Ol Voes blong Ol Lata-dei Sent
Paos we i Lus
Droing i kam long Wilson J. Ong
I no longtaem i pas, mi bin muv i go long wan niu hom mo mi bin askem samfala memba blong Jos blong helpem mi wetem wan projek long niufala haos blong mi. Long medel blong projek ia, mi aot blong pem sam samting we mifala i nidim blong finisim wok ia. Afta we mifala i finisim wok ia, mi luksave se paos blong mi i no gat. Mi seksek from se insaed long paos blong mi, i gat evri pepa blong mi wetem mane we mi jes kasem long wan kastoma long moning ia. Mi gobak folem wokbaot blong mi i go kasem ples we mi pem ol saplae blong mi, be mi no faenem wan samting. Mi go hom, mi lukaot blong luk sapos mi mekem i foldaon samples, be mi no save faenem nating. Mi stat blong tingting long rod ia we bae mi mas mekem bak evri pepa blong mi bakegen. Nao, bifo mi aot long haos, wan fren i askem mi: “?Yu prea from finis?”
Kwiktaem mi tingting, “!O yes, mi prea finis!”
Be wanem we i tru, i we mi no bin prea wetem ful tingting. Be, mi wantem fosem tingting blong mi long hemia blong Papa long Heven, mo mi mekem se i wok blong Hem blong i helpem mi blong faenem paos blong mi. Be afta, mi tingbaot skripja long Aesea 55:8: “Hae God i talem se: ‘Tingting blong mi i no olsem tingting blong yufala, mo fasin blong mi, i no olsem fasin blong yufala.’”
Long Sandei, mi go long jos, mo wan memba we i bin stap wetem mi long dei bifo i talem long mi se hem i bin prea had long Papa long Heven blong mi save faenem paos blong mi. Hem i talem se hem i filim se bambae mi faenem. Afta long hemia, mi stap sidaon blong mekem stadi blong miwan, nao mi stat blong ridim toktok ia, Receiving Answers to Our Prayers we Elda Gene R. Cook i bin raetem, we hem i wan emeritus memba blong Olgeta Seventi. Fas pej i stap tokbaot wan stori we i kolosap semmak long hemia blong mi: Boe blong Elda Cook i bin lusum paos blong hem, mekem se famli i kam tugeta mo i bin prea long Lod se bambae oli faenem.
Afta we mi ridim eksperiens ia, mi putum long praktis wanem mi bin lanem mo singaotem waef mo ol pikinini oli kam tugeta. Mifala i mekem wan sekol, mo wanwan i mekem wan prea, i askem Lod blong helpem mifala blong faenem paos ia sapos i tingting blong Hem.
Mi bin luk finis paoa blong prea, be afta long hemia, taem mi bin prea long praevet, mi bin askem Papa long Heven blong ansarem prea blong mifala blong mekem fet blong waef mo ol pikinini blong mifala i kam strong moa.
Long nekis dei, wan man i ringim mi. Hem i talem se hem i faenem paos blong mi, wetem mane insaed. Mi krae olsem wan pikinini from se mi gat ansa long prea blong mi, mo fet blong famli blong mi i kam strong moa.
Mi save se Papa long Heven, nomata we Hem i gat fulap pikinini blong lukluk long olgeta, i ansa long wanwan long yumi folem taem blong Hem mo folem wei blong Hem.