Mekem Stadi long Gospel i Stret long Yuwan
Lukluk long ol aedia ia blong stadi long gospel, mo faenem ol ansa long ol kwestin blong yu long saed blong spirit.
?Olsem wanem nao bae yu stadi taem yu stap lukaotem ansa blong wan kwestin long saed blong spirit, o iven, taem yu stap traem blong andastanem gud moa olgeta skripja? Mi minim yu–yuwan. Evriwan i gat defren fasin blong stadi long skul, be samtaem, yumi fogetem se yumi save mekem gospel stadi i stret long yumiwan tu. Nekis taem we yu gat wan kwestin long saed blong spirit o long saed blong doktrin, traem samfala tingting ia blong traem faenemaot wijwan i wok gud moa long yuwan.
1. Krietem samting
Mekem wan lis, wan jat, o wan map. (Luk daon ia blong gat wan eksampol.)
Mekem wan stadi bed. Raetemdaon ol toktok mo ol aedia, mo afta, joenem olgeta wetem ol laen mo ol sekol blong soem olsem wanem nao oli joen tugeta.
2. Raetem
Raetemdaon insaed long wan jenol, ol tingting mo ol filing we yu stap kasem long taem blong skripja stadi blong yu mo luklukbak long olgeta plante taem.
Raetemdaon ol tingting mo ol filing we yu kasem afta long ol prea blong yu, iven sapos ol filing ia oli no abaot topik ia we yu stap stadi long hem. Luk wanem Spirit i stap tijim yu ova wan longfala taem.
Raetemdaon ol kwestin blong yu insaed long wan smol buk, insaed long fon blong yu, o wan eksasaes buk we i stap long saed blong bed blong yu, blong mekem yu tingbaot ol samting ia, mo blong helpem yu blong tingbaot wanem yu stap lanem evri dei.
3. Lisin mo Toktok Raon
Toktok long wan famli o wan lida we yu trastem. Wokemaot ol samting tugeta. Maet i save tekem longtaem smol, be bae yutufala i gro tugeta long rod ia.
Tijim wan narawan. Wanwan i tekem taem blong serem wanem we yu save. Toktok raon long wanem wanwan i stap lanem aot long narawan.
Lisin long ol skripja o ol narafala LDS stori mo risos we oli ridim laod.
4. Fasin blong Lukaotem Samting
Blong stadi mo luklukgud insaed long ol skripja mo long intanet (luk daon ia blong kasem wan lis blong ol gudfala LDS risos we i save help).
Luklukgud long LDS.org blong kasem ol vidio o singsing abaot wanem yu stap stadi long hem.
Stadi folem situesen we i stap. Luklukgud insaed long histri, o ol japta raon long topik o skripja ia we yu stap stadi long hem.
5. Mekem
Aktem ol stori blong ol skripja o ol narafala risos. ?Olsem wanem we taem yu putum yuwan insaed long sus blong man o woman ia i helpem yu blong andastanem gud moa wanem nao yu stap stadi long hem? ?Bae ol semmak situesen insaed long laef blong yu bae oli luk olsem wanem?
Mekem wan skripja jen we i joenem ol ansa we yu stap faenem insaed long ol skripja. (Luk daon ia blong gat wan eksampol.)