ຈົ່ງອະທິຖານ, ພຣະອົງຢູ່ທີ່ນັ້ນ
ຂ້າພະເຈົ້າຂໍເຊື້ອເຊີນພວກເຈົ້າໃຫ້ອະທິຖານເພື່ອຈະຮູ້ວ່າພຣະບິດາເທິງສະຫວັນຢູ່ທີ່ນັ້ນ, ອະທິຖານເພື່ອຈະເຕີບໂຕ ເພື່ອຈະກາຍເປັນເໝືອນດັ່ງພຣະອົງ, ແລະ ອະທິຖານເພື່ອຈະສະແດງຄວາມຮັກຂອງພຣະອົງຕໍ່ຄົນອື່ນ.
ອ້າຍເອື້ອຍນ້ອງທັງຫລາຍ, ຂ້າພະເຈົ້າຮູ້ສຶກຊື່ນຊົມຂະນະທີ່ຂ້າພະເຈົ້າຕອບສະໜອງຄວາມປະທັບໃຈທີ່ຈະກ່າວກັບເດັກນ້ອຍ!
ເດັກຍິງ ແລະ ເດັກຊາຍທັງຫລາຍ, ບໍ່ວ່າພວກເຈົ້າອາໄສຢູ່ບ່ອນໃດກໍຕາມໃນໂລກ, ຂ້າພະເຈົ້າຢາກແບ່ງປັນບາງສິ່ງກັບພວກເຈົ້າ.
ພຣະບິດາເທິງສະຫວັນຮັກພວກເຈົ້າ! ພວກເຈົ້າເປັນລູກຂອງພຣະອົງ. ພຣະອົງຮູ້ຈັກພວກເຈົ້າ. ພຣະອົງປະສົງຈະອວຍພອນພວກເຈົ້າ. ຂ້າພະເຈົ້າອະທິຖານດ້ວຍສຸດຈິດສຸດໃຈຂອງຂ້າພະເຈົ້າວ່າ ພວກເຈົ້າຈະຮູ້ສຶກເຖິງຄວາມຮັກຂອງພຣະອົງ.
ພວກເຈົ້າມັກຮັບຂອງຂວັນບໍ? ຂ້າພະເຈົ້າຢາກກ່າວກັບພວກເຈົ້າກ່ຽວກັບຂອງປະທານພິເສດທີ່ພຣະບິດາເທິງສະຫວັນໄດ້ປະທານໃຫ້ພວກເຈົ້າ ເພື່ອຊ່ວຍເຫລືອພວກເຈົ້າ. ມັນເປັນຂອງປະທານແຫ່ງການອະທິຖານ. ການອະທິຖານຊ່າງເປັນພອນທີ່ປະເສີດແທ້ໆ! ເຮົາສາມາດເວົ້າລົມກັບພຣະບິດາເທິງສະຫວັນໄດ້ໃນທຸກເວລາ, ໃນທຸກບ່ອນ.
ຕອນພຣະເຢຊູຢູ່ເທິງໂລກ, ພຣະອົງໄດ້ສິດສອນເຮົາໃຫ້ອະທິຖານ. ພຣະອົງໄດ້ກ່າວວ່າ, “ຈົ່ງໝັ່ນຂໍ, ແລ້ວພວກເຈົ້າຈະໄດ້ຮັບ.”1
ພວກເຈົ້າສາມາດອະທິຖານທູນຂໍຂອງປະທານອັນໃດແດ່? ມີຫລາຍໆຢ່າງ, ແຕ່ມື້ນີ້ຂ້າພະເຈົ້າຂໍແບ່ງປັນສາມຢ່າງ:
-
ອະທິຖານເພື່ອຈະຮູ້.
-
ອະທິຖານເພື່ອຈະເຕີບໂຕ.
-
ອະທິຖານເພື່ອຈະສະແດງ.
ໃຫ້ເຮົາມາກ່າວກ່ຽວກັບແຕ່ລະຢ່າງ.
ທຳອິດ, ອະທິຖານເພື່ອຈະຮູ້
ພວກເຈົ້າຈຳເປັນຕ້ອງ ຮູ້ ຫຍັງແດ່?
ມີເພງໜຶ່ງກ່ຽວກັບການອະທິຖານທີ່ເດັກນ້ອຍປະຖົມໄວຮ້ອງທົ່ວໂລກ. ມັນເລີ່ມຕົ້ນດ້ວຍຄຳຖາມ. ພວກເຈົ້າຮູ້ບໍວ່ານັ້ນເປັນເພງຫຍັງ? ຖ້າຫາກຂ້າພະເຈົ້າກ້າຫານພໍ, ຂ້າພະເຈົ້າຈະຮ້ອງໃຫ້ພວກເຈົ້າຟັງ!
“ພຣະບິດາສະຫວັນ, ຊົງຢູ່ທີ່ນັ້ນບໍ່? ແລະ ພຣະອົງໄດ້ຍິນ ແລະ ຕອບຄຳສວດຂອງເດັກເດັກບໍ່?”2
ພວກເຈົ້າຈະຮູ້ໄດ້ແນວໃດວ່າ ພຣະບິດາເທິງສະຫວັນຢູ່ທີ່ນັ້ນແທ້ໆ, ແມ່ນແຕ່ເມື່ອພວກເຈົ້າບໍ່ສາມາດເຫັນພຣະອົງ?
ປະທານຣະໂຊ ເອັມ ແນວສັນ ໄດ້ເຊື້ອເຊີນເຮົາໃຫ້ “ທຸ້ມເທໃຈຂອງທ່ານໃຫ້ແກ່ພຣະບິດາເທິງສະຫວັນຂອງທ່ານ. … ແລະ ແລ້ວໃຫ້ຮັບຟັງ!”3 ໃຫ້ຮັບຟັງສິ່ງທີ່ພວກເຈົ້າຮູ້ສຶກຢູ່ໃນໃຈ ແລະ ຄວາມຄິດທີ່ເຂົ້າມາສູ່ຈິດໃຈຂອງພວກເຈົ້າ.4
ພຣະບິດາເທິງສະຫວັນມີພຣະກາຍທີ່ເປັນເນື້ອໜັງ ແລະ ກະດູກທີ່ສະຫງ່າລາສີ ແລະ ເປັນພຣະບິດາຂອງວິນຍານຂອງພວກເຈົ້າ. ເພາະພຣະບິດາເທິງສະຫວັນມີອຳນາດທັງໝົດ ແລະ ຮອບຮູ້ທຸກສິ່ງທັງປວງ, ພຣະອົງຈຶ່ງສາມາດເຫັນລູກໆຂອງພຣະອົງທຸກຄົນ5 ແລະ ສາມາດໄດ້ຍິນທຸກໆຄຳອະທິຖານ. ພວກເຈົ້າສາມາດມາ ຮູ້ ດ້ວຍຕົວພວກເຈົ້າເອງວ່າ ພຣະອົງຢູ່ທີ່ນັ້ນ ແລະ ວ່າພຣະອົງຮັກພວກເຈົ້າ.
ເມື່ອພວກເຈົ້າຮູ້ວ່າ ພຣະບິດາເທິງສະຫວັນມີຈິງ ແລະ ວ່າພຣະອົງຮັກພວກເຈົ້າ, ພວກເຈົ້າສາມາດດຳລົງຊີວິດດ້ວຍຄວາມກ້າຫານ ແລະ ຄວາມຫວັງ! “ຈົ່ງອະທິຖານ, ພຣະອົງຢູ່ທີ່ນັ້ນ; ຈົ່ງກ່າວອອກມາ, ພຣະອົງຊົງຟັງຢູ່.”6
ພວກເຈົ້າເຄີຍຮູ້ສຶກໂດດດ່ຽວບໍ? ມື້ໜຶ່ງຕອນຫລານສາວຄົນໜຶ່ງຂອງພວກເຮົາ ນາງອາສະລີ ມີອາຍຸຫົກປີ, ນາງເປັນຄົນດຽວທີ່ບໍ່ມີໝູ່ຫລິ້ນນຳໃນເດີ່ນຫລິ້ນທີ່ໂຮງຮຽນ. ຂະນະທີ່ນາງຢືນຢູ່ບ່ອນນັ້ນ, ຮູ້ສຶກວ່າບໍ່ສຳຄັນ ແລະ ບໍ່ມີໃຜເຫັນ, ຄວາມຄິດໜຶ່ງໂດຍສະເພາະໄດ້ເຂົ້າມາໃນຈິດໃຈຂອງນາງວ່າ: “ດຽວກ່ອນ! ເຮົາບໍ່ໄດ້ຢູ່ຄົນດຽວ! ເຮົາມີພຣະຄຣິດ!” ນາງອາສະລີໄດ້ຄຸເຂົ່າລົງໃນເດີ່ນຫລິ້ນນັ້ນເລີຍ, ກອດແຂນຂອງນາງ, ແລະ ໄດ້ອະທິຖານຫາພຣະບິດາເທິງສະຫວັນ. ທັນທີທີ່ນາງມືນຕາ, ມີເດັກຍິງຄົນໜຶ່ງອາຍຸດຽວກັບນາງທີ່ໄດ້ຢືນຢູ່ທີ່ນັ້ນ ໄດ້ຖາມນາງຖ້າວ່ານາງຢາກຫລິ້ນບໍ. ນາງອາສະລີໄດ້ມາຮູ້ຈັກວ່າ, “ເຮົາສຳຄັນຕໍ່ພຣະຜູ້ເປັນເຈົ້າ, ແລະ ວ່າເຮົາບໍ່ໄດ້ຢູ່ຄົນດຽວເລີຍ.”
ບາງເທື່ອພວກເຈົ້າອາດຢາກ ຮູ້ ວ່າເປັນຫຍັງສິ່ງທີ່ຍາກກຳລັງເກີດຂຶ້ນໃນຊີວິດຂອງພວກເຈົ້າ ຫລື ວ່າເປັນຫຍັງພວກເຈົ້າຈຶ່ງບໍ່ໄດ້ຮັບພອນທີ່ພວກເຈົ້າອະທິຖານທູນຂໍ. ສ່ວນຫລາຍແລ້ວ ຄຳຖາມທີ່ດີທີ່ສຸດທີ່ຈະຖາມພຣະບິດາເທິງສະຫວັນບໍ່ແມ່ນວ່າ ເປັນຫຍັງ ແຕ່ວ່າ ແມ່ນຫຍັງ.
ພວກເຈົ້າຈຳໄດ້ບໍຕອນທີ່ນີໄຟ ແລະ ຄອບຄົວຂອງເພິ່ນໄດ້ຫິວໂຫຍຂະນະທີ່ເດີນທາງຢູ່ໃນຖິ່ນແຫ້ງແລ້ງກັນດານ? ເມື່ອນີໄຟ ແລະ ພວກອ້າຍຂອງເພິ່ນໄດ້ອອກໄປລ່າສັດ, ນີໄຟໄດ້ເຮັດຄັນທະນູຂອງເພິ່ນຫັກ. ແຕ່ເພິ່ນບໍ່ໄດ້ຖາມວ່າເປັນຫຍັງ.
ນີໄຟໄດ້ເຮັດທະນູຄັນໃໝ່ ແລະ ໄດ້ຖາມບິດາຂອງເພິ່ນ, ລີໄຮ, ວ່າເພິ່ນຈະໄປຫາອາຫານຢູ່ບ່ອນໃດ. ລີໄຮໄດ້ອະທິຖານ, ແລະ ພຣະຜູ້ເປັນເຈົ້າໄດ້ສະແດງໃຫ້ພວກເພິ່ນເຫັນບ່ອນທີ່ນີໄຟສາມາດໄປ.7 ພຣະບິດາເທິງສະຫວັນຈະຊີ້ນຳພວກເຈົ້າ ເມື່ອພວກເຈົ້າທູນຖາມພຣະອົງເຖິງ ສິ່ງ ທີ່ພວກເຈົ້າສາມາດເຮັດ ແລະ ສິ່ງ ທີ່ພວກເຈົ້າສາມາດຮຽນຮູ້.
ສອງ, ອະທິຖານເພື່ອຈະເຕີບໂຕ
ພຣະບິດາເທິງສະຫວັນປະສົງໃຫ້ພວກເຈົ້າ ເຕີບໂຕ! ພຣະອົງຮັກພວກເຈົ້າຫລາຍ ຈົນພຣະອົງໄດ້ສົ່ງພຣະບຸດຂອງພຣະອົງ, ພຣະເຢຊູຄຣິດ, ມາເພື່ອສະແດງໃຫ້ເຮົາເຫັນວິທີທີ່ຈະດຳລົງຊີວິດ.8 ພຣະເຢຊູໄດ້ທົນທຸກທໍລະມາ, ໄດ້ສິ້ນພຣະຊົນ, ແລະ ໄດ້ຟື້ນຄືນພຣະຊົນ ເພື່ອວ່າເຮົາຈະສາມາດໄດ້ຮັບການໃຫ້ອະໄພຈາກບາບຂອງເຮົາ ແລະ ເຕີບໂຕ ເພື່ອກາຍເປັນເໝືອນດັ່ງພຣະອົງຫລາຍຂຶ້ນ.
ພວກເຈົ້າຢາກ ເຕີບໂຕ ໃນຄວາມອົດທົນ ຫລື ໃນຄວາມຊື່ສັດບໍ? ພວກເຈົ້າຢາກ ເຕີບໂຕ ໃນທັກສະໃດໜຶ່ງບໍ? ບາງທີພວກເຈົ້າເປັນຄົນຂີ້ອາຍ ແລະ ຢາກ ເຕີບໂຕ ໃນຄວາມກ້າຫານ. “ຈົ່ງອະທິຖານ, ພຣະອົງຢູ່ທີ່ນັ້ນ”!9 ຜ່ານທາງພຣະວິນຍານຂອງພຣະອົງ, ຫົວໃຈຂອງພວກເຈົ້າສາມາດປ່ຽນໄປ, ແລະ ພວກເຈົ້າສາມາດໄດ້ຮັບຄວາມເຂັ້ມແຂງ.
ເພື່ອນໃໝ່ຄົນໜຶ່ງຂອງຂ້າພະເຈົ້າ ຊື່ ໂຈນາ ໄດ້ຂຽນວ່າ: “ຂ້ານ້ອຍມັກຈະຮູ້ສຶກກັງວົນຕອນໄປໂຮງຮຽນໃນຕອນເຊົ້າ. ຂ້ານ້ອຍເປັນຫ່ວງເລື່ອງການໄປຊ້າ, ການລືມບາງສິ່ງ, ແລະ ການສອບເສັງ. ຕອນຂ້ານ້ອຍອາຍຸ 10 ປີ, ຂ້ານ້ອຍໄດ້ເລີ່ມອະທິຖານຕອນຂີ່ລົດໄປໂຮງຮຽນກັບແມ່ຂ້ານ້ອຍ. ຂ້ານ້ອຍທູນຂໍຄວາມຊ່ວຍເຫລືອທີ່ຂ້ານ້ອຍຕ້ອງການ, ແລະ ຂ້ານ້ອຍອະທິຖານເພື່ອຄອບຄົວດ້ວຍ. ຂ້ານ້ອຍຍັງຄິດເຖິງສິ່ງທີ່ຂ້ານ້ອຍມີຄວາມກະຕັນຍູນຳອີກ. [ການອະທິຖານຫາພຣະບິດາເທິງສະຫວັນໄດ້] ຊ່ວຍຂ້ານ້ອຍ. ບາງເທື່ອຂ້ານ້ອຍບໍ່ຮູ້ສຶກສະບາຍໃຈໃນທັນທີທີ່ຂ້ານ້ອຍອອກຈາກລົດ, ແຕ່ເມື່ອຂ້ານ້ອຍໄປເຖິງຫ້ອງຮຽນ ຂ້ານ້ອຍກໍຮູ້ສຶກວ່າມີຄວາມສະຫງົບ.”10
ສັດທາຂອງໂຈນາ ເຕີບໂຕ ເມື່ອລາວອະທິຖານທຸກວັນ ແລະ ແລ້ວດຳເນີນໄປໜ້າ.
ສາມ, ອະທິຖານເພື່ອຈະສະແດງ
ພວກເຈົ້າສາມາດອະທິຖານທູນຂໍຄວາມຊ່ວຍເຫລືອ ທີ່ຈະ ສະແດງ ຄວາມຮັກຂອງພຣະບິດາເທິງສະຫວັນຕໍ່ຄົນອື່ນ.11 ຜ່ານທາງພຣະວິນຍານຂອງພຣະອົງ, ພຣະບິດາເທິງສະຫວັນຈະຊ່ວຍໃຫ້ພວກເຈົ້າສັງເກດເຫັນຄົນໃດຄົນໜຶ່ງທີ່ໂສກເສົ້າ ເພື່ອວ່າພວກເຈົ້າຈະສາມາດປອບໂຍນພວກເຂົາ. ພຣະອົງສາມາດຊ່ວຍພວກເຈົ້າ ສະແດງ ຄວາມຮັກຂອງພຣະອົງ ໂດຍການໃຫ້ອະໄພຄົນໃດຄົນໜຶ່ງ. ພຣະອົງສາມາດປະທານຄວາມກ້າຫານໃຫ້ແກ່ພວກເຈົ້າ ເພື່ອຈະຮັບໃຊ້ຄົນໃດຄົນໜຶ່ງ ແລະ ແບ່ງປັນກັບພວກເຂົາວ່າ ພວກເຂົາເປັນລູກຂອງພຣະເຈົ້າ. ພວກເຈົ້າສາມາດຊ່ວຍຄົນອື່ນໃຫ້ມາຮູ້ຈັກ ແລະ ຮັກພຣະເຢຊູ ແລະ ພຣະບິດາເທິງສະຫວັນດັ່ງທີ່ພວກເຈົ້າຮູ້ ແລະ ຮັກ.12
ຕະຫລອດຊີວິດຂອງຂ້າພະເຈົ້າ ຂ້າພະເຈົ້າໄດ້ອະທິຖານໃຫ້ພໍ່ຂອງຂ້າພະເຈົ້າກາຍເປັນສະມາຊິກຂອງ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ແມ່ນແຕ່ຕອນເປັນເດັກນ້ອຍ, ຂ້າພະເຈົ້າກໍໄດ້ຮູ້ວ່າມີພອນຢ່າງຫລວງຫລາຍທີ່ ເພິ່ນ ສາມາດໄດ້ຮັບ. ຄອບຄົວ ຂອງພວກເຮົາຈະສາມາດໄດ້ຮັບພອນຂອງການໄດ້ຜະນຶກເຂົ້າກັນຊົ່ວນິລັນດອນ. ຄອບຄົວ, ໝູ່ເພື່ອນຂອງຂ້າພະເຈົ້າ, ແລະ ຂ້າພະເຈົ້າໄດ້ອະທິຖານເພື່ອເພິ່ນເລື້ອຍໆ, ແຕ່ເພິ່ນບໍ່ໄດ້ເຂົ້າຮ່ວມສາດສະໜາຈັກ. ພຣະບິດາເທິງສະຫວັນບໍ່ບັງຄັບໃຫ້ໃຜເລືອກ.13 ພຣະອົງສາມາດສົ່ງຄຳຕອບຕໍ່ຄຳອະທິຖານຂອງເຮົາມາໃຫ້ໃນວິທີທາງອື່ນ.
ເມື່ອຂ້າພະເຈົ້າໃຫຍ່ພໍ, ຂ້າພະເຈົ້າໄດ້ຮັບປິຕຸພອນຂອງຂ້າພະເຈົ້າ. ຢູ່ໃນພອນນັ້ນ, ປິຕຸໄດ້ບອກຂ້າພະເຈົ້າວ່າ ສິ່ງທີ່ດີທີ່ສຸດທີ່ຂ້າພະເຈົ້າສາມາດເຮັດໄດ້ ເພື່ອຊ່ວຍຄອບຄົວຂອງຂ້າພະເຈົ້າໃຫ້ໄດ້ຢູ່ນຳກັນໃນສະຫວັນແມ່ນ ໃຫ້ເປັນຕົວຢ່າງຂອງພຣະກິດຕິຄຸນຂອງພຣະເຢຊູຄຣິດ. ນັ້ນຄືສິ່ງທີ່ຂ້າພະເຈົ້າສາມາດເຮັດໄດ້!
ພໍ່ຂອງຂ້າພະເຈົ້າໄດ້ມີຊີວິດເຖິງ 86 ປີ. ຫ້າວັນຫລັງຈາກເພິ່ນໄດ້ເສຍຊີວິດ, ຂ້າພະເຈົ້າໄດ້ຮັບຄວາມຮູ້ສຶກອັນສັກສິດແຫ່ງຄວາມຊື່ນຊົມ. ພຣະບິດາເທິງສະຫວັນໄດ້ໃຫ້ຂ້າພະເຈົ້າຮູ້ ຜ່ານທາງພຣະວິນຍານຂອງພຣະອົງວ່າ ພໍ່ຂອງຂ້າພະເຈົ້າຢາກຮັບພອນຂອງພຣະກິດຕິຄຸນຂອງພຣະເຢຊູຄຣິດ! ຂ້າພະເຈົ້າຈະບໍ່ມີວັນລືມ ວັນທີ່ຂ້າພະເຈົ້າໄດ້ຄຸເຂົ່າອ້ອມແທ່ນບູຊາຢູ່ໃນພຣະວິຫານ ພ້ອມກັບເອື້ອຍອ້າຍນ້ອງຂອງຂ້າພະເຈົ້າ ເພື່ອຜະນຶກເຂົ້າກັນກັບພໍ່ແມ່ຂອງຂ້າພະເຈົ້າ. ຂ້າພະເຈົ້າໄດ້ເລີ່ມອະທິຖານເພື່ອພອນນີ້ຕອນຂ້າພະເຈົ້າຢູ່ໃນປະຖົມໄວ, ແລະ ຂ້າພະເຈົ້າໄດ້ຮັບພອນນີ້ຕອນຂ້າພະເຈົ້າເປັນແມ່ຕູ້.
ບາງທີພວກເຈົ້າກໍກຳລັງອະທິຖານເພື່ອພອນສຳລັບຄອບຄົວຂອງພວກເຈົ້າ ແລະ ຄົນອື່ນທີ່ພວກເຈົ້າຮັກ. ຢ່າຍອມແພ້ເດີ! ພຣະບິດາເທິງສະຫວັນຈະ ສະແດງ ໃຫ້ພວກເຈົ້າເຫັນສິ່ງທີ່ພວກເຈົ້າສາມາດເຮັດໄດ້.
ໃຫ້ແບ່ງປັນກັບພຣະບິດາເທິງສະຫວັນ ສິ່ງທີ່ຢູ່ໃນໃຈຂອງພວກເຈົ້າ.14 ຂະນະທີ່ພວກເຈົ້າທູນຂໍຄວາມຊ່ວຍເຫລືອຈາກພຣະອົງດ້ວຍຄວາມຈິງໃຈ, ພວກເຈົ້າຈະໄດ້ຮັບພຣະວິນຍານຂອງພຣະອົງເພື່ອນຳພາພວກເຈົ້າ.15 ການອະທິຖານທຸກໆວັນຈະເຮັດໃຫ້ພວກເຈົ້າເຕັມໄປດ້ວຍຄວາມຮັກທີ່ມີໃຫ້ແກ່ພຣະບິດາເທິງສະຫວັນ ແລະ ພຣະເຢຊູຄຣິດ. ນີ້ຈະຊ່ວຍໃຫ້ພວກເຈົ້າຢາກຕິດຕາມພວກພຣະອົງໄປຕະຫລອດຊີວິດຂອງພວກເຈົ້າ!
ໃຫ້ຈິນຕະນາການວ່າ ຈະເກີດຫຍັງຂຶ້ນ ຖ້າຫາກເດັກນ້ອຍທຸກຄົນໃນ ອາຟຣິກາ, ອາເມຣິກາໃຕ້, ອາຊີ, ເອີຣົບ, ອາເມຣິກາເໜືອ, ແລະ ອົດສະຕາລີ ອະທິຖານທຸກໆວັນ. ຕະຫລອດທັງໂລກຈະໄດ້ຮັບພອນດ້ວຍຄວາມຮັກຂອງພຣະເຈົ້າຫລາຍຂຶ້ນ!
ຂ້າພະເຈົ້າຂໍເຊື້ອເຊີນພວກເຈົ້າໃຫ້ ອະທິຖານເພື່ອຈະຮູ້ ວ່າພຣະບິດາເທິງສະຫວັນຢູ່ທີ່ນັ້ນ, ອະທິຖານເພື່ອຈະເຕີບໂຕ ເພື່ອຈະກາຍເປັນເໝືອນດັ່ງພຣະອົງ, ແລະ ອະທິຖານເພື່ອຈະສະແດງ ຄວາມຮັກຂອງພຣະອົງຕໍ່ຄົນອື່ນ. ຂ້າພະເຈົ້າຮູ້ວ່າພຣະອົງຊົງພຣະຊົນຢູ່ ແລະ ຮັກ ພວກເຈົ້າ. “ຈົ່ງອະທິຖານ, ພຣະອົງຢູ່ທີ່ນັ້ນ.” ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.