Rere from Tempol Evri Dei
Taem mi gat naen yia, mi gat wan naesfala Praemeri tija, we nem blong hem i Sista Kohler. Hem i wan kwaet woman, mo hem i naes tumas mekem se mi laekem tumas blong stap wetem hem. Wan dei, hem i givim wan pis pepa long wanwan long mifala. Mifala evriwan i raetem wanem mifala i wantem taem bae mifala i kam olfala. Mi raetem: “Go long yunivesiti, mo go mared long tempol.” Mi skojem pepa blong mi long doa blong kabod blong klos. Long naet, laet blong rod i stap saen i kam tru long windo blong mi. Mi lukluk i go long pis pepa blong mi. I mekem mi tingbaot se mi wantem go long tempol.
Long tetaem ia, i gat 12 tempol nomo raon long wol. Mi bin wantem blong go long evriwan.
Taem mama mo papa i plan blong go holidei, oltaem oli tekem famli blong mifala i go long tempol. Mifala i stap laef long Oregon, YSA. Tempol we i 965 kilometa longwe, i stap long Kadston, Albeta, Kanada. Trak blong mifala i no gat kolkol ea. Brata mo sista blong mi i sidaon long jea biaen long trak. Bae mifala i hangem wan wetwet smol tawel aotsaed long windo blong trak. Afta, bae mifala i putum i go long nek blong mifala blong mekem mifala i kolkol.
Bae mifala i stap glad tumas taem mifala i stap luk tempol. Mi no save tumas se wanem nao i stap hapen long ples ia, be papa mo mama blong mi, oltaem tufala i hapi taem tufala i kamaot long tempol. Mi bin save se tempol i impoten tumas. Mi bin save se hemia i haos blong Lod. (Long foto, mi ia nao mi werem waet sot.)
Taem mi kasem 12 yia, mi bin go mekem ol tempol baptaes long plante defren tempol. Afta, taem mi bin mitim fiuja hasban blong mi, mi bin faenem se hem i lavem tempol tu. Mitufala i mared insaed long Mantae Yuta Tempol.
Yu save rere from tempol evri dei. Go long tempol taem yu save mekem. Tajem ol wol blong hem. Taem Apuboe blong mi, Jarret, i bin gat 11 yia, hem i stap wok long famli histri blong hem evri Sandei wetem papa blong hem. Hem i bin faenem plante nem blong ol bubu blong hem. Naoia, hem i gat 12 yia; !hem i stap mekem ol baptaes insaed long tempol long bihaf blong ol bubu ia!
Taem yu stap insaed long tempol, yu save wokbaot long ples we Jisas i wokbaot long hem. Hem i haos blong Hem. Mi hop se bae yu prea evri dei blong Papa long Heven i helpem yu blong rere blong go insaed long tempol mo filim lav blong Hem.