Wo i Stap Gohed
Wo we i bin stat long heven i stap gohed kasem tedei. Wanem i stap hapen i we, faet ia i stap mekem olgeta Sent oli rere blong kambak long Sevya.
Foto i kam long Katarina Stefanovic © iStock/Getty Images; Moment/Getty Images
Eniwan we i stap folem ol intanasonol nius bae i agri se yumi stap laef long wan taem blong ol “wo, ol toktok from wo” (luk long D&C 45:26). Laki tumas, evriwan long wol ia i wan olfala soldia blong wo. Yumi bin stap faet agensem ol grup blong ol devel long wan wo we i stap gogohed yet, mo wo ia i bin stat long ples blong laef bifo laef long wol ia, bifo yumi bon i kam long wol.
From se yumi no bin kasem wan bodi blong mit mo bun, yumi bin faet long Wo long Heven we i no gat naef blong faet, ol masket o ol bomb. Be faet ia i bigwan i semmak olsem eni wo blong tedei, mo i bin gat plante bilian man i kasem kil o i ded.
Wo long laef bifo laef long wol ia, yumi bin faet long hem wetem ol toktok, ol tingting, ol strong toktok, mo fasin blong winim tingting blong man (luk long Revelesen 12:7–9, 11). Teknik blong Setan i blong mekem evriwan i fraet. Hem i bin save se fraet i bes wei blong prapa spolem fet. Maet hem i yusum ol toktok olsem: “Hem i had tumas.” “Hem i no posibol blong mekem i klin bakegen.” “I gat tumas denja long hem.” “?Olsem wanem yu save se yu save trastem Jisas Kraes?” Hem i jalus tumas long Sevya.
Tangkyu tumas, plan blong God i bin winim ol giaman blong Setan. Plan blong God i gat insaed fridom blong man i jusum gud fasin, mo wan bigfala sakrifaes. Jehova, we yumi save long hem olsem Jisas Kraes, i bin volontia blong stap olsem sakrifaes ia—blong Hem i safa from evri sin blong yumi. Hem i bin glad blong givim laef blong Hem from ol brata mo sista blong Hem, blong mekem se olgeta we oli sakem sin, bae oli kambak we oli klin, mo long en, bae oli kam olsem Papa blong olgeta long Heven. (Luk long Moses 4:1–4; Abraham 3:27.)
Narafala gud samting we i bin helpem Jehova blong winim hat blong ol pikinini blong God, i strong testemoni we ol sapota blong Hem oli talem; ol sapota ia, Mikael, ak enjel nao i bin lidim (luk long Revelesen 12:7, 11; D&C 107:54). Long laef bifo laef long wol ia, Adam, oli singaotem hem, Mikael; mo Setan, oli stap singaotem hem Lusifa, we i minim “man we i tekem laet.”1 Bae yumi luk se nem ia i defren smol olsem nem blong wan prins blong tudak (luk long Moses 7:26), be ol skripja oli tijim se Setan i bin wan “enjel blong God we i bin gat atoriti long ples blong God” bifo hem i foldaon (luk long D&C 76:25–28).
?Olsem wanem nao wan spirit we i gat fulap save olsem mo fulap eksperiens olsem i foldaon longwe olsem? Hem i from hae tingting blong hem. Lusifa i bin faet agensem Papa blong yumi we i stap long Heven from se hem i bin wantem se kingdom blong God i blong hemwan nomo.
Long toktok we yumi save gud long hem, “Lukaot long Hae Tingting,” Presiden Ezra Taft Benson (1899–1994) i bin tijim se Lusifa “i bin wantem se hem i kasem ol ona we i bitim evri narawan,” mo “samting we hae tingting blong hem i wantem, i blong tekemaot God long jea blong Hem.”2 Yu bin harem tu se Setan i wantem blong prapa spolem fridom blong joes blong ol man, be hemia i no wan samting ia nomo we hem i wantem tumas. Oli bin sakemaot hem aotsaed long heven from hem i go agensem Papa mo Pikinini (luk long D&C 76:25; Moses 4:3).
?From wanem yu mo mi i stap faet agensem devel? Yumi bin faet from yumi gat tru fasin. Yumi bin lavem mo sapotem Papa blong yumi we i stap long Heven. Yumi bin wantem blong kam olsem Hem. Lusifa i bin gat wan defren gol. Hem i bin wantem blong tekem ples blong Papa (luk long Aesea 14:12–14; 2 Nifae 24:12–14). Traem tingting olsem wanem we taem Setan i tanem baksaed blong hem, i mekem Papa mo Mama blong yumi long Heven i harem nogud tumas. Long ol skripja, yumi ridim se “ol heven oli krae from hem” (luk long D&C 76:26).
Afta wan strong faet long toktok, Mikael mo ol ami blong hem oli win. Tu grup aot long tri blong ol pipol long heven oli jusum blong folem Papa (luk long D&C 29:36). Setan mo olgeta we oli folem hem, God i sakem olgeta oli aot long heven, be God i no sendem olgeta i go stret long bigfala tudak. Faswan, God i sendem olgeta oli kam long wol ia (luk long Revelesen 12:7–9), ples we Jisas Kraes bae i bon i kam long hem, mo ples we sakrifaes blong Hem we bae i pem praes, bae i tekples long hem.
?From wanem nao God i letem ol grup blong Setan oli kam long wol ia? Oli kam blong oli stap agensem olgeta we bae God i testem olgeta long wol ia (luk long 2 Nifae 2:11). ?Bae long en, God i sakem olgeta aot long bigfala tudak? Yes Afta long Milenium, Setan mo ol pipol blong hem, bae God i sakem olgeta aot fogud.
Setan i save se taem blong hem i sot i stap. Long taem blong Seken Kaming blong Jisas, Setan mo ol enjel blong hem, bae oli fasem olgeta blong 1,000 yia (luk long Revelesen 20:1–3; 1 Nifae 22:26; D&C 101:28). Taem dei ia i stap kam kolosap, ol paoa blong ivel oli stap faet strong tumas blong kasem fulap sol we oli save kasem.
Jon Reveleta, God i bin soem Wo long Heven long hem olsem pat blong wan bigfala visen. Oli soem long hem olsem wanem oli sakem Setan i kam daon long wol ia blong temtem ol man. Hemia wanem Jon i talem: “Be sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save smol taem nomo blong hem i stap yet” (Revelesen 12:12).
?So wanem nao Setan i stap mekem evri dei from se hem i save se hem i no gat taem blong westem? Aposol Pita i raetem se “hem i olsem wan laeon we i stap singaot bigwan, i stap lukaot man blong i kakae” (Fas Pita 5:8).
?Wanem nao i pusum Setan? Bambae hem i neva gat wan bodi, bambae hem i neva gat wan waef o wan famli, mo bambae hem i neva gat wan glad we i fulwan, mekem se hem i wantem mekem evri man mo woman oli “harem nogud semmak olsem hem” (2 Nifae 2:27).
Devel i stap lukaotem evri man, be speseli olgeta we oli gat moa janis blong kasem hapines we i no save finis. I klia se hem i jalus long eniwan we i stap long rod blong hem blong kam olsem wan god. Ol skripja oli tijim se Setan “i stap mekem wo agensem olgeta sent blong God, mo i raonem gud olgeta” (D&C 76:29).
Wo we i bin stat long heven i stap gohed kasem tedei. Wanem i stap hapen i we, faet ia i stap mekem olgeta Sent oli rere blong kambak long Sevya.
Presiden Brigham Young (1801–77) i bin profesae “se Jos bae i go olbaot long ol ples, i kam bigwan, i gro mo i go long evri ples, mo folem hamas ples we bambae Gospel i kasem long ol nesen blong wol, bae paoa blong Setan tu i girap folem.”3
Mi ting se yumi evriwan bae i agri se profesi ia i stap kamtru sapos yumi lukluk gud ivel i stap go insaed long ol sosaeti blong wol. Presiden Young i bin tijim se yumi nidim blong stadi long ol teknik blong enemi blong mekem se bae yumi save winim olgeta. Bae mi serem fofala teknik we i gat pruf se oli wok, mo samfala tingting long wei blong stanap agensem olgeta.
Ol Teknik blong Setan
1. Temtesen. Devel i no sem blong putum ol nogud tingting i go insaed long maen blong yumi. Buk blong Momon i stap tijim se Setan i sakem ol sloslo toktok we oli no klin, mo oli no kaen, mo i stap planem ol tu tingting. Hem i jikim yumi blong yumi tekem aksen long ol samting we bodi o filing i wantem tumas, mo blong yu stap selfis mo griri. Hem i no wantem yumi blong luksave se ol tingting ia oli kam wea, mekem se hem i toktok slo, “Mi mi no devel, from i no gat devel” (2 Nifae 28:22).
?Olsem wanem nao yumi stap stanap agensem temtesen? Wan long ol tul we i wok i blong sendem Setan nomo i go aot. Hemia nao wanem bae Jisas i mekem.
Stori long Niu Testeman abaot Sevya long hil blong ol temtesen i tijim fulap samting. Afta long wanwan temtesen, devel i presentem hem long Jisas, mo Jisas i yusum wan teknik blong difendem Hemwan we i gat tufala step long hem: faswan, Hem i givim oda long Setan blong aot; afta, Hem i talem toktok long skripja.
Bae mi givim yu wan eksampol: “!Setan! !Yu gowe long mi!” Jisas i talem, “Baebol i talem se ‘yu mas mekem wosip long Hae God we i God blong yu, mo bambae yu mas mekem wok blong hem nomo’” (Matiu 4:10). Nekis ves i talem: “Nao Setan i gowe long Jisas, mo ol enjel oli kam, oli stap lukaot long hem” (Matiu 4:11). !Teknik blong Sevya blong difendem Hemwan i wok gud!
Stori blong laef blong Presiden Heber J. Grant (1856–1945) i givim laet long wei we, Presiden Grant, taem hem i bin wan yang man, hem i stanap agensem devel. Taem Presiden Grant i luksave se Setan i stap toktok slo long hem, i traem blong planem ol tu tingting insaed long hat blong hem, hem i talem laod nomo: “Masta Devel, yu sarap.”4
Yu gat raet blong talem long Setan blong hem i aot taem yu fesem temtesen. Skripja i tijim: “Yufala i mas blokem Setan, nao hem bambae i ronwe long yufala” (Jemes 4:7).
Nara wei we Sevya i yusum blong difendem Hem i blong talem ol toktok blong skripja. I gat bigfala paoa long fasin blong lanem skripja baehat, semmak olsem we Jisas i bin mekem. Ol ves long skripja oli save kam wan bigfala ples blong bolet long saed blong spirit.
Taem yu gat temtesen, yu save talem ol komanmen baehat, olsem: “Tingbaot Sabat dei blong kipim i tabu,” “Lavem ol enemi blong yu,” o “Letem klin fasin i flasem ol tingting blong yu oltaem” (Eksodas 20:8; Luk 6:27; D&C 121:45). Paoa blong skripja i no mekem Setan i fraet nomo, be i tekem Spirit i kam long hat blong yumi, i mekem tingting blong yumi i kwaet, i mekem yu strong moa blong stanap agensem temtesen.
2. Ol giaman mo ol tingting we i harem nogud. Ol skripja oli talemaot we Setan i “papa blong evri giaman” (2 Nifae 9:9). No bilivim hem taem hem i stap tok slo mo talem ol mesej olsem, “Yu neva mekem eni samting i stret,” “Yu gat tumas sin blong yu kasem fogivnes,” “Bae yu neva jenis,” “I no gat wan i stap kea long yu,” mo “Yu no gat talen.”
Wan nara giaman we hem i stap yusum oltaem i olsem: “Yu nid blong traem evri samting wan taem nomo—jes blong kasem eksperiens. Wan taem nomo bae i no kilim yu.” Doti smol sikret we hem i no wantem yu blong save i we sin ia i save mekem se yu nomo save lego sin ia bakegen.
Wan nara giaman we i wok gud we Setan bae i traem long yu, hem i, “Evri narawan i stap mekem nomo. Hem i okei.” !Hem i no okei! So talem long devel se yu no wantem go long telestial kingdom—nating we evri nara man oli stap go long ples ia.
Nomata Setan bae i giaman long yu, yu save dipen long Spirit blong i talemaot long yu trutok we i stap. Hemia nao presen we i Tabu Spirit i impoten.
Devel, oli singaotem, “bigfala man blong giaman.”5 Hem i stap traem blong kopi long evri tru prinsipol we Lod i givim.
Tingbaot, ol kopi oli no semmak long nara saed blong samting. Olsem, nara saed blong waet, hem i blak, be wan kopi blong waet, bae i no waet tumas, o i grei. Ol kopi oli gat sam samting oli semsemmak long ril samting blong save trikim ol pipol we oli no lukluk gud. Oli wan rabis kopi blong wan gud samting, mo i semmak long giaman mane, oli blong nating nomo. Bae mi givim wan pikja long hemia.
Wan long ol giaman kopi blong Setan i we fet i wan giaman bilif. Giaman kopi blong hem blong soem lav, hem i fasin blong gat rabis tingting. Hem i mekem giaman kopi blong prishud taem hem i statem fasin blong giaman pris, mo hem i kopi ol merikel blong God tru long fasin blong wokem blak majik.
Mared bitwin wan man mo wan woman, God nao i odenem, be sem seks mared, hem i wan giaman kopi nomo. Mared ia i no givim rod blong pikinini i bon insaed long hem, mo i no mekem man i kam olsem wan god. Nomata ol kopi blong hem oli stap giaman long plante pipol, oli no ril samting. Oli no save tekem hapines we i stap oltaem.
God i givim woning long yumi abaot ol giaman kopi ia insaed long Doktrin mo Ol Kavenan. Hem i talem: “Mo wanem we i no mekem man i kam antap, i no kam long God, mo i tudak” (luk long D&C 50:23).
3. Raorao. Setan i papa blong ol raorao. Sevya i tijim se: “hem i tanem ol hat blong ol man blong rao wetem kros, wan wetem narawan” (3 Nifae 11:29).
Devel i bin lanem, aot long plante yia blong eksperiens, se long ples we i gat raorao, Spirit blong Lod bae i no stap long hem. Stat long tetaem ia we hem i winim tingting blong Ken blong kilimded Ebel, Setan i bin lidim tingting blong ol brata mo sista blong hem blong oli stap raorao. Hem i stap tantanem ol problem i go long ol mared, long medel blong ol memba blong wod, mo bitwin ol misinari kompanion. Hem i laekem blong luk ol gudfala man oli stap raorao. Hem i traem blong statem ol famli raorao stret bifo Jos i stat long Sandei, stret bifo long famli haos naet long Mandei naet, mo taem wan kapol i plan blong go long wan sesen long tempol. Hem i save plan gud long taem blong hem.
Taem i gat raorao long haos blong yu o long ples blong wok, wantaem nomo yu stop blong mekem wanem yu stap mekem mo go mekem pis. I nomata se huia i statem.
Raorao, plante taem i stat taem wan i faenem rong long nara man. Josef Smit i tijim se “devel i switim yumi se yumi stret mo gud nomo taem yumi stap fidim yumi wetem ol rong blong ol nara man.”6 Taem yu tingting long hem, fasin blong ting se yu stret mo gud evriwan, i wan giaman kopi blong tru mo gud fasin.
Setan i lavem blong pulpulum raorao insaed long Jos. Hem i spesel blong poenem ol rong blong ol lida blong Jos. Josef Smit i givim woning long olgeta Sent se fas step blong apostasi i blong lusum tras long ol lida blong Jos.7
Fulap long ol buk o samting we oli raetem agensem ol Momon, i stap giaman abaot huia i Josef Smit. Enemi i wok had blong no kliarem nem blong Josef from se mesej blong Restoresen i hang long stori blong Profet long wanem i bin hapen long Tabu Bus. Devel i stap wok had tedei i bitim bifo blong mekem ol memba oli gat kwestin long testemoni blong olgeta abaot Restoresen.
Long ol fas yia blong dispensesen blong yumi, plante long ol prishud brata oli no bin stap tru long Profet, mo oli bin rigret afta. Wan long olgeta i Lyman E. Johnson, we oli eskomuniketem hem from fasin blong hem i no stret mo i nogud. Afta long hemia, hem i krae se hem i aot long Jos: “Bae mi glad blong safa nomo blong oli katemaot raet han blong mi sapos mi save bilif bakegen. Nao mi bin fulap long glad mo hapines. Ol drim blong mi oli gud. Taem mi wekap long moning, spirit blong mi i gat glad long hem. Mi bin hapi long dei mo long naet, mi fulap long pis mo glad mo fasin blong talem tangkyu. Be naoia, hem i tudak nomo i stap, i soa long bodi, i mekem mi harem nogud, i rabis long evri samting. Mi neva luk wan hapi taem stat long tetaem ia.”8
Tingting long ol toktok ia. Oli stap olsem wan woning i go long evri memba blong Jos.
Mi mi konvet i kam long Jos. Mi bin baptaes taem mi gat 23 yia, mi wan yang singgel adalt we i stap go long medikol skul long Arisona, YSA. Mi save stret olsem wanem Setan i wok long ol investigeta blong mekem oli gat tu tingting mo slakem tingting blong olgeta taem oli stap lukaotem trutok.
Evri taem, long taem we mi bin yangfala, mi bin stap luk eksampol blong ol fren blong mi we oli ol Lata-dei Sent. Mi sapraes tumas long wei we oli stap lidim laef blong olgeta. Mi mekem desisen blong lanem moa abaot Jos, be mi no bin wantem talem long eniwan se mi stap stadi long ol Momon. Blong mekem se mi no fesem fos blong ol fren blong mi, mi disaed blong lukaotem samting miwan nomo.
Hemia i plante yia bifo i gat intanet, mekem se mi go long pablik laebri. Mi faenem wan kopi blong Buk blong Momon, mo wan buk we oli singaotem A Marvelous Work and a Wonder, we Elda LeGrand Richards (1886–1983) blong Kworom blong Olgeta Twelef Aposol i bin raetem. Mi stat blong ridim tufala buk ia wetem bigfala tingting blong wantem save, mo mi faenem insperesen insaed long tufala buk ia.
Taem we spirit blong mi i wantem blong save moa, Setan i stap wispa long sora blong mi. Hem i talem long mi se blong mi save gat wan klia tingting, mi nidim blong ridim wanem oli stap talem agensem Jos tu. Mi gobak long pablik laebri mo stat blong lukluk raon. Yes, mi bin faenem wan buk we i spolem nem blong Profet Josef.
Taem mi ridim buk ia agensem ol Momon, i mekem mi konfius. Mi lusum swit spirit ia mo paoa ia we i bin stap lidim stadi blong mi. Tingting blong mi i fasfas mo mi stap rere blong lego stadi blong mi blong faenem trutok. Mi bin stap prea blong kasem wan ansa !be mi stap ridim buk we i agensem ol Momon!
Mi sapraes. Mi kasem wan fon kol we i kam long wan fren blong mi long hae skul we i stap go long Brigham Yang Yunivesiti. Hem i invaetem mi blong go visitim hem long Yuta, mo i promesem mi se bae mi laekem blong lukluk raon. Woman ia i no save nating se mi stap stadi abaot Jos blong hem long sikret.
Mi akseptem invitesen blong hem. Fren blong mi i talem se bae mitufala i go long Sol Lek Siti blong visitim Tempol Skwea. Hem i sapraes tumas we mi mi glad tumas blong go. Hem i no save nating se mi wantem tumas blong lanem trutok abaot Josef Smit mo Restoresen.
Ol sista misinari long Tempol Skwea oli bin help plante. Oli no bin save, be oli bin stap ansarem ol kwestin blong mi. Testemoni blong olgeta i lidim mi blong “gat tu tingting long ol tu tingting blong mi,”9 mo fet blong mi i stat blong gro. Paoa blong testemoni we wan i filim insaed long hat, wan i no save sarem ae long hem.
Fren blong mi i serem testemoni blong hem tu long mi, mo i bin invaetem mi blong prea mo askem God sapos Jos i tru. Long longfala rod i gobak long Arisona, mi stat blong prea wetem fet—blong fas taem “wetem wan tru hat mo wan tingting we i tru blong wantem save” (Moronae 10:4). Long wan taem long rod ia, i olsem se ful trak blong mi i saen wetem laet. Mi lanem long tetaem ia se laet i save ronemaot tudak.
Afta we mi disaed blong baptaes, devel i traem wan moa taem. Hem i wok long famli blong mi, we oli mekem evri samting long paoa blong olgeta blong slakem tingting blong mi, mo oli no wantem kam long baptaes blong mi.
Mi kasem baptaes, mo sloslo, hat blong olgeta i kam sofsof. Oli stat blong helpem mi blong lukaotem famli histri blong mi. Sam yia afta, mi bin baptaesem yangfala brata blong mi. Fren ia we i bin invaetem mi blong visitim hem long Yuta, naoia i waef blong mi.
4. Daonem Tingting. Setan i yusum gud tul ia long plante fetful Sent taem we evri nara samting i no save wok. Long mi, taem mi stat blong daonem tingting blong mi, hem i stap helpem mi blong luksave huia i stap traem blong daonem mi. Hemia i mekem mi mi krangke inaf blong mi smael—jes blong jikim devel nomo.
Sam yia i pas, Presiden Benson i givim wan toktok we oli singaotem “Yu No Slakem Tingting.” Long gudfala toktok ia, hem i givim woning se: “Setan i stap traehad moa blong winim ol Sent wetem fasin blong slakem tingting, daonem tingting, sik long tingting mo trabol long tingting.”10 Presiden Benson i askem strong ol memba blong Jos blong lukaot gud, mo hem i givim 12 tingting long ril laef blong faet agensem fasin blong slakem tingting.
Samfala tingting blong hem i gat insaed blong givim seves long ol narawan; blong wok had mo blong no stap nating; blong praktisim ol gud fasin blong gud helt, we i blong mekem smol eksasaes mo kakae ol gudfala kaekae taem oli kamaot long garen; blong askem wan prishud blesing; blong lisin long miusik we i givim insperesen; blong kaontem ol blesing blong yu mo blong putum ol gol i stap. Mo antap long evri samting, olsem we ol skripja oli tijim, blong yumi mas prea oltaem blong yumi save winim Setan (luk long D&C 10:5).11
Setan i seksek taem hem i stap luk
Sent ia we i no strong nating long ol narawan i nildaon.12
Hem i impoten blong save se i gat ol limit long paoa blong ivel. Godhed i putum olgeta limit ia i stap, mo Setan i no gat raet blong krosem ol limit ia. Eksampol, ol skripja oli talem gud long yumi se “oli no givim paoa long Setan blong i temtem ol smol pikinini” (luk long D&C 29:47).
Wan nara limit i we Setan i no save ol tingting blong yumi, be sapos nomo yumi talem long hem. Lod i eksplenem se “i no gat wan narafala man bakegen, be God nomo, we bae i save ol tingting blong yu mo ol samting we hat blong yu i wantem mekem” (D&C 6:16).
Ating, from hemia nao God i givim yumi ol komanmen olsem: “Yu no mas sakem smol smol toktok” (luk long D&C 9:6) mo “Yu no talem nogud samting agensem neiba blong yu” (luk long D&C 42:27). Sapos yu save lanem blong kontrolem tang blong yu (luk long Jemes 1:26), bae yu no save givim tumas infomesen i go long devel. Taem hem i harem ol smol toktok, ol komplen mo poenem fingga long man, hem i tek not long hem. Ol nogud toktok blong yu i soemaot l weaples yu no strong long hem long enemi blong yu.
Mi gat sam gudfala nius blong yu. Ol ami blong God oli bigwan moa bitim ol ami blong Lusifa. Yu save lukluk raon mo tingting long yuwan se: “Wol ia i stap kam moa nogud we moa nogud. Setan i mas winim wo ia.” No letem giaman ia i winim yu. Trutok i we, namba blong yumi i bigwan moa bitim enemi. Tingbaot se tu pat aot long wan, oli ol pikinini blong God we oli bin jusum plan blong Papa.
Ol brata mo sista, meksua se yu stap faet long saed blong Lod. Meksua se yu stap tekem naef blong faet blong Spirit wetem yu.
Hem i prea blong mi se long en blong laef blong yumi, yu save talem wetem Aposol Pol, “Long laef blong mi we mi mi bilif strong long Kraes, i olsem we mi mi stap resis strong long wan resis, mo naoia mi mi kamtru finis long en blong hem, mo mi mi stap holem strong yet fasin blong bilif” (2 Timoti 4:7).