Wan Brij i Go long Hop mo Hiling
Wetem stret help, ol viktim (olgeta we oli mekem nogud olgeta) blong abius long saed blong seks oli save faenem hiling sapos oli wantem tumas.
Droing i kam long Cristina Bernazzani
Traem tingting se yu stap stanap long wan klif long ples we graon i finis long hem, mo yu wantem go long narasaed blong kanion we i dip i go daon, mo oli talem long yu se bigfala hapines i stap long narasaed ia. Taem yu stap lukaot long wan wei blong krosem ples, yu faenem wan hip blong ol tul i stap, we sapos yu putum gud tugeta, bae i bildim wan brij blong krosem kanion ia.
Sapos yu no save olsem wanem blong bildim wan brij, ol tul ia bae oli no gat yus blong hem, mo bae yu harem yu kros mo yu no gat hop. Be sapos yu kasem sam help long wan we i gat eksperiens blong bildim ol brij, save mo andastaning blong yu i save kam antap, mo tugeta, wok ia i save kamtru.
Ova long ol las 18 yia, wok blong mi i blong givim ol tul mo help blong lidim ol pipol blong krosem bigfala hol ia blong stap safa long filing o tingting. Aot long evri pipol we mi bin givim kaonsel long olgeta, ol kastoma we oli kam we oli karem bigfala kil moa oli, olgeta we oli bin abiusum olgeta long saed blong seks. Mi bin luk olsem wanem jalenj ia i spolem paoa blong wan blong stap strong kasem en.
Be, mi kam tu blong save se bigfala sapot long ol trabol mo safaring blong yumi, hem i posibol tru long Sevya blong yumi. Lav blong Hem, i stap leftemap ol pipol oli aot long tudak oli go long laet.
?From Wanem Abius long saed blong Seks i Spolem Gud Man?
Olgeta we oli abiusum olgeta, oli stap tokbaot long mi, wan laef we i fulap long trabol tingting, tingting daon long olgetawan, mo ol narafala bigfala soa long filing blong olgeta. Presiden Gordon B. Hinckley (1910–2008) i bin helpem yumi blong andastanem from wanem abius long saed blong seks i save mekem man i harem nogud:
“I gat prapa nogud fasin, we i nogud evriwan, we i abius long saed blong seks. Hem i bitim wanem we man i save andastanem. Hem i kam agensem evri gud fasin we i mas stap insaed long evri man mo woman. Hem i prapa spolem wanem we hem i tabu mo i kam long heven. Hem i prapa spolem laef blong ol pikinini. Hem i rong evriwan mo i naf blong i mas gat bigfala panismen evriwan from.
“Sem i stap long eni man o woman we i stap abiusum wan pikinini long saed blong seks. Taem wan i mekem olsem, man o woman ia, i no givim kil nomo we i moa bigwan. Be hem i gat rong mo panismen tu long fes blong Lod.”1
Paoa blong krietem laef, i wan paoa we i tabu mo i kam long heven, we Papa blong yumi we i stap long Heven i givim long ol pikinini blong Hem. Elda David A. Bednar blong Kworom blong Olgeta Twelef Aposol i tijim: “Paoa blong krietem laef i impoten tumas long saed blong spirit. … Papa blong yumi long Heven mo Pikinini blong Hem we Hem i Lavem tumas, Tufala i krietem wanwan long yumi, mo givim yumi wanwan wan pat blong paoa blong Tufala blong krietem laef.”2 From hemia nao, taem wan i yusum nogud tabu paoa ia, “hem i naf blong hem i mas kasem bigfala panismen evriwan from; mo tu, taem oli yusum nogud paoa ia, i “givim kil we i moa bigwan long ol narawan.”
Andastanem Harem Nogud Ia
Droing © nuvolanevicata/iStock/Getty Images
Abius long saed blong seks i wan samting we tu pipol i no agri long hem, mo long taem ia, wan i tajem o i no tajem bodi blong narawan long saed blong seks blong mekem se hemwan nomo i harem gud long hem. Plante taem tumas, olgeta we oli abiusum olgeta, oli stap lego olgeta i stap oli konfius long tingting, mo tu, long filing, se oli no inaf mo oli filim wan sem we i hevi tumas blong tekem. Sobodi mo safaring we olgeta ia we oli abiusum olgeta oli stap gotru long hem, i kam bigwan moa tru long ol narawan we oli sakem toktok, o oli no andastanem wanem i abius long saed blong seks mo risal blong hem. Samfala we oli abiusum olgeta long saed blong seks, oli stap talem se oli stap giaman, o oli talem olgeta se hem i rong blong olgeta nao. Sam narawan, oli mekem olgeta oli biliv se oli mas sakem sin, mo hemia i rong. Oli mekem olsem se olgeta nao oli sin from se oli abiusum olgeta.
Plante pipol we mi bin wok wetem olgeta, we oli gotru long abius long saed blong seks long taem oli smol, o taem oli yangfala, man i talem olgeta blong oli “no moa tingbaot samting ia,” “livim i stap long laef we i pas,” o “jes fogivim mo fogetem.” Olgeta kaen toktok ia—speseli taem i kam long ol gudgudfala fren, ol memba blong famli, o ol lida blong Jos—i save lidim olgeta ia we oli fesem abius blong oli go sarem olgetawan moa, mo blong oli sem moa, be i no blong oli kam gud bakegen mo filim pis. Semmak olsem wan soa long bodi, o wan soa we i kam nogud, olgeta soa ia long saed blong filing, bae oli no jes go lus nomo sapos yumi no lukluk long olgeta. Be, trabol tingting we i stat long taem blong abius ia, i gohed blong gro, mo tugeta, wetem risal blong ol soa long filing, tingting blong wan i jenis, mo long en, oli save kam ol fasin we oli nogud evriwan. Plante taem, olgeta we oli fesem abius long saed blong seks, oli no luksave se wanem i bin hapen long olgeta i wan abius, nao oli developem ol fasin we oli kam nogud mo oli harem i soa long filing blong olgeta.
Hannah (oli jenisim nem) i bin fesem abius long saed blong seks taem hem i smol gel nomo. Semmak olsem ol narawan we oli stap abiusum olgeta, hem i groap wetem filing ia se hem, hem i wan nogud gel we hem i no impoten. Hem i spendem plante taem blong laef long hem blong givim seves long ol narawan, inaf blong kavremap ol filing blong hem se “hem i no gud inaf” blong Papa long Heven o eniwan i lavem hem. Long ol rilesensip blong hem, hem i bin fraet se sapos eniwan i save hem tru, bae oli tingting se hem i nogud stret ia nao olsem we hem i stap tingting abaot hemwan. Hem i gotru long plante fasin we man i sakemaot hem, we i mekem se hem i fraet blong traem samfala niu samting long laef, o blong traem blong mekem ol simpol samting olsem blong ringim wan man o woman long fon. God i blesem hem wetem wan talen blong dro, be hem i slakem from se hem i fraet se bae hem i no save tekem ol toktok we bae oli kam tokbaot ol wok blong hem.
Blong ova long 50 yia, ol fasin ia blong filim se hem i no save help, hem i no gat paoa, filing blong fraet, kros, sem, stap hemwan i lidim ol desisen evri dei long laef blong hem.
Stap Riplesem, Sobodi wetem Pis
Sevya “i harem nogud long ol soa blong bodi mo fulap hadtaem mo temtesen blong evri kaen.” Hem i bin mekem olsem blong Hem i “save, long saed blong bodi blong mit mo bun, olsem wanem blong helpem ol man blong hem” (Alma 7:11–12). Safaring blong Hem i no jes from ol sin blong yumi, be tu, blong hilim yumi taem we ol sin blong wan narafala man i kam mekem yumi safa.
Sapos Hem i stap ia tedei, mi ting se bae Sevya bae i krae wetem olgeta we oli fesem abius long saed blong seks, mo bae i blesem olgeta semmak olsem we Hem i bin krae mo blesem Ol Man blong Nifae (luk long 3 Nifae 17). Nomata Hem i no stap long bodi wetem yumi, Spirit blong Hem i save stap wetem yumi, mo Hem i givim wan rod blong yumi kasem hiling, blong filim pis, mo blong fogivim man.
Long plante we oli bin mekem nogud long olgeta, tingting ia, se bae harem nogud we oli stap tekem, bae pis i save riplesem, hemia i wan tingting we i no posibol blong biliv long hem. Plante taem, ol kil ia blong hem we oli abiusum hem, man i no save luk, mo narawan i no save luksave blong plante yia. Harem nogud ia, oli haedem biaen ol fes we oli smael, fasin blong givhan fulap long ol narawan, mo stap laef evri dei olsem se i no gat samting i ron, be yet, harem nogud ia i stap ia oltaem.
Bae yumi komperem rod blong hiling long saed blong filing, wetem fasin blong tekem kea mo tritim wan kil long bodi. Tingting se yu yu yangfala mo yu brekem leg blong yu. Yu no go long dokta blong i lukluk gud long hem, yu gohed wetem nomo kasem taem we yu nomo harem i soa, be yet, i gat wan smol soa wetem evri step we yu mekem. Plante yia afta, yu wantem se harem nogud ia i gowe, mekem se yu go luk wan dokta. Dokta i mas fiksim bun, i mas klinim eni samting we i bin gro raon long hem, i simentem, mo i sendem yu blong mekem moa eksasaes blong mekem leg blong yu i kam strong moa.
Rod ia blong hiling long abius, i semmak, long wei ia we hem we i kasem abius ia, i mas luksave faswan se soa ia i wan rilwan, mo i wan samting we oli save stretem. Rod ia, i gat long hem blong luksave wanem i bin hapen, mo letem ol filing ia blong harem nogud, blong fraet, blong no hapi, oli luksave olgeta mo oli luksave se oli truwan. Fulap taem, hem i help blong wok wetem wan profesenol long rod ia blong hiling. (Jekem prishud lida blong yu blong save se i gat wan LDS Famli Seves i stap long eria blong yu.)
Nomata sapos hem we oli abiusum hem i save go luk wan dokta o no, hem i moa gud blong prea, stadi long laef blong Sevya mo Atonmen blong Hem, mo toktok wetem wan prishud lida oltaem. Hem i save help blong mekem ol trabol oli go lus, mo tu, hem i save kasem insperesen blong helpem wan we oli abiusum hem blong hem i andastanem tabu fasin blong hem, mo rilesensip blong Hem wetem Papa we i stap long Heven mo Sevya. Olsem we Sista Carole M. Stephens, Fas Kaonsela long Rilif Sosaeti Jeneral Presidensi i bin tijim i no longtaem i pas: “Hiling i wan longfala rod. Bae yu nid blong prea blong askem Lod blong lidim mo helpem yu, mo tu, i minim blong stap gat advaes we i kam long ol stret prishud.” Taem yu lan blong toktok, putum sam limit i stap mo maet yu save kasemkaonsel long sam profesenol. !Blong holemtaet wan gudfala helt long saed blong spirit long rod ia, i impoten tumas!3
Long Hannah, laef blong hem i nomo gud nao, hem i go lukaotem help. From testemoni blong hem, hem i save se hem i save filim pis, mo glad long laef, be hem i no filim hemia oltaem. Tru long prea mo taem we hem i spendem blong toktok wetem bisop blong hem, hem i go kasem kaonsel; long ples ia hem i kasem ol tul we hem i nidim blong tekem trutok i kamaot long tudak mo serem bigfala harem nogud we hem i bin stap tekem hemwan. Taem hem i mekem olsem, hem i bin save lego sobodi mo faenem pis we Sevya i stap promesem (luk long Jon 14:27). Wetem pis mo kamfot ia, filing blong wantem, mo paoa blong fogiv i kam.
Nid Ia blong Fogivim Man
Tingting ia, blong fogivim man i had tumas long olgeta we oli abiusum olgeta; i had blong oli harem mo oli no stap andastanem gud. Sapos oli ting se, fasin blong fogiv, i blong letem man ia we i abius i fri nomo olsem, o i blong talem se wanem we oli mekem, i nomo impoten, nao hem we oli abiusum hem, i filim se hem i no gat valiu. Long sem taem we yumi kasem komanmen blong fogivim man (luk long D&C 64:10), long ol situesen we harem nogud i bigwan, hiling i mas stat bifo hem we oli abiusum hem i save fogivim fulwan man o woman ia we i abiusum hem.
Olgeta we oli stap safa from ol harem nogud ia we i kamaot long abius, bae oli save faenem kamfot long Buk blong Momon: “mi, Jekob, bae mi toktok long yufala we hat blong yufala i klin. Luk long God wetem strong tingting, mo prea long hem wetem fet we i tumas, mo bae hem i leftemap tingting blong yufala long ol hadtaem blong yufala, mo bae hem i toktok from stamba tingting blong yufala, mo sendem daon jastis long olgeta we oli lukaotem blong smasem gud yufala” (Jekob 3:1). Nid blong gat jastis mo raet blong mekem samting i kam stret bakegen, yumi save givim i go long Lod blong Hem i riplesem ol harem nogud ia wetem pis.
Hannah i bin faenem se hem i save givim nid ia blong gat jastis i go long Sevya, mo semtaem bae hem i filim wan pis long laef blong hem we hem i neva gotru long hem bifo. Bifo, hem i fraet blong go long ol famli kam tugeta, taem we hem we i bin abiusum hem bae i stap. Naoia, from hem i wantem fesem ol strong kil long saed blong tingting, long rod ia blong hem blong kasem hilingl, hem i nomo filim fraet taem man ia i stap, mo hem i save gat lav mo sore long hem taem hem i olfala.
Fri long Ol Hevi Samting we I No gat Nid from
Elda Richard G. Scott (1928–2015) blong Kworom blong Olgeta Twelef Aposol i talem se “ful hiling bae i kam tru long fet blong yu long Jisas Kraes mo paoa blong Hem mo samting we Hem i save mekem, tru long Atonmen blong Hem, blong hilim ol mak blong ol samting we oli no stret mo yu no sapos blong kasem. …
“Hem i lavem yu. Hem i givim laef blong Hem blong yu save kam fri long ol trabol we i no nid blong yu kasem. Bae Hem i helpem yu blong mekem hemia. Mi save se Hem i gat paoa blong hilim yu.”4
Enemi i wantem se ol pipol oli fas wetem harem nogud mo safaring from se hem tu, hem i harem i nogud tumas (luk long 2 Nifae 2:27). Wetem help blong Sevya blong yumi, Jisas Kraes, pis i save riplesem harem nogud, olsem nomo we Sevya i save givim, mo yumi save laef wetem glad. “Adam i bin foldaon blong mekem se man i save stap; mo ol man oli stap, blong oli save gat glad” (2 Nifae 2:25). Blong laef wetem glad bae i letem ol tes oli moa isi blong tekem, mo bae i save mekem se yumi lanem samting mo gro mo kam moa olsem Papa we i stap long Heven.
Tingting blong mi i stap daon from blesing we mi bin gat long laef blong mi blong sidaon wetem olgeta we oli fesem abius, mo luk merikel blong hiling we i kam, we i tru, mo i kam nomo tru long Sevya. Sapos yu stap safa, plis prea blong kasem help. Yu no nid blong tekem ol hevi trabol ia yuwan. Mi save se Hem i stap hilim man, from se mi bin witnesem hemia plante, plante taem finis.