Te maramarama i roto i to ratou mau mata

E to‘u mau taea‘e e to‘u mau tuahine here, te mau hoa e ati noa‘e te ao nei, te imi haehaa nei au i to outou maramarama e i te tauturu a te Varua o to tatou Metua a paraparau ai au ia outou i teie po‘ipo‘i.

Ua mauruuru roa vau i te parau poro‘i tohu poto roa a te peresideni Hinckley i te omuaraa o teie amuiraa. Te faaite papû nei au e, o te peresideni Hinckley to tatou peropheta, o te farii papû nei i te arata‘iraa no ô mai i te Upoo faatere o teie Ekalesia, oia ho‘i, to tatou Fatu e Faaora o Iesu Mesia.

Ua haamana‘o vau i te hoê putuputuraa i Ierusalema 17 matahiti i ma‘iri a‘e nei. Te hi‘o ra vau i te fenua o tei tarahuhia mai no te paturaa i te pû haapiiraa tuatoru no Brigham Young no te mau haapiiraa no te pae hitia o te râ i Ierusalema. Hou teie tarahuraa a tuurimahia’i, ua farii te peresideni Ezra Taft Benson e o Elder Jeffrey R. Holland, o oia ïa te peresideni no te Fare haapiiraa tuatoru no Brigham Young i te reira taime, e te faatere- raa hau no Iseraela e, i te i‘oa no te Ekalesia e no te fare haapiiraa, eiaha te pororaa evanelia e ravehia i Iseraela.

Te maere nei paha outou e, no te aha tatou i farii ai eiaha e porohaere. Ua titauhia ia tatou ia na reira no te mea, o te reira ana‘e te rave‘a e farii ai tatou i te parau faati‘a no te patu i taua fare nehenehe ra o te ti‘a nei i roto i te oire tu‘iroo no Ierusalema.

Ua ite matou e, ua tape‘a hanahana maite te Ekalesia e o BYU i taua fafauraa ra. I muri mai i te tuurimaraa o teie tarahuraa, ua parau mai hoê o to matou mau hoa e, « Ua ite matou e eita outou e poro, tera râ, eaha te mea o ta outou e rave no te maramarama i roto i to ratou mau mata ? » Te parau nei oia no ta tatou mau tamarii e haapii nei i Iseraela.

Eaha ïa taua maramarama ra i roto i to ratou mau mata o ta teie hoa o matou i papû maitai ? Ua horo‘a mai te Fatu Iho i te pahonoraa : « E te maramarama o te anaana maira, o te horo‘a nei i te maramarama ia outou na, na roto ïa ia’na ra o te haamaramarama mai i to outou mau mata, hoê â te reira maramarama o te haapapû mai i to outou mau iteraa ».¹ No hea mai taua maramarama ra ? Te horo‘a faahou mai nei te Fatu ite pahonoraa : « E o vau nei ïa te maramarama mau o te haamaramarama mai i te taata ato‘a o te tae mai i roto i te ao nei ».² O te Fatu te maramarama mau, « e na te Varua e haamaramarama mai i te mau taata ato‘a o te tae mai i roto i te ao paato‘a nei o te haapa‘o mai i te reo o te Varua ».³ E iteahia teie maramarama i ni‘a i to tatou mata e i roto i to tatou mau mata.

Ua haere na Paul Harvey hoê taata faataa tuiroo no te ve‘a e mata‘ita‘i hoê o te mau fare haapiiraa a ta tatou Ekalesia i na matahiti i ma‘iri a‘e nei. Teie ta’na hi‘opo‘araa : « E faaite teie mau mata apî… tata‘itahi i te hoê… haapapûraa hanahana. I teie mau mahana, rave rahi mau mata apî tei paari na roto i te haafifiraa o te feruriraa. Area râ [teie feia apî] te vai nei ta ratou faufaa no roto mai i te haaviraa, e te haamo‘araa ».⁴

Te feia o te tatarahapa mau e farii ïa i te Varua o te Mesia e e bapetizohia i roto i teie Ekalesia na roto i te faaoreraa o ta ratou mau hara. E tuuhia te rima i ni‘a i to ratou upoo e na roto i te mana o te autahu‘araa o te Atua e farii ratou i te Varua Maitai.⁵ Na roto « i te mana o te Varua Maitai, o te horo‘ahia mai e te Atua i te feia ato‘a e imi papû ia’na ».⁶ Ua faataa Elder Parley P. Pratt i te reira, te horo‘a o te Varua Maitai « mai te au… i te oaoa i te aau, [e] te maramarama i roto i to ratou mau mata ».⁷ O te Varua Maitai o te Faaao ïa tei fafauhia mai e te Faaora hou Oia a faatasaurohia’i.⁸ E horo‘a te Varua Maitai i te Feia Mo‘a mâ i te arata‘iraa e i te parururaa i te pae varua. E faarahi ïa i to tatou ite e te maramarama no te « mau mea ato‘a ».⁹ E tao‘a faufaa rahi teie i te taime a tupu ai te pouri i te pae varua i te rahi.

Te tupu rahi nei te ti‘aturi-raa-ore i roto i te ao nei i teie mahana. E au te ti‘aturi-raa-ore mai « te mana‘o ore e aore râ, te faaru‘eraa e aore râ, te haapaeraa i te mau feruriraa o te haapa‘oraa ».¹⁰ Eita te ti‘aturi-raa-ore e farii rave rahi mau mea o te taui-ore. Ta’na mau fâ tumu o te oaoa e te tau‘araa ia oe iho. E hoho‘a ê ihoa to te feia o te farii i te ti‘aturi-raa-ore. Mai te hi‘oraa a Isaia, « O to ratou iho mata te ite ia ratou ».¹¹

I teie nei te rahiraa o te ti‘aturi-raa-ore i roto i te ao nei, e rave rahi feia o te hiaai nei i te mau mea o te Varua e i te faarooraa i te parau a te Fatu. Ua tohu Amosa e : « Inaha te na ô maira te Fatu ra o Iehova, te fatata maira te tau e hopoi atu ai au i te o‘e i ni‘a i te fenua, e ere râ i te o‘e maa ore, e te hiaai i te pape, i te faaroo râ i te parau a Iehova :

« E horo ho‘i te taata i te tahi miti e te tahi miti ; e mai te apato‘erau e tae roa’tu i te hiti‘a o te râ i te hororaa e te ho‘iraa mai, i te imiraa i te parau a Iehova e aore roa râ e itea ».¹²

I hea tatou e faaroo ai i te mau parau a te Fatu ? E faaroo tatou i te reira mai roto mai i to tatou peropheta, te peresideni Gordon B. Hinckley, te Peresideniraa Matamua, te Pŭpŭ no te Tino Ahuru Ma Piti Aposetolo, e te tahi atu â mau hui mana faatere. E faaroo ato‘a tatou i te reira mai roto mai i to tatou mau peresideni tĭtĭ e episekopo. E faaroo te mau misionare i te reira mai o mai i to ratou mau peresideni misioni. E tai‘o tatou i te reira i roto i te mau papa‘iraa mo‘a. E nehenehe ato‘a tatou e faaroo i te reo iti haihai na roto mai i te Varua Maitai. Te faarooraa i te mau parau a te Fatu, e faateitei ïa ia tatou i to tatou pouri i te pae varua « ia tae i to’na ra maramarama ».¹³

Nahea tatou ia tape‘a i te maramarama e anaana mai i roto i to tatou iho mau mata e i ni‘a i to tatou mau mata ? E rave rahi o teie maramarama o te tae mai na roto mai i to tatou auraro, to tatou haapa‘o e to tatou haamo‘araa¹⁴ i te tahi mau parau mau faufaa rahi. Te matamua roa o teie mau parau mau, maori râ, te vai nei te hoê Atua o tei riro ei Metua no to tatou varua, ei Ia’na ra ho‘i tatou e faaite ai i ta tatou mau ohipa. A piti, o Iesu te Mesia, to tatou Faaora e to tato Taraehara. A toru, e titau mai te opuaraa no te oaoa i te haapa‘o i te mau faaueraa a te Atua. A maha, te horo‘a rahi a‘e a te Atua, o te ora mure ore ïa.¹⁵

E faahau atu te tahi atu â mau haamaitairaa i te maramarama i roto i to tatou mau mata. O te mau horo‘a ïa o te Varua no ô mai i te Faaora.¹⁶ Te popou, te oaoa, te rave-faaoti-raa e te hau e mau horo‘a te reira a te Varua o te tae mai na roto i te mana o te Varua Maitai.

No ni‘a i te parau no te oaoa i teie tau e no te tau a muri atu, e rave rahi o to tatou mau ti‘aturiraa e mau ti‘aturiraa faauruhia ïa. E mau ti‘aturiraa rarahi, e te tahi pae o te reira ua tuati ïa i to tatou iho faaroo. Ua niuhia teie mau ti‘aturiraa faufaa i ni‘a i to tatou faaroo, e tae noa’tu i teie mau mea i muri nei, aita te reira i ana‘ihia ia au i to ratou faufaa :

1. E na taata hanahana te Atua e Ta’na Tamaiti. Te Atua te Metua o to tatou ïa Rahu Nui, e Ta’na Tamaiti o Iesu Mesia, o to tatou ïa Faaora e te Taraehara. Ua hamanihia tatou i te hoho‘a o te Atua.¹⁷ Ua ite tatou i te reira no te mea ua ite mata Iosepha Semita ia Raua, ua paraparau mai Raua, e ua paraparau atu raua ia’na, e ua paraparau atu ia ratou.¹⁸

2. E taati te mau haamaitairaa o te hiero i te tane e i te vahine, eiaha noa no teie oraraa no te oraraa râ a muri atu. E taaamu-amui-ato‘a-hia mai te mau tamarii e te mau huaai na roto i te taatiraa.

3. E nehenehe te mau tane tata‘itahi melo no te Ekalesia e farii e e faaohipa i te autahu‘araa o te Atua. E nehenehe oia e faaohipa i teie mana hanahana i roto i to’na utuafare e i roto i te Ekalesia i raro a‘e i te hoê piiraa a te hoê o tei mau i te mana.

4. Te vai ato‘a ra te mau papa‘iraa mo‘a mai: te Buka a Moromona, Te Parau Haapiiraa e te Mau Parau Fafau, e te Buka Poe Tao‘a Rahi.

5. E a‘o te mau aposetolo e te mau peropheta i te parau a te Atua i to tatou nei mahana, i raro a‘e i te arata‘iraa a te peresideni Gordon B. Hinckley tei riro ei peropheta, ei hi‘o e ei heheu parau, oia te tumu no te heheuraa tamau i to tatou nei tau.

6. E farii te mau melo ato‘a i te horo‘a o te Varua Maitai. I te ui-raa-hia te peropheta Iosepha Semita, « no te aha te [Ekalesia o te Mau Mahana Hopea Nei ] i huru ê ai… i te tahi mau haapa‘oraa i teie mahana », pahono maira oia e, no te mea te vaira « te horo‘a a te Varua Maitai na roto i te tuuraa rima… [e] tei roto te mau mea’toa tei faaturahia i te horo‘a a te Varua Maitai ».¹⁹

7. Te faateiteiraa i te autuahineraa. Hoê â faito to te mau vahine i to te mau tane i mua i te Fatu. Ua taa ê râ te ohipa a te mau vahine i ta te mau tane. Ua tae mai teie ite na roto i te Faaho‘i-faahou-raa-hia mai te evanelia i roto i to’na îraa, na roto i te aau mehara e ua horo‘ahia te mau hopoi‘a rahi no te ti‘araa metua vahine e te faaamuraa. Ua rahi atu â te tahi mau horo‘araa i tae mai i te mau vahine mai te matahiti 1842 mai â i to te peropheta Iosepha Semita, na roto i te i‘oa o te Atua, horo‘araa i te mau taviri ia ratou mai te haamataraa mai â o te ao nei.²⁰

I te tahi mau matahiti i ma‘iri, ua faauehia Constance, hoê piahi haapii tuati ma‘i ia tauturu i te hoê vahine tei pepe to’na avae i roto i te hoê ati puromu. Aita teie vahine e hinaaro i te tauturu a te taote no te mea, aita oia i atu‘atu maitaihia i te fare ma‘i. Ua ri‘ari‘a oia, e ua ape i te tahi mau taata. I te taime matamua to Constance haereraa e hi‘o ia’na, ua tiahihia oia i rapae. I te piti o te taime, ua faati‘a oia ia Constance ia tomo mai. I teie taime, ua î roa te avae i te mau tutu‘a e te haape ra te tahi mau vahi o te avae. Aita ihoa râ oia e hinaaro ia rapaauhia oia.

Ua pure Constance e i roto noa e piti e aore râ, e toru mahana, ua pahonohia mai oia. Ua rave oia i te mau raau rapaau no te farereiraa i muri mai. E no te mea ua ati roa teie vahine i te mauiui, ua faati‘a oia ia tuuhia teie raau i ni‘a i to’na avae. E ua aparau raua ia afa‘ihia oia i te fare ma‘i. Ua haapapû Constance ia’na, e riro to’na faaearaa i te fare ma‘i ei mea maitai. I roto e piti mahana i muri mai, ua afa‘ihia teie vahine i te fare ma‘i. I to Constance haereraa e hi‘o ia’na, ua ataata mai oia ma te parau e, « Ua haaputapû oe i to‘u mana‘o ». Ma te mana‘o-ore-hia, ui mai nei teie vahine ia’na e, « Eaha ta oe haapa‘oraa ? » Faaite atura Constance e e melo oia no Te Ekalesia a Iesu Mesia i te Feia Mo‘a i te Mau Mahana Hopea Nei. Pahono mai nei teie vahine, « Ua ite ihoa vau. Ua ite au e, ua tonohia mai oe ia‘u mai te mahana matamua mai â. Te vaira teie maramarama i ni‘a i to oe mata o ta‘u i ite no to oe faaroo. Ua tuu vau i to‘u ti‘aturiraa i ni‘a ia oe ».

Toru ava‘e i muri mai ua ora te avae. Ua haere te mau melo o te paroita e tata‘i i te fare o teie nei vahine paari e ua tama i to’na aua. Ua haere te mau misionare ia’na ra, e ua bapetizohia oia.²¹ Ua na reira oia no te mea ua ite oia i te maramarama i ni‘a i teie nei piahi utuutu ma‘i.

I te hoê taime ua uihia te peresideni Brigham Young e, no te aha tatou e vaiiho otahi noa-hia ai e te oto ho‘i, teie ta’na pahonoraa, ia haapii te taata nahea ia « ora oia ana‘e ra… ia ite eaha râ ïa o ta’na e rave… e ia tamata i to’na ti‘amâraa – ia vai parau-ti‘a i roto i te pouri ».²² E mea ohie ïa no te ite atu tatou i te « maramarama o te evanelia… ia anaana i ni‘a… ma te turama i te mau taata ».²³

Te taviniraa i roto i teie Ekalesia o te hoê ïa haamaitairaa nehenehe e te hoê rave‘a no te hopoiraa mai i te maramarama i roto i to tatou mau mata e i ni‘a i to tatou mata. Mai ta te Faaora i parau, « Oia ato‘a to outou maramarama, ia anaana ïa i mua i te aro o te taata nei, ia hi‘o ratou i ta outou ohipa maitai, e ia haamaitai i to outou Metua i te ao ra ».²⁴ Aita e parau no te faaite i te mau maitai e roaa ia tatou na roto i te ohipa taviniraa i roto i teie Ekalesia. Ua fafau mai te Fatu e, mai te mea e rave itoito tatou i te ohipa o to tatou piiraa, e roaa te oaoa e te poupou ia tatou.

Ua ui Alama e, ua roaa anei To’na hoho‘a i to tatou mata.²⁵ E tae mai te maramarama mo‘a i roto i to tatou mau mata e i ni‘a i to tatou hoho‘a mata ia taamuhia tatou i to tatou Metua i te Ao ra e i Ta’na Tamaiti, to tatou Faaora e to tatou Taraehara. Na roto i teie taamuraa, e riro to tatou mata ei mau hi‘o no taua « haapapûraa hanahana »²⁶ e te ora nei Oia.

Te faaite nei au i to‘u iteraa papû no te hanahana o teie ohipa mo‘a o ta tatou i fafau i te rave. E roaa te mau iteraa papû na roto i te heheuraa.²⁷ Ua roaa teie heheuraa i to‘u aau i to‘u apîraa. Aita e mau ra ia‘u te hoê ohipa taa ê tei tupu no te haapapûraa ia‘u i te reira. Ua vai tamau noa râ te reira ei tuhaa no to‘u feruriraa. Te oaoa nei au no teie haapapûraa i te ite i nehenehe ai ia amo i te mau fifi o te oraraa e tae mai ia tatou paato‘a.

Ua faauruhia tatou e e faauruhia’tu â tatou e te mau iteraa o te mau taea‘e e te mau tuahine i roto i teie amuiraa. Te ti‘aturi nei au e, ua roaa ato‘a ia outou teie mau iteraa. E nehenehe outou e farii i te hoê haapapûraa e, e parau mau te mau mea i parauhia. Ua haapii Brigham Young « eiaha te Feia Mo‘a noa i tae mai… i te feia ato‘a râ o te mau nunaa, te mau fenua e aore râ te mau motu o te ora nei i te hoê haapa‘o tei haapiihia e to tatou Faaora e Ta’na mau Aposetolo, oia’toa e Iosepha Semita… a faaite ato‘a i taua iteraa papû ra, e haamatarahia to ratou mau mata mai to tatou ato‘a, ua iritihia to ratou aau mai to tatou ato‘a, e e ite e e maramarama ratou mai ia tatou ato‘a ».²⁸

Ua ite au ma to‘u aau ato‘a e te ora nei te Atua. Te ti‘aturi nei au e e haamaramarama mai Oia i to tatou oraraa i To’na here no tatou tata‘itahi mai te mea e tutava tatou ia ti‘amâ no te farii i taua here ra, na roto i te i‘oa mo‘a o Iesu Mesia, amene.