Iesu Mesia – Te Fatu Faaora

Ei Fatu Faaora, ua parau o Iesu i To’na mau hoa ia « haere… a parau atu.. i ta orua i faaroo e ta orua i ite iho nei ; e te roaa nei te ite i te matapo, te haere nei te pirioi, te tamâhia nei te lepera, te faaroo nei te turi, te faati‘ahia nei tei pohe ».³

Ua faahiti pinepine te mau buka a Mataio⁴, Mareko⁵, Luka⁶ e Ioane⁷ e ua haere o Iesu e a‘o i te evanelia e e faaora i te mau huru ma’i ato‘a.

I to te Faaora, tei ti‘a faahou mai, fâraa’tu i te nunaa no Amerika tahito, ua ani aroha oia i te feia ato‘a « tei roohia i te mau huru ma’i »⁸ ia haere atu Ia’na e ia faaorahia.

Na roto i te rave‘a maere, ua horo‘ahia’tu To’na mana hanahana no te faaora i te feia ma’i i te mau taata parau-ti‘a tei mau i te autahu‘araa i te mau tau matamua no te tuuraa evanelia⁹, e faahou â i teie nei mau mahana hopea nei, a faaho‘i-faahou-hia mai te îraa o Ta’na evanelia.¹⁰

E nehenehe ato‘a ia tatou ia noaa To’na mana faaora na roto i te pure. E ore roa e mo‘ehia ia‘u te hoê ohipa i tupu i te tuahine Nelson e o vau nei, fatata e toru ahuru matahiti i teie nei, na muri i te peresideni Spencer W. Kimball e to’na hoa here o Camilla. Tei Hamilton matou, i Niu Zelani, no te hoê amuiraa rahi e te Feia Mo‘a. E ere au i te hoê hui mana faatere rahi i taua taime ra. Ua anihia vau ia haere atu i roto i teie nei rururaa e te tahi atu mau rururaa i roto i te tahi atu mau Motu no Patifita, a tavini ai au ei peresideni rahi no te Haapiiraa Sabati. Na ni‘a i to‘u ti‘araa taote, ua utuutu vau i te peresideni e te tuahine Kimball e rave rahi mau matahiti. Ua matau maitai au i te huru o to raua tino.

Ua faaineinehia te hoê faaiteiteraa no te peu tumu o te fenua i te pô mahana maa no teie nei amuiraa e te feia apî no te Ekalesia i Niu Zelani. Ua ma’i-ino roa-hia râ te peresideni e te tuahine Kimball, e e mea puai ato‘a to raua fiva. I muri a‘e i to raua fariiraa i te mau haamaitairaa autahu‘araa, ua faafaaea raua i te fare o te peresideni no te Hiero no Niu Zelani. Ua ani te peresideni Kimball i to’na tauturu, te peresideni N. Eldon Tanner, ia peresideni i te faaoaoaraa e ia faaite e, eita te peresideni e te tuahine Kimball e tae atu i te faaoaoaraa.

Ua haere atu te tuahine Nelson na muri i te peresideni e te tuahine Tanner e te tahi atu feia faatere i te faaoaoaraa, e ua faaea mai te papa‘i parau o te peresideni Kimball, te taea‘e Arthur D. Haycock e o vau nei no te tia‘i i to matou nei hoa tei roohia i te fiva.

A ta‘oto noa’i te peresideni Kimball, ua tai‘oi‘o noa vau, ma te hau,’ I roto i to’na piha ta‘otoraa. Ua ara ta‘ue mai te peresideni Kimball. Ua ani mai oia, « E te taea‘e Nelson, eaha te hora e haamata’i te faaoaoaraa i teie nei pô ? »

« I te hora hitu, e peresideni Kimball ».

« Eaha te hora i teie nei ? »

Ua pahono atura vau « Fatata i te hora hitu ».

Ua parau ‘oi‘oi maira te peresideni Kimball, « A parau atu i te tuahine Kimball e, e haere tatou ! »

Ua hi‘opo‘a atura vau i te faito fiva o te peresideni Kimball. E mea maitai. Ua rave au i te faito fiva o te tuahine Kimball. E mea maitai ato‘a.

Ua oomo ‘oi‘oi raua i to raua ahu e ua tomo atu i roto i te hoê pereoo uira. Ua faahorohia’tu raua i ni‘a i te tahu‘a tu‘aro no te Fare Haapiiraa a te Ekalesia no Niu Zelani. A tomo atu ai te pereoo uira i ni‘a i te tahua, ua tupu te hoê huroraa puai. E mea maere mau ! I muri a‘e i to matou parahiraa, ua ani atu vau i te tuahine Nelson te tumu no taua huroraa rahi ra. Ua parau mai oia e, a haamata ai te peresideni Tanner i te rururaa, ua faaite oia e eita te peresideni e te tuahine Kimball e tae mai no te ma’i. I muri iho ua anihia te hoê feia apî no Niu Zelani ia pure.

Ma te faaroo rahi, ua horo‘a oia, ia au i te faaiteraa a te tuahine Nelson, i te hoê pure huru roa e te puai. Ua pure ato‘a oia e: « E 3.000 feia apî Niu Zelani matou. Ua ruru mai matou i ô nei, i muri a‘e i to matou faaineineraa e ono ava‘e i te maoro, no te himene e no te ori no ta Oe peropheta. A faaora ia’na e a faahaere mai ia’na i ô nei ! » I muri a‘e i te faahiti-raa-hia te « amene » ua tomo mai te pereoo e faauta ra i te peresideni e te tuahine Kimball i ni‘a i te tahua tu‘aro. Ua ite-‘oi‘oi-hia e o vai râ raua e ma te reo hoê ua huro te mau taata ato‘a no te oaoa !¹¹

Ua ite mata vau i te mana faaora o te Fatu ! Ua ite mata ato‘a vau i te heheuraa tei fariihia e tei pahonohia e To’na peropheta ora !

Te ite nei au e, i te tahi taime, e au ra e, eita ta tatou mau pure u‘ana e pahonohia. Te maere nei tatou, « No te aha ? » Ua ite au i taua mana‘o ra. Ua ite au i te mau ri‘ari‘a e te mau roimata no taua mau taime ra. Area râ, ua ite ato‘a vau e ore roa ta tatou mau pure e haamo‘ehia. Eita roa to tatou nei faaroo e mauruuru-ore-hia. Ua ite au e, e mea aano a‘e te feruriraa o te hoê Metua i te Ao ra o tei î i te paari, i to tatou iho feruriraa. A ite ai tatou i to tatou mau fifi e to tatou mau mauiui i te tino nei, ua ite Oia i to tatou haereraa i mua e to tatou puai mure ore. Mai te mea e pure tatou no te ite i To’na hinaaro e ia farii tatou i te reira, ma te faa‘oroma‘i e te itoito, e nehenehe te faaoraraa no te ra‘i mai e tupu mai te au i Ta’na iho raveraa e Ta’na iho talena.

E nehenehe te mau ati e tupu mai na roto i te mau tumu varua e te mau tumu tino nei. Ua haamana‘o o Alama, Tamaiti e, no te mauiui rahi o ta’na hara i hinaaro ai oia « ia faaorahia ho‘i i te varua e te tino ato‘a ho‘i, ia ore [ia’na] ia faati‘ahia i mua i te aro o te Atua ia haavahia i [ta’na] mau ohipa i rave ».¹² I roto i taua mau huru taime, nahea e nehenehe ai ia tatou ia faaorahia e Ana ?

E nehenehe ta tatou e tatarahapa hope roa ! E nehenehe ta tatou ia riro ei taata faafariu-mau-hia ! I reira te « Tamaiti o te Parau-Ti‘a »¹³ e haamaitai rahi mai ai ia tatou e To’na rima faaora.

I te omua-roa-raa o Ta’na ohipa i te tino nei, ua faaite o Iesu e ua tonohia Oia no « te faaora i te feia aau oto ».¹⁴ I te mau vahi ato‘a ua haapii Oia ia ratou, ua tamau noa Ta’na raveraa. A faahiti ai au i te mau parau Ta’na i parau i na taime e i na mahana taa ê e maha, a hi‘o i te hoho‘a.

• I to te nunaa no te Fenua Mo‘a, ua parau te Fatu e « e ti‘a i To’na mau taata ia hi‘o to ratou mata, ia faaroo to ratou tari‘a, ia ite to ratou aau, o te faafariuhia e o te faaora’tu vau ia ratou ».¹⁵

• I to te nunaa no Amerika Tahito, ua horo‘a’tu te Fatu tei ti‘afaahou mai i teie nei aniraa : « A fariu mai ia‘u… a tatarahapa i ta outou mau hara, e e faaroo mai, ia faaorahia outou e au ra ».¹⁶

• I te feia faatere no Ta’na Ekalesia, ua haapii Oia, « E tamau â ho‘i outou i te tauturu i taua huru taata ra ; aita ho‘i outou i ite o te ore anei ratou e ho‘i mai e e tatarahapa, e e haere mai ia‘u ma te aau hinaaro hoê, e na‘u e faaora ia ratou ».¹⁷

• I muri iho, i roto « i faaho‘iraa i te mau mea ato‘a »,¹⁸ ua haapii te Fatu i te peropheta Iosepha Semita no ni‘a i te feia mo‘a, « I muri a‘e i ta ratou mau faahemaraa, e te mau ati e rave rahi ra, inaha, na‘u, o te Fatu, e titau atu ia ratou, e mai te mea e ore ratou e faaetaeta i to ratou ra mau aau, e i to ratou mau a’i ho‘i ia‘u nei, e faafariuhia mai ratou, e e faaora mai au ia ratou ».¹⁹

E mea faufaa rahi te tereraa no Ta’na hoho‘a. E arata‘i ti‘a’tu te faaroo, te tatarahaparaa, te bapetizoraa, te hoê iteraa papû e te hoê faafariuraa tamau i te mana faaora o te Fatu. Te bapetizoraa o te hoê ïa ohipa e haamau i te fafauraa – te tapa‘o no te faaotiraa e te fafauraa. E tupu te iteraa papû i te rahi ia horo‘a ana‘e te Varua Maitai i te taata e imi papû ra i te parau mau i te haapapûraa. E faarahi te iteraa papû i te faaroo ; e faatupu oia i te tatarahapa e te haapa‘oraa i te mau faaueraa a te Atua. E faatupu te iteraa papû i te anaanatae ia tavini i te Atua e te mau taata tupu.²⁰ Te auraa o te parau ra, faafariuraa, maori râ, « te fariu-ê-raa i te ».²¹ Te faafariuraa o te fariu-ê-raa’tu ïa i te mau peu o te ao nei, e ia huri atu i ni‘a i te mau peu a te Fatu e ia tape‘a maite i te reira. Tei roto te tatarahaparaa e te haapa‘oraa i te parau no te faafariuraa. E afa‘i mai te faafariuraa i te hoê tauiraa rahi o te aau.²² No reira, e « fanau-faahou-hia »²³ te hoê taata faafariu-mau-hia, ma te haere i te hoê oraraa apî.²⁴

Ei mau taata faafariu-mau-hia, ua anaanatae tatou i te rave i te mea ta te Fatu e hinaaro ia tatou i te rave²⁵ e ia riro i te huru taata Ta’na e hinaaro ia tatou i te riro mai.²⁶ E faaora te faaoreraa hara, i te varua, e na te reira e afa‘i mai i te faaoreraa hara a te Atua.

Nahea tatou e ite ai e, ua faafariu-mau-hia tatou ? Te vai nei te mau hi‘opo‘araa ia tatou iho i roto i te mau papa‘iraa mo‘a. Te vai nei te hoê hi‘opo‘araa o te faaite mai i te huru no to tatou faafariuraa hou te bapetizoraa.²⁷ Te tahi atu faito no to tatou hinaaro mau o te taviniraa ïa ia vetahi ê. I Ta’na pĭpĭ, o Petero, ua parau te Fatu, « I pure na râ vau ia oe ia ore ia mure to oe faaroo ; e ia faafa- riuhia mai oe ra, a faaitoito i to mau taea‘e ».²⁸ Te ti‘a nei te hinaaro i te tavini e te faaitoito ia vetahi ê ei tapa‘o no te ineine o te hoê taata ia faaorahia.

Ua parau o Ioane te aposetolo i Herehia, « A hi‘o na i te Arenio a te Atua, o tei hopoi ê atu i te hara o te ao ».²⁹ Auê ïa mana e ! O te Fatu Faaora ana‘e te nehenehe e hopoi ê atu i te hara o te ao nei. Ua rahi roa ta tatou tarahu Ia’na.

Te haamana‘o maitai nei au i te hoê ohipa tei tupu a a‘o ai au i te hoê pŭpŭ misionare. I muri a‘e i to‘u aniraa i te mau aniraa, ua ti‘a mai te hoê taea‘e orometua. Ma te roimata i to’na mata, ua ani oia, « No te aha Iesu i mauiui rahi ai ? » Ua ani au i te taea‘e orometua ia iriti i ta’na buka Himene e ia tai‘o mai i te mau parau no roto mai i te himene « To‘u Faaora ! To‘u Atua ! » Ua tai‘o oia:

I muri iho ua ani au i teie nei orometua ia tai‘o i te himene « Ma te Aau Haehaa ». E mea putapû roa teie mau parau no te mea ua papa‘ihia te reira mai te huru ra, na te Fatu iho e pahono i te uiraa i anihia :

Ua mauiui rahi roa o Iesu no te mea ua here mau Oia ia tatou ! Te hinaaro nei Oia e ia tatarahapa tatou e ia faafariuhia tatou, ia nehenehe Ia’na ia faaora hope roa ia tatou.

Ia tae mai te mau tamataraa mauiui i ni‘a ia tatou,³² ua tae ïa te taime no te faahohonu i to tatou faaroo i te Atua, ia rave puai i te ohipa, e ia tavini ia vetahi ê. I reira Oia e faaora ai i to tatou mau aau oto. E ninii mai oia i ni‘a iho ia tatou te hau³³ e te tamahanahana.³⁴ Eita taua mau horo‘a rarahi ra e mou noa’tu i te pohe.

Te horo‘araa o te ti‘a-faahou-raa o te ohipa hope roa ïa a te Fatu no te faaora. Aua‘e Oia, e faaho‘ihia te tino tata‘itahi i to’na iho huru mau e te maitai.³⁵ Aua‘e Oia, aore roa e ohipa e ore e matara. Aua‘e Oia, tei mua ia tatou nei te mau taime maitai a‘e, i ô nei e i roto i te oraraa a muri atu. Te tia‘i mai nei te popou mau ia tatou tata‘itahi – i muri a‘e i teie nei oraraa oto.

Te faaite papû atu nei au e te ora nei te Atua, e o Iesu te Mesia – Te Fatu Faaora – i te i‘oa mo‘a o Iesu Mesia. amene.