Video : Ei mauhaa i roto i te rima o te Atua
E video teie tei patahia i roto i te putuputuraa rahi a te Sotaiete Tauturu, no ni‘a i te peresideni Gordon B. Hinckley i te faati‘araa i te aamu o te Sotaiete Tauturu. I roto ato‘a i te reira video, te faaitehia ra te peropheta Iosepha Semita, o Lucy Mack Smith, e te mau tuahine matamua no te Sotaitete Tauturu, te putuputu ana‘e ra i roto i te fare toa uteute.
Peresideni Hinckley : 18 ana‘e melo i te taime a faati‘ahia ai te Sotaiete Tauturu i te 17 no mati 1842 i te oire no Navu ; 160 matahiti i muri a‘e, ua hau atu te reira i te pae milioni i roto i te mau fenua rarahi e te mau fenua na‘ina‘i ati a‘e te ao nei ; ua riro te reira tupuraa ei ohipa maere rahi e te faahiahia.
E mau mea rii tumu tei faatupu i te Sotaiete Tauturu hou to’na faanahonaho-raa-hia. Ua iritihia mai te mau mana‘o tumu no te mau vahine tei faatoro i te rima no te tauturu i te faahoturaa o te maitai no te taato‘araa, no te tauturu i te feia tei roohia i te ati, e no te haamaitai i to ratou iho mau mana‘o e ta ratou mau taleni. I te reira taime Iosepha Semita i te faanahonahoraa ia ratou.
Iosepha Semita : E nehenehe teie « sotaiete no te mau tuahine e faahiaai i te mau taea‘e ia rave i te mau ohipa maitatai no te mau hinaaro o te feia veve – te imiraa i te mau taviniraa no te aroha, e i te haapa‘oraa i to ratou mau titauraa – i te tautururaa na roto i te faatiti‘aifaroraa e i te faaitoitoraa i te mau viretu o te oire ».1
Peresideni Hinckley : Na roto mai i taua haamataraa haehaa ra, ua tupu te mea o ta‘u e ite nei oia te faanahonahoraa rahi e te manuïa roa i te ao taato‘a nei.
I taua putuputuraa matamua ra, i to Emma H. Semita ma‘iti-raa-hia ei peresideni, teie ta’na i parau : « e mea ti‘a i te mau melo ato‘a ia faaite i te hiaai puai no te rave i te maitai ».2 Te huru tera o te varua i reira ra, o te huru ïa o te varua i teie nei. E mea ti‘a ia vai teie parau-tumu arata‘i na roto i te mau u‘i ato‘a e fanauhia mai – ia « hiaai puai te mau melo no te rave i te maitai ».
Emma Smith : « E rave tatou i te hoê ohipa taa ê… E tia‘i tatou i te mau mea rû taa ê ».3
Iosepha Semita : « Teie sotaiete, no te imiraa mai ïa i te ite na roto i te haapa‘oraa o ta te Atua i faati‘a – [na roto i] te rave‘a a te feia o tei faataahia no te arata‘i ».4
« E naturaraa no te vahine te faaiteraa i te aroha e tei roto outou i te hoê ti‘araa ia nehenehe outou ia ohipa ia au i teie mau iteraa o ta te Atua i tanu i roto ia outou. Mai te mea e haapa‘o outou i teie mau parau-tumu, aue ïa i te faahiahia e i te hanahana ! – mai te mea e haapa‘o outou i te mau horo‘a, e ore roa te mau melahi e tape‘ahia’tu i te faahoaraa ia outou… Aita e tama‘i, aita e maniania, aita e mâroraa maoti râ, te auraro, te here, te mâ, teie te mau mea e ti‘a ia outou ia faaite ia matou…
« Ei reira ïa te mau haamaitairaa o te ra‘i e niniihia mai ai i raro nei…
« Ia ho‘i outou i te fare, eiaha e faahiti i te mau parau haamauiuui, mai teie atu nei râ taime, ia faaheihia ta outou mau ohipa i te parau maitai, te aroha e te here…
« A tupu ai outou i roto i te viivii-ore e te viretu, a tupu ai outou i roto i te maitai roa, a opere i to outou here e te aroha ia vetahi ê – e mea papu e ua oto maoro noa na outou e ua faaoroma‘i i te mau hara e i te hape a te taata nei. E mea faufaa te varua o te taata nei ! …
« … Te faaho‘i atu nei au i te taviri ia outou na roto i te i‘oa o te Atua, e ia popou teie nei Sotaiete, e ia niniihia te ite e te maramarama i ni‘a ia‘na mai teie atu taime – o teie te haamataraa no te mau mahana maitai no teie Sotaiete ».5
Peresideni Hinckley : Ua vai ti‘a noa teie parau tohu ei parau mana i roto i te hoê tenetere e te afa no te Sotaiete Tauturu a Te Ekalesia a Iesu Mesia i te Feia Mo‘a i te Mau Mahana Hopea Nei.
Teie te parau a Lucy Mack Semita, te metua vahine o te peropheta i parau i te mau tuahine i Nauvoo,
Lucy Mack Smith : « E mea ti‘a ia here tatou te tahi i te tahi, ia haapa‘o te tahi i te tahi, ia tamahanahana te tahi i te tahi e ia imi i te ite ia nehenehe tatou paato‘a ia parahi amui i te ra‘i ».6
Peresideni Hinckley : Ua faaite te aamu o te faanahonahoraa e, aita te mau vahine o te Ekalesia e tia‘i ia parahi amui ratou i te ra‘i ra, no te tamata i te hotu monamona no te mau ohiparaa o ta ratou i faaite na.
Ua faaohipa ratou i te mau mea o te ra‘i i ni‘a i te fenua na roto i to ratou aupururaa te tahi e te tahi, te tamahanahanaraa te tahi e te tahi, te haapiiraa te tahi e te tahi i roto i te oraraa nei. O vai te nehenehe e faito i te semeio tei tupu i ni‘a i te oraraa o te mau milioni vahine tei faarahihia te ite, tei faa‘aanohia te hi‘oraa, tei faaroahia te oraraa, e tei faarahihia te maramarama no te mau mea a te Atua e te mau haapiiraa maitatai e rave rahi tei haapiihia i roto i te mau pureraa a te Sotaiete Tauturu ?
O vai o te nehenehe e faito i te popou tei tupu i roto i te oraraa o teie mau vahine a putuputu-amui ai ratou, ma te haamatau i roto i te paroita e aore râ, i te amaa, ma te haamaitai i te oraraa o te tahi e te tahi na roto i te faahoaraa maitai e te faahereherehia ? O vai te nehenehe e haro‘aro‘a i te mau ohipa no te aroha o tei ravehia, te maa tei tuuhia i ni‘a i te airaa maa maa-ore, te faaroo tei faaamuhia i te mau hora hepohepo, te mau pepe o tei rapaauhia, te mau mauiui tei faaorahia e te mau rima o te aroha e o te mau parau mărû, te tamahanahanaraa o tei faaitehia i te taime no te pohe e no te tumu o te mo‘emo‘e ?
A paraparau ai oia i te Sotaiete Tauturu, teie ta te peresideni Joseph F. Smith i parau : « Ua faatupuhia teie faanahonahoraa na roto i te hanahana, ua faati‘ahia ma te hanahana, ua haamauhia ma te hanahana, ua faatoro‘ahia e te Atua no te ora o te varua o te mau vahine e o te mau tane. Aita e faanahonahoraa e vai nei no te faaau atu i ni‘a… te ore e nehenehe e rave i te ohipa a teie faanahonahoraa…
« … A faatupu i te [Sotaiete Tauturu] na mua roa, a rave ia rahi, a rave ia teitei roa, ia numera hoê roa e te maitai i te hoê noa’tu faanahonahoraa i te ao nei. Ua piihia outou e te reo o te peropheta a te Atua no te raveraa i te reira, ia riro ei mea teitei, ei mea rahi a‘e e te maitai rahi, te mâ e te itoito i te faaturaraa i te parau-ti‘a ».7
Ia haamaitai mai te Atua i te Sotaiete Tauturu o Te Ekalesia a Iesu Mesia i te Feia Mo‘a i te Mau Mahana Hopea Nei. Ia vai mai te varua no te here o tei faaitoito i to’na mau melo hoê tenetere e te afa i teie nei, e o te tamau noa nei i te tupu e î noa‘e te fenua nei. Ia haaputapû ta ratou ohipa no te aroha i te oraraa o te feia e rave rahi. Ia haaputapû te maramarama e te haapiiraa e te ite, e te parau-mau mure-ore i te oraraa o te mau u‘i o te mau vahine e fanauhia mai, i roto i te mau nunaa ato‘a o te ao nei, no teie faanahonahoraa taa ê e te hanahana. Ia mauruuru tata‘itahi ratou i ta ratou mau hopoi‘a e mau haamaitairaa rahi ia riro ei « mauihaa i roto i te rima o te Atua ia faatupu i teie nei ohipa rahi » (Alama 26:3).