Olfala Famli Albom: Paoa blong Famli Stori
Man we i raet i stap laef long Niu Yok, YSA.
Olgeta samting we ol bubu oli livim i stap biaen, oli bin laef tru long mi, mo oli bin gogohed blong lidim laef blong mi blong gud blong mi.
Wan sama moning, bifo long Wol Wo II, bigfala bubuman blong mi i wekap olsem hem i stap mekem oltaem—bifo san i girap. Hem i go aotsaed long haos blong hem antap long hil we i lukluk i go long wan grin vale mo vilej blong hem long Romenia, mo hem i sidaon long gras we smol moning ren i kavremap yet; hem i stap i lus we i lus long tingting blong hem—ol tingting ia we oli bin stap long maen blong hem samtaem nao. Hem i wan man we i skul, we i gat bigfala hat, we tingting blong hem i save askem kwestin, mo evriwan long vilej i lavem mo respektem hem. Vilej blong hem, we i stap long olfala reva ia, Olt, i eksampol blong vilej blong Romenia, we i gat ol ples we oli olsem ples blong feri, ol pikja blong ol kastom, mo kaen fasin ia blong tekem responsabiliti blong kea long ol samting mo ol kastom we wan i kasem long bubu blong hem mo i pasem i go long nekis jeneresen.
Afta we san i girap, hem i go insaed long haos mo i konfesem long waef blong hem se hem i bin wantem save se bae fenerol blong hem bae i olsem wanem, mo hem i bin wantem blong gat wan praktis blong taem we bae oli dresemap hem long fenerol. Hem i putum wan dei, i pem kofin, i pem wan pris mo ol man blong krae blong kam, i pem sam narafala samting we kastom blong ol Otodoks man blong Gris oli stap folem. Nao dei blong praktis taem i kam. Oli setemap ol tebol long medel blong vilej blong mekem kaekae blong tingbaot man, nao famli i dresap fulwan long blak, pris i kam, bubuman blong mi i ledaon insaed long kofin, i stretem pilo blong mekem se hem i save luk evri samting, mo fenerol wokbaot i stat. Taem seremoni i finis, oli invaetem ful vilej i kam long kaekae ia, mo bigfala bubuman blong mi i mekem drim blong hem ia i kamtru, blong hem i kam i danis long fenerol blong hemwan bakegen. Hem i laef blong wan nara 20 yia, i jek plante taem blong luk se kofin blong hem i inaf long hem yet.
I No Ol Nem mo Ol Deit Nomo
Mi neva mitim bigfala bubuman blong mi, be storian blong hem, i hemia we mi laekem tumas we ol bubu blong mi oli pasem i kam long mi. Evri dei, ol bubu blong mi bae oli storian long ol brata mo sista blong mi, ol stori abaot ol bubu blong mi: se oli kam wea, oli olsem wanem, wanem valiu, drim mo hop blong olgeta. Afta long kaekae long evri Sandei, bae oli bubu blong mi oli tekemaot foto albom, mo evri taem oli tanem wan pej, ol storian oli kam laef, ol stori blong bifo mo blong naoia, mo hat blong mifala i joen wan wetem lav we i gogohed i stanap mo i no foldaon wetem taem. Oli no jes ol olfala foto wetem ol nem mo ol deit we oli raetem long baksaed. Biaen long evri fes i gat wan papa, wan mama, wan boe o wan gel, wan brata o sista. Long mifala, oli ol ril pipol we oli gat ol hop mo ol drim, ol hadtaem mo ol taem blong harem nogud, ol sakses mo ol samting we oli no winim. Nomata oli nomo stap long bodi, stori blong olgeta i gohed blong laef i stap, histri blong olgeta i gohed blong saen i stap, mo fes blong olgeta i gohed blong smael aot long wan olfala albom blong famli we i joenem, wetem lav, sikis jeneresen.
Paoa long Taem blong Tes
Taem we mi kasem 19 yia, papa mo mama blong mi mo plante long stret famli blong mi oli ded, mo plante long ol samting we mi bin kasem long olgeta oli bin lus, o oli stilim. Be yet, i gat wan samting we taem, ol disasta, o iven ded i no save prapa spolem gud: hem i brij we i joenem ol samting blong bifo, blong naoia, mo blong fiuja we wanwan memba blong famli i bildimap. From oli bin wokhad, tugeta, ol hat blong mifala oli joen strong moa bitim eni tes long wol ia, mo hemia i givim mi paoa blong winim samfala hadtaem.
Taem papa mo mama blong mi, mo ol bubu blong mi oli ded, mi filim bigfala harem nogud, i mekem se mi askem miwan bakegen se bae mi gat inaf paoa blong gogohed o no. Be mi bin filim paoa blong olgeta tru long vel, we i bin helpem mi blong kasem wan testemoni we i no seksek abaot laef afta long ded, mo afta, abaot ol odinens blong tempol. Mi no tingbaot se mama blong mi i olsem wanem, mo mi neva mitim ol bigfala bubu blong mi, be evri taem mi tekem olfala famli albom ia, mi luk miwan tru long ae blong olgeta. Mi mi stap huia mi, from evriwan ia we oli bin stap ia fastaem long mi. Ol eksperiens mo waes tingting blong olgeta oli bin helpem mi blong bildimap fasin blong mi mo oli bin lidim mi long laef.
Wan long ol bigfala presen we famli blong mi i bin givim long mi taem mi smolwan i kam, i save ia abaot histri blong famli blong mi, mo strong tingting ia we mi nao, mi joenem wanem i bin stap bifo mo wanem bae i kam long fiuja. Mi save tu se mi bin kam long wol ia blong laef long stori blong laef blong mi—blong lukluk raon mo blong gat eksperiens, mo blong holemtaet gud olgeta samting ia. Save ia, abaot famli histri blong mi, i bin sapotem mi tru long evri tes blong laef.
Mi tingting plante abaot famli blong mi long narasaed blong vel mo abaot ol sakrifaes we oli bin mekem from mi blong save gat wan laef we i moa gud. Mi tingting long ol odinens blong tempol we i mekem se yumi save stap tugeta bakegen olsem wan famli wan dei. Mo mi tingting long Atonmen blong Kraes, we i bin mekem hemia i posibol. Hem i bin pem praes blong mekem se yumi save laef i stap. From hemia, yumi lavem Hem mo wosipim Hem wetem fasin blong talem tangkyu, tedei mo blong oltaem.