Te parau mau i faaho‘i-faahou-hia mai

Ati a‘e ia tatou nei, te ite nei tatou i te maraaraa te hinaaro o te taata i te arata‘iraa pae varua i te ao ato‘a nei, na roto i te maraaraa te mau ati o te natura e ta te taata iho i faatupu. Te tumu no teie hinaaro rahi to te taata i te arata‘iraa pae varua no te mea ïa e, e mau tamarii tatou na te hoê Metua hanahana i te Ao ra. Te taa ra ïa ia tatou e no te aha, ia û ana‘e tatou i te fifi, e fariu ti‘a tatou i ni‘a i to tatou Rahu nui no te ani i te tauturu. Ua ite to tatou Metua here i te Ao ra e, no te ino te huru o te ao nei, no te teimaha te titauraa, e te mau ati, na te reira e tura‘i i Ta’na mau tamarii ia imi i Ta’na maa varua. Te titauraa maoti râ, nahea ia imi i te reira.

I ora na tatou i mua i te aro o te Atua to tatou Metua Mo‘a e Ta’na Tamaiti Here, o Iesu Mesia, i roto i te hoê oraraa hou te oraraa tahuti nei. I reira, ua roaa ia tatou te ite no ni‘a i te faanahonahoraa no te faaoraraa a to tatou Metua, e te tauturu Ta’na e horo‘a mai ia fanau-ana‘e-hia mai tatou ei mau taata tahuti i ni‘a i te fenua nei. Ua haamaramaramahia mai te tumu matamua roa o te oraraa. Ua parauhia mai ia tatou e:

« E hamani tatou i te hoê ao ei parahiraa no ratou ;

« E e tamata tatou ia ratou i reira, ia ite tatou e, e haapa‘o anei ratou i te mau mea ato‘a ta te Fatu to ratou Atua e faaue ia ratou ra ;

« E o ratou o te haapa‘o i to ratou ai‘a matamua, e faarahihia ta ratou… e o ratou o te haapa‘o i te piti o to ratou ai‘a, [oia ho‘i, ia haapa‘o i roto i te oraraa tahuti nei] e faarahihia to ratou hanahana a muri, e a muri noa’tu ».¹

Te faahiti nei teie mau parau i te tumu rahi o to outou parahiraa i ni‘a i te fenua nei. Taua tumu rahi ra, o te tamataraa ïa ia outou ia haapa‘o i te mau faaueraa a te Fatu, e i reira, tupu atu ai i te rahi i roto i te ite, te aravihi, e te mau huru faito ato‘a. O te fariiraa ïa i te mau oro‘a ato‘a i titauhia, e ia rave e ia haapa‘o i te mau fafauraa ato‘a i titauhia. O te faatupuraa ïa e te faaamuraa i te hoê utuafare. I roto i teie ohipa, te vai ra te mau taime tamataraa e te oaoa, e te opuaraa ia ho‘i, ma te oaoa, i te mea e, ua haapa‘ohia te mau titauraa o te oraraa tahuti nei, no te farii i te mau haamaitairaa hanahana tei fafauhia no te reira haapa‘o.

No te farii i te mau maitai rarahi o te tau tamataraa e te tupuraa tahuti nei, ua haapiihia e ua faaineinehia outou no te mau mea ta outou tata‘itahi e farerei i roto i te oraraa tahuti nei. Ua haamaramaramahia mai outou i te faanahoraa a to tatou Metua no te arata‘i ia tatou i roto i te oraraa tahuti nei. E ma‘iti oia i rotopu i te mau tamarii varua itoito e te haapa‘o, i te mau peropheta e i te tahi atu mau tavini haamanahia no te farii i To’na autahu‘araa, no te haapii i Ta’na mau parau mau, e ia arata‘ihia ratou no te haaparare i taua parau mau ra i rotopu i Ta’na mau tamarii i ni‘a i te fenua nei. E horo‘a te Atua i te tamarii tata‘itahi i te ti‘amâraa morare, oia ho‘i, te ti‘araa ia ma‘iti i Ta’na parau, e aore ra, ia pato‘i i te reira. E faaitoitohia te mau tamarii ato‘a ia haapa‘o, eita râ e faahepohia. Te taa ra ïa ia outou e, e ti‘a ia outou ia ma‘iti i to outou haere‘a i ni‘a i te fenua nei, eita râ e ti‘a ia outou ia ma‘iti i te hopearaa o ta outou mau ma‘itiraa. Na te ture mure ore te reira e faaoti.

Mai te mea e, e ora te hoê taata i te oraraa e ti‘a ai ia’na ia farii i te mau haamaitairaa teitei roa a‘e i fafauhia, tera râ, aita oia e fana‘o i te reira i ni‘a i te fenua nei, no te tahi mau tumu aita e roaa ia’na ia arai, ua faataahia ïa te hoê rave‘a i roto i te oraraa i muri a‘e i te tahuti nei, no te faaho‘i i te reira. E iriti-ê-hia to outou haamana‘oraa i te mau mea no te oraraa hou te tahuti nei, ei haapapû-maitai-raa i te tamataraa, tera râ, e horo‘ahia mai te arata‘iraa ia outou no te faaite ia outou nahea outou ia ora. Te faanahonahoraa no te faaoraraa a to tatou Metua i roto i teie oraraa, e tae noa’tu i te rave‘a no te ho‘iraa i piha‘i iho Ia’na, e parauhia te reira te evanelia a Iesu Mesia.

Hou te Hamaniraa o te fenua nei, ua tupu te aroraa no te pato‘i i te faanahonahoraa a to tatou Metua, arata‘ihia te reira e te hoê varua maramarama, tera râ, e varua ino ato‘a, ta tatou i ite, oia ho‘i, o Lucifero e aore ra, o Satane. Ua hinaaro oia e taui i te tahi mau titauraa. E no te papû ta’na tatararaa, pee atura hoê i ni‘a i te toru o te mau tamarii varua a te Metua ia Satane, e ua tiavaruhia’tura ratou. Ere atura ratou i te rave‘a faahiahia ia tupu i te rahi, e i te haamaitairaa faufaa o te hoê tino tahuti.

Ite iho ra to tatou Metua Mo‘a, tei ite papû maitai roa i Ta’na mau tamarii tata‘itahi e, te vai ra te taime, e rave rahi o te faahemahia, o te topa i roto i te mau mea o te ao nei, e o te faaru‘e i te iteraa papû e te mau haapiiraa a To’na mau peropheta. E mono te poiri pae varua i te maramarama o te parau mau no te faatupu i te taivaraa. Mai te taime a tuuhia mai ai te parau mau e tae roa’tu i te taime a mo‘e roa ai te reira, e parauhia te reira pu‘e tau, te tau tuuraa. E ma‘itihia te mau peropheta i roto i te mau tau tuuraa, no te tape‘a i te parau mau i ni‘a i te fenua no te feia faaroo, noa’tu te haapi‘oraa e aore ra, te pato‘iraa a te mau taata e rave rahi.

Ua haapii outou e, na te maramarama o te Mesia e horo‘a mai i taua arata‘iraa ra. Na te reira e horo‘a i te maramarama e te ora i te mau mea ato‘a. Na te reira e muhumuhu i roto i te mau taata ato‘a o te fenua nei ia ite i te parau mau i te parau hape, i te parau ti‘a i te parau ti‘a ore. E ere te Maramarama o te Mesia i te hoê taata. E mana râ te reira no roto mai i te Atua to tatou Metua na roto i Ta’na Tamaiti, o Iesu Mesia, e mai te mea e, e haapa‘o tatou i te reira, e arata‘i te reira i te hoê taata ia farii i te arata‘iraa e te faaururaa hau atu a te Varua Maitai. Ua faaitehia ia outou e, na te hara e faaino i te faaururaa a te Varua Maitai, tera râ, e afaro faahou te reira na roto i te tatarahapa mau. Ua oaoa outou i te iteraa e, te taata o te haapa‘o e o te farii i te mau oro‘a ti‘a, e te mau fafauraa i titauhia, e o te haapa‘o tamau noa, e roaa ia’na te hanahana tiretiera, e e ora oia i mua i te aro o te Metua e Ta’na Tamaiti e a muri noa’tu.

Nahea tatou e ite ai i te reira mau parau mau ? Nahea outou ia haapapû i to ratou ti‘a mau. Ati a‘e ia outou, te ite nei outou i te papû ore rahi no ni‘a i te huru o te Atua, Ta’na mau haapiiraa, e te tumu no te oraraa nei ? No reira, nahea te Atua, to tatou Metua i te Ao ra, ia arata‘i i Ta’na mau tamarii i ni‘a i te fenua nei ? Nahea Oia ia faaite mai i te parau mau e i To’na hinaaro, ia nehenehe i te mau tamarii faaroo ia rave i te ma‘itiraa ti‘a e ia farii i te mau haamaitairaa ta te Metua i te Ao ra e hinaaro nei ia farii ratou ? E faataa’tu vau ?

Mai te faatumu-raa-hia teie nei fenua, ua haapa‘o maite te Atua to tatou Metua i Ta’na faanahonahoraa ta‘u i tatara’tu na. Ua haa o Adamu no te faaite i ta’na mau tamarii e i to’na huaai, i te faanahoraa a to tatou Metua. E rave rahi tei ti‘aturi e ua haamaitaihia ratou. Area râ, e rave rahi tei faaoti e faaohipa ratou i ta ratou horo‘a hanahana, oia ho‘i, te ti‘amâraa morare no te pato‘i i Ta’na mau haapiiraa e Ta’na evanelia. Tei ore i haapa‘o ra, ua pato‘i ïa ratou i te parau mau, ua ruri ê i te mau haapiiraa e te mau oro‘a, e ua faaatea ia ratou i te Atua. I te hoê tau, ua mono te poiri pae varua i te maramarama o te parau mau, e ua mo‘e ê te autahu‘araa e te Ekalesia mau i rotopu i te taata nei.

Te mau peropheta mai ia Enoha, Noa, Aberahama, e o Mose, ua faaapî ratou i te parau mau no to ratou tau tuuraa, tera râ, ua tae i te hoê taime, ua pato‘i te rahiraa taata i te reira tautooraa ta ratou. I te afa ti‘a o te mau tau ra, ua fanauhia mai Iesu Mesia, te Tamaiti here a te Atua, i ni‘a i te fenua nei. Ua faaho‘i faahou mai Oia i te parau mau, e ua utuutu ma te here e te aroha. Ua faati‘a faahou Oia i Ta’na Ekalesia i ni‘a i te fenua nei e te mau aposetolo e te mau peropheta. Ma te mamae rahi ua faatupu Oia i te faaueraa hanahana a To’na Metua Mo‘a ia riro ei Faaora e ei Taraehara no tatou. Ua farii Oia ia faatataurohia Oia. Ua ti‘afaahou mai Oia e ua upooti‘a i ni‘a i te pohe tino. Ua riro To’na tusia taraehara ei horo‘a hanahana e ti‘a ai i te feia tei tatarahapa ia faaorehia ta ratou mau hara, e ia farii i te ora mure ore. Noa’tu râ i te reira, ua pato‘i te mau taata ato‘a Ia’na, maori râ, te tahi rii noa taata. Ua hamani-ino-hia Ta’na mau Aposetolo e te mau melo o te Ekalesia, e e rave rahi tei taparahi-pohe-roa-hia. Ua paremo te fenua nei i roto i te hoê tau roa ri‘ari‘a o te poiri pae varua.

Te faaite ra te mau papa‘iraa mo‘a e, i roto i te roaraa o te aamu, i te tahi mau taime faufaa roa, ua faaroohia te reo o te Atua te Metua. E rave rahi taime, ua fâ tino roa mai Iesu Mesia iho i te mau taata tei ma‘itihia. Tera râ, hoê noa iho hi‘oraa hanahana e te taa ê roa ta tatou i ite, no ni‘a i te fâ tino-roa-raa mai te Atua te Metua iho. Ua tupu te reira e Ta’na Tamaiti Mo‘a, o Iesu Mesia, i mua i te hoê noa iho taata. Taua taata ra, o Iosepha Semita tamaiti ïa, te hoê varua maere rahi, tei faaineinehia hou te faatumu-raa-hia te ao nei. E riro mai oia te peropheta tei hau roa i te rahi, tei tonohia i ni‘a i te fenua. No ni‘a i te mau mea e tupu mai, te vai ra te faahomai o te mana autahu‘araa, te Faaho‘i-faahou-raa mai te Ekalesia tei faati‘ahia e te Faaora, e tae noa’tu i te mau papa‘iraa mo‘a e titauhia no to tatou tau o te horo‘ahia mai e te Faaora na roto i te heheuraa tamau.

Mai ni‘a mai i te mau mea Ta’na i hamani, ua pou roa mai to tatou Metua maitai, i te fenua nei no te haapapû i te parau mau, no te haapurara i te mau ata rahi o te poiri pae varua, no te faaite i To’na huru mau, no te faaho‘i mai i te hoê îraa o te parau mau, e no te horo‘a mai i te rave‘a hoê roa e roaa ai te parururaa, te arata‘iraa pae varua ia tatou. Ua haamata teie Faaho‘iraa faufaa rahi na roto i te parau ohie roa a te Metua: « O Ta‘u Tamaiti here teie. A faaroo Ia’na ! »² Ua tupu ihora te Faaho‘iraa mai o te parau mau, te autahu‘araa, te mau oro‘a mo‘a, e te Ekalesia mau e tae noa’tu i te faanahoraa no te faaoraraa e no te oaoa a te Metua. Mai te mea e, e haapa‘ohia taua faanahoraa ra, na te reira e tauturu ia outou ia upooti‘a i te mau titauraa ato‘a o te oraraa nei. Na te reira e tauturu ia outou, na roto i te faaroo e te haapa‘o, ia farii i te arata‘iraa no te ra‘i mai o ta outou e titau ra. Na te reira e horo‘a i te puai i roto ia outou no te ora mai tei titauhia ia outou ia ora, noa’tu te ino o te ao nei.

Eaha te tumu faufaa rahi mau i titauhia ai te taeraa mai te Atua te Metua mai teie te huru ? No te faatupu ïa i te « tau tuuraa no te îraa o te mau tau » tei tohuhia e te mau peropheta no te faufaa tahito e te faufaa apî. Ua tae i te taime e haaputuputu ai te Metua i « te mau mea ato‘a i roto i te Mesia »,³ no te horo‘a mai i te mau taviri o te basileia e no te faaho‘i mai i te ite tei horo‘ahia mai i te mau tau tuuraa i tahito ra,⁴ a haamau ai oia i te tau tuuraa hopea o te evanelia no teie fenua.

No To’na ite e, e fifi te mau taata e rave rahi no te ti‘aturi e, ua tupu mau taua Faaho‘iraa ra, ua horo‘a roa mai te Faaora i te hoê ite materia no te faati‘a i te parau mau o te reira, oia ho‘i, te Buka a Moromona. Ua faaitehia i roto i to’na mau api te rave‘a no te haapapûraa i te parau mau o te Faaho‘i-faahou-raa mai. Ua horo‘a ato‘a mai Oia i te tahi atu mau papa‘iraa mo‘a haamaramarama i titauhia no to tatou nei anotau i roto i te Parau Haapiiraa e te mau Parau Fafau e te Buka Poe Tao‘a Rahi na roto ia Iosepha Semita. Eita e rahi te maere no te ohipa a Iosepha Semita tei faatumuhia i ni‘a i te Faaora, To’na Taraehara e Ta’na haapiiraa.

A porohia ai teie poro‘i ora na te ao ato‘a nei, ua puai ato‘a o Satane i te tura‘iraa i te taata ia pato‘i i te reira e aore ra, ia imi i te reira i te vahi ti‘a ore. Te rahiraa o te mau tamarii a te Metua, aita ratou i haamo‘e noa i to ratou Metua i te Ao ra e i te opuaraa o te oraraa tahuti nei, ua varavara ato‘a râ te taime a haamana‘o ai ratou Ia’na, aita ato‘a ho‘i ratou i feruri hohonu i te tumu i tae mai ai ratou i ô nei, i te tahuti nei. Ua arata‘ihia ratou i roto i te mau mea faufaa ore o te faafariu ê ia ratou i te mau mea faufaa. Eiaha roa’tu outou e topa i roto i te reira hape.

Ei tavini no Iesu Mesia, te faaite papû nei au e, e parau mau te mau mea ta‘u i tatara atu. Eita e rava‘i te tahi ite iti noa no ni‘a i te parau mau, e aore ra, no ni‘a i te huru mau o te Metua e Ta’na Tamaiti to tatou Faaora. Mea ti‘a ia tatou tata‘itahi ia ite e, o vai mau raua. Mea ti‘a ia outou ia ite i to raua here rahi ia outou. Mea ti‘a ia outou ia ti‘aturi e, mai te mea e, e tamau maite outou i te haapa‘o i te parau mau ma te maitai roa, e tauturu mai raua ia outou ia faatupu i te opuaraa o to outou oraraa i te fenua nei, e e haapuai raua ia outou no te farii i te mau haamaitairaa i fafauhia mai. No te haapa‘o i te mau faaueraa a te Atua, e titauhia ia ite i te reira. E titauhia te faaroo i te reira. E roaa te reira iteraa na roto i te tai‘oraa i te haapiiraa. O te reira te hoê o te mau tumu te peresideni Hinckley e to’na na tauturu i titau ai i te ava‘e tiurai ra i te mau melo ato‘a ia tai‘o i te Buka a Moromona hou te hopea o te matahiti. Ua fafau mai ratou e: « O ratou o te tai‘o i te Buka a Moromona, e haamaitaihia ratou na roto i te fariiraa i te hoê tuhaa o te Varua o te Fatu, te hoê hinaaro rahi ia haapa‘o i te mau faaueraa, e te hoê iteraa papû paari no ni‘a i te huru mau o te Tamaiti a te Atua ».⁵ Ua tamata vau i te reira fafauraa i roto i to‘u oraraa, e ua haapapû vau i ta’na parau mau. Mai te mea e, ua haapa‘o outou i te reira parau, te taa ra ïa ia outou ta‘u e parau ra. Mai te mea râ e aita â outou i haamata, e taime â to outou no te haamaitai i to outou oraraa na roto i te tai‘oraa i te mau api o te Buka a Moromona. Te taparu nei au ia outou ia rave i te reira.

Ei aposetolo no te Fatu o Iesu Mesia, te faaite papû nei au e, ua faatupu mau te Atua to tatou Metua e o Iesu Mesia, na roto ia Iosepha Semita, i te Faaho‘i-faahou-raa mai, o ta‘u i paraparau atu na ; tei ni‘a faahou i te fenua nei te maramarama o te parau mau e te Ekalesia a Iesu Mesia ; ua heheu-faahou-hia mai te natura mau o te Atua te Metua e Ta’na Tamaiti, e ua haapapûhia mai te rave‘a ti‘a no te farii i te arata‘iraa varua. Te faaite papû nei au e, e faaitehia mai te faanahonahoraa a te Atua no te faaoraraa i te feia ato‘a e imi i te reira ma te parau-ti‘a. A farii i te reira. A haapa‘o i te reira ia roaa ho‘i te hau e te oaoa ia outou. Na roto i te i‘oa o Iesu Mesia ra amene.