Ol Ansa we Oli Kam long Ol Lida blong Jos
Olsem Wanem blong Faenem Tru Pis
I kam long wan toktok blong jeneral konfrens blong Epril 2013.
Hop we i kam long heven, long ol gudfala pipol long evri ples hem i bin, mo bambae oltaem hem i pis long wol. Yumi neva mas givap long gol ia. Be Presiden Joseph F. Smith (1838–1918) i bin tijim: “Spirit ia blong pis mo lav bae i neva kam long wol kasem taem we ol man bae oli kasem trutok blong God mo mesej blong God, mo kasem oli luksave paoa mo atoriti blong Hem we i tabu tumas.”
Yumi hop mo prea strong blong gat pis long wol, be yumi nao, olsem wanwan man, woman mo famli bae yumi mekem kaen pis olsem i stap, we hem i pis ia we i praes blong stap stret mo gud we God i promesem. Pis ia, i wan presen blong promes blong misin blong Sevya mo sakrifaes blong Hem we i bin pem praes.
Pis i no jes blong stap sef, o no gat wo, no gat vaelens, no gat raorao mo tingting blong agens. Pis i kam taem wan i save se Sevya i save huia yumi mo i save se yumi gat fet long Hem, lavem Hem, mo stap obei ol komanmen blong Hem, iven, mo speseli long taem blong ol tes mo trabol we oli spolem gud laef blong yumi (luk long D&C 121:7–8).
?Bae mi go wea blong faenem pis? ?Wehem kamfot blong mi taem ol nara ples oli stop blong mekem mi mi hapi?” (“Where Can I Turn for Peace?” Hymns, no. 129). Ansa, hem i Sevya, we i stamba mo man we i givim pis. Hem i “Prins blong Pis” (Aesea 9:6).
Taem yumi putum tingting blong yumi i stap daon long fored blong God, taem yumi stap prea oltaem, taem yumi sakem sin, taem yumi go insaed long ol wota blong baptaes wetem wan hat we i fulap long sore mo wan spirit we i wantem sakem sin, mo taem yumi kam ol tru disaepol blong Jisas Kraes, long taem ia nao yumi stap soem ol bigfala eksampol blong stret mo gud fasin, we praes blong hem, hem i pis.
Jos i wan ples we olgeta we oli stap folem Kraes oli kam haed long hem blong faenem pis. Samfala yang pipol long wol, oli talem se oli gat fasin long saed blong spirit be oli no folem relijin. Blong filim se yu stap laef long saed blong spirit, i wan gudfala fas step. Be, insaed long Jos nao yumi kasem felosip, oli tijim yumi mo oli fidim yumi wetem gudfala toktok blong God. Moa impoten long hemia, “hem i prishud atoriti insaed long Jos we i givim ol tabu odinens mo kavenan we ol joenem ol famli tugeta, mo i mekem yumi kwalifae blong gobak long God we i Papa, mo long Jisas Kraes, insaed long selestial kingdom. Ol odinens ia oli tekem pis i kam from se oli ol kavenan we yumi mekem wetem Lod.
Ol tempol oli ol ples we plante long ol tabu odinens ia oli stap tekem ples, mo tu, oli wan ples blong pis, mo wan ples blong haed long wol ia. Olgeta we oli stap visitim tempol o oli stap tekpat long ol open haos blong tempol, oli stap filim pis ia tu.
Sevya i stamba blong tru pis. Iven wetem ol tes blong laef, from Atonmen blong Sevya mo from gladhat blong Hem, taem man i laef long stret mo gud fasin bae i kasem wan praes we i wan pis insaed long hemwan (luk long Jon 14:26–27; 16:33).