Ol Buk we Oli Fogetem, Testemoni we Oli Tingbaot
Hem we i raet, i stap long Kagayan, Filipin.
Evri ae oli stap long mi. ?Bae mi save difendem Jos wetem simpol testemoni blong mi nomo?
Wan yia i pas, mi mekem wan gol blong kam antap long fasin blong lanem ol samting long saed blong spirit. Bae mi karem ol buk blong Jos, ol pamflet, ol lesenbuk, mo ol skripja i go long evri ples, mo long skul tu, from mi hanggri from ol toktok blong God. Be ol hadwok blong mi oli slodaon taem mi kam bisi blong stadi blong wan pleiplei we i stap kam.
Wan dei, tija blong mifala i lidim wan toktok, mo i askem evri studen we i no Katolik insaed long rum blong oli stanap. Mi, mi wan Lata-dei Sent nomo insaed long klas ia. Sikis nara studen tu oli stanap.
Nao hem i askem kwestin long olgeta: ?Yu yu blong wanem Jos? ?Hu nao i statem Jos? ?Olsem wanem nao oli stanemap Jos blong yu?
Mi nao laswan blong ansa. Mi no stap kwaet taem mi luksave se mi no bin karem ol buk blong Jos wetem mi, be mi stap traem blong tingbaot ol samting we mi bin stadi long olgeta. Wan ves long Baebol i kam long maen blong mi:
“Ino gud yu ting se sevya ia blong yu naoia, hem i inaf blong givhan long yu. Yu mas trastem Hae God long olgeta tingting blong yu.
“Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:5–6).
Mi stanap long fored blong klas, mo tok stret mo fogetem ol fraet blong mi. Mi talem se mi mi wan memba blong Jos blong Jisas Kraes blong Ol Lata-dei Sent. Mi bin serem stori blong wan yang boe, Josef Smit, we i bin luk God. Mi bin filim wan samting i hot insaed long jes blong mi, mo wota blong ae blong mi i foldaon. Mi bin serem se Jos i bin oganaes long 6 Epril 1830, mo mi bin testifae se wan profet blong God, God i bin singaotem mo prishud i bin kambak. Mi testifae se mi bin save se evri samting ia i tru.
Plante aoa blong stadi long gospel ia i tekem frut blong hem. I bin helpem mi blong difendem fet blong mi mo serem gospel. Mi bin praod we, sam wik afta, fo long ol klas fren blong mi oli kam joenem mi long Jos.
Eksperiens ia i bin tijim mi se hem i impoten blong gat wan testemoni. Long fas ples, mi bin askem miwan se from wanem Lod i no talem long mi blong tekem ol buk blong mi oli go long skul long dei ia. Bae oli helpem gud mi blong givim wan ansa we i stret evriwan blong ansarem ol kwestin ia. Be afta, mi bin luksave se yumi nidim blong lanem baehat evri samting abaot Jos, o dipen long ol refrens—yumi mas stadi, laef, mo serem gospel, mo dipen long Tabu Spirit. Maet mi no bin gat ol buk blong mi, be mi bin gat testemoni blong mi.