ພຣະວິຫານ, ບ້ານຂອງພຣະຜູ້ເປັນເຈົ້າ ມີຢາຍຢູ່ທົ່ວໂລກ
ເມື່ອທ່ານມາຍັງບ້ານສັກສິດຂອງພຣະອົງຢ່າງມີຄ່າຄວນ ແລະ ດ້ວຍການອະທິຖານ, ທ່ານຈະມີອຳນາດຂອງພຣະອົງເປັນອາວຸດ.
ທ່ານມັກຖ້ອຍຄຳອັນງົດງາມທີ່ເຮົາຫາກໍໄດ້ຮ້ອງໄປບໍ? “ເຮົາຈະຄ້ຳຊູ, ຈະຊ່ວຍໜູນກຳລັງ, … ຈະຊູເຈົ້າດ້ວຍຫລັກການທີ່ຖືກຕ້ອງ ແລະ ຊອບທຳ.”1 ພຣະຜູ້ເປັນເຈົ້າກຳລັງເສີມຄວາມເຂັ້ມແຂງໃຫ້ແກ່ໄພ່ພົນຂອງພຣະອົງໃນທຸກໆໄວ ຂະນະທີ່ເຂົາເຈົ້າມາທີ່ບ້ານທີ່ສັກສິດຂອງພຣະອົງ. ຈາກ ຄິນຊາຊາ ເຖິງ ໂຊລິໂກເຟັນ ເຖິງ ຟູກູໂອກາ ເຖິງອົກແລນ, ຊາວໜຸ່ມ, ດ້ວຍການລິເລີ່ມຂອງພວກເຂົາເອງ, ກໍເຕັມຢູ່ທີ່ຫ້ອງບັບຕິສະມາພຣະວິຫານ. ທີ່ຜ່ານມາ, ພະນັກງານພິທີການສ່ວນຫລາຍຈະເປັນຄົນອາວຸໂສ—ແຕ່ປະຈຸບັນນີ້ບໍ່ເປັນແບບນັ້ນອີກແລ້ວ. ຜູ້ສອນສາດສະໜາທີ່ຖືກເອີ້ນ, ຜູ້ສອນສາດສະໜາຝ່າຍໃຫ້ບໍລິການ, ແລະ ອະດີດຜູ້ສອນສາດສະໜາກໍເຕັມຢູ່ທຸກໆແຈໃນພຣະວິຫານ. ຕະຫລອດທົ່ວໂລກ, ກໍມີຄວາມຮູ້ສຶກຫລາຍຂຶ້ນ ທີ່ນຳເຮົາໃຫ້ມາທີ່ບ້ານຂອງພຣະຜູ້ເປັນເຈົ້າ.
ພຽງແຕ່ໜຶ່ງປີຜ່ານມານີ້, ເພື່ອນທີ່ຮັກແພງຂອງຄອບຄົວຄົນໜຶ່ງ, ອາຍຸ 95 ປີ, ອາໄສຢູ່ໃກ້ຊາຍຝັ່ງຕາເວັນອອກຂອງສະຫະລັດ, ຜູ້ທີ່ໄດ້ຮັບການສິດສອນຈາກຜູ້ສອນສາດສະໜາເປັນເວລາ 70 ປີ, ໄດ້ເວົ້າກັບລູກສາວຂອງລາວວ່າ, “ແມ່ຢາກໄປພຣະວິຫານນຳລູກ.”
ລູກສາວຂອງລາວໄດ້ຕອບວ່າ, “ແມ່ເອີຍ, ທຳອິດ, ແມ່ຕ້ອງຮັບບັບຕິສະມາກ່ອນ.”
“ຕົກລົງ,” ລາວໄດ້ຕອບ, “ແລ້ວ ແມ່ຢາກຮັບບັບຕິສະມາ.” ລາວກໍໄດ້ຮັບບັບຕິສະມາ. ສອງສາມມື້ຕໍ່ມາ, ລາວໄດ້ເຂົ້າໄປໃນຫ້ອງບັບຕິສະມາພຣະວິຫານດ້ວຍຄວາມຄາລະວະ. ແລະ ພຽງແຕ່ໜຶ່ງເດືອນຜ່ານມານີ້, ລາວໄດ້ຮັບເອົາຂອງປະທານສັກສິດ ແລະ ການຜະນຶກຂອງລາວເອງ. “ຄວາມຮູ້ ແລະ ພະລັງຂອງພຣະຜູ້ເປັນເຈົ້າແຜ່ໄປ; ມ່ານປົກຄຸມພື້ນໂລກເລີ່ມເປີດຄາຍຂະຫຍາຍຈອນ.”2
ທ່ານເຄີຍສົງໄສບໍວ່າ ເປັນຫຍັງພຣະຜູ້ເປັນເຈົ້າຈຶ່ງຈະຊີ້ນຳສາດສະດາຂອງພຣະອົງໃຫ້ຢາຍບ້ານທີ່ສັກສິດຂອງພຣະອົງຢູ່ທົ່ວໂລກ ໃນເວລານີ້?3 ເປັນຫຍັງພຣະອົງຈຶ່ງ, ໃນເວລານີ້ໂດຍສະເພາະ, ຈະປະທານຄວາມຈະເລີນຮຸ່ງເຮືອງທີ່ຈຳເປັນໃຫ້ແກ່ຜູ້ຄົນແຫ່ງພັນທະສັນຍາຂອງພຣະອົງ ເພື່ອວ່າຜ່ານທາງສ່ວນສິບທີ່ສັກສິດຂອງເຂົາເຈົ້າ, ບ້ານຂອງພຣະຜູ້ເປັນເຈົ້າຫລາຍຮ້ອຍແຫ່ງຈະສາມາດຖືກສ້າງຂຶ້ນ?
ເຊົ້າມື້ນີ້, ປະທານດາລິນ ເອັຈ ໂອກສ໌ ໄດ້ສະແດງພາບທີ່ສວຍງາມຂອງພຣະວິຫານທີ່ກຳລັງກໍ່ສ້າງທົ່ວໂລກ. ເມື່ອບໍ່ດົນມານີ້ ແຄຕີ້ ແລະ ຂ້າພະເຈົ້າໄດ້ຢູ່ທີ່ຟີລິບປິນ. ຂໍໃຫ້ຄິດເຖິງການມະຫັດສະຈັນນີ້: ພຣະວິຫານມານີລາຖືກອຸທິດໃນປີ 1984. ມັນຈະເປັນເວລາ 26 ປີກ່ອນພຣະວິຫານແຫ່ງທີສອງ, ໃນເມືອງເຊບູ, ໄດ້ສ້າງສຳເລັດໃນປີ 2010. ບັດນີ້, 14 ປີຕໍ່ມາ, ພຣະວິຫານ 11 ແຫ່ງກຳລັງຖືກກໍ່ສ້າງ, ຖືກອອກແບບ, ຫລື ຖືກກຽມພ້ອມສຳລັບການອຸທິດ. ຈາກທິດເໜືອເຖິງທິດໃຕ້: ລາໂອແອກ, ຕູກູກາຣາໂອ, ຊານຕີອາໂກ, ເອີດາເນຕາ, ອາລາບາງ, ນາກາ, ຕັກໂລບານ ຊີທີ, ອີໂລຍໂລ, ບາໂຄລອດ, ຄາກາຍານ ເດ ໂອໂຣ, ແລະ ດາວາໂອ. ຊ່າງເປັນສິ່ງທີ່ປະເສີດແທ້ໆທີ່ໄດ້ເຫັນວຽກງານທີ່ໜ້າອັດສະຈັນຂອງພຣະເຈົ້າ!
ຕະຫລອດທົ່ວໂລກ, ບ້ານຂອງພຣະຜູ້ເປັນເຈົ້າກໍເຂົ້າມາໃກ້ເຮົາຫລາຍຂຶ້ນ. ເປັນຫຍັງຈຶ່ງເປັນສະໄໝຂອງເຮົາ?
ວັນເວລາສຸດທ້າຍ
ພຣະຜູ້ເປັນເຈົ້າໄດ້ເຕືອນວ່າ ໃນວັນເວລາສຸດທ້າຍ, ຈະມີຄວາມກົດດັນລະຫວ່າງປະເທດຊາດ,4 ຜູ້ຄົນຈະ “ເຫັນແກ່ຕົວ,”5 “ທຸກສິ່ງທັງປວງ [ຈະ] ຢູ່ໃນຄວາມສັບສົນວຸ້ນວາຍ,”6 ຄວາມສັບສົນຈະມີຢ່າງຫລວງຫລາຍ,7 ແລະ “ໃຈຂອງມະນຸດ [ຈະ] ທໍ້ແທ້.”8 ແນ່ນອນວ່າເຮົາໄດ້ເຫັນໃຈຂອງຊາຍ ແລະ ຍິງທໍ້ແທ້: ການລໍ້ລວງຂອງໂລກ, ການລົບກວນຂອງສຽງທີ່ຍຸຍົງ, ການລະເລີຍຈາກການບຳລຸງລ້ຽງທາງວິນຍານ, ຄວາມອິດເມື່ອຍຈາກຂໍ້ຮຽກຮ້ອງຂອງການເປັນສານຸສິດ.9 ບາງທີທ່ານໄດ້ໂສກເສົ້າຂະນະທີ່ທ່ານໄດ້ເຫັນຄົນທີ່ທ່ານຮັກ, ຜູ້ທີ່ໃນຄັ້ງໜຶ່ງໄດ້ກ່າວດ້ວຍຄວາມຈິງໃຈເຖິງສັດທາຂອງລາວໃນພຣະເຢຊູຄຣິດ, ໄດ້ສະແດງປະຈັກພະຍານເຖິງພຣະຄຳພີມໍມອນ, ແລະ ໄດ້ຊ່ວຍສ້າງອານາຈັກຂອງພຣະເຈົ້າຢ່າງກະຕີລືລົ້ນ, ໄດ້ຫັນໜີອອກຢ່າງກະທັນຫັນ, ຢ່າງໜ້ອຍສຳລັບເວລານີ້, ຈາກຄວາມເຊື່ອຂອງລາວ ໄປສູ່ຄວາມບໍ່ເຂັ້ມແຂງໃນສາດສະໜາຈັກ. ຄຳແນະນຳຂອງຂ້າພະເຈົ້າຕໍ່ທ່ານຄື ຢ່າທໍ້ແທ້! ທຸກຢ່າງດີ. ເພາະດ້ວຍວ່າ, ບໍ່ມີສິ່ງໃດທີ່ພຣະເຈົ້າເຮັດບໍ່ໄດ້.10
ດ້ວຍຄວາມສັບສົນວຸ້ນວາຍ ແລະ ຄວາມບໍ່ເຊື່ອທີ່ຖືກທຳນາຍຢູ່ໃນໂລກ, ພຣະຜູ້ເປັນເຈົ້າໄດ້ສັນຍາວ່າຍັງຈະມີຜູ້ຄົນແຫ່ງພັນທະສັນຍາ, ຜູ້ຄົນທີ່ລໍຖ້າການສະເດັດກັບຄືນມາຂອງພຣະອົງຢ່າງກະຕືລືລົ້ນ, ຜູ້ຄົນທີ່ຢືນຢູ່ໃນສະຖານທີ່ສັກສິດ ແລະ ບໍ່ຫວັ່ນໄຫວ.11 ພຣະອົງໄດ້ກ່າວເຖິງຜູ້ຄົນທີ່ຊອບທຳ ຕ້ານທານການຫລອກລວງຂອງຜູ້ປໍລະປັກ, ຮັກສາສັດທາຂອງເຂົາເຈົ້າເອົາໄວ້, ຄິດກ່ຽວກັບຊັ້ນສູງ, ແລະ ໄວ້ວາງໃຈຢ່າງຄົບຖ້ວນໃນພຣະຜູ້ຊ່ວຍໃຫ້ລອດ ພຣະເຢຊູຄຣິດ.
ເປັນຫຍັງພຣະຜູ້ເປັນເຈົ້າຈຶ່ງນຳພຣະວິຫານຫລາຍໆຮ້ອຍແຫ່ງເຂົ້າມາໃກ້ເຮົາຫລາຍຂຶ້ນ? ເຫດຜົນໜຶ່ງຄື ທ່າມກາງຄວາມວຸ້ນວາຍ ແລະ ການລໍ້ລວງຂອງໂລກ, ພຣະອົງໄດ້ສັນຍາວ່າຈະເພີ່ມຄວາມເຂັ້ມແຂງ ແລະ ອວຍພອນໄພ່ພົນແຫ່ງພັນທະສັນຍາຂອງພຣະອົງ, ແລະ ຄຳສັນຍາຂອງພຣະອົງກຳລັງເກີດເປັນຈິງ.
ຄຳສັນຍາຈາກພຣະວິຫານເຄີດແລນ
ບ້ານທີ່ສັກສິດເຫລົ່ານີ້ເພີ່ມຄວາມເຂັ້ມແຂງ, ປອບໂຍນ, ແລະ ປົກປ້ອງເຮົາແນວໃດ? ເຮົາພົບເຫັນຄຳຕອບໃນຄຳອ້ອນວອນຂອງສາດສະດາໂຈເຊັບ ສະມິດ ໃນການອຸທິດພຣະວິຫານເຄີດແລນ. ແມ່ນຢູ່ໃນພຣະວິຫານແຫ່ງນີ້ ບ່ອນທີ່ໄພ່ພົນໄດ້ຂັບຮ້ອງວ່າ, “ເຮົາຈະຮ່ວມຮ້ອງເພງ ຈະໂຫ່ຮ້ອງກັບທູດສະຫວັນ.”12 ພຣະຜູ້ເປັນເຈົ້າພຣະອົງເອງໄດ້ມາປະກົດ, ແລະ ສາດສະດາໃນຍຸກສະໄໝກ່ອນໄດ້ກັບມາ, ໄດ້ມອບຂໍກະແຈຂອງຖານະປະໂລຫິດເພີ່ມເຕີມ ໃຫ້ແກ່ພຣະກິດຕິຄຸນທີ່ຖືກຟື້ນຟູ.13
ໃນໂອກາດທີ່ສັກສິດນັ້ນ ໃນພຣະວິຫານເຄີດແລນ, ສາດສະດາໄດ້ອະທິຖານວ່າ ໃນບ້ານທີ່ສັກສິດຂອງພຣະຜູ້ເປັນເຈົ້າ, ໄພ່ພົນຈະມີອຳນາດຂອງພຣະເຈົ້າເປັນອາວຸດ, ວ່າພຣະນາມຂອງພຣະເຢຊູຄຣິດຈະຢູ່ເທິງທີ່ນັ້ນ, ວ່າເຫລົ່າທູດຂອງພຣະອົງຈະພິທັກຮັກສາ, ແລະ ວ່າພວກເຂົາຈະເຕີບໂຕຂຶ້ນໃນພຣະຜູ້ເປັນເຈົ້າ ແລະ “ໄດ້ຮັບຄວາມສົມບູນແຫ່ງພຣະວິນຍານບໍລິສຸດ.”14 ຄຳອ້ອນວອນທີ່ມີພະລັງເຫລົ່ານີ້ກໍໄດ້ເກີດເປັນຈິງໃນຊີວິດຂອງເຮົາ ຂະນະທີ່ເຮົານະມັດສະການຢ່າງຊື່ສັດຢູ່ໃນບ້ານຂອງພຣະຜູ້ເປັນເຈົ້າ.
ມີອາວຸດຄືຄວາມຊອບທຳ
ໃນບ້ານຂອງພຣະອົງ, ເຮົາໄດ້ຮັບອຳນາດຈາກສະຫວັນແທ້ໆ.15 ສັດທາຂອງເຮົາໃນພຣະເຢຊູຄຣິດ ແລະ ຄວາມຮັກຂອງເຮົາຕໍ່ພຣະອົງຖືກຢືນຢັນ ແລະ ຖືກເສີມກຳລັງ. ເຮົາໄດ້ຮັບການຮັບຮອງທາງຝ່າຍວິນຍານ ເຖິງເອກະລັກທີ່ແທ້ຈິງຂອງເຮົາ ແລະ ຈຸດປະສົງຂອງຊີວິດ.16 ຂະນະທີ່ເຮົາຊື່ສັດ, ເຮົາໄດ້ຮັບພອນດ້ວຍການປົກປ້ອງຈາກການລໍ້ລວງ ແລະ ການລົບກວນ. ເຮົາຮູ້ສຶກເຖິງຄວາມຮັກຂອງພຣະຜູ້ຊ່ວຍໃຫ້ລອດຂອງເຮົາ ຂະນະທີ່ພຣະອົງຍົກເຮົາຂຶ້ນຈາກຄວາມຫຍຸ້ງຍາກ ແລະ ຄວາມໂສກເສົ້າຂອງເຮົາ. ເຮົາມີອຳນາດຂອງພຣະອົງເປັນອາວຸດ.
ພຣະນາມຂອງພຣະອົງຢູ່ກັບເຮົາ
ໃນບ້ານທີ່ສັກສິດຂອງພຣະອົງ, ເຮົາຮັບເອົາພຣະນາມຂອງພຣະອົງຢ່າງສົມບູນຫລາຍຂຶ້ນ. ເມື່ອເຮົາຮັບບັບຕິສະມາ, ເຮົາປະກາດຄວາມເຊື່ອຂອງເຮົາໃນພຣະອົງ ແລະ ຄວາມເຕັມໃຈຂອງເຮົາທີ່ຈະຮັກສາພຣະບັນຍັດຂອງພຣະອົງ. ຢູ່ໃນພຣະວິຫານ, ເຮົາໃຫ້ຄຳສັນຍາສັກສິດ, ຜ່ານທາງພັນທະສັນຍາຂອງເຮົາ, ທີ່ຈະຕິດຕາມພຣະອົງຕະຫລອດໄປ.
ຊາວໜຸ່ມຂອງສາດສະໜາຈັກນີ້ແມ່ນຍອດຢ້ຽມແທ້ໆ. ໃນໂລກທີ່ຫຍຸ້ງຍາກ, ພວກເຂົາຮັບເອົາພຣະນາມຂອງພຣະຄຣິດ. ໃນເມືອງຮີເບີ ລັດຢູທາ, ໄດ້ມີການປະຊຸມສາທາລະນະ ເພື່ອສົນທະນາລາຍລະອຽດຂອງພຣະວິຫານທີ່ຖືກວາງແຜນຈະສ້າງ. ຊາວໜຸ່ມສາມຮ້ອຍຄົນໄດ້ໄປຮ່ວມຢູ່ທີ່ສວນສາທາລະນະ ເພື່ອສະແດງການສະໜັບສະໜູນຂອງພວກເຂົາສຳລັບພຣະວິຫານທີ່ຖືກສະເໜີຈະສ້າງ. ຊາຍໜຸ່ມຄົນໜຶ່ງ, ກ່າວກັບຜູ້ນຳຝ່າຍລັດຖະບານໃນການສົນທະນາເປີດເຜີຍ, ດ້ວຍຄວາມກ້າຫານໄດ້ອະທິບາຍວ່າ, “ຂ້ານ້ອຍຫວັງວ່າຈະໄດ້ແຕ່ງງານໃນພຣະວິຫານແຫ່ງນີ້. [ພຣະວິຫານຈະຊ່ວຍ] ຂ້ານ້ອຍໃຫ້ຮັກສາຕົວເອງໃຫ້ສະອາດ ແລະ ບໍລິສຸດ.” ອີກຄົນໜຶ່ງໄດ້ບັນຍາຍວ່າພຣະວິຫານເປັນສັນຍາລັກຂອງຄວາມສະຫວ່າງ ແລະ ຄວາມຫວັງ. ຊາຍໜຸ່ມ ແລະ ຍິງໜຸ່ມຂອງສາດສະໜາຈັກຕະຫລອດທົ່ວໂລກກຳລັງຮັບເອົາພຣະນາມຂອງພຣະເຢຊູຄຣິດ.17
ເຫລົ່າທູດຢູ່ກັບພວກເຮົາ
ໃນພຣະວິຫານເຄີດແລນ, ສາດສະດາໂຈເຊັບໄດ້ອະທິຖານວ່າ “ເຫລົ່າທູດ [ຈະ] ຮັບຜິດຊອບດູແລ [ໄພ່ພົນຂອງພຣະອົງ].”18 ການປະຕິບັດພິທີການເປັນປະຈຳແທນບັນພະບຸລຸດຂອງເຮົາໃນພຣະວິຫານ ຈະນຳການຢືນຢັນທີ່ຫວານຊື່ນ ແລະ ແນ່ນອນມາໃຫ້ ວ່າຊີວິດມີຢູ່ຕໍ່ໄປຫລັງຈາກຄວາມຕາຍ.
ເຖິງແມ່ນວ່າປະສົບການຫລາຍຢ່າງຂອງເຮົາໃນບ້ານຂອງພຣະຜູ້ເປັນເຈົ້ານັ້ນສັກສິດເກີນທີ່ຈະແບ່ງປັນໃນສາທາລະນະຊົນ, ແຕ່ບາງສິ່ງເຮົາສາມາດແບ່ງປັນໄດ້. ເມື່ອສີ່ສິບປີກ່ອນ, ຕອນອາໄສຢູ່ທີ່ລັດຟລໍຣິດາ, ແຄຕີ້ ແລະ ຂ້າພະເຈົ້າໄດ້ເດີນທາງໄປພຣະວິຫານ ໃນເມືອງແອດແລນຕ້າ, ລັດຈໍເຈຍ. ໃນແລງວັນພຸດ, ວັນທີ 9 ເດືອນພຶດສະພາ, 1984, ຂະນະທີ່ພວກເຮົາໄດ້ສຳເລັດພິທີໜຶ່ງໃນພຣະວິຫານ, ພະນັກງານພິທີການຄົນໜຶ່ງໄດ້ມາຫາຂ້າພະເຈົ້າ ແລະ ໄດ້ຖາມຖ້າວ່າຂ້າພະເຈົ້າມີເວລາພໍທີ່ຈະໄປເຮັດພິທີການຂັ້ນຕົ້ນໃຫ້ຜູ້ໜຶ່ງໄດ້ບໍ່. ຊື່ຂອງຄົນທີ່ຂ້າພະເຈົ້າໄດ້ກະທຳແທນກໍແປກ. ຊື່ຂອງລາວແມ່ນ ອີລີເຊີ ເຊີຊີ.
ມື້ຕໍ່ມາ, ພຣະວິຫານກໍເຕັມໄປດ້ວຍໄພ່ພົນ. ຂະນະທີ່ຂ້າພະເຈົ້າໄດ້ກະກຽມທີ່ຈະໄປຮ່ວມພິທີຮັບຂອງປະທານສັກສິດເທື່ອທີສອງຂອງວັນນັ້ນ, ຂ້າພະເຈົ້າໄດ້ຮັບຊື່ຂອງບຸກຄົນທີ່ຂ້າພະເຈົ້າຈະກະທຳແທນ. ເປັນທີ່ໜ້າປະຫລາດໃຈ, ຊື່ທີ່ຂ້າພະເຈົ້າໄດ້ຮັບແມ່ນຊື່ຂອງບຸກຄົນຈາກຄືນກ່ອນ, ອີລີເຊີ ເຊີຊີ. ຂ້າພະເຈົ້າໄດ້ຮູ້ສຶກເຖິງພຣະວິນຍານຂອງພຣະຜູ້ເປັນເຈົ້າ ຂະນະທີ່ພິທີການໄດ້ສຳເລັດລົງ. ຕໍ່ມາໃນຕອນບ່າຍ, ຂະນະທີ່ຍັງຢູ່ໃນພຣະວິຫານ, ແຄຕີ້ໄດ້ເຫັນເພື່ອນສູງອາຍຸຄົນໜຶ່ງ, ຊິດສະເຕີ ດໍລີ ເຟີແນນເດສ໌, ຜູ້ທີ່ໃນຕອນນັ້ນໄດ້ອາໄສຢູ່ເມືອງແອດແລນຕ້າ. ໂດຍບໍ່ມີສະມາຊິກເປັນຜູ້ຊາຍໃນຄອບຄົວຂອງລາວ, ລາວໄດ້ຖາມວ່າ ຂ້າພະເຈົ້າຈະສາມາດຊ່ວຍໃນການຜະນຶກພໍ່ຂອງລາວເຂົ້າກັບພໍ່ແມ່ຂອງເພິ່ນໄດ້ບໍ. ແນ່ນອນ ຂ້າພະເຈົ້າຖືວ່າເປັນກຽດ.
ຂະນະທີ່ຂ້າພະເຈົ້າໄດ້ຄຸເຂົ່າຢູ່ທ້າຍແທ່ນບູຊາສຳລັບພິທີການສັກສິດນີ້, ຂ້າພະເຈົ້າໄດ້ຍິນຊື່ນັ້ນອີກຄັ້ງ ຊື່ທີ່ ບັດນີ້ ໄດ້ຕິດຢູ່ໃນຈິດໃຈຂອງຂ້າພະເຈົ້າ, ຊື່ຂອງພໍ່ລາວ, ອີລີເຊີ ເຊີຊີ. ຂ້າພະເຈົ້າເຊື່ອແທ້ໆວ່າ ຫລັງຈາກຊີວິດນີ້, ຂ້າພະເຈົ້າຈະໄດ້ພົບ ແລະ ໂອບກອດຊາຍຄົນໜຶ່ງ ທີ່ເປັນທີ່ຮູ້ຈັກກັນໃນຊີວິດມະຕະວ່າ ອີລີເຊີ ເຊີຊີ.
ປະສົບການສ່ວນຫລາຍຂອງພວກເຮົາໃນບ້ານຂອງພຣະຜູ້ເປັນເຈົ້າ ນຳສັນຕິສຸກອັນໜ້າຍິນດີ ແລະ ການເປີດເຜີຍອັນສະຫງົບງຽບມາໃຫ້ ຫລາຍກວ່າການແຊກແຊງທີ່ຕື່ນເຕັ້ນ. ແຕ່ໝັ້ນໃຈໄດ້ວ່າ: ເຫລົ່າທູດມີໜ້າທີ່ດູແລເຮົາ.
ຄວາມສົມບູນແຫ່ງພຣະວິນຍານບໍລິສຸດ
ຂອງປະທານແຫ່ງພຣະວິນຍານບໍລິສຸດແມ່ນໄດ້ຮັບໂດຍການຢືນຢັນເປັນສະມາຊິກຂອງສາດສະໜາຈັກ. ແຕ່ລະອາທິດ ເມື່ອເຮົາຮັບສ່ວນສິນລະລຶກຂອງເຂົ້າຈີ່ ແລະ ນ້ຳຢ່າງມີຄ່າຄວນ ໃນການລະນຶກເຖິງພຣະຜູ້ຊ່ວຍໃຫ້ລອດຂອງເຮົາ, ເຮົາໄດ້ຮັບຄຳສັນຍາວ່າຈະມີພຣະວິນຍານຂອງພຣະອົງສະຖິດຢູ່ກັບເຮົາຕະຫລອດເວລາ.19 ເມື່ອເຮົາມາທີ່ບ້ານຂອງພຣະຜູ້ເປັນເຈົ້າດ້ວຍຄວາມເຕັມໃຈ, ສະຖານທີ່ທີ່ສັກສິດທີ່ສຸດຢູ່ເທິງໂລກ, ເຮົາຈະເຕີບໃຫຍ່ໃນພຣະຜູ້ເປັນເຈົ້າ ແລະ ສາມາດ “ໄດ້ຮັບຄວາມສົມບູນແຫ່ງພຣະວິນຍານບໍລິສຸດ.”20 ຜ່ານທາງອຳນາດຂອງພຣະວິນຍານບໍລິສຸດ, ເຮົາຈະເຕັມໄປດ້ວຍສັນຕິສຸກ ແລະ ຄວາມຊື່ນຊົມ ແລະ ຄວາມຫວັງທີ່ເກີນກວ່າຈະກ່າວອອກມາໄດ້.21 ເຮົາໄດ້ຮັບຄວາມເຂັ້ມແຂງທີ່ຈະຄົງຢູ່ເປັນສານຸສິດຂອງພຣະອົງ ແມ່ນແຕ່ເມື່ອເຮົາພົບເຫັນຕົວເອງຢູ່ນອກສະຖານທີ່ສັກສິດ.
ປະທານຣະໂຊ ເອັມ ແນວສັນ ໄດ້ປະກາດວ່າ: “ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ພຣະເຢຊູຄຣິດ, ຈະສະແດງວຽກງານທີ່ຍິ່ງໃຫຍ່ທີ່ສຸດຂອງພຣະອົງ ນັບຈາກເວລານີ້ໄປ ຈົນເຖິງເວລາທີ່ພຣະອົງສະເດັດມາອີກ. ເຮົາຈະໄດ້ເຫັນການບົ່ງບອກທີ່ມະຫັດສະຈັນວ່າ ພຣະເຈົ້າອົງເປັນພຣະບິດາ ແລະ … ພຣະເຢຊູຄຣິດ … ຄວບຄຸມສາດສະໜາຈັກນີ້ ໃນຄວາມສະຫງ່າລາສີ ແລະ ດ້ວຍລັດສະໝີພາບ.”22 ການຢາຍບ້ານຂອງພຣະຜູ້ເປັນເຈົ້າໄວ້ຢູ່ທົ່ວໂລກ ເປັນວຽກງານທີ່ຍິ່ງໃຫຍ່ ແລະ ການບົ່ງບອກທີ່ມະຫັດສະຈັນ.23
ເພື່ອນທີ່ຮັກແພງຂອງຂ້າພະເຈົ້າ, ຖ້າເຮົາສາມາດ ແລະ ຍັງບໍ່ທັນໄດ້ເພີ່ມການໄປພຣະວິຫານຂອງເຮົາ, ຂໍໃຫ້ເຮົາຈົ່ງຫາເວລາຕື່ມອີກ ທີ່ຈະໄປນະມັດສະການຢ່າງສະໝ່ຳສະເໝີຢູ່ໃນບ້ານຂອງພຣະຜູ້ເປັນເຈົ້າ. ຂໍໃຫ້ເຮົາຈົ່ງອະທິຖານເພື່ອພຣະວິຫານທີ່ຖືກປະກາດແລ້ວ, ວ່າຈະສາມາດຊື້ທີ່ດິນ, ວ່າລັດຖະບານຈະອະນຸມັດແຜນການ, ວ່າພະນັກງານທີ່ມີພອນສະຫວັນຈະໄດ້ເຫັນຂອງປະທານຂອງເຂົາເຈົ້າຖືກຂະຫຍາຍ, ແລະ ວ່າການອຸທິດທີ່ສັກສິດຈະໄດ້ຮັບການເຫັນຊອບຈາກສະຫວັນ ແລະ ໄດ້ຮັບການຢ້ຽມຢາມຂອງເຫລົ່າທູດ.
ຄຳສັນຍາ
ພຣະວິຫານແມ່ນບ້ານຂອງພຣະຜູ້ເປັນເຈົ້າແທ້ໆ. ຂ້າພະເຈົ້າໃຫ້ສັນຍາທ່ານວ່າ ຂະນະທີ່ທ່ານມາທີ່ບ້ານທີ່ສັກສິດຂອງພຣະອົງຢ່າງມີຄ່າຄວນ ແລະ ດ້ວຍການອະທິຖານ, ທ່ານຈະມີອຳນາດຂອງພຣະອົງເປັນອາວຸດ, ພຣະນາມຂອງພຣະອົງຈະສະຖິດຢູ່ກັບທ່ານ, ເຫລົ່າທູດຂອງພຣະອົງຈະຮັບຜິດຊອບດູແລທ່ານ, ແລະ ທ່ານຈະເຕີບໂຕໃນພອນຂອງພຣະວິນຍານບໍລິສຸດ.
ພຣະຜູ້ເປັນເຈົ້າໄດ້ສັນຍາວ່າ, “ທຸກຄົນທີ່ໄດ້ປະຖິ້ມບາບຂອງຕົນ ແລະ ມາຫາເຮົາ, ແລະ ເອີ້ນຫານາມຂອງເຮົາ, ແລະ ເຊື່ອຟັງສຽງຂອງເຮົາ, ແລະ ຮັກສາບັນຍັດຂອງເຮົາ, ຈະເຫັນໜ້າຂອງເຮົາ ແລະ ຮູ້ວ່າເຮົາເປັນຢູ່.”24 ມີຫລາຍວິທີທາງທີ່ຈະໄດ້ເຫັນພຣະພັກຂອງພຣະຄຣິດ, ແລະ ບໍ່ມີບ່ອນໃດທີ່ດີໄປກວ່າໃນບ້ານທີ່ສັກສິດຂອງພຣະອົງ.25
ໃນວັນເວລາຂອງຄວາມສັບສົນ ແລະ ວຸ້ນວາຍ, ຂ້າພະເຈົ້າເປັນພະຍານວ່າ ພຣະວິຫານ ເປັນບ້ານທີ່ສັກສິດຂອງພຣະອົງ ແລະ ຈະຊ່ວຍຮັກສາເຮົາ, ປົກປ້ອງເຮົາ, ແລະ ກະກຽມເຮົາສຳລັບວັນທີ່ຮຸ່ງໂລດເມື່ອ, ພ້ອມດ້ວຍເຫລົ່າທູດທີ່ບໍລິສຸດຂອງພຣະອົງ, ພຣະຜູ້ຊ່ວຍໃຫ້ລອດຂອງເຮົາຈະສະເດັດກັບມາໃນສະຫງ່າລາສີ, ອຳນາດ, ແລະ ໃນລັດສະໝີພາບອັນຍິ່ງໃຫຍ່. ໃນພຣະນາມຂອງພຣະເຢຊູຄຣິດ, ອາແມນ.