Oli bin Luk Hem

Meri Magdala i bin fasfala witnes. Long Sandei moning, afta we oli hangem Jisas long kros, hem i kam long hol blong ston we oli haedem Jisas long hem wetem sam narafala woman blong anoentem bodi blong Kraes. Taem Meri i luk se hol blong ston ia i emti, hem i krae. Wan i kam kolosap long hem, biaen long hem, i askem: “Woman, ?yu yu stap krae from wanem?” Traem tingting se hem i sapraes olsem wanem taem hem i faenemaot se hem i Jisas, we i girap long ded. (Luk long Jon 20:1–18.)

Pikja

Christ on the road to Emmaus

Road to Emmaus, i kam long Jon McNaughton

Kleopas mo wan nara disaepol oli bin stap wokbaot long rod i go long Emeas, nao wan strenja i joenem tufala. Tufala i no luksave niufala man ia, be long taem blong kakae tugeta long naet, strenja ia i brekem bred. Nao, ae blong tufala i open, mo tufala i luksave se oli bin stap wokbaot wetem Sevya long rod i kam. “Man. Taem hem i stap toktok long yumitufala long rod, i stap talemaot ol tok ya long Baebol, tok blong hem i nambawan, i mekem yumi harem gud tumas.” Tufala i stap askem tufalawan bakegen, mo stap ting hevi long konfemesen we tufala i bin filim se i tru we Jisas i bin stap wetem tufala. (Luk long Luk 24:13–34.)

Pikja

Resurrected Christ with Apostles

Behold My Hands and Feet, i kam long Harry Anderson

Tufala disaepol we oli bin travel i go long Emeas wetem Kraes oli gobak long Jerusalem mo talem olgeta ten Aposol abaot eksperiens blong olgeta. Taem oli bin stap storian, Sevya Hemwan i kamaot long olgeta, i talem se: “Yufala i luk han blong mi mo leg blong mi. Mi nomo ya. Yufala i pusum han blong yufala, yufala i tajem mi, nao bambae yufala i haremsave. Devel blong man i no gat mit mo bun blong hem, olsem we yufala i save luk we mi mi gat.” (Luk long Luk 24:36–41, 44–49.)

Pikja

Christ with Thomas

Peinting we i soem Tomas we i kam long Brian Call

Aposol Tomas i no bin stap taem we Sevya i bin kamaot faswan long ol nara Aposol, mekem se hem i no bin biliv se Kraes i laef bakegen long ded. Wan wik afta, Kraes i kamkamaot bakegen long ol Aposol. Long tetaem ia, Tomas i bin stap long ples ia, mo from se hem i bin luk Kraes, hem i bin biliv se Hem i bin girap bakegen. Sevya i bin givim woning long Tomas long saed blong fasin blong bilivim samting afta we hem i lukluk nomo: “Yu yu bilif long mi from we yu luk mi. Be olgeta we oli no luk mi, be oli bilif long mi, bambae oli save harem gud.” (Luk long Jon 20:24–29.)

Pikja

Apostles on the Sea of Tiberias

The Resurrected Christ at the Sea of Tiberias, we i kam long David Lindsley

Wan dei, i no longtaem afta long Laef bakegen long ded blong Jisas, samfala Aposol oli bin go huk long Solwota blong Taebirias, be oli no kasem fis. Long nekis moning, Sevya i kamaot long olgeta mo talem long olgeta blong oli sakem net long raet saed blong bot. Taem oli mekem, net i fulap long fis, mekem se oli no save pulum net i kam insaed long bot. Afta we oli kakae tugeta, Sevya i bin tijim se i impoten blong tijim ol narafala man, mo i talem: “Givim kaekae long ol sipsip blong mi.” Ol Aposol oli bin spendem haf laef blong olgeta blong mekem hemia nomo—blong tijim ol pipol abaot Kraes—mo long sam long olgeta, oli ded from wok ia. (Luk long Jon 21:1–22.)

Pikja

Christ among the Nephites

One Shepherd,i kam long Howard Lyon

Long taem we oli hangem Kraes long kros, graon ia long Ol Amerika, graon we i seksek i prapa spolem olgeta, wetem ol faea, ol nara disasta, mo trifala dei blong tudak we i makem taem we Sevya i ded. Afta, Kraes i bin kamdaon long heven mo i bin visitim plante pipol, samples 2,500 long olgeta we oli kam tugeta kolosap long tempol long Baontiful. Hem i bin invaetem ol pipol blong oli filim ol mak long han blong Hem mo long leg blong Hem mo long saed blong bodi blong Hem; Hem i givim wan toktok mo i bin blesem ol pikinini blong ol Man blong Nifae, wan afta narawan. Plante moa pipol oli bin kam wanples long nekis dei, mo Sevya i bin visitim mo i bin tijim olgeta. Long en, ol disaepol oli stanemap Jos blong Kraes, mo ol Man blong Nifae oli kasem wan strong witnes mekem se, olgeta mo ol Man blong Leman tu, oli bin jenisim laef i kam long Lod. (Luk long 3 Nifae 11–18; luk tu long 3 Nifae 8–10; 4 Nifae 1.)

Kraes i bin kamaot tu long plante narafalawan, wetem samfala woman we oli bin kam long hol blong ston blong helpem Meri Magdala blong anoentem bodi blong Kraes; mo long samples 500 man, Jemes mo Pol. (Luk long Matiu 28:9; Ol Wok 9:4–19; 1 Korin 15:6–7; luk tu long 3 Nifae 19; 26:13.)