« Ahani e o te Mesia te ti‘a ra i ni‘a i to‘u mau ti‘araa… »

E rave rahi matahiti i teie nei, e ono, e maha e e piti mata- hiti o ta maua mau tamarii paari, ua tamata maua ta‘u vahine ia ratou. Te tai‘o ra matou te utuafare i te mau mahana ato‘a i te Buka a Moromona.

Ua ani ta‘u vahine e, « O vai te taata tei haere i roto i te uru raau no te haere imi haere i te mau puaa, tera râ, ua pure oia i te taato‘araa o te mahana e tae noa’tu i te pô ? »

I muri a‘e i tau minuti e aita e pahonoraa, ua tamata oia i te tauturu : « E haamata to’na i‘oa na ni‘a i te E… e… e… ».

Ua tuo maira, na roto mai i te poro [o te piha], ta maua tamarii e piti matahiti, « Nosa ! »

O oia ïa o te ha‘uti noa ra i te poro o te piha – o oia ïa ta maua i mana‘o e, e mea na‘ina‘i roa oia no te taa i te ohipa e tupu ra. Enosa ! O Enosa o tei haere atu i te uru raau no te imi i te puaa, o tei hiaa’i no to’na iho varua. Noa’tu aita ta’na papa‘i i parau mai e ua mo‘e oia i roto i taua uru raau ra, te haapii mai nei te aamu o Enosa ia tatou e ua haere mai oia i rapae au i te ururaa, mai te hoê taata apî – o tei hinaaro i te maitai no to’na mau taea‘e.

I roto i te Faufaa Apî, te haapii mai nei to tatou Faaora, o Iesu Mesia, ia tatou, i te faufaa rahi no te imiraa i tei mo‘e.

« O vai ïa taata i ô outou nei, hoê hanere a’na mamoe, ia moe râ te hoê, e ore e vaiiho i te iva ahuru e iva tiahapa i te medebara ra, a haere a imi ai i tei moe ra, e ia itea’tu ?

« E itea’tura ia’na, amo a‘era i nia i te tapono ma te oaoa » (Luka 15:4-5).

Mai te Hi‘araa o Adamu, ua vai noa te taata i roto i te hoê huru mo‘emo‘e e te hara. Mai te rahiraa o outou, ua haamata to‘u « ite-raa-hia mai » na roto i na misionare haapa‘o maitai e piti. I te matahiti 1913, i Copenhague, Danemaka, ua haapii o Elders C. Earl Anhder e o Robert H. Sorenson i to‘u papa ruau e to‘u mama ruau i te evanelia a Iesu Mesia e ua bapetizo-ato‘a-hia raua. Ua haapii to‘u na metua ia‘u i te faufaa rahi no te rave-puai-raa i te ohipa, te haavare-ore-raa e te parau-ti‘a. Area râ, i roto noa hoê u‘i, ua mo‘e ê matou i te mau ohipa a te Ekalesia e i te iteraa i te evanelia. Ia hi‘o ana‘e au i muri i teie nei, te haamana‘o ra vau, i to‘u apî-roa-raa, ua titau manihini mai to‘u mau hoa ia‘u ia haere i te Paraimere. Ua haamauhia te mau ohipa matamua i tupu ia‘u i roto i te Ekalesia i ni‘a i te mau hoaraa i roto i te Paraimere.

I to‘u tamariiraa, e rave rahi ava‘e na mua a‘e i te ahuru-ma-piti-raa o to‘u mahana fanauraa, ua patotohia mai i te opani e ua haere atu vau e iriti. E rave rahi o to‘u mau hoa – diakono ma te ahuhia i te ahu uouo e te taamu arapoa – ua haere mai ratou e imi ia‘u ia haere i ta‘u pureraa autahu‘araa matamua roa. Tei piha‘i iho noa to matou taata faatere ia‘u a pou atu ai matou no te haere i te Fare Menemene i Temple Square. E pureraa autahu‘araa taua taime ra no te amuiraa rahi i te ava‘e eperera.

O Lloyd Bennett to‘u arata‘i scout. E mea pinepine oia i te haere mai e tii ia‘u i te mahana maa avatea no te afa‘i atu ia‘u i te Fare Scout no te hoo mai i te mau tapa‘o e te mau mea e hinaarohia. E paraparau noa maua a tere ai maua. Ua riro oia ei hoa ti‘aturihia e au. Ua rave o Lloyd Bennett, mai ia outou e rave rahi, i te taime no te atuatu i te taata tata‘itahi.

Ua taa maitai i teie nei mau hoa e i teie nei feia faatere faahiahia i te a‘oraa ta Elder M. Russell Ballard i horo‘a iho nei oia ho‘i ia « imi â i te hoê faahou â » (« Hoê a‘e toe », Liahona, Me 2005, 71), e ua taa ia ratou te mea i titauhia ia ratou. I te tahi mau taime, tei te poro noa, te taata o tei tau‘a-ore-hia.

Ua tupu te ohipa i tupu ia Enosa i ni‘a ia‘u nei, i te 18 raa o to‘u matahiti, a tuturi ai au i raro i roto i te aua faehau, i Fort Ord, California. I muri mai i te poheraa o te mau mori, ua tuturi au i ni‘a i te hoê tahua paari, e, mai ia Enosa, ua ti‘a mai au ei taata apî. E ti‘a ia‘u ia haere e tavini i te hoê misioni rave tamau. Ua î to‘u aau i te mauruuru no te mau taata e rave rahi tei tauturu mai ia‘u ia ite au e o vai mau vau e ia ite i te Mesia e Ta’na evanelia. Ua noaa ia‘u i te iteraa e te e‘a e tae atu ai i te ora e mea na roto ïa i to tatou Faaora o Iesu Mesia.

« E Tae mai oia i te ao nei ia faaora i to’na ra mau taata, e rave oia i nia iho ia’na i te mau hara a tei faaroo i to’na ra i‘oa ; o te feia ïa e roaa ia ratou te ora mure ore, e ore e taea te ora ia vetahi ê mau taata » (Alama 11:40).

Ua faaite te peropheta no te Faufaa Tahito, o Isaia, a ite ai oia i to tatou anotau e a faaho‘i hia mai ai te evanelia i roto i to’na îraa :

« Te na ô maira te Fatu ra o Iehova ; Inaha, e hopoi au i tau rima i nia i te mau fenua ra ; e faateitei au i tau tapao i nia i te mau taata ra ; e hopoi mai ratou i to mau tamarii i roto i to ratou ouma, e to mau tamahine na nia i to ratou mau tapono » (Isaia 49:22).

Ia atuatu ana‘e tatou i tei mo‘e, e te mau taea‘e e te mau tuahine, e ite ïa tatou i te tupuraa o taua tohuraa ra. E nehenehe anei ta outou e ite e nahea outou e hopoi ato‘a hia’i roto i te rima e na ni‘a i te mau tapono – e tae atu i te vahi papû ?

Eaha ta te Faaora e rave i te mau taime horo‘ahia ia tatou no te haa no vetahi ê ? Ia faaohipa ana‘e tatou i taua haapiiraa ra Ahani e o te Mesia te ti‘a ra i ni‘a i to‘u mau ti‘araa, eaha ïa Ta’na e Rave ?, e faatumuhia ïa ta tatou mau faaotiraa o te oraraa i ni‘a i te Mesia.

E mea papû roa ia‘u e, ua imi noa o Elder Maxwell tei herehia, i tei mo‘e. No te mea ua itoito oia mai ia Nephi, i te papai no te ani ia « tatou [paato‘a], ia faaroo i te Mesia e ia haamaitai ho‘i i te Atua » (2 Nephi 25:23) Ua ite au e ua pii o Elder Maxwell hau atu i te hoê noa taime, ia ratou, e tae noa’tu i tei mo‘e, o ta’na e tamata ra i te arata‘i atu i te Mesia ra.

Noa’tu e, e orometua haapii paraimere tatou, e taata faatere no te Feia Apî Tamaroa e aore ra, no te Feia Apî Tamahine, e Raatira scout, e orometua haapii utuafare, e tuahine hahaere, e aore ra, e hoa, e faaohipa te Fatu ia tatou, mai te mea e, e faaroo tatou, ia imi e ia itea te hoê.

Auê au i te mauruuru i te faaotiraa ia tavini i te hoê misioni rave tamau o tei riro ei tuhaa faufaa rahi i roto i to‘u nei oraraa. E te feia apî tane, tei ia outou ra te haamaitairaa no te tavini, e no te rohi ma te itoito. A faaea parau-ti‘a noa, a faaineine no te poro i te evanelia ; eiaha e faa taime – a haere e tavini ! E te feia apî tamahi-ne, e rave rahi te mau mea o ta ou-tou e nehenehe e rave no te patu i te Basileia. E te feia paari: Te hinaaro nei matou ia outou !

Ua farii to matou nei utuafare i te haamaitairaa no te taviniraa i Canada i piha‘iho i te mau orometua tamaroa e tamahine e te mau misionare paari. Ma to ratou aau e te varua ato‘a e na roto i te puai o te Fatu, ua ma’imi ratou i tei mo‘e e ua iteahia ia ratou, mai te mau misionare haapa‘o maitai ato‘a na te ao nei.

« E riro ihora ratou ei mauhaa i roto i te rima o te Atua i te arata‘iraa i te mau taata e rave rahi i te ite i te parau mau ra, oia ho‘i, i te ite i to ratou Faaora » (Mosiah 27:36)

E nehenehe ta tatou tata‘itahi e faatupu i te taa-ê-raa i roto i te oraraa o te hoê taata, e tae noa’tu i to’na ora mure ore, tera râ e ti‘a ia tatou ia haa ; e ti‘a ia tatou ia rohi ; e ti‘a ia tatou ia rave ma te itoito. Penei a‘e ua farii outou i te hoê mana‘o no te titau manihini i te hoê taata ia ho‘i mai i roto i te ekalesia, aore râ ia faaroo, no te taime matamua, i te parau poro‘i o te evanelia o tei faaho‘ihia mai. A na reira, a pee i taua mana‘o ra. No te aha tatou paato‘a e ore ai e titau manihini i te hoê taata no te haere mai ananahi e faaroo i te reo o te hoê peropheta ? E na reira anei outou ? E faatae anei outou i te reira titauraa i teie mahana ? Na roto i te faaroo e te hoê aau tae (e tae noa’tu te hinaaro), e ti‘a ia tatou ia ti‘aturi e horo‘a mai te Varua ia tatou, i te hora mau ihoa, oia ïa, « i te taime mau ihoa, i te mea o ta [tatou] e parau » (PH&PF 100:6). Ua ite au e tupu te reira.

Aue to‘u mauruuru no teie piiraa no te tavini faahou i teie taime i Auteraria. Te faaite nei au i to‘u here e to‘u mauuruuru mure ore i to‘u hoa e ta maua mau tamarii e iva no to ratou hiaai misionare, to ratou here e to ratou tururaa ia‘u. Te faaite nei au i te iteraa papû e ua faaho‘ihia mai te îraa o te Evanelia i ni‘a i te fenua nei, e e peropheta o Iosepha Semita na te Atua e e parau na te Atua te Buka a Moromona. Te arata‘ihia nei tatou, i teie nei mahana, e te hoê peropheta ora oia te peresideni Gordon B. Hinckley. Ua ite au e, te ora nei te Atua, e ua ite au o Iesu te Mesia, to tatou Faaora e to tatou Taraehara. I roto i te rima o te ti‘a‘i mamoe, e i ni‘a i to’na tapono tatou e arata‘ihia’i i te fare. Mai ia Enosa, te parau haehaa atu nei au, « Ia a‘o atu vau e ti‘a’i … i teie nei feia, i te faaite-hua-raa’tu i te parau mai tei au i te parau mau tei roto i te Mesia ra… E ua hau to‘u popou i te reira i to te mau mea ato‘a i te ao nei » (Enosa 1:26). Te faaite nei au i to‘u iteraa papû no teie nei mau parau mau, i te i‘oa o Iesu Mesia, amene.