Anggel blong mi i wan artis mo i stap mekem ol smol wud sip we hem i putum insaed long ol glas botel. Hemia i save tekem taem, tingting, mo had wok blong mekem olgeta samting ia.

Wan dei, mi bin luk evri tul blong hem mo luk olsem wanem hem i yusum wanwan tul blong mekem wan spesel samting, o mekem bot ia. Taem mi stap lukluk hem i wok, mi bin sapraes long olsem wanem nao hem i stap yusum ol tul ia blong mekem ol bot ia. Mi tingbaot stori blong Nifae we i bildim wan bot (luk long 1 Nifae 17–18). Hem i bin bildim bot ia i folem wei blong Lod, i no wei blong man. God i givim yumi ol tul blong yumi bildim ol bot blong yumiwan be long wei blong Hem. Ol skripja, fet, mo lav blong God oli ol tul we mi mas yusum long laef blong mi blong lukaotgud blong bildim bot blong miwan we bae i no gat hol long hem. Mi stap lanem evri dei blong stap olsem wan disaepol blong Lod.

Hem i long wan springtaem we ples i kolkol long Denmak. Mi jes statem fultaem misin blong mi, mo mi stap traehad wetem testemoni blong mi. Mi wan konvet blong 19 manis nomo, mo mi gat fulap tu tingting long saed blong fesem wan kantri we i defren, wan lanwis we mi no save toktok long hem, mo plante rod we mi no ting se mi save faenem rod blong mi long olgeta. Ol prea blong mi we fastaem mi stap talem tangkyu bigwan, naoia oli kam konkon mo stap poenem fingga: “God. ?From wanem yu lego mi, mi stap miwan?”

Wan moning, mi plis long Hem long prea. Be mi no askem “from wanem” wetem kros long hat blong mi, mi plis blong kasem wan witnes abaot trutok blong gospel mo blong hem i karemaot ol tu tingting blong mi.

Afta we mi prea, mi openem ol skripja blong mi. Mi foldaon long Dutronome 31:6: “Tingting blong yufala i mas strong, mo yufala i mas stanap strong oltaem. Bambae yufala i no mas fraet long olgeta. Hem i God blong yumi, mo hem i no save gowe long yufala samtaem. Bambae hem i no save lego yufala, oltaem bambae hem i stap wetem yufala.”

Hat blong mi i bin fulap long glad taem mi bin luksave ansa long prea blong mi: God i bin stap oltaem nomo. Hem i bin stap wet long wan tru prea, be i no blong mi poenem fingga long Hem se Hem i lego mi mi stap miwan.

God bambae i neva livim mi, iven taem evri samting we i stap i no gat hop long olgeta. Mo yumi save filim sansaen blong Hem tru long prea mo skripja blong Hem.