ຄວາມໝັ້ນໃຈໃນພັນທະສັນຍາຜ່ານທາງພຣະເຢຊູຄຣິດ
ເມື່ອເຮົາເຂົ້າໄປໃນບ້ານຂອງພຣະຜູ້ເປັນເຈົ້າ, ເຮົາເລີ່ມຕົ້ນການເດີນທາງອັນສັກສິດແຫ່ງການຮຽນຮູ້ ເພື່ອກາຍເປັນສານຸສິດທີ່ສູງກວ່າ ແລະ ບໍລິສຸດກວ່າຂອງພຣະຄຣິດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າອະທິຖານຂໍໃຫ້ເຮົາໄດ້ຮັບການຕໍ່ອາຍຸທາງວິນຍານ ດ້ວຍຂ່າວສານທີ່ດົນໃຈ ຈາກຜູ້ນຳຂອງເຮົາໃນທ້າຍອາທິດນີ້ ແລະ ປິຕິຍິນດີໃນສິ່ງທີ່ຂ້າພະເຈົ້າມັກເອີ້ນວ່າ “ຄວາມໝັ້ນໃຈໃນພັນທະສັນຍາຜ່ານທາງພຣະເຢຊູຄຣິດ.” ຄວາມໝັ້ນໃຈນີ້ແມ່ນງຽບໆ ແຕ່ເປັນການຮັບຮອງທີ່ແນ່ນອນໃນການຮັບພອນທີ່ພຣະເຈົ້າສັນຍາສຳລັບຜູ້ທີ່ຮັກສາພັນທະສັນຍາຂອງຕົນ ແລະ ເປັນທີ່ຕ້ອງການຫລາຍ ທ່າມກາງສະຖານະການທ້າທາຍ ຂອງວັນເວລາຂອງເຮົາ.
ການກໍ່ສ້າງບ້ານໃໝ່ຂອງພຣະຜູ້ເປັນເຈົ້າຕະຫລອດທົ່ວໂລກ, ພາຍໃຕ້ການນຳພາຂອງປະທານຣະໂຊ ເອັມ ແນວສັນ, ໄດ້ເຮັດໃຫ້ເກີດຄວາມປິຕິຍິນດີອັນຍິ່ງໃຫຍ່ ໃນບັນດາສະມາຊິກຂອງສາດສະໜາຈັກ ແລະ ມັນຮັບໃຊ້ເປັນສັນຍາລັກຂອງການຂະຫຍາຍອານາຈັກຂອງພຣະຜູ້ເປັນເຈົ້າ.
ເມື່ອສະທ້ອນຄິດເຖິງປະສົບການທີ່ສ້າງແຮງບັນດານໃຈຂອງຂ້າພະເຈົ້າ ໃນການອຸທິດພຣະວິຫານ ແຟເຕີ ຣິເວີ ຄາລິຟໍເນຍ ເດືອນຕຸລາທີ່ຜ່ານມາ, ຂ້າພະເຈົ້າສົງໄສວ່າ ບາງເທື່ອພວກເຮົາຫລົງໄຫລໄປກັບຄວາມຕື່ນເຕັ້ນທີ່ຈະມີພຣະວິຫານໃໝ່ ໃນເມືອງ ແລະ ຊຸມຊົນຂອງເຮົາ ແລະ ລະເລີຍຈາກຈຸດປະສົງອັນສັກສິດຂອງພັນທະສັນຍາສັກສິດທີ່ໄດ້ເຮັດໃນພຣະວິຫານ.
ຢູ່ທາງໜ້າພຣະວິຫານແຕ່ລະແຫ່ງ ມີຂໍ້ຄວາມທີ່ໜັກແໜ້ນວ່າ: “ສັກສິດແດ່ພຣະຜູ້ເປັນເຈົ້າ.”1 ຖ້ອຍຄຳທີ່ດົນໃຈເຫລົ່ານີ້ເປັນຄຳເຊື້ອເຊີນທີ່ແຈ່ມແຈ້ງ ວ່າເມື່ອເຮົາເຂົ້າໄປໃນບ້ານຂອງພຣະຜູ້ເປັນເຈົ້າ, ເຮົາເລີ່ມຕົ້ນການເດີນທາງອັນສັກສິດແຫ່ງການຮຽນຮູ້ ເພື່ອກາຍເປັນສານຸສິດທີ່ສູງກວ່າ ແລະ ບໍລິສຸດກວ່າຂອງພຣະຄຣິດ. ເມື່ອເຮົາເຮັດພັນທະສັນຍາໃນຄວາມບໍລິສຸດຢູ່ຕໍ່ພຣະພັກຂອງພຣະເຈົ້າ ແລະ ໃຫ້ຄຳໝັ້ນສັນຍາວ່າຈະຕິດຕາມພຣະຜູ້ຊ່ວຍໃຫ້ລອດ, ເຮົາໄດ້ຮັບພະລັງທີ່ຈະປ່ຽນແປງ, ຕໍ່ອາຍຸທາງວິນຍານຂອງເຮົາ, ແລະ ເພີ່ມຄວາມສຳພັນຂອງເຮົາກັບພຣະອົງໃຫ້ເລິກເຊິ່ງ. ຄວາມພະຍາຍາມດັ່ງກ່າວນຳເອົາຄວາມບໍລິສຸດມາສູ່ຈິດວິນຍານຂອງເຮົາ ແລະ ສ້າງຄວາມຜູກພັນອັນສັກສິດກັບພຣະເຈົ້າ ແລະ ພຣະເຢຊູຄຣິດ, ຜູ້ທີ່ສັນຍາວ່າເຮົາຈະສາມາດສືບທອດຂອງປະທານແຫ່ງຊີວິດນິລັນດອນ.2 ຜົນຂອງການເດີນທາງທີ່ສັກສິດນີ້ແມ່ນວ່າ ເຮົາໄດ້ຮັບຄວາມໝັ້ນໃຈທີ່ສັກສິດກວ່າ ແລະ ສູງກວ່າ ສຳລັບຊີວິດປະຈຳວັນຂອງເຮົາ ພາຍໃນພັນທະສັນຍາຂອງເຮົາ ທີ່ໄດ້ເຮັດຜ່ານທາງພຣະເຢຊູຄຣິດ.
ຄວາມໝັ້ນໃຈເຊັ່ນນັ້ນເປັນຈຸດສູງສຸດຂອງການເຊື່ອມຕໍ່ອັນສູງສົ່ງຂອງເຮົາກັບພຣະເຈົ້າ ແລະ ສາມາດຊ່ວຍເຮົາເພີ່ມທະວີການອຸທິດຕົນ ແລະ ຄວາມກະຕັນຍູຕໍ່ພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ. ມັນເສີມສ້າງຄວາມສາມາດຂອງເຮົາທີ່ຈະຮັກ ແລະ ຮັບໃຊ້ຄົນອື່ນ, ແລະ ມັນເພີ່ມຄວາມເຂັ້ມແຂງໃຫ້ຈິດວິນຍານຂອງເຮົາ ທີ່ຈະດຳລົງຊີວິດຢູ່ໃນໂລກທີ່ບໍ່ບໍລິສຸດ ທີ່ນັບມື້ນັບມືດມົວ ແລະ ທໍ້ຖອຍ. ມັນເຮັດໃຫ້ເຮົາເອົາຊະນະເມັດພືດຂອງຄວາມສົງໄສ ແລະ ຄວາມໝົດຫວັງ, ຄວາມຢ້ານກົວ ແລະ ຄວາມອຸກອັ່ງ, ຄວາມເຈັບປວດໃຈ ແລະ ຄວາມສິ້ນຫວັງ ທີ່ສັດຕູພະຍາຍາມເຂົ້າໄປໃນຫົວໃຈຂອງເຮົາ ໂດຍສະເພາະໃນເວລາທີ່ຊີວິດມີຄວາມຍາກລຳບາກ, ການທົດລອງຍາວນານ, ຫລື ສະຖານະການຫຍຸ້ງຍາກ. ຂໍ້ພຣະຄຳພີຂໍ້ໜຶ່ງໃຫ້ຄຳແນະນຳທີ່ດີສຳລັບເຮົາແຕ່ລະຄົນ ຂະນະທີ່ເຮົາມຸ້ງໜ້າເຂົ້າໄປໃນລົມແຮງຂອງການທ້າທາຍທາງໂລກໃນປະຈຸບັນ: “ຢ່າໄດ້ປະຖິ້ມຄວາມໝັ້ນໃຈຂອງເຈົ້າ.”3
ອ້າຍເອື້ອຍນ້ອງທີ່ຮັກແພງ, ຜູ້ທີ່ໄດ້ຮັບຄວາມໝັ້ນໃຈຢ່າງແທ້ຈິງໃນພັນທະສັນຍາ ທີ່ເຮັດໄວ້ໃນບ້ານຂອງພຣະຜູ້ເປັນເຈົ້າຜ່ານທາງພຣະເຢຊູຄຣິດ ຈະມີກອງກຳລັງທີ່ຊົງພະລັງທີ່ສຸດ ທີ່ເຮົາສາມາດເຂົ້າເຖິງໃນຊີວິດນີ້.
ເມື່ອເຮົາສຶກສາພຣະຄຳພີມໍມອນ ໃນປຶ້ມ ຈົ່ງຕາມເຮົາມາ ປີນີ້, ເຮົາໄດ້ເຫັນວິທີທີ່ນີໄຟໄດ້ສະແດງຕົວຢ່າງຂອງຄວາມໝັ້ນໃຈໃນພັນທະສັນຍາປະເພດນີ້ຢ່າງສວຍງາມ ຜ່ານທາງຄວາມຊື່ສັດຂອງເພິ່ນ ເມື່ອເພິ່ນໄດ້ປະເຊີນກັບຄວາມຜ່າຍແພ້ ແລະ ການທ້າທາຍຄືກັນກັບທີ່ຈະໄດ້ຮັບແຜ່ນຈາລຶກຕາມພຣະບັນຊາຂອງພຣະຜູ້ເປັນເຈົ້າ. ນີໄຟ, ເຖິງແມ່ນວ່າຈະມີຄວາມໂສກເສົ້າຫລາຍເພາະຄວາມຢ້ານກົວ ແລະ ການຂາດສັດທາຂອງເລມັນ ແລະ ເລມູເອນ, ແຕ່ຍັງໝັ້ນໃຈວ່າ ພຣະຜູ້ເປັນເຈົ້າຈະມອບແຜ່ນຈາລຶກໃຫ້ເຂົາເຈົ້າ. ເພິ່ນໄດ້ເວົ້າກັບພວກອ້າຍຂອງເພິ່ນວ່າ: “ຕາບໃດທີ່ພຣະຜູ້ເປັນເຈົ້າຊົງພຣະຊົນຢູ່ ແລະ ຕາບໃດທີ່ພວກເຮົາຍັງມີຊີວິດຢູ່, ພວກເຮົາຈະບໍ່ລົງໄປຫາບິດາຂອງພວກເຮົາໃນຖິ່ນແຫ້ງແລ້ງກັນດານ ຈົນກວ່າຈະສຳເລັດໃນສິ່ງທີ່ພຣະຜູ້ເປັນເຈົ້າບັນຊາພວກເຮົາ.”4 ເພາະຄວາມໝັ້ນໃຈຂອງນີໄຟໃນຄຳສັນຍາຂອງພຣະຜູ້ເປັນເຈົ້າ, ເພິ່ນຈຶ່ງສາມາດບັນລຸສິ່ງທີ່ເພິ່ນຖືກບັນຊາໃຫ້ເຮັດ.5 ຕໍ່ມາ, ໃນພາບນິມິດຂອງເພິ່ນ, ນີໄຟໄດ້ເຫັນອິດທິພົນຂອງຄວາມໝັ້ນໃຈປະເພດນີ້, ໂດຍຂຽນວ່າ “ຂ້າພະເຈົ້າ, ນີໄຟ, ໄດ້ເຫັນອຳນາດຂອງພຣະເມສານ້ອຍຂອງພຣະເຈົ້າລົງມາເທິງໄພ່ພົນຂອງສາດສະໜາຈັກຂອງພຣະເມສານ້ອຍ ແລະ ຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ, … ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່.”6
ຂ້າພະເຈົ້າໄດ້ເຫັນດ້ວຍຕົວເອງເຖິງຄຳສັນຍາແຫ່ງຄວາມຮັກຂອງພຣະຜູ້ເປັນເຈົ້າ ແລະ ອຳນາດທີ່ໄຫລເຂົ້າມາໃນຊີວິດຂອງລູກໆຂອງພຣະເຈົ້າ, ເພີ່ມຄວາມເຂັ້ມແຂງໃຫ້ພວກເຂົາເພື່ອປະເຊີນກັບສະຖານະການຂອງຊີວິດ. ມື້ກ່ອນນີ້ ພັນລະຍາຂອງຂ້າພະເຈົ້າໄດ້ກັບມາເຮືອນຈາກການໄປນະມັດສະການຢູ່ພຣະວິຫານ ແລະ ໄດ້ບອກຂ້າພະເຈົ້າເຖິງຄວາມປະທັບໃຈຢ່າງເລິກເຊິ່ງທີ່ລາວໄດ້ປະສົບຢູ່ທີ່ນັ້ນ. ຂະນະທີ່ລາວເຂົ້າໄປໃນບ້ານຂອງພຣະຜູ້ເປັນເຈົ້າ, ລາວໄດ້ເຫັນຜູ້ຊາຍຄົນໜຶ່ງນັ່ງຢູ່ລໍ້ເຂັນ ທີ່ເຄື່ອນໄປຢ່າງຊ້າໆ ແລະ ຜູ້ຍິງຄົນໜຶ່ງຍ່າງດ້ວຍໄມ້ເທົ້າຢ່າງລຳບາກ, ທັງສອງໄດ້ມານະມັດສະການພຣະຜູ້ເປັນເຈົ້າຢູ່ໃນບ້ານຂອງພຣະອົງຢ່າງກ້າຫານ. ຂະນະທີ່ພັນລະຍາຂອງຂ້າພະເຈົ້າເຂົ້າໄປໃນບ່ອນເຮັດພິທີການຂັ້ນຕົ້ນ, ລາວໄດ້ເຫັນເອື້ອຍນ້ອງທີ່ໜ້າຮັກຄົນໜຶ່ງ ທີ່ແຂນກຸດເບື້ອງໜຶ່ງ—ແລະ ອີກເບື້ອງໜຶ່ງມີພຽງບາງສ່ວນ—ໄດ້ປະຕິບັດໜ້າທີ່ຂອງນາງຢ່າງສວຍງາມ ແລະ ຢ່າງຊັ້ນສູງ.
ຂະນະທີ່ຂ້າພະເຈົ້າກັບພັນລະຍາເວົ້າລົມກັນກ່ຽວກັບປະສົບການນັ້ນ, ພວກເຮົາໄດ້ສະຫລຸບວ່າ ມີພຽງຄວາມໝັ້ນໃຈຈາກໃຈຈິງໃນຄຳສັນຍານິລັນດອນທີ່ພຣະເຈົ້າ ຊຶ່ງປະທານໃຫ້ຜ່ານທາງພັນທະສັນຍາສັກສິດ ໄດ້ເຮັດກັບພຣະອົງໃນບ້ານຂອງພຣະອົງເທົ່ານັ້ນ ທີ່ສາມາດເຮັດໃຫ້ສານຸສິດທີ່ໜ້າອັດສະຈັນເຫລົ່ານັ້ນຂອງພຣະຄຣິດຕ້ອງອອກຈາກບ້ານຂອງເຂົາເຈົ້າໃນມື້ທີ່ອາກາດໜາວເຢັນທີ່ສຸດ, ເຖິງແມ່ນສະຖານະການຊີວິດສ່ວນຕົວຂອງເຂົາເຈົ້າຈະເປັນແນວໃດກໍຕາມ.
ເພື່ອນທີ່ຮັກແພງຂອງຂ້າພະເຈົ້າ, ຖ້າມີສິ່ງໜຶ່ງທີ່ເຮົາສາມາດຄອບຄອງໄດ້—ແລະ ສິ່ງໜຶ່ງທີ່ເຮົາສາມາດສົ່ງຕໍ່ໃຫ້ລູກຫລານຂອງເຮົາ ຊຶ່ງຈະຊ່ວຍແຕ່ລະຄົນໃນການທົດສອບ ແລະ ການທົດລອງຢູ່ຂ້າງໜ້າ—ສິ່ງນັ້ນຄົງຈະເປັນຄວາມໝັ້ນໃຈໃນພັນທະສັນຍາທີ່ໄດ້ເຮັດຜ່ານທາງພຣະເຢຊູຄຣິດ. ການໄດ້ຄອບຄອງສົມບັດອັນສູງສົ່ງນັ້ນ ຈະຊ່ວຍໃຫ້ພວກເຂົາມີຊີວິດຕາມທີ່ພຣະຜູ້ເປັນເຈົ້າໄດ້ສັນຍາຜູ້ຕິດຕາມທີ່ຊື່ສັດຂອງພຣະອົງວ່າ: “ສານຸສິດຂອງເຮົາຈະຢືນຢູ່ໃນສະຖານທີ່ສັກສິດ, ແລະ ຈະບໍ່ຫວັ່ນໄຫວ.”7
ເຮົາຈະໄດ້ຮັບຄວາມໝັ້ນໃຈຜ່ານທາງພຣະເຢຊູຄຣິດໄດ້ແນວໃດ? ມັນມາເຖິງຜ່ານທາງຄວາມຖ່ອມຕົວ, ການໃຫ້ພຣະຜູ້ຊ່ວຍໃຫ້ລອດເປັນສູນກາງໃນຊີວິດຂອງເຮົາ, ການດຳລົງຊີວິດຕາມຫລັກທຳພຣະກິດຕິຄຸນຂອງພຣະເຢຊູຄຣິດ, ການຮັບພິທີການແຫ່ງຄວາມລອດ ແລະ ຄວາມສູງສົ່ງ, ແລະ ການໃຫ້ກຽດແກ່ພັນທະສັນຍາທີ່ເຮົາໄດ້ເຮັດໄວ້ກັບພຣະເຈົ້າ ໃນບ້ານທີ່ສັກສິດຂອງພຣະອົງ.
ໃນຄຳປາໄສປິດທ້າຍກອງປະຊຸມໃຫຍ່ສາມັນ ເດືອນຕຸລາ ປີ 2019, ສາດສະດາທີ່ຮັກແພງຂອງເຮົາໄດ້ເຕືອນເຮົາກ່ຽວກັບຂັ້ນຕອນສຳຄັນໃນການບັນລຸຄວາມໝັ້ນໃຈໃນພັນທະສັນຍາ, ໂດຍກ່າວວ່າ: “ຄວາມມີຄ່າຄວນສ່ວນບຸກຄົນທີ່ຈະເຂົ້າໄປໃນບ້ານຂອງພຣະຜູ້ເປັນເຈົ້າ ຮຽກຮ້ອງຫລາຍສົມຄວນ ເພື່ອໃຫ້ກະກຽມທາງວິນຍານ. … ຄວາມມີຄ່າຄວນສ່ວນຕົວຮຽກຮ້ອງການເຫລື້ອມໃສທີ່ແທ້ຈິງຂອງຄວາມຄິດ ແລະ ຈິດໃຈ ເພື່ອຈະໄດ້ກາຍເປັນເໝືອນດັ່ງພຣະຜູ້ເປັນເຈົ້າ, ເປັນພົນລະເມືອງທີ່ຊື່ສັດ, ເປັນຕົວຢ່າງທີ່ດີກວ່າເກົ່າ, ແລະ ເປັນຄົນບໍລິສຸດຫລາຍກວ່າເກົ່າ.”8 ສະນັ້ນ, ຖ້າຫາກເຮົາປ່ຽນການກະກຽມຂອງເຮົາທີ່ຈະເຂົ້າໄປໃນພຣະວິຫານ, ເຮົາຈະປ່ຽນປະສົບການຂອງເຮົາໃນພຣະວິຫານ, ຊຶ່ງຈະປ່ຽນຊີວິດຂອງເຮົາຢູ່ນອກພຣະວິຫານ. “ເມື່ອນັ້ນ ຄວາມໝັ້ນໃຈຂອງທ່ານຈະແຂງແກ່ນຂຶ້ນໃນທີ່ປະທັບຂອງພຣະເຈົ້າ; ແລະ ຄຳສອນຂອງຖານະປະໂລຫິດຈະກັ່ນລົງມາເທິງຈິດວິນຍານຂອງທ່ານເໝືອນດັ່ງຢາດນ້ຳຄ້າງຈາກສະຫວັນ.”9
ອະທິການຄົນໜຶ່ງທີ່ຂ້າພະເຈົ້າຮູ້ຈັກກ່າວເຖິງຊັ້ນຮຽນໃຫຍ່ສຸດໃນປະຖົມໄວ ວ່າບໍ່ໄດ້ເປັນຊັ້ນ “ປະຖົມໄວ” ແຕ່ເປັນຊັ້ນ “ກະກຽມສຳລັບພຣະວິຫານ”. ໃນເດືອນມັງກອນອະທິການໄດ້ຂໍໃຫ້ສະມາຊິກໃນຫ້ອງດັ່ງກ່າວ ແລະ ຄູສອນຂອງພວກເຂົາ ມາຫ້ອງການຂອງເພິ່ນ, ຊຶ່ງເຂົາເຈົ້າໄດ້ເວົ້າລົມກັນວ່າ ເຂົາເຈົ້າຈະໃຊ້ເວລາໃນປີນັ້ນເພື່ອກະກຽມທີ່ຈະເຂົ້າໄປໃນພຣະວິຫານແນວໃດ. ອະທິການໄດ້ໃຊ້ເວລາອ່ານຄຳຖາມສຳພາດໃບຮັບຮອງເຂົ້າພຣະວິຫານທີ່ກ່ຽວຂ້ອງ, ຊຶ່ງຈະລວມຢູ່ໃນບົດຮຽນປະຖົມໄວຂອງພວກເຂົາ. ເພິ່ນໄດ້ເຊື້ອເຊີນໃຫ້ເດັກນ້ອຍກຽມພ້ອມ ເພື່ອວ່າເມື່ອພວກເຂົາມາຫ້ອງການຂອງອະທິການໃນປີຕໍ່ໄປ, ພວກເຂົາຈະໝັ້ນໃຈ, ໝັ້ນໃຈໃນພັນທະສັນຍາ, ພ້ອມແລ້ວທີ່ຈະຮັບໃບຮັບຮອງເຂົ້າພຣະວິຫານ ແລະ ເຂົ້າໄປໃນບ້ານຂອງພຣະຜູ້ເປັນເຈົ້າ. ປີນີ້ອະທິການມີເດັກນ້ອຍຜູ້ຍິງສີ່ຄົນ ຜູ້ຕື່ນເຕັ້ນຫລາຍ, ໄດ້ກຽມພ້ອມ, ແລະ ໝັ້ນໃຈທີ່ຈະໄປພຣະວິຫານ ເຖິງຂະໜາດທີ່ພວກເຂົາໄດ້ຂໍໃຫ້ອະທິການພິມໃບຮັບຮອງເຂົ້າພຣະວິຫານຂອງພວກເຂົາໃນມື້ປີໃໝ່ ເວລາ 12:01 ໂມງເຊົ້າ.
ການກຽມພ້ອມບໍ່ແມ່ນພຽງແຕ່ສຳລັບຜູ້ທີ່ຈະໄປພຣະວິຫານເປັນເທື່ອທຳອິດເທົ່ານັ້ນ. ເຮົາທຸກຄົນຄວນກຽມພ້ອມຢ່າງຕໍ່ເນື່ອງ ທີ່ຈະໄປບ້ານຂອງພຣະຜູ້ເປັນເຈົ້າ. ສະເຕກໜຶ່ງທີ່ຂ້າພະເຈົ້າຮູ້ຈັກ ໄດ້ຮັບເອົາຄຳຂວັນນີ້ “ບ້ານເປັນສູນກາງ, ສາດສະໜາຈັກສະໜັບສະໜູນ, ແລະ ຢູ່ຕິດກັບພຣະວິຫານ.” ຢູ່ຕິດກັບ11 ແມ່ນຄຳທີ່ໜ້າສົນໃຈ ໃນນັ້ນມີຄວາມໝາຍວ່າ ສຸມໃຈໃສ່ທິດທາງ, ແຕ່ມັນກໍຍັງມີຄວາມໝາຍອີກວ່າ ຍຶດໝັ້ນ ຫລື ຍຶດໂດຍ, ໃຈເດັດ, ແລະ ຕັ້ງໃຈ, ແນ່ນອນ. ສະນັ້ນການຕິດຢູ່ກັບພຣະວິຫານຈະຍຶດໝັ້ນເຮົາກັບພຣະຜູ້ຊ່ວຍໃຫ້ລອດ, ໃຫ້ການຊີ້ນຳທີ່ເໝາະສົມ ແລະ ໝັ້ນຄົງຂະນະທີ່ເຮັດໃຫ້ເຮົາໝັ້ນໃຈໃນພັນທະສັນຍາ ຜ່ານທາງພຣະເຢຊູຄຣິດ. ສະນັ້ນ, ເຮົາທຸກຄົນຄວນຕັ້ງໃຈເພີ່ມຄວາມຜູກພັນດັ່ງກ່າວ ໂດຍນັດໝາຍຄັ້ງຕໍ່ໄປກັບພຣະຜູ້ເປັນເຈົ້າ ໃນບ້ານສັກສິດຂອງພຣະອົງ, ບໍ່ວ່າພຣະວິຫານຈະຢູ່ໃກ້ ຫລື ໄກກໍຕາມ.11
ສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ໄດ້ເຕືອນເຮົາກ່ຽວກັບຫລັກທຳທີ່ສຳຄັນເຫລົ່ານີ້ ໂດຍການກ່າວວ່າ: “ພຣະວິຫານເປັນສູນກາງຂອງການເສີມສ້າງສັດທາ ແລະ ຄວາມເຂັ້ມແຂງທາງວິນຍານຂອງເຮົາ ເພາະວ່າພຣະຜູ້ຊ່ວຍໃຫ້ລອດ ແລະ ຄຳສອນຂອງພຣະອົງເປັນສູນກາງຂອງພຣະວິຫານ. ທຸກສິ່ງທີ່ສິດສອນໃນພຣະວິຫານ, ຜ່ານທາງຄຳແນະນຳ ແລະ ຜ່ານທາງພຣະວິນຍານ, ຈະເພີ່ມຄວາມເຂົ້າໃຈຂອງເຮົາກ່ຽວກັບພຣະເຢຊູຄຣິດຫລາຍຂຶ້ນ. ພິທີການທີ່ຈຳເປັນຂອງພຣະອົງຈະຜູກມັດເຮົາໄວ້ກັບພຣະອົງ ຜ່ານທາງພັນທະສັນຍາຂອງຖານະປະໂລຫິດທີ່ສັກສິດ. ເມື່ອເຮົາຮັກສາພັນທະສັນຍາຂອງເຮົາ, ພຣະອົງຈະມອບອຳນາດທີ່ປິ່ນປົວ ແລະ ເສີມສ້າງ ຂອງພຣະອົງ ໃຫ້ເຮົາ. ແລະ ໂອ້, ເຮົາຈະຕ້ອງການອຳນາດຂອງພຣະອົງຫລາຍເທົ່າໃດ ໃນວັນຂ້າງໜ້າ.”12
ພຣະຜູ້ຊ່ວຍໃຫ້ລອດປາດຖະໜາໃຫ້ເຮົາກຽມພ້ອມທີ່ຈະເຂົ້າໃຈ, ດ້ວຍຄວາມແຈ່ມແຈ້ງອັນໃຫຍ່ຫລວງ, ວ່າຈະປະຕິບັດແນວໃດ ເມື່ອເຮົາເຮັດພັນທະສັນຍາກັບພຣະບິດາເທິງສະຫວັນໃນພຣະນາມຂອງພຣະອົງ. ພຣະອົງຕ້ອງການໃຫ້ເຮົາກຽມພ້ອມທີ່ຈະປະສົບກັບສິດທິພິເສດ, ຄຳສັນຍາ, ແລະ ຄວາມຮັບຜິດຊອບຂອງເຮົາ; ເພື່ອກຽມພ້ອມຮັບຄວາມຮູ້ແຈ້ງທາງວິນຍານ ແລະ ການຕື່ນຕົວທີ່ເຮົາຕ້ອງການໃນຊີວິດນີ້. ຂ້າພະເຈົ້າຮູ້ວ່າ ເມື່ອພຣະຜູ້ເປັນເຈົ້າເຫັນແມ່ນແຕ່ປະກາຍໄຟແຫ່ງຄວາມປາດຖະໜາ ຫລື ຄວາມພະຍາຍາມອັນຊອບທຳທີ່ລິບລີ່ ໃນຄວາມເຕັມໃຈຂອງເຮົາ ທີ່ຈະໃຫ້ພຣະອົງເປັນສູນກາງໃນຊີວິດຂອງເຮົາ ແລະ ໃນພິທີການ ແລະ ພັນທະສັນຍາທີ່ເຮົາເຮັດໃນບ້ານຂອງພຣະອົງ, ແລ້ວພຣະອົງຈະອວຍພອນເຮົາ, ໃນວິທີທີ່ດີເລີດຂອງພຣະອົງ, ດ້ວຍການອັດສະຈັນ ແລະ ຄວາມເມດຕາອັນອ່ອນໂຍນ ທີ່ເຮົາຕ້ອງການ.
ບ້ານຂອງພຣະຜູ້ເປັນເຈົ້າເປັນບ່ອນທີ່ເຮົາສາມາດປ່ຽນແປງໄດ້ ໃນວິທີທີ່ສູງກວ່າ ແລະ ສັກສິດກວ່າ. ສະນັ້ນ, ເມື່ອເຮົາຍ່າງອອກຈາກພຣະວິຫານ, ຖືກປ່ຽນແປງໂດຍຄວາມຫວັງໃນຄຳສັນຍາແຫ່ງພັນທະສັນຍາຂອງເຮົາ, ມີອາວຸດຄືອຳນາດຈາກເບື້ອງເທິງ, ແລ້ວເຮົາຈະເອົາພຣະວິຫານໄປກັບເຮົາ ເຂົ້າໄປໃນບ້ານ ແລະ ຊີວິດຂອງເຮົາ. ຂ້າພະເຈົ້າຮັບຮອງກັບທ່ານວ່າ ພຣະວິນຍານແຫ່ງບ້ານຂອງພຣະຜູ້ເປັນເຈົ້າທີ່ຢູ່ໃນຕົວເຮົາ ຈະປ່ຽນແປງເຮົາ, ຢ່າງສົມບູນ.
ເຮົາຍັງຮູ້ຈາກພຣະວິຫານອີກວ່າ ຖ້າຫາກເຮົາຕ້ອງການໃຫ້ພຣະວິນຍານຂອງພຣະຜູ້ເປັນເຈົ້າບໍ່ຖືກຈຳກັດໃນຊີວິດຂອງເຮົາ, ເຮົາຕ້ອງບໍ່ມີຄວາມຮູ້ສຶກທີ່ບໍ່ດີຕໍ່ໃຜເລີຍ. ການມີຄວາມຮູ້ສຶກທີ່ບໍ່ດີໃນໃຈ ຫລື ໃນຈິດໃຈ ຫລື ໃນຄວາມຄິດຂອງເຮົາ ຈະເຮັດໃຫ້ເກີດຄຳເວົ້າ ແລະ ການກະທຳທີ່ບໍ່ດີ, ບໍ່ວ່າຈະຢູ່ໃນສື່ສັງຄົມ ຫລື ໃນບ້ານເຮືອນຂອງເຮົາກໍຕາມ, ຈະເຮັດໃຫ້ພຣະວິນຍານຂອງພຣະຜູ້ເປັນເຈົ້າຖອນຕົວອອກຈາກໃຈຂອງເຮົາ. ສະນັ້ນ, ກະລຸນາຢ່າຖິ້ມຄວາມໝັ້ນໃຈຂອງທ່ານ, ແຕ່ໃຫ້ຄວາມໝັ້ນໃຈຂອງທ່ານແຂງແກ່ນຂຶ້ນ.
ການສ້າງພຣະວິຫານຢ່າງຕໍ່ເນື່ອງ ແລະ ເລັ່ງລັດ ຈະຍັງຄົງສ້າງຄວາມຕື່ນເຕັ້ນ, ແຮງບັນດານໃຈ, ແລະ ເປັນພອນໃຫ້ແກ່ເຮົາຕໍ່ໄປ. ແຕ່ສຳຄັນກວ່ານັ້ນ, ເມື່ອເຮົາປ່ຽນການກະກຽມຂອງເຮົາທີ່ຈະເຂົ້າໄປໃນພຣະວິຫານ, ເຮົາຈະປ່ຽນປະສົບການຂອງເຮົາໃນພຣະວິຫານ, ຊຶ່ງຈະປ່ຽນຊີວິດຂອງເຮົາຢູ່ນອກພຣະວິຫານ. ຂໍໃຫ້ການປ່ຽນແປງນີ້ເຮັດໃຫ້ເຮົາໝັ້ນໃຈໃນພັນທະສັນຍາອັນສັກສິດ ທີ່ໄດ້ເຮັດໄວ້ກັບພຣະເຈົ້າ ຜ່ານທາງພຣະເຢຊູຄຣິດ. ພຣະເຈົ້າຊົງພຣະຊົນຢູ່, ພຣະເຢຊູເປັນພຣະຜູ້ຊ່ວຍໃຫ້ລອດຂອງເຮົາ, ແລະ ນີ້ແມ່ນສາດສະໜາຈັກທີ່ຖືກຟື້ນຟູຂອງພຣະອົງຢູ່ເທິງແຜ່ນດິນໂລກ. ຂ້າພະເຈົ້າປະກາດຄວາມຈິງເຫລົ່ານີ້ ດ້ວຍຄວາມຄາລະວະ ໃນພຣະນາມອັນສັກສິດຂອງພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ອາແມນ.