Ia ineine noa i te pae varua: a haamata vave e ia haere itoito noa i mua

E mana‘o tatou e nahea ia faaineine no te mau vero. Ua ite tatou i te oto o te mau vahine, te mau tane e te mau tamarii e tei ruhiruhia e tei paruparu, tei ŭ i te mau mata‘i rorofa‘i, te mau miti pu‘e, te mau tama‘i e te mau poa‘i. Te uiraa matamua e uihia : « Nahea vau ia faaineine ? » E horo vitiviti no te hoo mai e no te haaputu i te mea o ta te taata e mana‘o e e hinaarohia no taua mahana ra ia ti‘a’tu i roto i teie mau ati.

Te vai nei râ te hoê faaineineraa hau atu i te faufaa o ta tatou e ta‘ita‘i atu i te tata‘uraa o te tae mai ia tatou paato‘a. E mea ti‘a ia faaineine ateahia no te mea e titau te reira i te taime. Te mau mea o ta tatou e hinaaro i te reira taime e ore roa ïa e nehenehe ia hoo mai. Eita e nehenehe ia tarahu mai. Eita e nehenehe ia haaputu. Titauhia ia faaohipa tamau noa e ia faaapî noa.

Te mea e hinaaro-roa-hia e tatou i roto i te tata‘uraa o to tatou nei mau mahana o te faaineineraa pae varua ïa. Titauhia te faatupuraa puai i te faaroo i roto ia Iesu Mesia ia nehenehe tatou ia manuïa i te tata‘uraa o te oraraa i ni‘a i te reira te mau mea o te mure ore i haamauhia’i. E tuhaa taua tata‘uraa ra no te opuaraa a te Atua i faaineine i te poieteraa ra.

Ua horo‘a mai te peropheta Iosepha Semita i te tatararaa papû no teie tata‘uraa. Ua hamani to tatou Metua i te Ao ra i te ao nei e Ta’na Tamaiti o Iesu Mesia. Te faaite mai nei teie mau parau ia tatou i te tumu no te hamaniraa : « E haere tatou i raro, te vai ra ho‘i te area i reira, e e rave tatou i teie mau materia, e hamani tatou i te hoê ao ei parahiraa no ratou ; e e tamata tatou ia ratou i reira, ia ite tatou e, e haapa‘o anei ratou i te mau mea ato‘a ta te Fatu to ratou Atua e faaue ia ratou ra ».¹

No reira, te tamataraa rahi o te oraraa o te iteraa ïa e, e faaroo e e haapa‘o anei tatou i te mau faaue a te Atua i roto i te mau vero o te oraraa nei. Eiaha noa no te faaoroma‘i i te mau vero, no te ma‘iti râ i te mea maitai i roto i to ratou riri. Te mea ri‘ari‘a o te oraraa nei o te oreraa ïa e upooti‘a i taua tata‘uraa ra, ia ore e faataahia no te ho‘i ma te hanahana i to tatou ai‘a tumu.

E mau tamarii varua tatou na te Metua i te Ao ra. Ua here e ua haapii Oia ia tatou hou tatou a fanauhia mai ai i te ao nei. Ua faaite Oia ia tatou e te hinaaro nei Oia i te horo‘a mai na tatou te taato‘araa o te mau mea e vai Ia’na ra. No te faataa no taua horo‘araa ra, titauhia tatou ia farii i te tino tahuti ia nehenehe ia tamatahia. Na roto i taua mau mea ra, e ite te tino tahuti nei i te mauiui, te ma‘i e te pohe.

E tamatahia tatou na roto i te mau hiaai e te mau paruparu o te tino tahuti. Na te mau aravihi e te puai o te diabolo e faahema ia vare tatou i taua mau faahemaraa ra. E topa mai te mau vero i roto i te oraraa i titauhia’i tatou ia ma‘iti ma te faaohipa i te faaroo i te mau mea e ore e itehia ia tatou i to tatou mau mata taata nei.

Ua fafauhia ia tatou e o Iehova, o Iesu Mesia, to tatou Faaora e to tatou Taraehara. Ua haapapû mai Oia e, e ti‘afaahou tatou paato‘a. E e haamanuïa Oia ia tatou i te tata‘uraa o te oraraa mai te mea e faaohipa tatou i te faaroo i roto Ia’na na roto i te haapa‘oraa. Ua pii noa tatou i te oaoa i taua parau apî ra.

Ua faaite te hoê irava o te Buka a Moromona, te tahi atu ite no Iesu Mesia, i te etaeta o taua tata‘uraa ra e eaha te rave ia manuïa :

« E tena na, ia oaoa to outou aau, e e haamana‘o e, e mea ti‘amâ outou ia rave noa’tu i tei au i to outou hinaaro – ia rave i te e‘a o te pohe mure ore e aore râ, i te e‘a o te ora mure ore.

« E teie nei, e ta‘u mau taea‘e here e, a faafa‘i-ite outou ia outou iho i te hinaaro o te Atua, e eiaha i te hinaaro o te diabolo e to te tino nei ; ia haamana‘o outou e, i muri a‘e i to outou faafa‘i-ite-raa-hia i te Atua, e na roto ïa i te aroha rahi o te Atua e faaorahia’i outou.

« E tena na, ia faateitei te Atua ia outou mai te pohe mai, na roto i te mana o te ti‘a-faahou-raa, e mai te pohe mure ore ho‘i na roto i te mana o te taraehara, ia fariihia outou i roto i te basileia mure ore o te Atua, ia arue outou ia’na na roto i te aroha o te Atua. Amene ».²

Titauhia te faaroo tapetepete-ore i roto i te Fatu ia Iesu Mesia no te ma‘iti i te e‘a e tae atu ai i te ora mure ore. Na roto i te raveraa i taua faaroo ra e nehenehe ai tatou e ite i te hinaaro o te Atua. Na roto i te ohiparaa i taua faaroo ra tatou e patu ai i te puai no te raveraa i te hinaaro o te Atua. E na roto i te faaohiparaa i taua faaroo ra i roto ia Iesu Mesia tatou e nehenehe ai e pato‘i i te faahemaraa e te fariiraa i te faaoreraa hara na roto i te Taraehara.

Titauhia te faarahiraa e te faaamuraa i te faaroo i roto ia Iesu Mesia hou roa Satane a aro ai ia tatou, a na reira ai oia, ma te feaa e ma te pii i to tatou hiaai o te tino, e ma te reo haavare i te parauraa e, e mea ino te maitai e aita e hara. Te tupu nei teie mau vero o te pae varua. E ite tatou i to’na puairaa hou te taeraa mai o te Faaora.

Tera râ, titauhia ia rahi te faaroo no te haapa‘oraa i ta te Atua, titauhia tatou ia haapuai tamau e ia faaapî noa i te reira. A opua tatou i teie nei ia haapa‘o vitiviti no te faaoroma‘i hau atu â. A haapii i te haamata vave e ia haere itoito noa i mua, o te mau taviri ïa o te faaineineraa pae varua. E haamou te faataereraa e te feruri-ore-raa i te faaineineraa pae varua.

E horo‘a’tu vau e maha faaotiraa no te faaohipa vitiviti e no te faahaere itoito i te haapa‘o i mua. Hoê, o te popouraa ïa i te parau a te Atua. A piti, o te pure tamau noa-raa. A toru, o te faaueraa ia aufau i te taato‘araa o te tuhaa ahuru. E te maha ra, o te faatearaa ïa i te hara e i to’na mau hopea ataata. Titauhia te faaroo no te haamata e i muri mai te tape‘a papûraa ïa. E faaitoito teie mau mea taato‘a i to outou paari ia ite e ia haapa‘o i te mau faaueraa a te Fatu.

Ua farii a‘e na outou i te tauturu a te Fatu no te haamata. I te ava‘e Atopa, ua farii outou i teie fafauraa a te peresideni Gordon B. Hinckley e, mai te mea e oti ia outou i te tai‘o i te taato‘araa o te Buka a Moromona i teie hopea matahiti : « Ma te feaa-ore te fafau atu nei au ia outou e, mai te mea e pee outou tata‘itahi i te talena ohie, noa’tu e ua tai‘o na outou i te Buka a Moromona rave rahi taime na mua atu, e tae mai i roto i to outou oraraa e i roto i to outou mau utuafare te hoê faito hau atu o te Varua o te Fatu e te hoê faaotiraa rahi atu ia haapa‘o i Ta’na mau faauearaa e te hoê iteraa papû puai e, te ora nei te Tamaiti a te Atua ».³

Teie taua fafauraa ra no te faarahi i te faaroo o ta tatou e hinaaro ia ineine i te pae varua. Ia faataere râ tatou i te haamata i to tatou haapa‘o i teie aniraa faauruhia e rahi atu â ïa te mau api o ta tatou e tai‘o atu. Ia ore tatou e tai‘o no na mahana rii, e rahi atu â te toparaa. No reira vau i ma‘iti ai i te tai‘o hau atu i ta te talena i titau mai i te tai‘o i te mahana hoê, ia faataahia vau no te mau haamaitairaa a te Varua e no te faaotiraa rahi e no te iteraa papû no Iesu Mesia. Ia hopea Titema, ua haapii mai ïa vau no ni‘a i te haamata e ia tae mai te faaue a te Atua ua ineine ia vau no te haere itoito noa i mua.

Hau atu â, a tai‘o ai au i te Buka a Moromona, e pure au ia tauturu mai te Varua Maitai ia‘u ia ite i te mea o ta te Atua e hinaaro ia‘u ia rave. Te vai nei te hoê fafauraa i teie titauraa e pahonohia i roto i teie buka iho : « I parau ai ho‘i au ia outou na, a popou na outou i te parau a te Mesia ; inaha ho‘i, e faaite te parau a te Mesia ia outou i te mau mea ta outou e haapa‘o ».⁴

E rave vitiviti au i ta te Varua Maitai e faaue ia‘u ia rave a tai‘o ai e a feruri hohonu ai au i te Buka a Moromona. Ia oti teie titauraa i te ava‘e Titema, e roaa ïa ia‘u e rave rahi mau iteraa no ni‘a i te faarahiraa i to‘u faaroo no te haapa‘o. E haapuaihia ïa to‘u faaroo. E ite ïa vau na roto ia‘u iho i te mea e roaa na roto i te imi-’oi‘oi-raa e te tamau i te mau papa‘iraa mo‘a e te iteraa i te mea o ta te Atua e hinaaro nei ia‘u i te rave e a rave roa’tu ai. Mai te mea e na reira tatou, e ineine maitai ïa tatou no te mau vero rahi e tae mai.

E ite ïa tatou eaha te rave i muri mai i te mahana matanua no Tenuare. E ma‘iti tatou i te huti i te aho ma te tamaru e ma te parau ia tatou iho e : « Ua patu vau i te hoê faarii rahi no te faaroo na roto i te haamata vaveraa e i te haere itoito noaraa i mua i roto i te haapa‘o. E haaputu vau i te reira no te taime au e tamatahia’i i roto i te mau vero ». Te vai nei te hoê rave‘a maitai atu no te faaineineraa, no te mea e mea poto te oraraa o te faaroo. E ma‘iti tatou i te tai‘o tamau i te mau parau a te Mesia i roto i te mau papa‘iraa mo‘a e i te mau haapiiraa a te mau peropheta ora. Teie ïa o ta‘u e rave. E ho‘i ïa vau i roto i te Buka a Moromona e ia tai‘o rahi atu â. E mauruuru ïa vau no te titauraa a te peropheta e i te fafauraa o te haapii ia‘u nahea ia imi i te faaroo rahi e ia tape‘a i te reira.

E patu ato‘a te pure i to tatou faaroo ia rave i te mea o ta te Atua i faaue. Ua anihia tatou ia pure tamau noa ia ore tatou ia hi‘a. Te tahi mau parururaa o ta tatou e titau e mau arairaa afaro ïa na te Atua. Rahi atu â ra, e tae mai te reira na roto i te paturaa i to tatou faaroo no te haapa‘o. E pure tatou i te mau mahana ato‘a ia ite i te mea o ta te Atua e hinaaro ia tatou ia rave. E fafau tatou ia haamata i teie nei ia tae mai te pahono. Ua ite au e, e pahono tamau mai Oia i teie mau titauraa. I reira ïa tatou e ma‘iti ai i te haapa‘o. A na reira ai tatou, e patu tatou i te faaroo ia rava‘i ia ore e hi‘a. E roaa faahou ïa te faaroo e faahou â no te mau haapiiraa e tae mai. Ia tae mai te vero, ua ineine ïa tatou no te rave i te mea o ta te Fatu e faaue mai.

Ua faaite te Faaora ia tatou i te hoho‘a rahi no te pure auraro. Ua pure Oia i roto i te Aua i Getesemane a faaruru ai Oia i te Taraehara o ta To’na Metua i hinaaro Ia’na ia rave. Ua ite Oia i te hinaaro o To’na Metua oia ïa ia farii i te mea mauiui e te ri‘ari‘a o ta tatou i ore e maramarama. Ua pure Oia eiaha noa no te farii i te titauraa a te Metua, no te rave-ato‘a-raa râ. Ua faaite Oia ia tatou nahea ia pure na roto i te auraroraa.

Te parau tumu no te faaohipa vitivitiraa e te papû i te faaroo e tano ato‘a ïa no te faaueraa ia aufau i te tuhaa ahuru. Eiaha tatou e ti‘a‘i ia piri mai te faaafaroraa tuhaa ahuru a opua ai i te aufau i te tuhaa ahuru. A rave i teie nei ra. E mea rave ia haapii i te tamaru i ta tatou haamauaraa e ia ite e, te mau mea o ta tatou e farii nei no ô mai ïa i te Atua. Titauhia te faaroo no te aufau ‘oi‘oi i ta tatou tuhaa ahuru ma te faataere ore.

Ia opua tatou i te faariro ia tatou ei feia aufau tuhaa ahuru e mai te mea e aufau itoito tatou i te reira, e tahe mai te mau haamaitairaa i roto i te matahiti, e tae noa’tu i te taime o te faaafaroraa. Na roto i ta tatou opuaraa i teie nei, i te riroraa ei feia aufau tuhaa ahuru e ta tatou tutavaraa itoito no te haapa‘o, e haapuaihia tatou i roto i to tatou faaroo, e, i te taime mau, e tamaruhia to tatou aau. O te faahuru-ê-raa ïa o to tatou aau na roto i te Taraehara a Iesu Mesia, i raro atu i te pûpûraa i ta tatou moni e aore râ, i ta tatou mau maitai, e nehenehe ai i te Fatu ia fafau i te feia aufau i te parururaa o te mau mahana hopea nei.⁵ E ti‘aturi tatou e e faataahia tatou no te haamaitairaa o te paruru, mai te mea e fafau tatou i teie nei i te aufau i te hoê tuhaa ahuru taato‘a e ia itoito noa i te aufauraa.

Ua tano ato‘a teie mana no te hoê ma‘itiraa no te faaohipa i te faaroo e ia haapapû i roto i te haapa‘oraa ia roaa te faaroo no te pato‘iraa i te faahemaraa ia roaa te faaoreraa hara. Te taime maitai no te pato‘iraa i te faahemaraa o te haamata-’oi‘oi-raa ïa. Te taime maitai no te tatarahapa o teie nei ïa. E tuu te enemi o to tatou varua i te mau mana‘o i roto i to tatou feruriraa no te faahema ia tatou. E opua ‘oi‘oi tatou i te faaohipa i te faaroo no te ti‘avaru i te mau mana‘o iino hou tatou a haapaai. E ma‘iti vitiviti tatou i te tatarahapa ia rave tatou i te hara hou Satane e haaparuparu ai i to tatou faaroo e ia ruuruu ia tatou. Te imiraa i te faaoreraa hara, e mea maitai a‘e ia rave na mua roa i te faataereraa.

A tarava‘i to‘u metua tane i ni‘a i to’na ro‘i hou to’na poheraa, ua ani au ia’na e ere anei teie i te taime tano ia tatarahapa e ia pure no te faaoreraa i te mau hara ato‘a o tei ore i faaafarohia i te Atua. Ua faaroo rii mai paha oia i to‘u reo ia feaa oia i te pohe e i te haavaraa. Ua ataata rii mai oia ia‘u e parau mai ra, « Aita roa, e Hal, ua tatarahapa noa na vau i roto i to‘u oraraa ».

Na te mau faaotiraa i teie nei ia faaohipa i te faaroo e ia ti‘a maite i roto i te haapa‘o, e faatupu i te faaroo rahi e te haapapûraa. E parauhia te reira te ineineraa pae varua o ta tatou paato‘a e titau. Na te reira e faataa ia tatou i roto i te mau taime o te ati ia farii i te fafauraa a te Fatu e, « mai te mea râ ua vai ineine noa outou e ore outou e măta‘u ».⁶

Ua ti‘a te reira parau i te taime e û tatou i te mau vero o te oraraa e i te ti‘aturiraa i te pohe. Ua horo‘a mai te hoê Metua Here e Ta’na Tamaiti Here ia tatou paato‘a nei, i te tauturu ia manuïa tatou i te titauraa o te oraraa i faanahohia no tatou. E mea ti‘a râ ia tatou ia opua i te haapa‘o e i te rave. Ua haamau tatou i te faaroo no te haere i te tata‘uraa o te haapa‘o i te mau taime e na roto i ta tatou mau ma‘itiraa. E opua tatou i teie nei i te rave vitiviti i te mau mea o ta te Atua e ani mai. E e nehenehe tatou e opua ia itoito noa i roto i te mau tata‘uraa iti o te haapa‘o no te patu i te faaroo ia nehenehe tatou ia nuu i mua i te tata‘uraa rahi atu o te tae mai.

Ua ite au e, e mau tamarii outou e o vau nei na te hoê Metua Here i te Ao ra. Ua ite au e, te ora nei Ta’na Tamaiti, o Iesu Mesia e o Oia to tatou Faaora, e ua aufau Oia i te hoo o ta tatou mau hara ato‘a. Ua ti‘afaahou mai Oia, e ua fâ mai Oia e To’na Metua i te tamaiti ra ia Iosepha Semita. Ua ite au e, te Buka a Moromona o te parau ïa na te Atua, iritihia na roto i te horo‘araa e te mana o te Atua. Ua ite au e, teie te Ekalesia mau a Iesu Mesia.

Ua ite au e na roto i te Varua Maitai e nehenehe ai tatou e ite i te mea o ta te Atua e hinaaro ia tatou ia rave. Te faaite papû nei au e, e horo‘a Oia ia tatou te mana no te rave i te mea o Ta’na e ani mai ia tatou, noa’tu eaha te mea e eaha te mau tamataraa e tae mai.

Te pure nei au ia ma‘iti i te haapa‘o vitiviti i te Fatu, e ia tamau noa, i te mau taime maniania-ore e i te taime no te vero. Ia na reira tatou, e haapuaihia to tatou faaroo, e ite tatou i te hau i roto i teie oraraa, e e farii tatou i te haapapûraa e faataahia tatou e to tatou utuafare no te ora no amuri atu i roto i te ao e tae mai. O ta‘u ïa fafauraa i mua ia outou, na roto i te i‘oa o Iesu Mesia, amene.