ຈົ່ງປິຕິຍິນດີໃນຂອງປະທານແຫ່ງຂໍກະແຈຂອງຖານະປະໂລຫິດ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ຂໍກະແຈຂອງຖານະປະໂລຫິດ ປົກຄອງວິທີທີ່ຖານະປະໂລຫິດຂອງພຣະເຈົ້າຈະສາມາດຖືກນຳໃຊ້ ເພື່ອບັນລຸຈຸດປະສົງຂອງພຣະຜູ້ເປັນເຈົ້າ ແລະ ເປັນພອນໃຫ້ກັບທຸກຄົນທີ່ຍອມຮັບພຣະກິດຕິຄຸນທີ່ຖືກຟື້ນຟູ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ມື້ນີ້ ແມ່ນມື້ແຫ່ງປະຫວັດສາດສຳລັບປະທານດາລິນ ເອັຈ ໂອກສ໌ ແລະ ຂ້າພະເຈົ້າ. ເມື່ອ 40 ປີກ່ອນ, ໃນວັນທີ 7 ເດືອນເມສາ, 1984, ເປັນເວລາພວກເຮົາໄດ້ຖືກສະໜັບສະໜູນໃຫ້ເຂົ້າສູ່ກຸ່ມອັກຄະສາວົກສິບສອງ.¹ ພວກເຮົາໄດ້ປິຕິຍິນດີໃນທຸກໆກອງປະຊຸມໃຫຍ່ສາມັນຕັ້ງແຕ່ນັ້ນມາ, ລວມທັງຄັ້ງນີ້ເຊັ່ນກັນ. ພວກເຮົາໄດ້ຮັບພອນອີກຄັ້ງດ້ວຍການຖອກເທພຣະວິນຍານອັນສັກສິດ. ຂ້າພະເຈົ້າຫວັງວ່າ ທ່ານຈະສຶກສາຂ່າວສານຂອງກອງປະຊຸມຄັ້ງນີ້ຢ່າງຊໍ້າໆ ຕະຫລອດເດືອນຕໍ່ໆໄປ.

ຕອນທີ່ຂ້າພະເຈົ້າເກີດ,² ໄດ້ມີພຣະວິຫານຫົກແຫ່ງທີ່ເປີດດຳເນີນການໃນສາດສະໜາຈັກ—ບ່ອນລະແຫ່ງໃນເຊັ້ນ ຈອດ, ໂລແກນ, ແມນທາຍ, ແລະ ເຊົາເລັກ ຊີທີ, ຢູທາ; ພ້ອມທັງໃນຄາດສ໌ຕັນ, ອາລເບີຕ້າ, ການາດາ, ແລະ ເລ, ຮາວາຍ. ພຣະວິຫານສອງແຫ່ງກ່ອນນັ້ນໄດ້ເປີດດຳເນີນການຊົ່ວຄາວໃນເຄີດແລນ, ໂອໄຮໂອ, ແລະ ນາວູ, ອິລິນອຍ. ດັ່ງທີ່ສາດສະໜາຈັກໄດ້ຍ້າຍໄປທາງທິດຕາເວັນຕົກ, ໄພ່ພົນໄດ້ຖືກບັງຄັບໃຫ້ຖິ້ມພຣະວິຫານສອງແຫ່ງນັ້ນໄວ້ທາງຫລັງ.

ພຣະວິຫານນາວູໄດ້ຖືກທຳລາຍໂດຍໄຟຂອງຜູ້ວາງເພີງ. ມັນໄດ້ຖືກສ້າງຂຶ້ນໃໝ່ ແລະ ແລ້ວຖືກອຸທິດໂດຍ ປະທານກໍດອນ ບີ ຮິງລີ.³ ພຣະວິຫານເຄີດແລນໄດ້ຖືກໝິ່ນປະໝາດໂດຍສັດຕູຂອງສາດສະໜາຈັກ. ຕໍ່ມາ ພຣະວິຫານເຄີດແລນໄດ້ຕົກເປັນກຳມະສິດຂອງ Community of Christ, ຊຶ່ງໄດ້ເປັນເຈົ້າຂອງພຣະວິຫານມາເປັນເວລາຫລາຍປີ.

ເມື່ອເດືອນທີ່ແລ້ວ ພວກເຮົາໄດ້ປະກາດວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຊື້ພຣະວິຫານເຄີດແລນ, ລວມທັງສະຖານທີ່ປະຫວັດສາດທີ່ສຳຄັນຫລາຍແຫ່ງໃນນາວູ. ພວກເຮົາຊາບຊຶ້ງໃຈຢ່າງຍິ່ງຕໍ່ການສົນທະນາທີ່ຈິງໃຈ ແລະ ເປັນປະໂຫຍດທັງສອງຝ່າຍທີ່ພວກເຮົາໄດ້ມີກັບຜູ້ນຳຈາກ Community of Christ ທີ່ໄດ້ນຳມາສູ່ຂໍ້ຕົກລົງນີ້.

ຮູບພາບ

ພຣະວິຫານເຄີດແລນ.

ພຣະວິຫານເຄີດແລນມີຄວາມສຳຄັນທີ່ບໍ່ທຳມະດາໃນການຟື້ນຟູພຣະກິດຕິຄຸນຂອງພຣະເຢຊູຄຣິດ. ຫລາຍໆເຫດການທີ່ໄດ້ເກີດຂຶ້ນຢູ່ທີ່ນັ້ນ ໄດ້ຖືກທຳນາຍໄວ້ເປັນເວລາພັນປີ ແລະ ເປັນສິ່ງທີ່ຈຳເປັນສຳລັບສາດສະໜາຈັກທີ່ຖືກຟື້ນຟູຂອງພຣະຜູ້ເປັນເຈົ້າ ໃນການບັນລຸພາລະກິດໃນຍຸກສຸດທ້າຍ.

ເຫດການທີ່ສຳຄັນທີ່ສຸດໃນເຫດການເຫລົ່ານີ້ ໄດ້ເກີດຂຶ້ນໃນວັນອາທິດອີດສະເຕີ, ວັນທີ 3 ເດືອນເມສາ, 1836.⁴ ໃນມື້ນັ້ນ, ໂຈເຊັບ ສະມິດ ແລະ ອໍລີເວີ ຄາວເດີຣີ ໄດ້ປະສົບກັບການມາຢ້ຽມຢາມທີ່ໂດດເດັ່ນ ຢ່າງລຽນຕິດ. ທຳອິດ, ອົງພຣະເຢຊູຄຣິດເຈົ້າໄດ້ມາປະກົດ. ສາດສະດາໄດ້ບັນທຶກໄວ້ວ່າ “ພຣະເນດຂອງ [ພຣະຜູ້ຊ່ວຍໃຫ້ລອດ] ເປັນດັ່ງແປວໄຟ; ພຣະເກສາຂອງພຣະອົງຂາວເໝືອນຫິມະບໍລິສຸດ; ພຣະພັກຂອງພຣະອົງຮຸ່ງເຫລື້ອມແຈ້ງກວ່າຄວາມສະຫວ່າງຂອງດວງຕາເວັນ; ແລະ ສຸລະສຽງຂອງພຣະອົງຄືກັບສຽງນ້ຳໄຫລ ຢ່າງໄວຂອງແມ່ນ້ຳອັນກວ້າງໃຫຍ່.”⁵

ໃນລະຫວ່າງການມາຢ້ຽມຢາມນີ້, ພຣະຜູ້ເປັນເຈົ້າໄດ້ຢືນຢັນຕົວຕົນຂອງພຣະອົງ. ພຣະອົງໄດ້ກ່າວວ່າ, “ເຮົາເປັນຜູ້ທຳອິດ ແລະ ຜູ້ສຸດທ້າຍ; ເຮົາຄືເຂົາຜູ້ນັ້ນທີ່ມີຊີວິດ, ເຮົາຄືຜູ້ນັ້ນທີ່ຖືກປະຫານ; ເຮົາຄືຜູ້ວິງວອນແທນພວກເຈົ້ານຳພຣະບິດາ.”⁶

ແລ້ວພຣະເຢຊູຄຣິດກໍໄດ້ປະກາດວ່າ ພຣະອົງໄດ້ຍອມຮັບເອົາພຣະວິຫານແຫ່ງນີ້ເປັນບ້ານຂອງ ພຣະອົງ ແລະ ໄດ້ໃຫ້ຄຳສັນຍາອັນໜ້າຕະລຶງນີ້ວ່າ: “ເຮົາຈະສະແດງຕົນໃຫ້ປະຈັກແກ່ຜູ້ຄົນຂອງເຮົາໃນຄວາມເມດຕາໃນບ້ານແຫ່ງນີ້.”⁷

ຄຳສັນຍາອັນສຳຄັນນີ້ໃຊ້ກັບພຣະວິຫານ ທຸກໆ ແຫ່ງທີ່ໄດ້ຖືກອຸທິດໃນທຸກມື້ນີ້. ຂ້າພະເຈົ້າຂໍເຊື້ອເຊີນທ່ານໃຫ້ໄຕ່ຕອງວ່າ ຄຳສັນຍາຂອງພຣະຜູ້ເປັນເຈົ້ານີ້ ມີຄວາມໝາຍແນວໃດຕໍ່ທ່ານເປັນການສ່ວນຕົວ.

ຫລັງຈາກການມາຢ້ຽມຢາມຂອງພຣະຜູ້ຊ່ວຍໃຫ້ລອດ, ໂມເຊກໍໄດ້ມາປະກົດ. ໂມເຊໄດ້ມອບຂໍກະແຈສຳລັບການເຕົ້າໂຮມອິດສະຣາເອນ ແລະ ການກັບຄືນມາຂອງສິບເຜົ່າໃຫ້ແກ່ໂຈເຊັບ ສະມິດ.⁸

ເມື່ອພາບນິມິດນີ້ໄດ້ປິດລົງ, “ອີລາຍໄດ້ປະກົດ, ແລະ ໄດ້ມອບໝາຍຍຸກສະໄໝແຫ່ງພຣະກິດຕິຄຸນຂອງອັບຣາຮາມ” ໃຫ້ແກ່ໂຈເຊັບ.⁹

ແລ້ວສາດສະດາເອລີຢາກໍໄດ້ມາປະກົດ. ການປະກົດຕົວຂອງເພິ່ນໄດ້ເຮັດໃຫ້ຄຳສັນຍາຂອງມາລາກີສຳເລັດຄົບຖ້ວນວ່າ ກ່ອນການສະເດັດມາຄັ້ງທີສອງ, ພຣະຜູ້ເປັນເຈົ້າຈະສົ່ງເອລີຢາມາເພື່ອ “ນຳພໍ່ກັບລູກມາພົບກັນອີກ.”¹⁰ ເອລີຢາໄດ້ມອບຂໍກະແຈແຫ່ງອຳນາດແຫ່ງການຜະນຶກໃຫ້ແກ່ໂຈເຊັບ ສະມິດ.¹¹

ຄວາມສຳຄັນຂອງຂໍກະແຈເຫລົ່ານີ້ທີ່ໄດ້ຖືກນຳກັບຄືນມາສູ່ແຜ່ນດິນໂລກ ໂດຍຜູ້ສົ່ງຂ່າວຈາກສະຫວັນສາມທ່ານ ພາຍໃຕ້ການຊີ້ນຳຂອງພຣະຜູ້ເປັນເຈົ້າ ບໍ່ສາມາດເປັນການກ່າວເກີນຈິງໄດ້. ຂໍກະແຈຂອງຖານະປະໂລຫິດ ແຕ່ງຕັ້ງສິດອຳນາດ ແລະ ອຳນາດຂອງຝ່າຍປະທານ. ຂໍກະແຈຂອງຖານະປະໂລຫິດ ປົກຄອງວິທີທີ່ຖານະປະໂລຫິດຂອງພຣະເຈົ້າຈະສາມາດຖືກນຳໃຊ້ ເພື່ອບັນລຸຈຸດປະສົງຂອງພຣະຜູ້ເປັນເຈົ້າ ແລະ ເປັນພອນໃຫ້ກັບທຸກຄົນທີ່ຍອມຮັບພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ.

ມັນເປັນສິ່ງສຳຄັນທີ່ຈະສັງເກດວ່າ ກ່ອນການຈັດຕັ້ງສາດສະໜາຈັກ, ຜູ້ສົ່ງຂ່າວຈາກສະຫວັນໄດ້ມອບຖານະປະໂລຫິດແຫ່ງອາໂຣນ ແລະ ເມນຄີເສເດັກໃຫ້ແກ່ສາດສະດາໂຈເຊັບ ສະມິດ ແລະ ໄດ້ມອບຂໍກະແຈຂອງຖານະປະໂລຫິດທັງສອງໃຫ້ກັບເພິ່ນແລ້ວ.¹² ຂໍກະແຈເຫລົ່ານີ້ໄດ້ມອບສິດອຳນາດໃຫ້ແກ່ໂຈເຊັບ ສະມິດ ໃນການຈັດຕັ້ງສາດສະໜາຈັກໃນປີ 1830.¹³

ແລ້ວໃນພຣະວິຫານເຄີດແລນໃນປີ 1836, ການມອບຂໍກະແຈຂອງຖານະປະໂລຫິດເພີ່ມເຕີມທັງສາມອັນນີ້—ໄດ້ແກ່, ຂໍກະແຈແຫ່ງການເຕົ້າໂຮມອິດສະຣາເອນ, ຂໍກະແຈແຫ່ງພຣະກິດຕິຄຸນຂອງອັບຣາຮາມ, ແລະ ຂໍກະແຈແຫ່ງອຳນາດແຫ່ງການຜະນຶກ—ເປັນສິ່ງຈຳເປັນ. ຂໍກະແຈເຫລົ່ານີ້ໄດ້ມອບສິດອຳນາດໃຫ້ແກ່ໂຈເຊັບ ສະມິດ—ແລະ ປະທານຂອງສາດສະໜາຈັກຂອງພຣະຜູ້ເປັນເຈົ້າທີ່ສືບທອດຕຳແໜ່ງທຸກຄົນ—ໃຫ້ເຕົ້າໂຮມອິດສະຣາເອນຢູ່ທັງສອງຟາກມ່ານ, ໃຫ້ອວຍພອນລູກໆແຫ່ງພັນທະສັນຍາທຸກຄົນຂອງອັບຣາຮາມ, ໃຫ້ວາງຕາປະທັບທີ່ຮັບຮອງໃສ່ພິທີການຂອງຖານະປະໂລຫິດ ແລະ ພັນທະສັນຍາຕ່າງໆ, ແລະ ໃຫ້ຜະນຶກຄອບຄົວຊົ່ວນິລັນດອນ. ອຳນາດຂອງຂໍກະແຈຂອງຖານະປະໂລຫິດເຫລົ່ານີ້ ບໍ່ມີຂອບເຂດ ແລະ ໜ້າອັດສະຈັນໃຈ.

ຂໍໃຫ້ພິຈາລະນາວ່າ ຊີວິດຂອງ ທ່ານ ຈະແຕກຕ່າງໄປຈາກນີ້ແນວໃດ ຖ້າຫາກຂໍກະແຈຂອງຖານະປະໂລຫິດບໍ່ໄດ້ຖືກຟື້ນຟູສູ່ແຜ່ນດິນໂລກ.¹⁴ ຖ້າປາດສະຈາກຂໍກະແຈຂອງຖານະປະໂລຫິດ, ທ່ານຈະບໍ່ສາມາດຮັບພອນດ້ວຍອຳນາດຂອງພຣະເຈົ້າໄດ້.¹⁵ ຖ້າປາດສະຈາກຂໍກະແຈຂອງຖານະປະໂລຫິດ, ສາດສະໜາຈັກຈະສາມາດເຮັດໜ້າທີ່ເປັນພຽງແຕ່ອົງການສິດສອນ ແລະ ຊ່ວຍເຫລືອມະນຸດສະທຳທີ່ສຳຄັນເທົ່ານັ້ນ ແຕ່ບໍ່ມີຫຍັງຫລາຍໄປກວ່ານີ້. ຖ້າປາດສະຈາກຂໍກະແຈຂອງຖານະປະໂລຫິດ, ຈະບໍ່ມີໃຜໃນພວກເຮົາທີ່ສາມາດເຂົ້າເຖິງພິທີການຕ່າງໆທີ່ຈຳເປັນ ແລະ ພັນທະສັນຍາທີ່ຜູກມັດເຮົາກັບຄົນທີ່ເຮົາຮັກຊົ່ວນິລັນດອນ ແລະ ໃຫ້ເຮົາຢູ່ກັບພຣະເຈົ້າອີກຄັ້ງໃນທີ່ສຸດ.

ຂໍກະແຈຂອງຖານະປະໂລຫິດຈຳແນກສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຈາກອົງການອື່ນໃດເທິງແຜ່ນດິນໂລກ. ອົງການອື່ນໆຫລາຍອົງການ ສາມາດ ແລະ ເຮັດ ໃຫ້ຊີວິດຂອງທ່ານດີຂຶ້ນໃນຄວາມເປັນມະຕະນີ້. ແຕ່ບໍ່ມີອົງການອື່ນໃດທີ່ ສາມາດ ແລະ ຈະ ມີອິດທິພົນຕໍ່ຊີວິດຂອງທ່ານຫລັງຄວາມຕາຍ.¹⁶

ຂໍກະແຈຂອງຖານະປະໂລຫິດມອບສິດອຳນາດໃຫ້ເຮົາສົ່ງຕໍ່ພອນທັງໝົດທີ່ໄດ້ສັນຍາໄວ້ກັບອັບຣາຮາມໃຫ້ແກ່ຊາຍ ແລະ ຍິງທັງຫລາຍທີ່ຮັກສາພັນທະສັນຍາ. ວຽກງານພຣະວິຫານເຮັດໃຫ້ພອນອັນເລີດລໍ້າເຫລົ່ານີ້ມີໃຫ້ລູກໆຂອງພຣະເຈົ້າ ທຸກຄົນ, ບໍ່ວ່າພວກເຂົາຈະເຄີຍມີຊີວິດຢູ່ ຫລື ມີຊີວິດຢູ່ຕອນນີ້ໃນ ບ່ອນໃດ ຫລື ເມື່ອໃດ ກໍຕາມ. ຂໍໃຫ້ເຮົາປິຕິຍິນດີວ່າ ຂໍກະແຈຂອງຖານະປະໂລຫິດໄດ້ມີຢູ່ເທິງແຜ່ນດິນໂລກອີກຄັ້ງ!

ຂ້າພະເຈົ້າຂໍເຊື້ອເຊີນທ່ານ ໃຫ້ພິຈາລະນາຄຳຖະແຫລງສາມຂໍ້ຕໍ່ໄປນີ້ຢ່າງຮອບຄອບ:

ການເຕົ້າໂຮມອິດສະຣາເອນເປັນຫລັກຖານວ່າ ພຣະເຈົ້າຮັກລູກໆ ທຸກຄົນ ຂອງພຣະອົງຢູ່ທຸກແຫ່ງຫົນ.
ພຣະກິດຕິຄຸນຂອງອັບຣາຮາມເປັນຫລັກຖານ ເພີ່ມເຕີມ ວ່າ ພຣະເຈົ້າຮັກລູກໆ ທຸກຄົນ ຂອງພຣະອົງຢູ່ທຸກແຫ່ງຫົນ. ພຣະອົງເຊື້ອເຊີນໃຫ້ ທຸກຄົນ ມາຫາພຣະອົງ—“ບໍ່ວ່າດຳ ແລະ ຂາວ, ຂ້າທາດ ແລະ ຜູ້ເປັນອິດສະລະ, ຊາຍ ແລະ ຍິງ; … ທຸກຄົນ ເທົ່າທຽມກັນໝົດສຳລັບພຣະເຈົ້າ.”¹⁷
ອຳນາດແຫ່ງການຜະນຶກເປັນຫລັກຖານທີ່ ສູງສົ່ງ ວ່າພຣະເຈົ້າຮັກລູກໆຂອງພຣະອົງ ທຸກຄົນ ໃນທຸກແຫ່ງຫົນ ຫລາຍສໍ່າໃດ ແລະ ຢາກໃຫ້ພວກເຂົາ ແຕ່ລະຄົນ ເລືອກທີ່ຈະກັບບ້ານໄປຫາພຣະອົງ.

ຂໍກະແຈຂອງຖານະປະໂລຫິດທີ່ໄດ້ຖືກຟື້ນຟູຜ່ານທາງສາດສະດາໂຈເຊັບ ສະມິດ ເຮັດໃຫ້ເປັນໄປໄດ້ສຳລັບຊາຍ ແລະ ຍິງທີ່ຮັກສາພັນທະສັນຍາ ທຸກຄົນ ທີ່ຈະຊື່ນຊົມກັບສິດທິພິເສດທາງວິນຍານ ສ່ວນຕົວ ອັນໜ້າເຫລືອເຊື່ອ. ອີກຄັ້ງໜຶ່ງ, ຍັງມີຫລາຍຢ່າງທີ່ເຮົາສາມາດຮຽນຮູ້ຈາກປະຫວັດສາດອັນສັກສິດຂອງພຣະວິຫານເຄີດແລນ.

ຄຳອະທິຖານອຸທິດພຣະວິຫານເຄີດແລນຂອງໂຈເຊັບ ສະມິດ ເປັນບົດສອນກ່ຽວກັບວິທີທີ່ພຣະວິຫານເພີ່ມພະລັງທາງວິນຍານໃຫ້ກັບທ່ານ ແລະ ຂ້າພະເຈົ້າ ໃນການປະເຊີນກັບຄວາມທ້າທາຍຂອງຊີວິດໃນຍຸກສຸດທ້າຍນີ້. ຂ້າພະເຈົ້າຂໍຊຸກຍູ້ໃຫ້ທ່ານສຶກສາຄຳອະທິຖານນັ້ນ, ທີ່ມີບັນທຶກໃນ ຄຳສອນ ແລະ ພັນທະສັນຍາ ພາກທີ 109. ຄຳອະທິຖານອຸທິດນັ້ນ, ຊຶ່ງໄດ້ ຮັບໂດຍການເປີດເຜີຍ, ສິດສອນວ່າ ພຣະວິຫານແມ່ນ “ບ້ານແຫ່ງການອະທິຖານ, ບ້ານແຫ່ງການຖືສິນອົດເຂົ້າ, ບ້ານແຫ່ງສັດທາ, ບ້ານແຫ່ງການຮຽນຮູ້, ບ້ານແຫ່ງລັດສະໝີພາບ, ບ້ານແຫ່ງລະບຽບ, ບ້ານຂອງພຣະເຈົ້າ.”¹⁸

ລາຍການຂອງຄຸນລັກສະນະເຫລົ່ານີ້ ເປັນຫລາຍກວ່າຄຳອະທິບາຍກ່ຽວກັບພຣະວິຫານ. ມັນເປັນຄຳສັນຍາກ່ຽວກັບສິ່ງທີ່ຈະເກີດຂຶ້ນກັບຜູ້ທີ່ຮັບໃຊ້ ແລະ ນະມັດສະການໃນບ້ານຂອງພຣະຜູ້ເປັນເຈົ້າ. ພວກເຂົາສາມາດ ຄາດຫວັງ ທີ່ຈະຮັບຄຳຕອບຕໍ່ຄຳອະທິຖານ, ການເປີດເຜີຍສ່ວນຕົວ, ສັດທາທີ່ຫລາຍຂຶ້ນ, ຄວາມເຂັ້ມແຂງ, ການປອບໂຍນ, ຄວາມຮູ້ທີ່ເພີ່ມຂຶ້ນ, ແລະ ພະລັງທີ່ເພີ່ມຂຶ້ນ.

ເວລາໃນພຣະວິຫານ ຈະຊ່ວຍໃຫ້ທ່ານ ຄິດກ່ຽວກັບຊັ້ນສູງ ແລະ ໃຫ້ທ່ານມີວິໄສທັດກ່ຽວກັບວ່າ ແທ້ຈິງແລ້ວທ່ານແມ່ນໃຜ, ທ່ານສາມາດກາຍເປັນໃຜໄດ້, ແລະ ຊີວິດແບບໃດທີ່ທ່ານສາມາດມີຕະຫລອດໄປ. ການນະມັດສະການພຣະວິຫານເປັນປະຈຳ ຈະຂະຫຍາຍວິທີທີ່ທ່ານເຫັນຕົວເອງ ແລະ ວິທີທີ່ທ່ານເຂົ້າກັບແຜນອັນດີເລີດຂອງພຣະເຈົ້າ. ຂ້າພະເຈົ້າສັນຍາກັບທ່ານໄດ້.

ເຮົາຍັງໄດ້ຮັບຄຳສັນຍານຳອີກວ່າ ໃນພຣະວິຫານ ເຮົາຈະສາມາດ “ຮັບຄວາມສົມບູນແຫ່ງພຣະວິນຍານບໍລິສຸດ.”¹⁹ ລອງຈິນຕະນາການເບິ່ງວ່າ ຄຳສັນຍາ ນັ້ນ ໝາຍຄວາມວ່າແນວໃດ ໃນແງ່ຂອງການທີ່ມີສະຫວັນເປີດອອກສຳລັບຜູ້ສະແຫວງຫາຄວາມຈິງນິລັນດອນແຕ່ລະຄົນທີ່ຕັ້ງອົກຕັ້ງໃຈ.

ເຮົາໄດ້ຮັບຄຳແນະນຳວ່າ ທຸກຄົນທີ່ນະມັດສະການໃນພຣະວິຫານ ຈະມີອຳນາດຂອງພຣະເຈົ້າ ແລະ ເຫລົ່າທູດສະຫວັນ “ຮັບຜິດຊອບດູແລເຂົາເຈົ້າ.”²⁰ ມັນເພີ່ມຄວາມໝັ້ນໃຈໃຫ້ແກ່ທ່ານຫລາຍສໍ່າໃດ ທີ່ໄດ້ຮູ້ວ່າ, ໃນຖານະຍິງ ຫລື ຊາຍທີ່ໄດ້ຮັບຂອງປະທານສັກສິດ ໂດຍສວມອາວຸດດ້ວຍອຳນາດຂອງພຣະເຈົ້າ, ທ່ານບໍ່ຈຳເປັນຕ້ອງປະເຊີນໜ້າກັບຊີວິດຕາມລຳພັງ? ການທີ່ຮູ້ວ່າ ເຫລົ່າທູດສະຫວັນຈະຊ່ວຍເຫລືອທ່ານແທ້ໆນັ້ນ ຊ່ວຍໃຫ້ທ່ານມີຄວາມກ້າຫານຢ່າງໃດ?

ສຸດທ້າຍ, ເຮົາໄດ້ຮັບສັນຍາວ່າ “ບໍ່ມີການມົ້ວສຸມລັບແຫ່ງຄວາມຊົ່ວຮ້າຍໃດ” ຈະເອົາຊະນະເໜືອຜູ້ທີ່ນະມັດສະການໃນບ້ານຂອງພຣະຜູ້ເປັນເຈົ້າ.²¹

ການທີ່ເຂົ້າໃຈສິດທິພິເສດທາງວິນຍານທີ່ເຮັດໃຫ້ເປັນໄປໄດ້ໃນພຣະວິຫານນັ້ນ ສຳຄັນຢ່າງຍິ່ງຕໍ່ພວກເຮົາແຕ່ລະຄົນໃນທຸກມື້ນີ້.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ນີ້ຄືຄຳສັນຍາຂອງຂ້າພະເຈົ້າ. ບໍ່ມີສິ່ງໃດທີ່ຈະຊ່ວຍທ່ານໃຫ້ຈັບຮາວເຫລັກໄວ້ໃຫ້ແໜ້ນ ຫລາຍໄປກວ່າ²² ການນະມັດສະການໃນພຣະວິຫານເປັນປະຈຳເທົ່າທີ່ສະພາບການຈະເອື້ອອຳນວຍ. ບໍ່ມີສິ່ງໃດຈະປົກປ້ອງທ່ານ ຫລາຍໄປກວ່າ ເມື່ອທ່ານພົບກັບໝອກແຫ່ງຄວາມມືດຂອງໂລກ. ບໍ່ມີສິ່ງໃດທີ່ຈະຄໍ້າຊູປະຈັກພະຍານຂອງທ່ານ ເຖິງອົງພຣະເຢຊູຄຣິດເຈົ້າ ແລະ ການຊົດໃຊ້ຂອງພຣະອົງ ຫລື ຊ່ວຍໃຫ້ທ່ານເຂົ້າໃຈແຜນອັນດີເລີດຂອງພຣະເຈົ້າ ຫລາຍໄປກວ່າ ນີ້. ບໍ່ມີສິ່ງໃດທີ່ຈະເລົ້າໂລມຈິດວິນຍານຂອງທ່ານ ຫລາຍໄປກວ່າ ນີ້ ໃນຊ່ວງເວລາແຫ່ງຄວາມເຈັບປວດ. ບໍ່ມີສິ່ງໃດທີ່ຈະເປີດຟ້າສະຫວັນ ຫລາຍໄປກວ່າ ນີ້. ບໍ່ມີສິ່ງໃດ!

ພຣະວິຫານ ເປັນ ປະຕູສູ່ພອນທີ່ຍິ່ງໃຫຍ່ທີ່ສຸດທີ່ພຣະເຈົ້າເກັບໄວ້ໃຫ້ພວກເຮົາແຕ່ລະຄົນ, ດ້ວຍວ່າ ພຣະວິຫານເປັນສະຖານທີ່ແຫ່ງດຽວໃນໂລກ ທີ່ເຮົາຈະສາມາດຮັບພອນ ທັງໝົດ ທີ່ໄດ້ສັນຍາໄວ້ກັບອັບຣາຮາມ.²³ ນັ້ນຄືເຫດຜົນທີ່ພວກເຮົາເຮັດທຸກສິ່ງພາຍໃນອຳນາດຂອງພວກເຮົາ, ພາຍໃຕ້ການຊີ້ນຳຂອງພຣະຜູ້ເປັນເຈົ້າ, ເພື່ອເຮັດໃຫ້ພອນຂອງພຣະວິຫານເປັນທີ່ເຂົ້າເຖິງໄດ້ຫລາຍຂຶ້ນ ແກ່ສະມາຊິກຂອງສາດສະໜາຈັກ. ດັ່ງນັ້ນ, ຂ້າພະເຈົ້າຍິນດີທີ່ຈະປະກາດວ່າ ພວກເຮົາວາງແຜນທີ່ຈະສ້າງພຣະວິຫານໃໝ່ໃນສະຖານທີ່ 15 ແຫ່ງດັ່ງຕໍ່ໄປນີ້:

ອູທູໂຣອາ, ໂປລີເນເຊຍຝຣັ່ງ.
ຈິວາວາ, ແມັກຊິໂກ
ໂຟລເຣຍໂນໂພລິສ໌, ບຣາຊິນ
ໂຣຊາຣິໂອ, ອາກຊັງຕິນ
ເອດິນເບີ, ສະກ໊ອດແລນ
ບຣິສ໌ເບນ, ອົດສະຕາລີ ເຂດໃຕ້
ວິກທໍເຣຍ, ບຣິທິສ໌ ໂຄລຳເບຍ
ຢູມາ, ອາຣິໂຊນາ
ຮິວສ໌ຕັນ, ເທັກຊັສ໌ ເຂດໃຕ້
ເດິ ມວຍນ໌, ໄອໂອວາ
ຊິນຊິນນາດີ, ໂອໄຮໂອ
ໂຮໂນລູລູ, ຮາວາຍ
ແວສທ໌ ຈໍແດນ, ຢູທາ
ລີໄຮ, ຢູທາ
ມາຣາໄຄໂບ, ເວເນຊູເອລາ

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າເປັນພະຍານວ່າ ນີ້ ແມ່ນ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ພຣະອົງເປັນປະມຸກ. ເຮົາເປັນສານຸສິດຂອງພຣະອົງ.

ຂໍໃຫ້ເຮົາ ປິຕິຍິນດີ ໃນການຟື້ນຟູຂໍກະແຈຂອງຖານະປະໂລຫິດ ຊຶ່ງເຮັດໃຫ້ເປັນໄປໄດ້ສຳລັບທ່ານ ແລະ ຂ້າພະເຈົ້າ ທີ່ຈະຊື່ນຊົມໄປກັບ ທຸກໆ ພອນທາງວິນຍານທີ່ເຮົາ ເຕັມໃຈ ແລະ ມີຄ່າຄວນທີ່ຈະຮັບ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.