E horo‘a mai te mau fafauraa o te evanelia i te mau haamaitairaa i fafauhia mai

I teie mahana te hinaaro nei au e faaite atu i to‘u faatura e to‘u here rahi i to tatou Metua i te Ao ra, i Ta’na Tamaiti, te Fatu ra o Iesu Mesia e i te Varua Maitai. Te faaite ato‘a nei au i to‘u iteraa papû no ni‘a i te piiraa mo‘a o te peresideni Gordon B. Hinckley ei peropheta na te Fatu, ei hi‘o e ei heheu parau. Te paturu nei au ia’na ma to‘u aau ato‘a e to‘u puai ato‘a.

Te oaoa nei au no te fafauraa o te faaipoiporaa i roto i te hiero i te hoê hoa mure ore nehenehe o ta‘u e here nei e ta‘u e poihere nei. Te faaite tamau nei oia i te hi‘oraa i roto i te ohipa aupururaa i te feia hepohepo. Ua haamaitaihia to maua faaipoiporaa na roto i te fariiraa i te mau tamarii faaroo e te mau mootua pautuutu maitai, tei haapii mai ia maua i te mau haapiiraa e rave rahi e te na reira noa nei â ratou.

E oaoa rahi taa ê to‘u i te mea e, ua fanauhia to‘u taea‘e, to‘u mau tuahine e o vau nei i te mau metua parau ti‘a, tei tape‘a maite i ta raua mau fafauraa no te hiero, e ua faatusia i te mau mea ato‘a ma te aau tae mau, ia ti‘a ia matou ia vai maite i roto i te faanahoraa a to tatou Metua i te Ao ra. I to‘u metua vahine melahi, oia to matou patereareha vahine ora, te parau e au ia‘u ia parau maori râ, mauruuru ia oe i te tape‘a-maite-raa i te taamuraa o te here e o te mau oro‘a o te evanelia i roto i to matou oraraa.

Te faahiti nei au i teie nei mau autaatiraa mo‘a i te mea e, e oaoa rahi to‘u ia ite e, te vai ra te hoê fafauraa ia ratou tata‘itahi tei taatihia i roto i te hiero mo‘a. E oaoa hohonu to‘u ia ite e, noa’tu eaha te mau fifi e farereihia e tatou, te vai ra te ti‘aturiraa e, ia haapa‘o tatou i te mau fafauraa o te evanelia, e upooti‘a tatou i mua i te mau tamataraa o te oraraa nei. Te haapii nei te mau papa‘iraa mo‘a ia tatou e, e maitai te mau mea ato‘a mai te mea e vai haapa‘o maite tatou i ta tatou mau fafauraa. Ua haapii mai te Arii Beniamina e :

« No te faufaa ta outou i fafau maira, e parauhia’i outou i te tamarii a te Mesia…

« No reira, i hinaaro ai au ia rave outou i te i‘oa o te Mesia i ni‘a ia outou, outou ato‘a ho‘i o tei fafau i te faufaa i te Atua, oia ho‘i ia haapa‘o maitai outou e tae noa’tu i te hopea o to outou ora nei.

« E o te na reira ra, e itea ïa oia i te rima atau o te Atua » (Mosia 5:7-9).

Ua riro te haapa‘oraa i te fafauraa ei parau faufaa no to tatou faaoraraa mure ore. Te mau fafauraa, o te mau parau faaau ïa ta tatou e rave e to tatou Metua i te Ao ra, i reira ho‘i tatou e tuu ai i to tatou aau, to tatou feruriraa e to tatou huru no te haapa‘o i te mau faaueraa tei faataahia e te Fatu. Mai te mea e haapa‘o tatou i taua faaauraa ra, e fafau mai Oia, e haamaitai Oia ia tatou, ma te horo‘a mai i te mau mea ato‘a Na’na ra.

I roto i te Faufaa Tahito ua haapiihia tatou i te faanahoraa no te fafauraa a te Fatu i roto i te ohipa tei tupu i ni‘a ia Noa i roto i te hoê ao ino, e tae noa’tu i te faanahoraa a te Fatu no te tamâ i te fenua. No te haapa‘o maite o Noa i ta’na fafauraa, na ô atura te Fatu ia’na e :

« E faaau na râ vau i tau faufaa ia oe ; e tae oe i roto i te pahi ; o oe, e to mau tamarii, e to vahine, e na vahine a to tamarii ra…

« E ua na reira ho‘i Noa… mai ta Iehova ato‘a i faaue mai ia’na ra » (Genese 6:8 ; 7:5).

I muri a‘e i te itiraa te pape pu‘e, ua haere mai ratou i rapae i te pahi.

« Ua faati‘a ihora Noa i te fata na Iehova…

« Ua parau maira ho‘i te Atua ia Noa, e ta’na mau tamarii ato‘a ra, na ô maira,

« O vau nei inaha, te fafau nei au i ta‘u nei faufaa ia outou, e to outou huaai a muri atu » (Genese 8:20 ; 9:8-9).

Ua fafau ato‘a tatou i te hoê fafauraa mo‘a e te Fatu, ia ti‘a ia tatou ia paruruhia i te enemi. Mai te anotau o Noa, te ora ato‘a nei tatou i te hoê tau no te tupuraa te fafauraa tei tohuhia ra. I roto i na matahiti e 8 i ma‘iri a‘e nei, e 71 hiero apî tei haamo‘ahia – o te hoê te reira ohipa tei ravehia i raro a‘e i te arata‘iraa a te peropheta o te Fau, mai te huru rii i te hamani-raa-hia te pahi i te anotau o Noa.

Ua titau mai to tatou peropheta ora, te peresideni Gordon B. Hinckley, ia tatou ia haere i te hiero, i reira ho‘i tatou e rave ai i te mau fafauraa e te Fatu ra.

Mai te anotau o Noa, e riro ta tatou mau tautooraa no te haapa‘o i te reira mau fafauraa, ei mau tautooraa faatusia. Noa’tu te huru o te reira mau faatusiaraa, tei rahi anei, e aore ra, tei iti anei, na te reira mau faatusiaraa e faaite i te huru o te puai o to tatou mana‘o e to tatou aau no te farii i te hinaaro o to tatou Metua i te ao ra. I roto i te parau no te faatusiaraa, te vai ra te parau no te hoê pu‘e tau aroraa, i reira ho‘i tatou e faaau ai, e e hi‘opo‘a ai i te hopearaa o ta tatou mau faaotiraa. Eita te mau ma‘itiraa e riro ei ohipa maramarama e te ohie i te mau taime ato‘a, no reira ïa tatou e aro ai. E ia faaoti ana‘e tatou e faaore i ta tatou mau aroraa ato‘a, e ia faatusia i to tatou hinaaro i te hinaaro o te Fatu, te ta‘uma ra ïa tatou i te hoê faito apî o te iteraa. E ite-pinepine-hia te reira i roto i to tatou oraraa i te taime e farerei ai tatou i te hoê ati rahi, e aore ra, i te hoê titauraa.

Tau hepetoma i ma‘iri a‘e nei, i roto i te hoê puhaparaa Scout i roto i te mau mou‘a i te pae hitia o te râ no Roto Miti, ua haruhia te hoê taure‘are‘a i te ho‘a uira e ua pohe roa. E oto rahi e te mauiui to na metua no teie mo‘eraa vitiviti o ta raua tamaiti, e ua aro noa raua ma te muhu ore, e ma te uiui e, no te aha teie ohipa i tupu ai. No te haehaa o to raua aau, e no te puai o to raua faaroo, ua farii a‘era raua i te hoê niniiraa rahi o te here o te Fatu. I roto i to raua oto, ua tae maira te hinaaro mărû ia farii i te ohipa i tupu ma te inoino ore. Na roto i te reira fariiraa ta raua, ua tupu mai te hoê iteraa rahi a‘e i te opuaraa o te oraraa e te haamana‘oraa i te mau fafauraa ta raua i rave ra. Noa’tu e, te vai noa ra to raua ahoaho no taua mo‘eraa vitiviti ra, ua fatata atu râ raua i te Fatu ra, ma te tape‘a papû i ta raua mau fafauraa, e ia ora i te hoê oraraa e ti‘a ai ia raua ia farerei faahou i ta raua tamaiti ma te oaoa rahi.

I roto i teie tau tuuraa, e auraa apî to te ohipa raveraa i te fafauraa tei taa ê i to te anotau o Noa. Aita tatou i titauhia ia rave i te fafauraa no tatou ana‘e, tera râ, ua faaue-ato‘a-hia ia tatou ia imi i to tatou mau tupuna tei pohe e ia iriti i te uputa no ratou ato‘a o te hinaaro e rave i te fafauraa e ia farii i te mau oro‘a o te evanelia.

Te ohipa e ravehia nei i rotopu i te feia tei reva ê atu, e ohipa ïa o te haere nei i mua ma te puai rahi, na roto i te rohiraa a te mau nuu o te ra‘i e na roto i te i‘oa o te Fatu. I roto i te orama a te peresideni Joseph F. Smith no ni‘a i te feia i pohe ra, te papa‘i ra oia e:

« Inaha râ, mai rotopu mai i te feia parau-ti‘a, ua faanahonaho ihora Oia i To’na mau nuu taata e ua faataa ihora i Ta’na mau ve‘a, o tei faaahuhia i te puai e te mana, e ua faaue atura ia ratou ia haere…

« Ua ite atura vau i te mau peresibutero faaroo o teie nei tau tuuraa Evanelia, a faaru‘e mai ai ratou i te oraraa tahuti nei, ua tamau noa ratou i ta ratou mau ohipa no te pororaa i te evanelia o te tatarahaparaa e te faaoraraa » (PH&PF 138:30, 57)

Te haapii faahou ra te mau papa‘iraa mo‘a ia tatou e, teie mau ve‘a e parauhia ra, « o te mau peropheta ïa o tei faaite i to ratou iteraa papû no ni‘a iho i [te Faaora] i te tino nei » (PH&PF 138:36). Te tahi o te reira mau ve‘a, teie ïa, oia ho‘i, o Petero, o Paulo, o Alama, o Ioane, o Iosepha, e o Nephi.

Na roto i te tai‘oraa i teie orama a te peresideni Smith, e na roto i te iteraa i te mau misionare tei faauehia ia haere e rave i te reira ohipa, e riro te taata i te feruri e, e mea faufaa mau ia haapa‘o tatou tata‘itahi i ta tatou fafauraa ia imi i te i‘oa o te mau melo o to tatou utuafare e ia faaohi-pa i te mau hora ato‘a i faataahia i roto i te mau hiero ato‘a. E nehenehe ta‘u, ma te ti‘aturi, e faaite atu e, e taime â te vai nei i roto i te rahiraa o te mau hiero, no te faati‘a i te parau a te Peresideniraa Matamua, ia vaiiho i te hiti i te tahi mau taime arearearaa to tatou, e ia rahi atu te taime no te raveraa i te mau oro‘a hiero. Te pure nei au ia pahono tatou i teie titauraa ia haere i te uputa o te hiero.

Te haehaa nei au no te tavini i roto i teie piiraa faufaa, e te pure nei au ia ti‘a ia‘u ia haapa‘o i ta‘u mau fafauraa i te Fatu e ia faaroo i te arata‘iraa a te Varua. Te faaite nei au i to‘u iteraa papû hanahana no ni‘a i te Fatu o Iesu Mesia e no nii te Faaho‘iraa mai o Ta’na evanelia na roto i te peropheta Iosepha Semita. Te faaite atu nei au i to‘u here i te mau fafauraa e te mau oro‘a o te hiero, ma te fafau ia tata‘i piti i ta‘u haaraa no te haere atu i roto i teie mau fare mo‘a o te Atua. Ua ite au e, mai te mea e, e rave tatou i te mau fafauraa mo‘a e e haapa‘o ho‘i i te reira, e arata‘i atu te Fatu ia tatou i mua i to’na aro mo‘a. Te faaite papû nei au i te reira na roto i te i‘oa o Iesu Mesia ra, amene.