɛɛ sɛ ɔmma wɔntutu fam berɛ baako, na Carnarvon tee aseɛ na ɔpenee sikasɛm no so.

Carter hunuu sɛ Ahemfo Bohwa no ase hɔ nyinaa wɔatutu—gye sɛ wɔn ankasa atenaeɛ hɔ. Nna kakra a wɔtutuu hɔ no, wɔhunuu anammɔm a ɛdi kan de rekɔ amusieɛ no ho.⁴

Berɛ a Carter de n’ani hwɛɛ Tutankhamun amusieɛ no tokuro bi mu no, ɔhunuu sɛ sika kɔkɔɔ wɔ baabiara. Abosome mmiɛnsa akyi a na wɔrehyehyɛ tokuro no mu nneɛma ho mfonini no, wɔbuee amusieɛ a na wɔasɔ ano no so wɔ Ogyefuo1923, mfeɛ100 a atwam no. Na yei yɛ tete nneɛma nhwehwɛmu a agye din a wɔahunu wɔ 20th century mu.

Wɔ saa mfeɛ a na wɔrehwehwɛ a wɔnhunu hwee no, Carter ne Carnarvon buu wɔn ani guu deɛ na ɛwɔ wɔn nan ase pɛɛ so. Mfeɛ bɛyɛ sɛnturi num ansa na wɔrewo Agyenkwa no, Mormon Nwoma no nkɔmhyɛni Yakob kyerɛɛ adeɛ a yɛmpɛ mmua anaa yɛbu no animtia no sɛ “adeɛ a wɔhwɛ tra soɔ.” Yakob hunuu sɛ nkorɔfoɔ a wɔwɔ Yerusalem renhunu Mesaia no berɛ a Ɔbɛba no. Yakob hyɛɛ nkɔm sɛ wɔbɛyɛ “nkorɔfoɔ a wɔ po nsɛm a emu da hɔ no na wɔahwehwɛ nneɛma a wɔnte aseɛ. Ɛno nti, ɛnam wɔn anifira nti, anifira a ɛmaa wɔhwɛ traa so no maa ɛkɔhiaa sɛ wɔhwe ase.”⁵ Wɔ nsɛm foforɔ mu no, wɔbɛhwe ase.

Yakob nkɔmhyɛ no baa mu pɛpɛɛpɛ. Yesu asetena mu som mu no, dodoɔ no na wɔhwɛ traa soɔ, traa No. Wɔhwɛ traa wiase Agyenkwa no so. Sɛ wɔbɛhwɛ Ne dwumadie a ɛrehyɛ Soro Agya no nhyehyɛeɛ ma no, wɔbuu no fɔ na wɔbɔɔ No asɛnnua mu. Wɔhwɛɛe na wɔtwɛnn sɛ obi foforɔ na ɔmfa nkwagyeɛ mmerɛ wɔn.

Te sɛ nkorɔfoɔ a wɔwɔ Yerusalem no, na te sɛ Carter ne Carnarvon, yɛn nso yɛbɛtumi ahwɛ atra agyiraehyɛdeɛ no so. Ɛwɔ sɛ yɛhwɛ yie wɔ saa suban no ho, anyɛ saa a yɛbɛhwere Yesu Kristo wɔ yɛn abrabɔ mu na yɛnhunu nhyira bebree a Ɔde ma yɛn no. Yɛhia No. Wɔatu yɛn fo sɛ “yɛmfa yɛn ho nyinaa nto ɔno a ɔyɛ kɛseɛ a ɔtumi gye nkwa.”⁶

Ɔno ne yɛn botaeɛ. Sɛ yɛyɛ mfomsoɔ susu sɛ biribi ho hia sene deɛ Ɔde ma no a, na yɛredi atorɔ anaasɛ yɛrete tumi a ɔbɛtumi anya wɔ yɛn abrabɔ mu no so. Wagye ahummɔborɔ ho kwan na waterɛ saa ahummɔborɔ ama yɛn.⁷ Ɔno ne “fibea awieeɛ [a ɛwɔ sɛ] yɛkɔhwehwɛ [yɛn] bɔnefakyɛ.”⁸ Ɔyɛ yɛne Agya no ntamgyinafoɔ na ɔdi deɛ Agya no ahwehwɛ nyinaa anim, sɛdeɛ yɛbɛsane akɔ Ne nkɛn sɛ sodifoɔ wɔ N’ahemman mu. Wɔ nkɔmhyɛni Alma nsɛm mu no, yɛhia sɛ “yɛma [yɛn] ani so na yɛhyɛaseɛ gye Onyankopɔn Ba no di, ama wabɛdi ama ne nkorɔfoɔ na wabɛhunu amane na wawu de apata [yɛn] bɔne; na ama wasɔre bio afiri owuo mu, ama owusɔreɛ aba mu.”⁹ Yesu Kristo yɛ yɛn ademudeɛ.

Agyenkwa no ama yɛn akwan bebree a yɛbɛhyɛ da atwe yɛn ani asi Ne so, a daadaa ahunuu akwanya ka ho. Ɛtɔ da a, yɛbu saa nhyira yi boɔ a ɛsom animtia. Berɛ a medii mfeɛ nnwɔtwe no, me papa na ɔbɔɔ me asu. Akyire yi no, mesɔɔ ne nsa berɛ a na yɛrekɔtwa kaa kwan mu no. Manyɛ ahwɛyie na metiaa kwan no ano berɛ a ɛhyɛn kɛseɛ bi de nnyegyeɛ retwam. Me papa piaa me firi kwan no mu kɔsi nkyɛn hɔ. Sɛ wanyɛ saa a, anka ɛhyɛn no bɔɔ me. Menim sɛdeɛ me suban teɛ nti, me dwenee sɛ, “Anka ɛbɛyɛ sɛ ɛhyɛn no bɛkum me ɛfiri sɛ me ho ntumi nte te sɛ deɛ mete seesei wɔ m’asubɔ no akyi.”

Sɛ mfeɛ nnwɔtwe nipa no, me yɛɛ mfomsoɔ dwenee sɛ asubɔ nsuo no hohoroo bɔne firii hɔ. Ɛnte saa. Mfeɛ bebree wɔ m’asubɔ akyi no, masua sɛ ɛnam Yesu Kristo mpata afɔrebɔ tumi no na ɛhohoro bɔne berɛ a yɛyɛ na yɛdi asubɔ apam so no.¹⁰ Afei, ɛnam adwensakyera akyɛdeɛ no so, yɛn ho bɛtumi ate. Masane nso asua sɛ adidikronkron no de ɔbrapa mframa tumi bi ba yɛn abrabɔ mu, na ɛma yɛnya yɛn bɔefakyɛ.¹¹

Te sɛ ademudeɛ a na ɛwɔ Carter ne Carnarvon nan ase no, adidikronkron ademdie nhyira no wɔ hɔ ma yɛn mu biara berɛ biara a yɛkɔ adidikronkron nhyiamu. Wɔahyɛ yɛn bɔ sɛ Sunsum Kronkron no bɛyɛ yɛn daadaa yɔnkoɔ sɛ yɛfa adidikronkron no sɛdeɛ wɔn a wabɔ asu foforɔ no fa asubɔ ne denhyɛ no, akoma ne honhom a abubuo mu, ne mmɔdemmɔ a yɛde bɛdi asubɔ apam so. Sunsum Kronkron no hyira yɛn wɔ Ne tumi ahoteɛ mu sɛdeɛ yɛbɛtumi anya yɛn bɔnefakyɛ berɛ biara, nnawɔtwe biara mu.¹²

Yɛn honhom mu fapem mu yɛ den fa adwensakyera so ne akomapa mu ahoboa a yɛde bɛfa adidikronkron wɔ ahoteɛ mu. Gye sɛ honhom mu fapem a ɛmu yɛ den so na yɛbɛtumi asɔ kasakoa mu nsutɔ, mframa, ne nsuyire a ɛba yɛn abrabɔ mu.¹³ Wɔ nsɛm foforɔ mu no, yɛn honhom mu fapem yɛ mmrɛ berɛ a yɛhyɛ da kwati adidikronkron nhyiamu anaasɛ yɛnntwe yɛn adwene nsi Agyenkwa no so wɔ adidikronkron berɛ mu. Yɛrenhyɛ da “ntwe [yɛn ho] mfiri Awurade no Honhom ho, sɛdeɛ ɛbɛyɛ a ɛrennya kwan wɔ [yɛn] mu ama ɛde [yɛn] akɔ nyansa kwan so ama wɔahyira [yɛn], ayɛ yɛn frɔmfrɔm, wɔakora yɛn.”¹⁴

Sɛ yɛnya Sunsum Kronkron ka yɛn ho a, ɔbɛkanyan yɛn na wakyerɛ yɛn kwan ama yɛatumi ayɛ na yɛadi apam afoforɔ so, te sɛ deɛ yɛyɛ no wɔ tɛmpol mu no. Yɛyɛ saa a ɛhyɛ ayɔnkofa a ɛda yɛne Onyankopɔn ntam no mu kena .¹⁵ Ebia moahunu sɛ wɔabobɔ tɛmpol afoforɔ din mfeɛ kakra yi mu, de tɛmpol rebɛn asafomma deɛ ɛdi kan koraa.¹⁶ Akyinnyeɛ mu, berɛ a tɛmpol rebɛn yɛn no, ɛbɛtumi ayɛ fo sɛ yɛbɛtwe yɛn ho afiri tɛmpol kɔ mu. Sɛ tɛmpol wɔ akyirikyiri a, yɛhyehyɛ yɛn mmerɛ ne akadeɛ de tu kwan kɔ tɛmpol kɔsom wɔ hɔ. Yɛbu saa akwantuo yeinom.

Tɛmpol abɛn yɛn no, ɛbɛtumi ayɛ fo sɛ nneɛma nketenkete bɛtumi asi yɛn tɛmpol kɔ ho kwan, na yɛka kyerɛ yɛn ho sɛ, “Ɛyɛ, mɛkɔ berɛ foforɔ mu.” Sɛ yɛte bɛn tɛmpol a ɛde akwadworɔ bi ba tɛmpol kɔ nhyehyɛeɛ mu, nanso saa akwadworɔ no bɛtumi ama ayɛ fo sɛ yɛbɛbu yɛn ani agu tɛmpol so. Sɛ yɛyɛ saa a, “yɛhwɛ tra so,” bu akwanya a yɛwɔ sɛ yɛde twe bɛn Agyenkwa no wɔ Ne fie krokron no aimtia. Ɛwɔ sɛ yɛn ahofama a yɛde bɛkɔ tɛmpol a ɛbɛn mu no yɛ den te sɛ deɛ ɛwɔ akyiri no ara.

Carter ne Carnarvon tutuu babiara wɔ Ahemfo Bohwa no mu rehwehwɛ Tutankhamun amusieɛ no, wɔhunuu wɔn anifasoɔ. Ɛnhia sɛ yɛbɛyɛ ɔberɛguo adwuma sɛdeɛ wɔyɛɛ no mmerɛ bi no, de ahwehwɛ yɛn ademudeɛ. Anaasɛ ɛhia sɛ yɛhwehwɛ afotuo firi fibea foforɔ hɔ, na yɛhoahoa fibea hɔ na yɛdwene sɛ saa afotuo no ho bɛba mfasoɔ asene deɛ yɛbɛtumi anya afiri Onyankopɔn ahobrɛaseɛ nkɔmhyɛni hɔ.

Sɛdeɛ wɔatwerɛ wɔ Apam Dada mu no, berɛ a Naaman hwehwɛɛ ayaresa maa ne kwata no, ɔyɛɛ ahomasoɔ sɛ wɔase no sɛ ɔmfa ne ho nkɔ bɔ asuwa mu mprɛ nso. Nanso wɔkorɔkorɔɔ no ma ɔdii Elisa afotuo no so, sene sɛ ɔde ne ho bɛto ɔno ankasa adwene so ɛfa sɛdeɛ anwanwadwuma bɛsie so. Awieeɛ no, Naaman nyaa ayaresa.¹⁷ Sɛ yɛgye Onyankopɔn nkɔmhyɛni a ɔte asase so ɛnnɛ di, na yɛde n’afotuo yɛ adwuma a, yɛbɛnya anigyeɛ, yɛn nso bɛnya ayaresa. Ɛnsɛ sɛ yɛhwehwɛ babiara.

Anuanom mmarima ne mmaa, mehyɛ mo nkuran sɛ monkae na montwe mo adwene nsi Yesu Kristo so. Ɔyɛ yɛn Agyenkwa ne yɛn Dimafoɔ, a ɛwɔ sɛ yɛhwɛ no, ne yɛn botaeɛ kɛseɛ. Sɛ yɛba Ne nkyɛn a, ɔbɛkyɛ yɛn ahoɔden akyɛdeɛ ma yɛde ahyia abrabɔ mu haw kwan, akokoɔduro de ayɛ deɛ ɛyɛ, ne ahoɔden de ahyɛ asetena mu botaeɛ ma. Fa akwanya a wode sakyera no sɛ ademudeɛ, akwanya wode fa adidikronkron no, nhyira a wode reyɛ na wadi tɛmpol apam so, anigyeɛ a ɛwɔ tɛmpol som mu, ne anigyeɛ a ɛyɛ sɛ wowɔ nkɔmhyɛni a ɔte aseɛ.

Medi m’adanse kronkron sɛ,Oniawieeɛ Agya no, yɛ yɛn Soro Agya na Ɔte ase; Yesu ne Kristo no; Ɔyɛ yɛn yamyɛfoɔ, soro nyansani Adamfoɔ no ,¹⁸ na yei ne N’Asɔre a wasan de ama no. Meda mo ase wɔ mogyedie ne gyedieyɛ ho. Mebɔ mpaeɛ sɛ wɔbɛhyira mo, ayɛ mo frɔmfrɔm, na wɔakora mo, wɔ Yesu Kristo din mu, amen.