E hoho‘a no te taato‘araa

Aita i maoro a‘e nei, i roto i te hoê faanahoraa na te ratio, ua uiui te hoê taata no ni‘a i te Ekalesia e i to’na tupuraa matamua i New York, ta’na pû i Utaha, e te aamu no te hoê nunaa tahito o te fenua Amerika i roto i te Buka a Moromona. Ia haamana‘o vau i te mau hoa i Asia, i Aferika, i Europa, e i te tahi atu mau vahi o te ao nei, e mea papû e aita teie taata e paraparau nei i maramarama e, no te mau nunaa ato‘a te evanelia tei faaho‘i-faahou-hia mai e aore râ, to’na mau oro‘a, te mau fafauraa, e te mau haamaitairaa, no te mau taata ato‘a ïa te reira. Aita te auraa no te Orama matamua a te peropheta Iosepha Semita e te Buka a Moromona e faitohia na roto i te vahi, e mea na roto râ i te parau poro‘i no ni‘a i te auraa o te taata nei e te Atua, te here o te Metua no Ta’na mau tamarii, e te paari mo‘a e vai i roto i te taata hoê.

Te piiraa tohu o te mau tau ato‘a oia ïa « [ia] haere mai i te Mesia ia maitai roa outou Ia’na » (Moroni 10:32 ; a hi‘o ato‘a Mataio 5:48 ; Ioane 10:10 ; 14:6), e te ora e mea na roto mai ïa i te Tamaiti Fanau Tahi a te Metua (a hi‘o Ioane 1:14, 18 ; PH&PF 29:42). E piiraa teie no te taato‘araa e e tano no te mau tamarii ato‘a a te Atua noa’tu e no Afirika, no Asia, e no Europa e aore râ, te tahi atu hau. Mai ta te Aposetolo Paulo i parau i to Ateno, e mau « tamarii tatou na te Atua » (Te Ohipa 17:29).

Ua faaineinehia te faanahonahoraa a te Metua, tei faatumuhia i ni‘a i te Taraehara a te Mesia, hou roa te ao nei i hamanihia’i (a hi‘o Aberahama 3:22-28 ; Alama 13:3). Ua horo‘ahia te reira ia Adamu raua o Eva e ua faauehia raua ia haapii i te reira i ta raua mau tamarii (a hi‘o Mose 5:6-12). I muri mai, ua pato‘i te huaai a Adamu i te evanelia area râ, ua faaapîhia te reira na roto mai ia Noa e i muri mai, na roto faahou ia Aberahama (a hi‘o Exodo 6:2-4 ; Galatia 3:6-9). Ua pûpûhia te evanelia i te mau tamarii a Iseraela i te tau o Mose. Ua tuuhia mai te mau titauraa eta‘eta no te faaho‘i mai ia ratou i te Mesia i muri mai i te vairaa i roto i te taivaraa tau tenetere te maoro (a hi‘o Exodo 19:5-6 ; PH&PF 84:19-24). Inaha, ua faaho‘ihia mai te îraa o te evanelia i to Iseraela e te Faaora iho i te afaraa o te mau tau.

Te hoê o te mau irava haapapûraa no ni‘a i teie tupuraa no te taivaraa e no te faaho‘i-faahou-raa, e itehia ïa i roto i te parabole a Iesu no te mau ti‘a‘i ô vine (a hi‘o Mareko 12:1-10). I roto i teie parabole, ua faahaamana‘o Iesu i te mau taata i te rahiraa o te mau peropheta o tei tonohia mai i tera tau e tera tau no te faati‘a i te hoê nunaa parau-ti‘a. E ua faaite Oia e mea nahea te mau ve‘a i te tiahi-raa-hia. Ua taparahihia vetahi e faaho‘ihia’tura. Ua haapohehia vetahi. I muri iho, a tohu ai Oia no ni‘a i Ta’na iho misioni, ua faaite Iesu i Ta’na mau pipi e, ua opua te Metua i te to’no mai i Ta’na « tamaiti hoê roa, ta’na i here maitai » (Iritiraa a Iosepha Semita, Mareko 12 :7), ma te parau e, « E riro ratou i te faaturatura mai i Ta‘u tamaiti » (Mataio 21:37).

Area râ, ua ite Iesu i To’na iho ati i parau ai Oia e:

« Ua parau râ taua mau ti‘a‘i ra… O te taata ‘ai‘a teie ; e taparahi tatou ia’na, e e riro mai ïa te fenua no tatou iho.

« Ua rave atura ratou ia’na, taparahi pohe roa ihora, faarue atura i rapae i taua ô vine ra » (Mareko 12:7-8).

I muri mai i te poheraa o te Faaora e i to Ta’na mau Aposetolo, ua tauihia te mau parau haapiiraa e te mau oro‘a e ua tae faahou mai te taivaraa. I teie taime, ua vai mai te pouri hanere matahiti hou te mau aveave o te maramarama i tae mai ai i te fenua nei. Ua ite te Aposetolo Petero i teie Taivaraa i tohu ai oia i muri mai i to te Faaora Ma‘ueraa i te ra‘i e, e ore roa te Fatu e ho‘i mai no te Piti o To’na tae-piti-raa mai, maoti râ, i te tau e « tia‘i te mau mea ato‘a nei » (a hi‘o Te Ohipa 3:19-21). Ua tohu ato‘a te Aposetolo Paulo i te hoê tau e ore ai te mau melo e nehenehe ia « farii i te parau mau » (2 Timoteo 4:3-4) e e tupu te hoê « taivaraa » (2 Tesalonia 2: 2-3) na mua‘e i te Tae-piti-raa mai o te Mesia. Ua parau-ato‘a Oia no te « faaho‘iraa mai o te mau mea’toa » e, e riro te Faaora «ia tae i te tuuraa parau i te hoperaa mau o te mau tau ra… e amui ai oia i te mau mea ato‘a i te Mesia ra » (Ephesia 1:10).

Na te Fatu i arata‘i i te Faaho‘i- faahou-raa mai o te evanelia na roto i te peropheta Iosepha Semita. Ua haamata « te faaho‘i-faahou-raa mai o te mau mea’toa » i roto i te Uru Raau Mo‘a i to te Metua e te Tamaiti fâraa mai ia Iosepha Semita. I roto i teie orama, ua haapii mai Iosepha e, e huru taata to te Atua – e na taata taa ê te Metua e te Tamaiti, e na taata faahanahanahia e e tino ‘i‘o e te ivi to Raua.

I te omuaraa o te mau tau tuuraa evanelia, e horo‘ahia te hoê buka i te peropheta tei pii apîhia. Ua farii Mose i na păpă ture (a hi‘o Exodo 31:18). Ua horo‘ahia te hoê buka ia Lehi ia tai‘o no ni‘a i te haamouraa o Ierusalema (a hi‘o 1 Nephi 1:11-14). Ua horo‘a- hia ia Ezekiera te hoê « otaro buka » (Ezekiera 2:9-10) e tei roto i te reira te parau poro‘i a te Fatu no te Utuafare o Iuda i to’na ra mau mahana. Ua faaitehia ia Ioane te Heheu Parau i ni‘a i te Motu no Patamo te hoê buka e na tapa‘o taati e hitu ra (a hi‘o Apokalupo 5 ; PH&PF 77:6). No reira, e ohipa maere anei ia horo‘a mai te Fatu i te hoê buka tei roto te îraa o te evanelia, ei tuhaa no te « faaho‘i-faahou-raa mai o te mau mea’toa » ? E mana to te Buka a Moromona no te haafatata i te taato‘araa o te mau tane e o te mau vahine i te Mesia. E te mau faahororaa no te Taraehara a te Faaora o te mau mea ateate i ni‘a i te mau api no te ti‘a-faahou-raa, to’na tumu e to’na mana.

Ua muhumuhu mai te Varua Mo‘a i to‘u varua e ua ite mata Iosepha i te Metua e i te Tamaiti i roto i te Uru Raau Mo‘a e e parau mau te Buka a Moromona. Ua popou vau no te tahi atu ite no ni‘a i te Taraehara a te Faaora tei faaitehia i roto i te Buka a Moromona. Hoê o te mau i‘oa i horo‘ahia i te Faaora o te Tamaiti Fanau Tahi a te Metua. Ei hi‘oraa, i roto i ta’na Evanelia ua parau te Aposetolo Ioane e, ua ite oia i te tura e te hanahana o te Fatu i ni‘a i te Mou‘a o te Faahuru-ê-raa e e au To’na hanahana mai to te « Tamaiti Fanau Tahi a te Metua » (Ioane 1:14 ; a hi‘o ato‘a irava 18). Te faaohipa ato‘a nei te Buka a Moromona i te reira tiaraa e rave rahi taime.

Taa ê atu i te mau taata tahuti tei farii i te pohe no roto mai i na metua toopiti, ua fanauhia Iesu i te hoê metua vahine tahuti e i te hoê Metua tahuti-ore. Te auraa no te tumu o te pohe o Ta’na i farii no ô mai ia Maria, e pohe Oia area te faufaa o Ta’na i farii mai To’na Metua, na te reira i horo‘a Ia’na te ora mure ore to’na auraa ra, ua riro te pohe ei horo‘araa aau tae. I parau ai Iesu i te mau Ati Iuda e, « Mai te Metua ra, e ora to’na tei roto ia’na iho, ua horo‘a mai ho‘i oia i to te Tamaiti, ei ora ato‘a to’na i roto ia’na iho » (Ioane 5:26).

I te hoê taime ua parau Oia e:

« I here mai ai ta‘u Metua ia‘u, o vau e horo‘a i to‘u ora e a rave faahou atu ai.

« Aore roa e taata e riro ai ia haru, na‘u iho râ e horo‘a noa’tu. E ti‘a ia‘u ia horo‘a, e e ti‘a ho‘i ia‘u ia rave faahou. O ta ta‘u Metua ïa i faaue mai ia‘u » (Ioane 10:17-18).

Na te huru faito-ore tei fariihia mai o mai i To’na Metua i horo‘a ia Iesu te mana no te faaotiraa i te Taraehara, ia mauiui no te mau hara a te taato‘araa. Ua haapii te peropheta Alama i roto i te Buka a Moromona e, aita noa Iesu i rave i ni‘a Ia’na iho ta tatou mau hara, to tatou ato‘a râ mau mauiui, mau ati e mau faahemaraa. Ua parau ato‘a Alama e, ua rave Iesu i to tatou mau ma‘i, mau pohe e te mau paruparu i ni‘a iho Ia’na (A hi‘o Alama 7:11-13). Te parau ra Alama e, i na reira Oia ia « faaî i to’na ra aau i te aroha ia au i te tino, ia ite oia… i te rave‘a e faaora‘i i to’na mau taata » (Alama 7:12).

Ua faaite ato‘a te peropheta Abinadi e, « ia faarirohia ra oia ei Taraehara, e ite oia i to’na huaai » (Mosia 15:10). Ua faaau Abinadi i te huaai o te Faaora i te mau peropheta e i te feia o te pee ia ratou. Rave rahi matahiti to‘u feruriraa i te ohipa o ta te Faaora i faaruru i roto i te aua e i ni‘a i te satauro ei mau vahi i reira te taato‘araa o te hara i hurihia’i i ni‘a Ia’na. Tera râ, na roto i te mau parau a Alama, a Abinadi, a Isaia e a te tahi atu mau peropheta, ua taui to‘u iteraa. Aita Iesu i amo noa i te taato‘araa o te hara a te taata – no te mau taata e rave rahi – ua amo ato‘a râ i to tatou « mau paruparu » (Hebera 4:15), ua « [hopoi ê] i to tatou oto… [e] i ta‘irihia oia i to tatou nei ino » (Isaia 53:4-5).

Ua riro te Taraehara ei iteraa no’na iho, ei ohipa na’na iho e e mea na roto i te reira Iesu i ite ai e e nahea ia tauturu ia tatou tata‘itahi.

Ua haapii mai Te Buka Poe Tao‘a Rahi e, ua faaitehia ia Mose te mau taata ato‘a o te fenua nei e au «mai te one tahatai ra » (Mose 1:28). Mai te mea ua ite Mose i te mau varua ato‘a, e mana ihoa ïa to te Rahu Nui i ni‘a i te ao nei ia ite ia tatou tata‘itahi. Ua ite Oia i to outou e i to‘u nei mau paruparu. Ua ite Oia i to outou mauiui e i to outou mau oto. Ua ite ato‘a Oia i to‘u nei. Te faaite papû nei au e, ua ite Oia ia tatou. Ua ite Oia i te rave‘a e nehenehe ai tatou ia aro i te mau faahemaraa. Ua ite Oia i to tatou mau paruparu. Tera râ, hau atu i te reira, hau atu i To’na noa matauraa ia tatou, ua ite Oia nahea ia tauturu ia tatou mai te mea e haere tatou Ia’na na roto i te faaroo. No reira te hoê vahine Paniola i feruri ai e, ua hau atu oia i te hoê tuhaa na‘ina‘i faufaa-ore i roto i te ao nei na roto i to te Varua Mo‘a faaiteraa ia’na i te Faaho‘i-faahou-raa mai. Ua ite oia i te here o te Atua, e e tamahine oia Na’na, e ua ite oia e, ua ite Oia ia’na. Ua faaite ato‘a te reira e, no te aha to‘u hoa Tapone i haro‘aro‘a’i i te opuaraa no te ora o ta te mau misionare i haapii ia’na e a faaite ai te Varua Mo‘a i te tumu oia i haere mai ai i te fenua nei, e i te paari e vaira i roto ia’na.

Te faaite papû nei au e, ua riro te evanelia a Iesu Mesia tei faaho‘i-faahou-hia mai ei hoho‘a no te taato‘araa. E ere te vahi i tupu ai te mau ohipa te mea faufaa ; te mau parau apî râ – te parau haapiiraa mure ore e te mana taraehara o te Fatu o Iesu Mesia. Te faaite papû nei au e, te ora nei Oia, e o Oia ho‘i te Mesia. Te faaite papû nei au e, te evanelia i faaho‘ihia mai na roto i te peropheta Iosepha Semita, na Petero te reira « faaho‘iraa i te mau mea ato‘a ». Te faaite papû nei au e, te peropheta Gordon B. Hinckley o te peropheta ïa a te Fatu i teie mahana. Na roto i te i‘oa o Iesu Mesia ra, amene.