ບັນທຶກກ່ຽວກັບສິ່ງທີ່ຂ້າພະເຈົ້າໄດ້ເຫັນ ແລະ ໄດ້ຍິນ
ບໍ່ເຄີຍມີເວລາໃດທີ່ດີໄປກວ່ານີ້ ທີ່ຈະເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ຫລັງຈາກທີ່ຂ້າພະເຈົ້າໄດ້ຈົບຈາກໂຮງຮຽນກົດໝາຍ, ຂ້າພະເຈົ້າ ແລະ ພັນລະຍາຂອງຂ້າພະເຈົ້າ, ມາເຊຍ, ໄດ້ເລືອກທີ່ຈະເຂົ້າຮ່ວມບໍລິສັດກົດໝາຍໜຶ່ງທີ່ຊ່ຽວຊານດ້ານກົດໝາຍພິຈາລະນາຄະດີ. ຂະນະທີ່ຂ້າພະເຈົ້າໄດ້ເລີ່ມການຝຶກອົບຮົມແບບລົງສະໜາມ, ຂ້າພະເຈົ້າໄດ້ໃຊ້ເວລາສ່ວນຫລາຍໃນການກຽມພະຍານຂຶ້ນໃຫ້ຄຳພະຍານຢູ່ການພິຈາລະນາຄະດີ. ຂ້າພະເຈົ້າໄດ້ຮຽນຮູ້ຢ່າງໄວວາວ່າ ຄວາມຈິງແມ່ນໄດ້ຖືກກຳນົດໃນຫ້ອງສານ ຂະນະທີ່ພະຍານ, ພາຍໃຕ້ຄຳສາບານ, ໃຫ້ຄຳພະຍານເຖິງຄວາມຈິງກ່ຽວກັບສິ່ງທີ່ພວກເຂົາໄດ້ເຫັນ ແລະ ໄດ້ຍິນ. ຂະນະທີ່ພະຍານໄດ້ໃຫ້ຄຳພະຍານ, ຖ້ອຍຄຳຂອງພວກເຂົາກໍໄດ້ຖືກບັນທຶກ ແລະ ຮັກສາໄວ້. ຄວາມສຳຄັນຂອງພະຍານທີ່ເຊື່ອຖືໄດ້ ເປັນສິ່ງທີ່ສຳຄັນທີ່ສຸດຂອງການກຽມພ້ອມຂອງຂ້າພະເຈົ້າ.
ຂ້າພະເຈົ້າບໍ່ໄດ້ໃຊ້ເວລາດົນທີ່ຈະຮັບຮູ້ວ່າ ຄຳສັບທີ່ຂ້າພະເຈົ້າໃຊ້ທຸກໆມື້ໃນຖານະທະນາຍຄວາມ ແມ່ນຄຳສັບທີ່ຂ້າພະເຈົ້າໄດ້ໃຊ້ໃນການສົນທະນາຂອງຂ້າພະເຈົ້າກ່ຽວກັບພຣະກິດຕິຄຸນ. “ພະຍານ” ແລະ “ປະຈັກພະຍານ” ແມ່ນຄຳສັບທີ່ເຮົາໃຊ້ກັນ ຂະນະທີ່ເຮົາແບ່ງປັນຄວາມຮູ້ ແລະ ຄວາມຮູ້ສຶກຂອງເຮົາກ່ຽວກັບຄວາມຈິງຂອງພຣະກິດຕິຄຸນຂອງພຣະເຢຊູຄຣິດ.
ເມື່ອຂ້າພະເຈົ້າໄດ້ຖືກສະໜັບສະໜູນເປັນສາວົກເຈັດສິບປະຈຳເຂດ, ຂ້າພະເຈົ້າໄດ້ເປີດພຣະຄຳພີເພື່ອຮຽນຮູ້ກ່ຽວກັບໜ້າທີ່ຂອງຂ້າພະເຈົ້າ ແລະ ອ່ານ ຄຳສອນ ແລະ ພັນທະສັນຍາ 107:25, ຊຶ່ງລະບຸວ່າ, “ສາວົກເຈັດສິບຖືກເອີ້ນໃຫ້ … ເປັນພະຍານພິເສດຕໍ່ຄົນຕ່າງຊາດ ແລະ ໃນທົ່ວໂລກ.” ດັ່ງທີ່ທ່ານສາມາດຈິນຕະນາການອອກໄດ້, ສາຍຕາຂອງຂ້າພະເຈົ້າຖືກດຶງດູດໄປຍັງຄຳສັບທີ່ວ່າ “ພະຍານພິເສດ.” ມັນໄດ້ກາຍເປັນສິ່ງແຈ່ມແຈ້ງສຳລັບຂ້າພະເຈົ້າ ທີ່ຂ້າພະເຈົ້າໄດ້ມີໜ້າທີ່ຮັບຜິດຊອບໃນການເປັນພະຍານຂອງຂ້າພະເຈົ້າ—ເພື່ອເປັນພະຍານເຖິງພຣະນາມຂອງພຣະເຢຊູຄຣິດ—ທຸກທີ່ທຸກບ່ອນທີ່ຂ້າພະເຈົ້າໄດ້ເດີນທາງໄປໃນໂລກ.
ມີຫລາຍໆຕົວຢ່າງໃນພຣະຄຳພີກ່ຽວກັບພະຍານຜູ້ຢູ່ໃນເຫດການ ແລະ ຜູ້ທີ່ໄດ້ເປັນພະຍານເຖິງສິ່ງທີ່ພວກເຂົາໄດ້ເຫັນ ແລະ ໄດ້ຍິນ.
ເມື່ອສາດສະດາມໍມອນໃນສະໄໝບູຮານເລີ່ມການບັນທຶກຂອງເພິ່ນ, ເພິ່ນຂຽນວ່າ, “ແລະ ບັດນີ້ຂ້າພະເຈົ້າ ມໍມອນເຮັດບັນທຶກກ່ຽວກັບເລື່ອງທີ່ຂ້າພະເຈົ້າໄດ້ເຫັນ ແລະ ໄດ້ຍິນ ແລະ ເອີ້ນໜັງສືນີ້ວ່າ ໜັງສືມໍມອນ.”1
ເປໂຕ ແລະ ໂຢຮັນອັກຄະສາວົກຂອງພຣະຜູ້ຊ່ວຍໃຫ້ລອດ ໄດ້ປິ່ນປົວຊາຍຄົນໜຶ່ງໃນພຣະນາມຂອງພຣະເຢຊູຄຣິດໄທນາຊາເຣັດ.2 ເມື່ອໄດ້ຖືກສັ່ງຫ້າມບໍ່ໃຫ້ກ່າວໃນພຣະນາມຂອງພຣະເຢຊູ, ພວກເພິ່ນກໍໄດ້ຕອບວ່າ:
“ພວກທ່ານຈົ່ງພິຈາລະນາເອົາເອງວ່າ ທີ່ຈະຟັງຄວາມຂອງພວກທ່ານ ຫລື ຈະຟັງຄວາມຂອງພຣະເຈົ້າ ອັນໃດເປັນສິ່ງທີ່ຖືກຕ້ອງຕໍ່ສາຍຕາຂອງພຣະເຈົ້າ.
“ດ້ວຍວ່າ, ເປັນໄປບໍ່ໄດ້ທີ່ຈະໃຫ້ພວກຂ້າພະເຈົ້າປິດບັງ ບໍ່ໃຫ້ເວົ້າສິ່ງທີ່ໄດ້ເຫັນ ແລະ ໄດ້ຍິນ.”3
ປະຈັກພະຍານອີກຢ່າງໜຶ່ງທີ່ໜ້າຈັບໃຈ ແມ່ນມາຈາກໄພ່ພົນໃນພຣະຄຳພີມໍມອນ ຜູ້ທີ່ໄດ້ເປັນພະຍານເຖິງການມາຢ້ຽມຢາມຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ. ກະລຸນາຟັງການບັນຍາຍຂອງການເປັນພະຍານຂອງພວກເຂົາ: “ແລະ ຕາມວິທີນີ້ທີ່ພວກເຂົາໄດ້ເປັນພະຍານ: ຕາບໍ່ເຄີຍໄດ້ເຫັນ ແລະ ຫູບໍ່ເຄີຍໄດ້ຍິນເລື່ອງອັນຍິ່ງໃຫຍ່ ແລະ ໜ້າອັດສະຈັນເຊັ່ນນີ້ມາກ່ອນ ດັ່ງທີ່ພວກເຮົາໄດ້ເຫັນ ແລະ ໄດ້ຍິນເລື່ອງທີ່ພຣະເຢຊູໄດ້ກ່າວກັບພຣະບິດາ.”4
ອ້າຍເອື້ອຍນ້ອງທັງຫລາຍ, ມື້ນີ້ ຂ້າພະເຈົ້າຂໍປະກາດພະຍານຂອງຂ້າພະເຈົ້າ ແລະ ບັນທຶກສິ່ງທີ່ຂ້າພະເຈົ້າໄດ້ເຫັນ ແລະ ໄດ້ຍິນ ລະຫວ່າງການປະຕິບັດສາດສະໜາກິດອັນສັກສິດຂອງຂ້າພະເຈົ້າໃນຖານະສາວົກເຈັດສິບຂອງອົງພຣະເຢຊູຄຣິດເຈົ້າ. ໃນການເຮັດເຊັ່ນນັ້ນ, ຂ້າພະເຈົ້າຂໍເປັນພະຍານຕໍ່ທ່ານເຖິງພຣະບິດາເທິງສະຫວັນທີ່ຊົງຮັກ ແລະ ພຣະບຸດທີ່ຊົງເມດຕາກະລຸນາຂອງພຣະອົງ, ພຣະເຢຊູຄຣິດ, ຜູ້ທີ່ໄດ້ທົນທຸກທໍລະມານ, ສິ້ນພຣະຊົນ, ແລະ ຟື້ນຄືນພຣະຊົນອີກຄັ້ງ ເພື່ອມອບຊີວິດນິລັນດອນໃຫ້ແກ່ລູກໆຂອງພຣະເຈົ້າ. ຂ້າພະເຈົ້າເປັນພະຍານເຖິງ “ງານແປກປະຫລາດ ແລະ ອັດສະຈັນ”5 ແລະ ວ່າພຣະຜູ້ເປັນເຈົ້າໄດ້ລົງມືອີກຄັ້ງ ເພື່ອຟື້ນຟູພຣະກິດຕິຄຸນຂອງພຣະອົງເທິງແຜ່ນດິນໂລກ ຜ່ານທາງສາດສະດາທີ່ມີຊີວິດຢູ່ ແລະ ອັກຄະສາວົກຂອງພຣະອົງ.6 ຂ້າພະເຈົ້າເປັນພະຍານວ່າ ອີງຕາມສິ່ງທີ່ຂ້າພະເຈົ້າໄດ້ເຫັນ ແລະ ໄດ້ຍິນ, ບໍ່ເຄີຍມີເວລາໃດທີ່ດີໄປກວ່າເວລານີ້ ທີ່ຈະເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ຂ້າພະເຈົ້າຮູ້ສິ່ງນີ້ດ້ວຍຄວາມຮູ້ຂອງຂ້າພະເຈົ້າເອງ, ໂດຍບໍ່ຂຶ້ນກັບແຫລ່ງອື່ນໃດ, ຍ້ອນສິ່ງທີ່ຂ້າພະເຈົ້າໄດ້ເຫັນ ແລະ ໄດ້ຍິນ.
ໃນຊ່ວງປີສຸດທ້າຍຂອງມັດທະຍົມປາຍ, ເພື່ອທີ່ຈະຈົບຫ້ອງຮຽນສາດສະໜາ ຂ້າພະເຈົ້າຕ້ອງລະບຸຊື່ພຣະວິຫານ 15 ແຫ່ງຂອງສາດສະໜາຈັກ. ຮູບພາບຂອງພຣະວິຫານແຕ່ລະແຫ່ງໄດ້ຢູ່ຕໍ່ໜ້າຫ້ອງຮຽນຂອງພວກເຮົາ, ແລະ ຂ້າພະເຈົ້າຕ້ອງຮູ້ວ່າ ແຕ່ລະແຫ່ງຕັ້ງຢູ່ໃສ. ບັດນີ້, ຫລາຍປີຕໍ່ມາ, ມັນໜ້າຈະເປັນການທ້າທາຍທີ່ໃຫຍ່ຫລວງ—ໂດຍມີພຣະວິຫານ 335 ແຫ່ງທີ່ກຳລັງເປີດດຳເນີນການ ຫລື ຖືກປະກາດ—ເພື່ອບອກຊື່ແຕ່ລະແຫ່ງ. ຂ້າພະເຈົ້າເຄີຍເຫັນບ້ານຫລາຍແຫ່ງເຫລົ່ານີ້ຂອງພຣະຜູ້ເປັນເຈົ້າເປັນການສ່ວນຕົວ ແລະ ເປັນພະຍານວ່າ ພຣະຜູ້ເປັນເຈົ້າກຳລັງສະເໜີມອບພອນ ແລະ ພິທີການຕ່າງໆຂອງພຣະອົງໃຫ້ແກ່ລູກໆຂອງພຣະອົງຫລາຍຂຶ້ນເລື້ອຍໆຢູ່ທົ່ວໂລກ.
ໝູ່ຂອງຂ້າພະເຈົ້າຢູ່ທີ່ FamilySearch ໄດ້ສອນຂ້າພະເຈົ້າວ່າ ຊື່ໃໝ່ຫລາຍກວ່າໜຶ່ງຮ້ອຍລ້ານຊື່ໄດ້ຖືກຕື່ມໃສ່ FamilySearch ທຸກມື້. ຖ້າຫາກທ່ານບໍ່ພົບບັນພະບຸລຸດຂອງທ່ານມື້ວານນີ້, ຂ້າພະເຈົ້າຂໍເຊື້ອເຊີນໃຫ້ທ່ານຊອກຫາໃໝ່ອີກຄັ້ງມື້ອື່ນ. ເມື່ອເວົ້າເຖິງການເຕົ້າໂຮມອິດສະຣາເອນຢູ່ຟາກມ່ານເບື້ອງນັ້ນ, ບໍ່ເຄີຍມີເວລາໃດທີ່ດີໄປກວ່າເວລານີ້ ທີ່ຈະເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ເນື່ອງຈາກວ່າ ພວກເຮົາລ້ຽງລູກໆຂອງພວກເຮົາຢູ່ເມືອງທະວິນຟໍສ໌, ລັດໄອດາໂຮ, ມຸມມອງຂອງພວກເຮົາກ່ຽວກັບສາດສະໜາຈັກທົ່ວໂລກໄດ້ມີຂໍ້ຈຳກັດ. ເມື່ອຂ້າພະເຈົ້າໄດ້ຖືກເອີ້ນໃຫ້ເປັນເຈົ້າໜ້າທີ່ຊັ້ນຜູ້ໃຫຍ່, ມາເຊຍ ແລະ ຂ້າພະເຈົ້າໄດ້ຖືກມອບໝາຍໃຫ້ຮັບໃຊ້ໃນເຂດປາຊີຟິກ, ບ່ອນທີ່ພວກເຮົາບໍ່ເຄີຍໄປ. ພວກເຮົາຮູ້ສຶກຍິນດີທີ່ໄດ້ພົບສະເຕກຈາກທາງເທິງຂອງປະເທດນູແວນເຊລັງໄປຈົນຮອດທາງລຸ່ມ, ພ້ອມດ້ວຍພຣະວິຫານທີ່ໄດ້ຖືກອຸທິດໃນປີ 1958. ມັນແມ່ນໜຶ່ງໃນພຣະວິຫານ 15 ແຫ່ງທີ່ຂ້າພະເຈົ້າຕ້ອງຈື່ໃນຫ້ອງຮຽນສາດສະໜາ. ພວກເຮົາໄດ້ພົບພຣະວິຫານໃນທຸກໆເມືອງໃຫຍ່ຂອງອົດສະຕາລີ, ພ້ອມດ້ວຍສະເຕກທົ່ວທັງທະວີບນັ້ນ. ພວກເຮົາໄດ້ມີວຽກງານມອບໝາຍໃນຊາມົວ, ບ່ອນທີ່ມີ 25 ສະເຕກ, ແລະ ຕົງກາ, ບ່ອນທີ່ເກືອບເຄິ່ງໜຶ່ງຂອງປະຊາກອນແມ່ນສະມາຊິກຂອງສາດສະໜາຈັກ. ພວກເຮົາໄດ້ຮັບວຽກງານມອບໝາຍຢູ່ທີ່ເກາະກີຣີບາຕີ, ບ່ອນທີ່ພວກເຮົາໄດ້ພົບກັບສອງສະເຕກ. ພວກເຮົາໄດ້ຮັບວຽກງານມອບໝາຍໃຫ້ໄປຢ້ຽມຢາມບັນດາສະເຕກໃນເກາະອີເບຍ ໃນກຸ່ມເກາະມາກໂຊນ ແລະ ເມືອງດາຣູ ໃນເກາະປາປົວນິວກີນີ.
ຫລັງຈາກການຮັບໃຊ້ຂອງພວກເຮົາໃນເກາະປາຊີຟິກ, ພວກເຮົາຖືກມອບໝາຍໃຫ້ໄປຮັບໃຊ້ໃນປະເທດຟີລິບປິນ. ຂ້າພະເຈົ້າປະຫລາດໃຈຫລາຍ, ວ່າສາດສະໜາຈັກຂອງພຣະເຢຊູຄຣິດໃນປະເທດຟີລິບປິນກຳລັງເຕີບໂຕຂຶ້ນເໜືອກວ່າສິ່ງໃດໆທີ່ຂ້າພະເຈົ້າເຄີຍຮູ້ຈັກ. ຕອນນີ້ ໄດ້ມີ 125 ສະເຕກ, 23 ເຂດເຜີຍແຜ່, ແລະ ພຣະວິຫານທີ່ກຳລັງເປີດດຳເນີນການ ຫລື ໄດ້ຖືກປະກາດ 13 ແຫ່ງ. ຂ້າພະເຈົ້າໄດ້ເຫັນສາດສະໜາຈັກທີ່ມີສະມາຊິກຫລາຍກວ່າ 850,000 ຄົນ ໃນປະເທດນັ້ນ. ຂ້າພະເຈົ້າໄດ້ພາດການສະຖາປະນາຂອງສາດສະໜາຈັກຂອງພຣະຄຣິດຢູ່ທົ່ວໂລກໄປໄດ້ແນວໃດ?
ຫລັງຈາກສາມປີຢູ່ຟີລິບປິນ, ຂ້າພະເຈົ້າໄດ້ຖືກຂໍໃຫ້ຮັບໃຊ້ໃນພະແນກເຜີຍແຜ່. ວຽກງານມອບໝາຍຂອງຂ້າພະເຈົ້າໄດ້ພາພວກເຮົາໄປຍັງເຂດເຜີຍແຜ່ຢູ່ທົ່ວໂລກ. ທັດສະນະຂອງຂ້າພະເຈົ້າກ່ຽວກັບສາດສະໜາຈັກທົ່ວໂລກຂອງພຣະຜູ້ຊ່ວຍໃຫ້ລອດ ໄດ້ຂະຫຍາຍອອກຢ່າງທະວີຄູນ. ມາເຊຍ ແລະ ຂ້າພະເຈົ້າໄດ້ຖືກມອບໝາຍໃຫ້ໄປຢ້ຽມຢາມເຂດເຜີຍແຜ່ໃນອາຊີ. ພວກເຮົາໄດ້ພົບສູນກາງສະເຕກທີ່ງົດງາມໃນສິງກະໂປ, ພ້ອມດ້ວຍສະມາຊິກທີ່ໜ້າອັດສະຈັນ ແລະ ຊື່ສັດ. ພວກເຮົາໄດ້ໄປຢ້ຽມຢາມບັນດາສະມາຊິກ ແລະ ຜູ້ສອນສາດສະໜາໃນຕຶກໂບດຫລັງໜຶ່ງໃນເມືອງໂຄຕາ ຄິນາບາລູ, ປະເທດມາເລເຊຍ. ພວກເຮົາໄດ້ພົບກັບຜູ້ສອນສາດສະໜາໃນຮົງກົງ ແລະ ໄດ້ເຂົ້າຮ່ວມໃນກອງປະຊຸມສະເຕກທີ່ດີເລີດ ພ້ອມດ້ວຍໄພ່ພົນທີ່ຊື່ສັດ ແລະ ອຸທິດຕົນ.
ປະສົບການນີ້ໄດ້ເກີດຂຶ້ນຊໍ້າແລ້ວຊ້ຳອີກ ເມື່ອພວກເຮົາໄດ້ພົບກັບຜູ້ສອນສາດສະໜາ ແລະ ສະມາຊິກທົ່ວທັງເອີຣົບ, ໃນອາເມຣິກາລາຕິນ, ໃນຄາຣິບບຽນ, ແລະ ໃນອາຟຣິກາ. ສາດສະໜາຈັກຂອງພຣະເຢຊູຄຣິດກຳລັງປະສົບກັບການເຕີບໂຕທີ່ໃຫຍ່ຫລວງໃນອາຟຣິກາ.
ຂ້າພະເຈົ້າເປັນພະຍານທີ່ຢູ່ໃນເຫດການເຖິງການຟື້ນຟູຢ່າງຕໍ່ເນື່ອງຂອງພຣະກິດຕິຄຸນຂອງພຣະເຢຊູຄຣິດ ແລະ ຄຳທຳນາຍຂອງໂຈເຊັບ ສະມິດ ທີ່ກຳລັງສຳເລັດຄົບຖ້ວນທີ່ວ່າ “ຄວາມຈິງຂອງພຣະເຈົ້າຈະກ້າວໄປໜ້າຢ່າງອາດຫານ, ຢ່າງສູງສົ່ງ, ແລະ ເປັນອິດສະລະ, ຈົນກວ່າມັນໄດ້ເຂົ້າໄປເຖິງທຸກທະວີບ, ໄດ້ຢ້ຽມຢາມທຸກພາກພື້ນຂອງແຜ່ນດິນ, ໄດ້ຜ່ານໄປໃນທຸກປະເທດ, ແລະ ທຸກຄົນໄດ້ຍິນ.”7
ຜູ້ສອນສາດສະໜາທີ່ດີເລີດຂອງເຮົາຢູ່ທົ່ວໂລກ ຂະນະນີ້ແມ່ນມີຢູ່ 71,000 ຄົນ. ໂດຍທີ່ເຮັດວຽກນຳກັນກັບສະມາຊິກ, ເຂົາເຈົ້າໄດ້ໃຫ້ບັບຕິສະມາຫລາຍກວ່າ 20,000 ຄົນທຸກໆເດືອນ. ເມື່ອບໍ່ດົນມານີ້ ແມ່ນບັນດາຊາຍໜຸ່ມ ແລະ ຍິງໜຸ່ມອາຍຸ 18, 19, ແລະ 20 ປີທີ່, ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ໄດ້ສ້າງການອັດສະຈັນອັນຍິ່ງໃຫຍ່ແຫ່ງການເຕົ້າໂຮມນີ້. ພວກເຮົາພົບຍິງໜຸ່ມ ແລະ ຊາຍໜຸ່ມເຫລົ່ານີ້ໃນໝູ່ບ້ານນ້ອຍໆຂອງເກາະວານູວອນຕູ ແລະ ໃນເມືອງໃຫຍ່ໆຂອງນິວຢອກ, ປາຣີ, ແລະ ລອນດອນ. ຂ້າພະເຈົ້າໄດ້ເບິ່ງເຂົາເຈົ້າສິດສອນກ່ຽວກັບພຣະຜູ້ຊ່ວຍໃຫ້ລອດ ໃນບ່ອນຊຸມນຸມທີ່ຫ່າງໄກໃນເກາະຟີຈີ ແລະ ບ່ອນເຕົ້າໂຮມທີ່ໃຫຍ່ກວ່າໃນສະຖານທີ່ຕ່າງໆເຊັ່ນ ເທັກຊັສ໌, ຄາລິຟໍເນຍ, ແລະ ຟລໍຣິດາ ໃນສະຫະລັດອາເມຣິກາ.
ທ່ານຈະພົບຜູ້ສອນສາດສະໜາໃນທຸກໆມຸມຂອງໂລກ ທີ່ເວົ້າ 60 ພາສາທີ່ແຕກຕ່າງກັນ ແລະ ເຮັດໃຫ້ໜ້າທີ່ຮັບຜິດຊອບອັນຍິ່ງໃຫຍ່ຂອງພຣະຜູ້ຊ່ວຍໃຫ້ລອດໃນມັດທາຍ ບົດທີ 28 ສຳເລັດຄົບຖ້ວນ ທີ່ວ່າ: “ເຫດສະນັ້ນ ພວກເຈົ້າຈົ່ງອອກໄປ ຈົ່ງເຮັດໃຫ້ຄົນທຸກຊາດເປັນລູກສິດ ໃຫ້ພວກເຂົາຮັບບັບຕິສະມາໃນ [ພຣະນາມຂອງພຣະບິດາ, ແລະ ຂອງພຣະບຸດ, ແລະ ຂອງພຣະວິນຍານບໍລິສຸດ].”8 ຂ້າພະເຈົ້າຂໍຍົກຍ້ອງບັນດາຜູ້ສອນສາດສະໜາໃນອະດີດ ແລະ ໃນປະຈຸບັນຂອງສາດສະໜາຈັກ ແລະ ຂໍຢໍ້າເຕືອນຄົນລຸ້ນໃໝ່ເຖິງຄຳເຊື້ອເຊີນຂອງປະທານຣະໂຊ ເອັມ ແນວສັນ ໃຫ້ມາ ແລະ ເຕົ້າໂຮມອິດສະຣາເອນ.9
ຂ້າພະເຈົ້າເປັນພະຍານວ່າ ຂ້າພະເຈົ້າໄດ້ສັງເກດເຫັນການຟື້ນຟູອັນເລິກເຊິ່ງນີ້ຂອງພຣະກິດຕິຄຸນຂອງພຣະຜູ້ຊ່ວຍໃຫ້ລອດ ດ້ວຍຕາຂອງຂ້າພະເຈົ້າເອງ ແລະ ໄດ້ຍິນດ້ວຍຫູຂອງຂ້າພະເຈົ້າເອງ. ຂ້າພະເຈົ້າເປັນພະຍານເຖິງວຽກງານຂອງພຣະເຈົ້າຢູ່ທົ່ວໂລກ. ບໍ່ເຄີຍມີເວລາໃດທີ່ດີໄປກວ່າເວລານີ້ ທີ່ຈະເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ບາງທີ ການອັດສະຈັນທີ່ດົນໃຈທີ່ສຸດຂອງການຟື້ນຟູທີ່ຂ້າພະເຈົ້າເຄີຍເຫັນມາ ແມ່ນພວກທ່ານ, ສະມາຊິກທີ່ຊື່ສັດຂອງສາດສະໜາຈັກໃນທຸກແຜ່ນດິນ. ພວກທ່ານ, ໄພ່ພົນຍຸກສຸດທ້າຍ, ໄດ້ຖືກບັນຍາຍໄວ້ໂດຍນີໄຟໃນພຣະຄຳພີມໍມອນ, ດັ່ງທີ່ເພິ່ນໄດ້ເຫັນສະໄໝຂອງເຮົາ ແລະ ໄດ້ເປັນພະຍານວ່າ, “ແລະ ເຫດການໄດ້ບັງເກີດຂຶ້ນຄື ຂ້າພະເຈົ້ານີໄຟໄດ້ເຫັນອຳນາດຂອງພຣະເມສານ້ອຍຂອງພຣະເຈົ້າລົງມາເທິງໄພ່ພົນຂອງສາດສະໜາຈັກຂອງພຣະເມສານ້ອຍ ແລະ ຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ ຊຶ່ງກະຈັດກະຈາຍໄປຕາມຜືນແຜ່ນດິນໂລກ; ແລະ ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່.”10
ຂ້າພະເຈົ້າເປັນພະຍານວ່າ ຂ້າພະເຈົ້າໄດ້ເຫັນສິ່ງທີ່ນີໄຟໄດ້ເຫັນດ້ວຍຕາຂອງຂ້າພະເຈົ້າເອງ—ພວກທ່ານ, ໄພ່ພົນແຫ່ງພັນທະສັນຍາໃນທຸກແຜ່ນດິນ, ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າ. ຂະນະທີ່ຂ້າພະເຈົ້າຢູ່ທີ່ແທ່ນປາໄສໃນປະຊາຊາດທີ່ຍິ່ງໃຫຍ່ແຫ່ງໜຶ່ງເຫລົ່ານີ້ຂອງໂລກ, ພຣະຜູ້ເປັນເຈົ້າໄດ້ປະທັບໃນຈິດໃຈຂອງຂ້າພະເຈົ້າ ສິ່ງທີ່ກະສັດເບັນຢາມິນໄດ້ສິດສອນໃນ ໂມໄຊຢາ 2 ໃນພຣະຄຳພີມໍມອນ. ບເຣັ້ນ, ກະສັດເບັນຢາມິນໄດ້ສິດສອນວ່າ: “ແລະ ຍິ່ງໄປກວ່ານັ້ນ, ຂ້າພະເຈົ້າປາດຖະໜາໃຫ້ພວກທ່ານພິຈາລະນາເຖິງສະພາບອັນເປັນພອນ ແລະ ຄວາມສຸກຂອງຄົນທີ່ຮັກສາພຣະບັນຍັດຂອງພຣະເຈົ້າ. ເພາະຈົ່ງເບິ່ງ, ເຂົາໄດ້ຮັບພອນທຸກຢ່າງ ທັງຝ່າຍໂລກ ແລະ ຝ່າຍວິນຍານ.”11
ຂ້າພະເຈົ້າເປັນພະຍານຕໍ່ທ່ານວ່າ ຂ້າພະເຈົ້າໄດ້ເຫັນສິ່ງນີ້ດ້ວຍຕາຂອງຂ້າພະເຈົ້າເອງ ແລະ ໄດ້ຍິນມັນດ້ວຍຫູຂອງຂ້າພະເຈົ້າເອງ ເມື່ອຂ້າພະເຈົ້າໄດ້ພົບກັບທ່ານ, ໄພ່ພົນທີ່ຊື່ສັດຂອງພຣະເຈົ້າ ຢູ່ທົ່ວແຜ່ນດິນໂລກ ຜູ້ທີ່ຮັກສາພຣະບັນຍັດ. ທ່ານເປັນລູກແຫ່ງພັນທະສັນຍາຂອງພຣະບິດາເທິງສະຫວັນ. ທ່ານເປັນສານຸສິດຂອງພຣະເຢຊູຄຣິດ. ທ່ານຍັງຮູ້ເຖິງສິ່ງທີ່ຂ້າພະເຈົ້າຮູ້ ເພາະວ່າທ່ານໄດ້ຮັບພະຍານສ່ວນຕົວເຖິງຄວາມຈິງຂອງພຣະກິດຕິຄຸນທີ່ໄດ້ຖືກຟື້ນຟູຂອງພຣະເຢຊູຄຣິດ. ພຣະຜູ້ຊ່ວຍໃຫ້ລອດໄດ້ສິດສອນວ່າ, “ແຕ່ຕາຂອງພວກເຈົ້າກໍເປັນສຸກ ເພາະພວກເຈົ້າໄດ້ເຫັນ ແລະ ຫູຂອງພວກເຈົ້າກໍເປັນສຸກເພາະໄດ້ຍິນ.”12
ພາຍໃຕ້ການຊີ້ນຳຂອງພຣະຜູ້ເປັນເຈົ້າ ແລະ ການນຳພາຂອງສາດສະດາ ແລະ ອັກຄະສາວົກຂອງພຣະອົງ, ເຮົາຈະສືບຕໍ່ກຽມຜູ້ສອນສາດສະໜາ, ເຮັດ ແລະ ຮັກສາພັນທະສັນຍາອັນສັກສິດ, ສະຖາປະນາສາດສະໜາຈັກຂອງພຣະຄຣິດຢູ່ທົ່ວໂລກ, ແລະ ຮັບພອນທີ່ມີມາ ເມື່ອເຮົາຮັກສາພຣະບັນຍັດຂອງພຣະເຈົ້າ. ເຮົາສາມັກຄີກັນ. ເຮົາເປັນລູກຂອງພຣະເຈົ້າ. ເຮົາຮູ້ຈັກພຣະອົງ ແລະ ເຮົາຮັກພຣະອົງ.
ຂ້າພະເຈົ້າຂໍຮ່ວມກັບທຸກທ່ານ, ໝູ່ເພື່ອນຂອງຂ້າພະເຈົ້າ, ຂະນະທີ່ເຮົາເປັນພະຍານນຳກັນ ວ່າສິ່ງເຫລົ່ານີ້ເປັນຄວາມຈິງ. ເຮົາເຮັດບັນທຶກກ່ຽວກັບສິ່ງທີ່ເຮົາໄດ້ເຫັນ ແລະ ໄດ້ຍິນ. ທ່ານ ແລະ ຂ້າພະເຈົ້າເປັນພະຍານທີ່ໃຫ້ຄຳພະຍານ. ແມ່ນດ້ວຍພະລັງຂອງພະຍານທີ່ສາມັກຄີນີ້ ທີ່ເຮົາຈະມຸ້ງໜ້າຕໍ່ໄປດ້ວຍສັດທາໃນອົງພຣະເຢຊູຄຣິດເຈົ້າ ແລະ ພຣະກິດຕິຄຸນຂອງພຣະອົງ. ຂ້າພະເຈົ້າຂໍປະກາດຄຳພະຍານຂອງຂ້າພະເຈົ້າວ່າ ພຣະເຢຊູຄຣິດຊົງພຣະຊົນຢູ່. ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.