Te Buka a Moromona, [te] mauhaa no te haaputuputu ia Iseraela tei haapurarahia

A toru ahuru ma ono matahiti i ma‘iri a‘e nei, ua rave au i te hoê misioni i Mexico apato‘a hitia o te râ. I taua taime ra, aita e tĭtĭ, e piti oire rarahi i roto i te reira misioni, e e piti ana‘e amaa. Aita e rave‘a rahi roa no te titau i te ite haapiiraa, e e veve rahi to te reira fenua. No Marite mai te taato‘araa o te mau misionare, maori râ, te tahi rii noa no te fenua iho.

Te haamana‘o nei au i te mau taata no te amaa no Nealtican. Ua hamanihia te mau fare ato‘a i te parpain araea ano‘ihia i te aihere, tara‘ihia i te mahana, eiaha râ te fare parpaing Katorika e te fare pureraa a te Ekalesia. Te haamana‘o nei au i to‘u ti‘araa i roto i te fare na‘ina‘i o te peresideni amaa. E tahua repo noa, te haamaramarama aita e hi‘o, e te hoê vauvau tahua te tarere noa ra i ni‘a a‘e i te uputa. Aita e tauhaa to roto i te fare. Aita e ti‘aa to te utuafare.

Noa’tu râ i te reira, ua vai oaoa noa ratou. Ua parau mai oia ia‘u e, ua hoo ratou i ta ratou mau tao‘a ato‘a no te aufau i ta ratou titeti pereoo no te haere i te hiero no Mesa, i reira ratou i te taati-raa-hia no teie tau e no te tau a muri atu. E rave rahi mau melo o te amaa tei rave ato‘a i te reira faanahoraa.

Hoê ava‘e i ma‘iri a‘e nei, ua ho‘i faahou atu vau i Mexico no te tavini i roto i te peresideniraa no te area no Mexico apato‘erau. Mea taa ê roa te Mexico o teie mahana i te Mexico a toru ahuru maono matahiti i teie nei. Ua riro o Nealtican ei pû no te hoê tĭtĭ puai e te tupu maitai no Ziona. E 200 tĭtĭ i Mexico, e hoê milioni rahiraa melo no te Ekalesia. Mea rahi te feia faatere no te tĭtĭ e no te paroita e feia maramarama e te moni ato‘a. E rave rahi tauasini mau tamaroa e te mau tamahine no Mexico te rave nei i te misioni rave tamau.

Oia mau, te orama ta Lehi i ite e ta Nephi i tatara, te tupu nei te reira. « E ia tae i taua mahana ra, e ite ai te toea o to tatou huaai e, no te utuafare o Iseraela ratou, e e feia faufaa ho‘i ratou o te Fatu ra ; ei reira ratou e ITE ai e e tae atu ai ho‘i i te ite i to ratou mau metua, e te ite ho‘i i te evanelia a to ratou Faaora, ta’na i faaite mai i to ratou mau metua ; e ite ai ratou i to ratou Faaora ».¹

Mea papû roa e, teie mau taata no Mexico e no te tahi atu mau fenua no Amerika i ropu, no roto ato‘a ratou i te mau huaai o te mau peropheta. Ua riro te Buka a Moromona ei faufaa ai‘a na ratou. Ua faaite o Iesu Mesia ia’na i to ratou mau metua.

I muri a‘e i To’na Ti‘a-faahou-raa, ua pou mai Iesu Mesia mai te ra‘i mai, ma te ahuhia i te ahu uouo, e ua ti‘a i rotopu i to ratou mau tupuna i Amerika nei. Ua faatoro oia i To’na rima e na ô atura : « Inaha, o vau nei, o Iesu Mesia, o ta te mau peropheta i faaite mai e tae mai i te ao nei.

« …O vau te maramarama e te ora o teie nei ao ».²

« No reira, e faateitei i to outou maramarama, ia anaana’tu i to te ao nei. Inaha, o vau ïa te maramarama ta outou e faateitei i ni‘a ».³

I to te Ekalesia i to tatou nei anotau, ua faahiti faahou mai te Faaora i te reira a‘oraa a parau ai oia e, « Oia mau te parau atu nei au ia outou paato‘a : A ti‘a mai na i ni‘a e ia anaana mai na, ia riro to outou maramarama ei hi‘oraa no te mau nunaa ».⁴ O Iesu Mesia te maramarama mai tei heheuhia mai i roto i te Buka a Moromona : Te tahi faahou faufaa no Iesu Mesia.

Ua faaue mai te peresideni Hinckley ia tatou ia tai‘o e ia tai‘o faahou i te Buka a Moromona na mua i te hopea o teie matahiti, ei faahanahanaraa i te 200raa o te matahiti fanauraa o te peropheta Iosepha Semita. Na roto i te reira, te faahanahana ra ïa tatou ia Iosepha Semita, tei huri i te Buka a Moromona « na roto i te horo‘a e te mana o te Atua. »⁵

I to te peropheta tahito o Moroni fâraa mai ia Iosepha, ua parau maira oia ia’na, « e ohipa ta te Atua e horo‘a [na’na] ia rave, e e haamaitaihia e e faainohia [to’na] i‘oa i rotopu i te mau nunaa ato‘a, te mau opû ato‘a, e te mau reo ato‘a ho‘i, oia ho‘i, e parauhia i rotopu i te mau taata ato‘a e, e taata maitai (oia), e aore ra, e taata ino ».⁶

Ua tupu te reira parau tohu. Te itehia nei e te faaturahia nei te i‘oa o Iosepha Semita na te ao ato‘a nei, tae roa i roto te oire iti atea roa no Nealtican, Mexico.

Aita i maoro a‘e nei, te hoê melo no Monterrey, Mexico tei parau mai ia‘u e mea nahea to te Buka a Moromona tauiraa i to’na oraraa. I to’na apîraa, ua faahiahia o Jesú Santos i to’na iteraa i te mau misionare no te Ekalesia i te haereraa na ni‘a i te mau purumu reporepo. Ua hinaaro oia e paraparau ia ratou no ni‘a i te ekalesia, tera râ, ua parau te hoê hoa to’na e, e tia‘i na ratou hoa e farerei mai ia’na.

E rave tahi taime e haere oia i te fare pureraa e e hi‘o noa oia na roto i te area auri o te aua, i te mau misionare e i te feia apî ia ha‘uti. E au ra e, e mea tino maitai ratou, e ua hinaaro oia ia amui atu ia ratou. E tapiri roa oia i to’na taa i ni‘a i te auri aua, ma te ti‘aturi e, e ite mai ratou ia’na, e e titau mai ia’na ia amui atu ia ratou. Aita roa’tu te reira i tupu.

I te faati‘araa mai o Jesús i to’na aamu ia‘u, na ô maira oia e, « E mea oto mau. E taure‘are‘a vau, e e nehenehe ta‘u e rave i te hoê misioni rave tamau ».

Ua haere atu oia e faaea i Monterrey, Mexico. E iva matahiti i muri iho, te farerei ra oia i te hoê hoa i te oire, patoto mai nei te mau misionare i te uputa. Ua hinaaro to’na hoa e faaho‘i ia ratou. Ua ani atura o Jesús ia’na ia vaiiho i te mau misionare ia paraparau ia raua e piti noa minuti te maoro. Ua farii to’na hoa.

Ua paraparau maira na misionare no ni‘a i te Buka a Moromona, te tere o te utuafare o Lehi mai Ierusalema haere atu i Amerika, e te fâraa mai o Iesu Mesia i te huaai o Lehi i Amerika.

Ua hinaaro a‘era o Jesús i te tahi atu mau ite. Ua huru tapitapi rii to’na mana‘o no ni‘a i te hoho‘a o te Mesia i te fâraa mai i Amerika. Ua horo‘a oia i to’na vahi nohoraa i te mau misionare ra. Ua tia‘i oia e rave rahi ava‘e, aita râ ratou i farerei faahou mai ia’na.

Ua ma‘iri faahou e toru matahiti. Ua titau mai te tahi mau hoa i to’na utuafare ia haere atu i roto i te hoê pô utuafare. Ua horo‘a maira ratou i te hoê Buka a Moromona na’na.

A haamata ai oia i te tai‘o i te reira, ua ite a‘era oia e, e parau mau te Buka a Moromona. I te pae hopea ra, 12 matahiti i muri a‘e i to’na faaroo-matamua-raa i te parau no te Ekalesia, ua bapetizohia a‘era oia e ta’na vahine. Ua mau‘a ïa e rave rahi matahiti. Ahiri te mau misionare i paraparau noa’tu ia’na, ahiri te feia apî i ite noa mai a‘e i te hoê tamaitiiti i te hi‘o-noa-raa na ni‘a i te aua, ahiri te mau misionare i Monterrey i farerei ia’na i to’na fare, e mea taa ê roa ïa to’na oraraa i roto i tera roaraa 12 matahiti. Aua‘e râ ua titau manihini mai te mau hoa i piha‘i iho noa ia’na ia haere atu i te hoê pô utuafare, e ua horo‘a mai i te hoê buka na’na, e buka mana rahi no te faafariu, oia te Buka a Moromona.

I teie mahana, e peresideni hiero o Jesús Santos no te hiero no Monterrey Mexico.

Ua horo‘a mai Iesu Mesia i te Buka a Moromona ia tatou nei, ei mauhaa no te haaputuputu ia Iseraela tei haapurarahia. I To’na fâraa’tu i Amerika, ua parau atu Oia i te mau taata e, « E ia tupu mau te reira, ia tupu te ite o to outou huaai i taua mau mea ra, e tapa‘o ïa te reira no ratou e ite ai ratou e, ua haamatahia te ohipa a te Metua ia faati‘ahia te faufaa ta’na i fafau i te feia no te utuafare o Iseraela ra. »⁷

O te Buka a Moromona iho to’na ite i mua i te taata no Amerika Latino, e no te mau nunaa ato‘a. Ua riro to’na taeraa mai i teie anotau hopea nei ei faaiteraa e, ua haamata faahou te Atua i te haaputuputu ia Iseraela tei haapurarahia.

Mai te huru ra e, te ite ra vau ia Jesús Santos te hoê tamaiti 18 matahiti, e to’na ahu reporepo, i te hi‘oraa na ni‘a i te aua o te fare pureraa. E nehenehe anei ta outou ia ite ia’na ? E nehenehe anei ta outou e titau manihini ia’na e i te tahi atu mau taata mai ia’na te huru, ia amui mai i rotopu ia tatou ? O vai ta outou i ite e, e pahono mai ratou i ta outou titauraa ia tai‘o i te Buka a Moromona ? E titau anei outou ia ratou ? Eiaha e tia‘i.

Te faaite papû nei au e, e peropheta o Iosepha Semita no te Faaho‘iraa mai. Te Buka a Moromona, te Tahi atu ite no Iesu Mesia, o te rave‘a ïa e haaputuputuhia ai te mau taata no te mau fenua ato‘a i roto i te Ekalesia a Iesu Mesia i te Feia Mo‘a i te mau Mahana Hopea nei. Ua niuhia teie Ekalesia i ni‘a i te mau aposetolo e te mau peropheta, mai tei te matamua ra. Te peresideni Gordon B. Hinckley o te peropheta faatahinuhia ïa a te Fatu i ni‘a i te fenua nei i teie mahana. O Iesu Mesia, to tatou ïa Faaora e to tatou Taraehara. Na‘na teie Ekalesia e No’na teie Basileia. Oia to tatou Arii Emanuela. Te faaite papû nei au i te reira na roto i te i‘oa o Iesu Mesia ra, amene.