Faaineineraa no te faaho‘i-faahou-raa mai e te tae-piti-raa mai : « Ei ni‘a a‘e to‘u rima ia oe »

I teie matahiti, te faahanahana nei tatou i te 200raa o te fanauraa o te peropheta Iosepha Semita. Te faaite papû nei matou i to te ao nei e, e peropheta mau oia na te Atua tei ma‘itihia no te faaho‘i mai i te evanelia a Iesu Mesia. Ua na reira oia i raro a‘e i te arata‘iraa a to tatou Faaora, o tei parau i te hoê peropheta e, « O Iehova to‘u i‘oa, e ua ite au i te hopea mai te matamua mai ; no reira, ei ni‘a a‘e to‘u rima ia oe ».¹

Ua ite au i te rima o te Fatu i roto i te Faaho‘i-faahou-raa mai o te evanelia. Na roto i te mau tusia faauruhia a te mau tamarii a te Atua o te mau tau ato‘a, ua haamauhia te niu o taua Faaho‘i-faahou-raa mai, e te faaineine nei te ao nei no te Ho‘i Piti-raa Mai o to tatou Fatu e Faaora o Iesu Mesia.

Ua faati‘a-matamua-hia na Ta’na evanelia i ni‘a i te fenua nei e te peropheta ra Adamu e ua haapiihia i te mau tau tuuraa evanelia ato‘a na roto i te mau peropheta mai ia Enosa, Noa, Aberahama, Mose, e te tahi atu â. Ua tohu teie mau peropheta i te taeraa mai o Iesu Mesia ia pohe no te mau hara a to te ao nei. Ua tupu teie mau tohu. Ua faati‘a te Faaora i Ta’na Ekalesia. Ua pii i Ta’na mau aposetolo e ua faati‘a i To’na autahu‘araa. Te mea faufaa roa’tu râ, ua horo‘a Oia i To’na iho ora e ua ti‘afaahou mai ia nehenehe tatou ia ti‘afaahou, no reira ua faaotihia te tusia taraehara. E ere râ te reira i te hopea.

I muri mai i te ti‘a-faahou-raa o te Faaora, ua horo‘a Oia i te hopoi‘a i Ta’na mau Aposetolo no te arata‘i i te Ekalesia e no te faatere i te mau oro‘a o te evanelia. No to ratou haapa‘o i teie hopoi‘a, ua hamani-ino-hia ratou, e ua maratirihia vetahi. Ei hopearaa, ua iriti-ê-hia te mana o te autahu‘araa o te Fatu i te ao nei, e ua topa te ao nei i roto i te pouri o te pae varua. I te mau tenetere i muri mai, ua farii te mau tamarii a te Atua i te maramarama o te Mesia, e ua nehenehe ratou ia pure e ia farii i te faaururaa a te Varua Maitai. Area te îraa o te evanelia, ua mo‘e ïa. Aita roa e taata i te ao nei e mana to’na no te arata‘i i te Ekalesia e aore râ, no te raveraa i te mau oro‘a mo‘a mai te bapetizoraa e te horo‘araa i te horo‘a a te Varua Maitai, e i te mau oro‘a faaora o te hiero. Ua huna ê fatata te taato‘araa i te mau papa‘iraa mo‘a, e aita tura i ti‘a ia ratou ia ite i te tai‘o.

Te horo‘araa i te mau papa‘iraa mo‘a e te tautururaa i te mau tamarii a te Atua i te tai‘o o te taahiraa matamua ïa o te Faaho‘i-faahou-raa mai o te evanelia. Ua papa‘i-matamua-hia te Bibilia i roto i te reo Hebera e i te reo Hereni e mau reo ite-ore-hia i te mau taata no Europa. I te 400 o te matahiti i muri mai i te poheraa o te Faaora, ua iritihia te Bibilia e Jerome i roto i te reo Latino. Aita ihoa te mau papa‘iraa mo‘a i rae‘a-roa-hia i te mau taata. Ua papa‘ihia vetahi mau api e te mau monahi [moines] rave rahi matahiti i oti ai te tahi mau api.

Na roto i te faaururaa a te Varua Maitai, ua tupu te hiaai i te ite i roto i te aau o te taata. Ua parare teie fanau-faahou-raa e aore râ, teie « fanauraa apî » i Europa. I te matahiti 1.300, ua opua te hoê perepitero o John Wycliffe to’na i‘oa i te iriti i te Bibilia na roto mai i te reo Latino i roto i te reo Peretane. No te mea ho‘i e, e reo apî te reo Peretane e ere ho‘i i te mea ateate roa, ua măta‘u e ua mana‘o te feia faatere o te ekalesia e, e ere paha i te mea ti‘a roa ia iriti i te parau a te Atua. Ua mana‘o vetahi feia faatere e, mai te mea e ite te taata i te tai‘o e iriti oia i te Bibilia no’na iho, e riro te mau parau haapiiraa i te haaviiviihia ; ua măta‘u vetahi e ua mana‘o e, na roto i te ti‘amâraa o te taata ia tai‘o i te mau papa‘iraa mo‘a aita ïa te taata e hinaaro i te Ekalesia ia ore ratou e paturu i te reira i te pae no te faufaa. No reira, ua parihia o Wycliffe ei taata ti‘aturi-ore e ua hamani-ino-hia oia. I muri mai i to’na poheraa e i to’na tanu-raa-hia, ua iritihia mai to’na mau ivi e ua taninahia. Aita râ te ohipa a te Atua i mau.

A faauruhia’i vetahi ia iriti i te Bibilia, te faauruhia ra ïa vetahi ia faaineine i to’na haaparareraa. I te matahiti 1455, Johannes Gutenberg tei hamani i te hoê nene‘i parau e o te Bibilia ïa ta’na buka matamua i nene‘i. No te taime matamua, ua nene‘ihia rave rahi mau parau no te papa‘iraa mo‘a o te nehenehe i te tahi feia ia aufau.

I te reira taime, ua parahi te faaururaa a te Atua i ni‘a i te mau taata hi‘o-haere. I te matahiti 1.492, ua tere Christoph Colomb e imi i te e‘a apî i te tuhaa fenua no te pae Hiti‘a o te Râ. Ua arata‘ihia Colomb e te rima o te Atua i to’na tere. Teie ta’na i parau, « Ua horo‘a mai te Atua i te faaroo ia‘u, e i muri mai i te itoito ».²

Ua faaineinehia te mau imiraa e te mau itearaa no te mau tauturu. I te mau matahiti 1.500, ua tapa‘o te hoê taure‘are‘a o William Tyndale i roto i te Fare haapiiraa tuatoru no Oxford. I reira, ua haapii oia i te ohipa a Erasmus no te Bibilia, o tei ti‘aturi e, ua riro te mau papa‘iraa mo‘a ei « maa no te varua [ taata] ; e… e mea ti‘a ia taui i te hohonuraa o to’na aau e o to’na mana‘o ».³ Na roto i ta’na haapiiraa, ua faarahi Tyndale i te here no te parau a te Atua e ua hinaaro i te mau tamarii a te Atua ia fana‘o i te reira no ratou iho.

I taua taime ato‘a ra, ua itehia i te hoê tahu‘a purutia, e e orometua ato‘a ho‘i, o Martin Luther, e 95 hape i roto i te ekalesia i to’na ra anotau, e o ta’na i hapono ma te măta‘u ore na roto i te rata, i to’na ra mau taata faatere. I Switzerland, te fenua Helevetia, ua nene‘ihia e 67 api parau e Huldrych Zwingli no ni‘a i te faaapîraa. Ua paturuhia teie nei ohipa e rave rahi feia o John Calvin i Helevetia, o John Knox i Ekotia. E ua haamata te faaapîraa.

I te reira taime, ua riro mai o William Tyndale ei orometua tei haapiipii-mau-hia e e nehenehe oia e parau i roto e va‘u reo. Ua ti‘aturi oia e, e mea tano a‘e te iritiraa afaro na te reo Heleni e te reo Hebera i roto i te reo Peretane i te iritiraa a Wycliffe na roto mai i te reo Latino. No te mea ua haamaramaramahia o Tyndale e te Varua o te Atua, ua iriti oia i te Faufaa Apî e te hoê tuhaa o te Faufaa Tahito. Ua faaara râ to’na mau hoa ia’na e, e haapohehia oia no te raveraa i taua ohipa ra area râ, ua opua oia i te faaoti i teie ohipa. I te hoê taime, te maro ra oia e te hoê taata ite, parau atura oia e, « Mai te mea e faaherehere te Atua i to‘u ora no na matahiti e rave rahi, e haapii au i te hoê tamaiti apî o te arata‘i i te arote ia ite i te mau papa‘iraa mo‘a hau atu ia oe ».⁴

No reira, ua haapohehia Tyndale mai te tahi ato‘a pu‘eraa no ta’na mau tutavaraa – ua tarihia oia e ua tutu‘ihia i te hoê vahi piri i Brussels. Aita râ te ti‘aturiraa i te mea i horo‘a ai oia i to’na ora i mo‘e. Milioni feia o tei haere mai e hi‘o i te mea o ta Tyndale i haapii i roto i to’na oraraa: « Te natura o te parau a te Atua o teie ïa, ia tai‘o te hoê taata i te reira… e riro ‘oi‘oi roa oia i te maitai i te mau mahana’toa e tae roa’tu e ua tupu oia i te maitai roa ».⁵

Ua hopoi mai te huehue rahi o te mau tau politita i te tauiraa. No te mâro o te Ekalesia i Roma, ua faataa te Arii Henry Va‘u ia’na iho ei ti‘a no te ekalesia i Peretane e ua titau ia hopoihia te mau Bibilia Peretane i roto i te mau paroita o te ekalesia. No te hiaai o te taata i te evanelia, ua haapu‘e te mau taata i roto i teie mau ekalesia, no te tai‘oraa i te mau papa‘iraa mo‘a i te tahi e i te tahi e tae noa’tu e aita to ratou reo e matara-faahou. Ua faaohipa-ato‘a-hia te Bibilia ei buka niu no te haapiiraa i te tai‘o. No te mea ho‘i e, te tamau noa ra te mau maratiriraa i Europa, ua fatata te taivaraa i te ore. Teie ta te hoê orometua i parau hou oia a taninahia’i : « I teie mahana na roto i te maitai o te Atua, e mea ti‘a ia tatou ia faaama i te mori hinu i Peretane o ta‘u e mana‘o nei e, e ore roa e tupohehia ».⁶

Te faaite nei matou i to matou aau mehara i te taato‘araa o te feia e ora nei i Peretane e i Europa o tei tauturu i te tutu‘iraa i taua mori ra. Na roto i te maitai o te Atua, ua maramarama maitai mai te mori. No to’na ite i te mau amahamaharaa i roto i to’na fenua, ua farii te Arii Peretane o James I ia ravehia te hoê iritiraa o te Bibilia. Ua mana‘ohia e, hau atu i te 80 i ni‘a i te hanere o te mau iritiraa a William Tyndale no te Faufaa Apî e te tahi tuhaa rahi o te Faufaa Tahito (Te ‘Pentateuch’ e aore ra, Genese e tae atu i te Deuteronomi, e Iosua e tae atu i te Paraleipomeno) tei tape‘ahia i roto i te buka a ‘King James’.⁷ I muri mai, ua haponohia’tu teie iritiraa i te hoê atu fenua apî e ua tai‘ohia e te hoê tamaiti faaapu 14 matahiti, to’na i‘oa o Iosepha Semita. E ere i te mea maere i te mea e, i teie mahana, ua farii Te Ekalesia a Iesu Mesia i te Feia Mo‘a i te Mau Mahana Hopea Nei i te iritiraa a ‘King James’.

Ua tamau noa te mau hamani-ino-raa no te pae faaroo i te tupu i Peretane i raro a‘e i te tamaiti a James o Charles te i‘oa, e rave rahi o tei rû i te imi i te ti‘amâraa i te mau fenua apî. I rotopu ia ratou o te mau Pilgrims ïa, tei tere i te fenua Amerika i te matahiti 1620 te vahi i terehia e Colombus 100 matahiti na mua atu. Ua tere ato‘a te tahi mau pŭpŭ, mai ïa Roger Williams, na’na i ite i te Motu no Rhode e ua riro mai oia ei tavana rahi i reira i muri mai, o tei imi tamau i te Ekalesia mau a te Mesia. Ua parau William e, aita te ekalesia mau a te Mesia i faati‘ahia i te fenua nei, e aita ato‘a e taata tei haamanahia no te faatere i te hoê noa’tu oro‘a a te ekalesia, aita ato‘a e ti‘a maoti râ, ia tonohia mai te mau Apotesolo apî na te Upoo faatere o te ekalesia, o ta’na e imi nei i to ratou taeraa mai.⁸

Hau i te hoê tenetere i muri mai, na teie mau mana‘o no te faaroo i arata‘i i te feia faati‘a no te hoê nunaa apî i ni‘a i te fenua Amerika. I raro a‘e i te rima o te Atua, ua paruru ratou i te ti‘amâraa no te faaroo o te huiraatira na roto i te horo‘araa i te Bill of Rights. Ahuru ma maha matahiti i muri mai, i te 23 no titema 1805, i fanauhia mai ai te peropheta Iosepha Semita. Fatata roa te mau faaineineraa no te Faaho‘i-faahou-raa mai i te oti.

Ei taata apî, « ua fifi roa to Iosepha mana‘o »⁹ no ni‘a i te tumu no te faaroo. No te mea ua fanauhia oia i roto i te hoê fenua tei reira te ti‘amâraa no te faaroo, i nehenehe ai oia ia ui e, o vai tei ti‘a i teie mau ekalesia’toa. E no te mea ua iritihia te Bibilia i roto i te reo Peretane, ua nehenehe ia’na ia imi i te pahonoraa i roto i te parau a te Atua. Ua tai‘o oia i te buka a Iakobo, « Te ere ra râ te hoê o outou i te ite, e ani oia i te Atua ra »¹⁰ e ua rave oia mai tei faauehia mai. Ei pahonoraa i te pure Iosepha, ua fâ mai te Atua te Metua e Ta’na Tamaiti Iesu Mesia ia’na.¹¹ Teie tamaiti faaapu haehaa o te peropheta ïa tei ma‘itihia e te Atua no te faaho‘i-faahou mai i te Ekalesia tahito a Iesu Mesia e To’na autahu‘araa i teie mau mahana hopea nei. Ua riro teie Faaho‘i-faahou-raa mai ei tau tuuraa hopea, oia te tau tuuraa no te îraa o te mau tau, oia ho‘i, te faaho‘i-faahou-raa mai i te mau haamaitairaa ato‘a o te autahu‘araa o ta te taata e nehenehe e farii i ni‘a i te fenua nei. Na roto i teie faaueraa hanahana, e ere ta’na ohipa no te faaapî e aore râ, no te pato‘i i te mea e vai nei i te fenua nei. O te Faaho‘i-faahou-raa mai râ i te mea tei mo‘e.

Ua haamata te Faaho‘i-faahou-raa na roto i te Orama matamua i te matahiti 1820, e tae roa i te taeraa mai o te Buka a Moromona : Te Tahi Atu Ite no Iesu Mesia. I te 21 no Setepa 1823, ua fâ mai te melahi Moroni ia Iosepha Semita, o tei haapii mai ia’na i te parau no te hoê buka tahito tei roto i te reira « te îraa o te evanelia mure ore… faaineineraa no te ho‘i-piti-raa mai o te Mesia ».¹² Papa‘ihia i ni‘a i te mau api auro, te faaite mai nei te Buka a Moromona i te aamu no te misioni a te Mesia i te Pae Tooa o te râ, mai ta te Bibilia i papa‘i no To’na oraraa e Ta’na misioni i te Fenua Mo‘a. Ua farii Iosepha i te mau api auro e maha matahiti i muri mai, e, i te ava‘e Titema matahiti 1827, ua haamata i te iriti i te Buka a Moromona.¹³

I te taime o te iritiraa, ua tai‘o Iosepha Semita e to’na papa‘i parau o Oliver Cowdery no ni‘a i te bapetizoraa. Na to raua hiaai i te farii i teie haamaitairaa no raua iho i faa‘oi‘oi i te Faaho‘i-faahou-raa mai o te Autahu‘araa a Aarona i te 15 no me 1829, i raro a‘e i te rima o Ioane Bapetizo.¹⁴

A peehia mai e te Faaho‘i-faahou-raa mai o te Autahu‘araa a Melehizedeka, o tei tuuhia i ni‘a ia Iosepha e ia Oliver na te mau Aposetolo Petero, Iakobo e Ioane o tei mau i te mau taviri. I muri mai i te mau tenetere o te taivaraa, ua itehia te puai e te mana no te faaohipa i te i‘oa o te Atua, no te raveraa i te mau oro‘a mo‘a, e no te arata‘iraa i Ta’na Ekalesia i ni‘a i te fenua nei.

Ua haapararehia te nene‘iraa o te mau api matamua o te Buka a Moromona i te 26 no Mati 1830. Tau mahana i muri mai, i te 6 no eperera, ua faanahonahohia te Ekalesia mau a te Mesia i teie mau mahana hopea nei i te fare o Peter Whitmer, Papa, i Fayette, New York. No te tatara papû i te huru no te mau mea i tupu i te ao nei, teie ta te Aposetolo Parley P. Pratt i papa‘i :

Ua hope te taivaraa, ua ho‘i faahou mai te heheuraa, ua tae mai te tahi atu papa‘iraa mo‘a. Ua fariihia Te Parau Haapiiraa e te Mau Parau Fafau e te Ekalesia i te 17 no Atete 1835. Ua haamata ato‘a te tatararaa o te Buka Poe Tao‘a Rahi no te buka a Aberahama i taua matahiti ra.

Ua faaho‘ihia mai te mana no te ohiparaa i roto i te i‘oa o te Fatu. Ua haamo‘ahia te Hiero no Kirtland i te 27 no mati 1836.¹⁶ I roto i taua hiero ra, ua fâ mai te Faaora ia Iosepha Semita e ia Oliver Cowdery, apeehia e te faraa mai o Mose, Elia, e Eliaha, o tei horo‘a mai i te tahi atu â mau taviri no te autahu‘araa i te peropheta.¹⁷

Eita roa’tu te maramarama o te evanelia e iriti-faahou-hia i te fenua nei. I te matahiti 1844, ua horo‘a Iosepha Semita i te mau taviri ato‘a o te autahu‘araa ia Brigham Young, John Taylor, Wilford Woodruff e to’na mau hoa Aposetolo. Teie ta te peropheta i parau : « Ua ora mai au e tae noa’tu e ua ite au i teie teimaha, o tei tuuhia i ni‘a i to‘u na tapono, faautahia i ni‘a i te tapono o te tahi atu mau tane… ua faaho‘i-faahou-hia mai te mau taviri o te basileia i ni‘a i te fenua nei ia ore e iriti-faahou-hia… Noa’tu eaha te tupu mai i ni‘a ia‘u ».¹⁸ Te vahi pe‘ape‘a râ, e toru ava‘e i muri mai, i te 27 no tiunu, ua maratirihia Iosepha Semita te peropheta e to’na taea‘e o Hyrum i Carthage, Illinois.

Tei reira ato‘a o Elder John Taylor tei piha‘i iho i te peropheta i to’na maratiri-raa-hia, tei faaite papû no’na e: « Ua rahi a‘e ta Iosepha Semita, te peropheta e te Hi‘o a te Fatu i rave maoti râ, ia Iesu ana‘e, no te faaoraraa i te taata nei i roto i teie nei ao, i tei ravehia e te hoê taata ê atu o tei ora na i ni‘a iho i te reira ».¹⁹

Te faaite papû nei au e, te ohipa tei ravehia e te peropheta Iosepha Semita o te ohipa ïa a te Faaora. I roto i te taviniraa i te Fatu, e ere te e‘a i te mea ohie. E titau te reira i te faatusiaraa, e e ite atu tatou i te faahemaraa a te enemi. A tavini ai Ia’na, e ite tatou i To’na rima i ni‘a iho ia tatou. Oia’toa i ni‘a ia Wycliffe, Tyndale e tauasini atu â o tei faaineine i te e‘a no te Faaho‘i-faahou-raa mai. No te peropheta Iosepha Semita e te taato‘araa o tei tauturu i te faaôraa mai i te evanelia tei faaho‘i-faahou-hia mai. Oia’toa ïa no tatou nei.

Te titau mai nei te Fatu ia tatou ia ora faaroo noa, ia pŭpŭ ia tatou, e ia itoito noa mai te feia o tei haere mai na mua‘e ia tatou. Ua piihia ratou no te horo‘a i to ratou ora no te evanelia. Ua piihia tatou no te ora i to tatou oraraa no taua tumu ra. I teie mau mahana hopea nei, e tumu taa ê to tatou no te raveraa i te reira.

Hou taua pô mo‘a ra i Betelehema, ua faaineine te mau tupuraa o te aamu e te mau parau a te mau peropheta ato‘a o te mau tau tuuraa, i te e‘a no te tae-matamua-raa mai o te Fatu e Ta’na Taraehara. Hoê ato‘a aamu e te tohu tei faati‘a i te niu no te Faaho‘i-faahou-raa mai o te evanelia na roto i te peropheta Iosepha Semita. E mata ite anei to tatou no te hi‘o i te mau ohipa tei tupu e te mau tohu o to tatou anotau e faaineine nei no tatou no te Tae-Piti-raa mai o te Faaora ?

Te faaite papû nei au e, te ora nei te Faaora o Iesu Mesia. Te faaite papû nei au e, ua itehia To’na rima i ni‘a a‘e i te ohipa no te Faaho‘i-faahou-raa mai hou te faatumuraa o te ao nei e e haere noa â i mua e tae noa’tu i To’na Ho‘i-Pitiraa mai.

Ia faaineine tatou ia tatou iho no te manava Ia’na o ta‘u ïa pure haehaa. Na roto i To’na i‘oa mo‘a, oia o Iesu Mesia, amene.